《瞬間看地球》Stranger's Blog

今日行程：

Day 01：ORIX租車(関西空港店) → 一蘭(泉大津店) → KAMO(神戶兵庫店) → Tokyu Hands(三宮店) → たあちゃん(骨付鳥) → 酒店(イーストパーク栗林)

今日會搭香港快運 1005 飛大阪嘅航班，香港快運加熱門嘅大阪線，我哋都有心理準備或會有啲唔順利嘅事發生......

為咗安全起見，我哋決定 0700 到機場~
噚日阿珊已經 online check-in 咗，今日打算晨早去寄埋行李，可以做嘅都做晒，餘下嘅，就交俾個天喇~

我哋五個人，四件行李，肯定唔可以上晒我部車，我哋希望可以上三個人(我屎塔同媽咪)及所有行李~
約咗飛珊 0530 喺佢哋樓下等，上一上行李先再評估~

行經佢哋樓下嘅機場巴士站，已經有十幾人排緊隊，呢個仲要係尾幾個站，真係有啲擔心佢哋上唔到車~
如果上唔晒行李，就啟動 PLAN B，上晒所有行李，媽咪上埋車，屎塔飛珊就搭機場巴士，冇行李的話，上車會易好多~

見到飛珊，上埋行李，都幾可以肯定，三人及所有行李可以上得晒，於是飛珊就去搭機場巴士，我哋就去媽咪樓下等佢~

去到機場 join 埋飛珊，就去寄行李，四個篋加埋共重 46 KG，我哋來回都買咗 60 KG，唔知回程夠唔夠用呢？

之後去咗翠華食早餐，食早餐時，阿飛俾咗張上網卡我哋，我哋從來都未用過呢啲上網卡，今次有新嘗試~

一切順利，冇 delay，非常好！

到咗関西空港，天氣好好，正！

今日第一站係「ORIX租車(関西空港店)」
經中介 book 車，喺冇指定公司情況底下 book 咗呢間~

入咗境之後，就去 ORIX 租車公司~
經中介 book 車，成日都怕去到租車公司會冇我哋 booking，不過喺唔同國家都試過幾次，次次都順利，今次都唔例外~

去日本玩，從來冇諗過喺大阪租車，咁陌生又繁忙嘅街道自駕，方便都可能變咗唔方便~
不過今次只係去一去泉大津再行高速直飛神戶，還可以吧~

今次五個人再加四件行李，所以租咗部中型七人車，Honda ~ Stepwgn，部車只係行咗二萬幾公里，幾新淨~

下一站係「一蘭(泉大津店)」
貪佢離機場不用半小時車程，方便快捷~

行經機場至市區嘅大橋，開始感受到大型私家車同普通私家車嘅分別，就係食風食到不得了，不過好彩部車都算幾好揸~

好快就到一蘭(泉大津店)~


泊好車，唔知點解部車鎖唔到，於是我就叫其他人入去一蘭先，阿飛就留喺度睇吓有咩幫到手~
研究咗一陣，最後係阿飛鎖到車，其實當時都唔知點解，不過鎖到車就唔理喇，入去食嘢先~
(後記：車越新就越麻煩，我終於都知點解成日鎖唔到車，原來我熄咗車先入 P 波，但喺熄車與入 P 波之間，螢幕會提示我未入 P 波，就算我再入返 P，螢幕都唔會自己熄，所以就鎖唔到車，之後每次入咗 P 波先熄車就好順利，一撳遙控就鎖到車~)

一蘭嚟講，大家都應該駕輕就熟，我同阿飛入到去，佢哋已經買好飛，可以埋位 lu~
全店都唔見有其他客人，包場！

一人一碗麵，食飽飽就繼續上路~


下一站係「KAMO(神戶兵庫店)」
一間大型嘅運動用品店，有成四層樓咁大~

離開一蘭，好快就上咗高速公路，一路係咁行，不經不覺就到咗神戶~
差唔多到達目的地時，阿飛都認得個環境，咁啱前面有部車落客頂住我哋，阿飛話不如順便喺度落埋，費事到咗舖頭開口唔方便落車~
阿飛真係想得周到，所以就即刻俾佢同阿珊落車~

下一站係「Tokyu Hands(三宮店)」
上次喺熊本去唔到，屎塔爭取呢次機會去行吓~

放低咗飛珊之後，就直駛去 Tokyu Hands 後方嘅時租停車場~
當我哋差唔多到嘅時候，身處窄街，前方係一個九十度嘅左彎位，我全神貫注咁望住左前方，深怕有對頭車駛來~
過咗呢個彎位，GPS 顯示已到達目的地，但係左望右望，都唔見我事前喺地圖度見嘅露天停車場，只有右方嘅立體停車場~
今次揸嘅呢部中型七人車，我知道係入唔到呢啲立體停車場嘅，而立體停車場嘅職員望住我作出手勢，表示車高問題不能停泊~

