《瞬間看地球》Stranger's Blog

今日行程：

Day 04：青島 → 今治(踩單車) → 酒店(道後やや飯店) → 道後麦酒館 → 道後商店街 → 道後溫泉本館 → 酒店(道後やや飯店)

今日第一站係「青島(貓島)」
住有超過一百隻貓嘅小島，絕對係貓多過人！

今次旅程嘅誕生，就係由青島開始嘅~
五位團員都係愛貓人士，所以青島係今次旅程最重要嘅景點！

要成功