我選擇兜個圈行多一次返嚟，不過就會喺較早前嘅小路行相反方向睇睇~
返到嚟較早前嘅小路，行另一邊，仍然唔見有嗰個停車場，不過就見到有個神社嘅收費停車場喺身後~
我決定又兜個圈返嚟，泊呢個收費嘅停車場~

今次 GPS 帶我喺頭先嗰個立體停車場嗰邊入，即係同第一次相反方向咁入，就係因為咁，我終於搵到我一直諗住泊嗰個停車場喇！
咁點解之前會錯過咗呢？
先前提到「當我哋差唔多到嘅時候，身處窄街，前方係一個九十度嘅左彎位，我全神貫注咁望住左前方，深怕有對頭車駛來~」
就係因為我只顧左前方，就錯過咗呢個位於我右方轉角位嘅小型停車場，所以當我反方向入嚟嘅時候，就比較容易留意到佢嘅存在~


不過，就係因為咁樣來來回回，少咗好多時間俾屎塔行，對唔住呀！ >_<

泊好車，去部自助票機度研究吓，撳撳撳，有飛出喇，以為泊好啦，但係車底條鐵又冇升起喎~
跟住又研究咗一陣，但都冇咩頭緒，咁都冇計啦，無了期喺度磨都唔係辦法，返嚟再算~
之後媽咪又留意到，人哋啲車，塊鐵升起並且有盞紅燈，我哋呢，塊鐵冇升但著咗綠燈，但都冇咩辦法，唔理喇~


行到入 Tokyu Hands 上咗一層，諗諗吓都係唔得，俾人發現以為我泊霸王車咪死？
都係返落車睇住穩陣啲，反正我行唔行 Tokyu Hands 都冇所謂~

行到返落車，塊鐵已經升起咗，亦都著咗紅燈，咁就掂啦！
仲有半個鐘就要開車返去接返飛珊，仲上唔上返去好呢？
我部手機就冇得上網嘅，都唔知佢哋行到邊，但係唔上去喺到等又好戇居，都係上啦~

搜索咗幾層，終於到佢哋~
行到差唔多就一齊落返車，其實屎塔就未行夠嘅，不過冇計啦，唉~

返落車，按常理去撳部機，俾錢，鐵板下降，成功，走得~

返到去 KAMO 啱啱好係約好嘅 1830，阿飛又啱啱好喺 KAMO 行緊出嚟，咦，唔見阿珊嘅？
再望吓，原來佢喺遠處急步行緊返嚟，即係佢哋分開行啦~
全部人都咁準時，真係要俾個 LIKE 大家！

下一站係「たあちゃん」
香川縣有一種食品叫「骨付鳥」，即係帶骨雞髀，其實就咁聽，咪即係普通雞髀~
佢嘅製作方法係用高溫直烤而成，而たあちゃん，就係用高溫直烤足足 50 分鐘先上檯~
唔理佢係純噱頭定係真心機，都吸引咗我哋嚟試吓佢~

經過超過兩小時嘅車程，我哋終於嚟到たあちゃん~


一嚟到，即刻叫咗五隻骨付鳥先~
再叫其他嘢食住等~

喺叫嘢食嘅環節，就發現飛珊同我哋好唔同，佢哋係正常好多~
阿飛識少少日文，阿珊就靠手機 app 做翻譯~
我同屎塔自己去旅行呢，除咗招牌菜可能出發前已經知道，其他睇唔明就亂咁叫，嚟到係咩就食咩~

最後就由阿飛落單，佢識少少日文嘛，溝通上點都好啲嘅~

只有老闆一個人做嘢，非常忙碌，又要顧住啲骨付鳥，又要整我哋另外點嘅嘢，仲要執檯，超人一樣！

有嘢食喇~
雜菜炒麵~
好食！


炸腐皮~
又脆又好食！


雞腎~
夠晒香！


雞肉串同丸子(唔知咩肉 XDDD)
不錯~


食完上面呢啲已經飽咗一半~
至於骨付鳥，老闆真係好用心烤，係咪烤足 50 分鐘我哋冇計時，只係落完單(骨付鳥)之後，經過討論再叫啲咩，再落單，製作，食埋，先到骨付鳥上檯，中間都已經經過好一段時間了~

曾被網友稱為全世界最好食嘅雞髀，食之前總覺得誇張，食完呢？
嗯......咁講啦，雞髀就係雞髀，無論你點整，佢都係雞髀，唔會變咗龍蝦，而呢度嘅雞髀，又真係我自己食過最好食嘅~
皮脆肉嫩，味道甚佳，冇多餘脂肪，非常美味！


不過如果係有少少餓住嚟食，相信會更正！

食完晚餐，就揸車返酒店，完結今日行程~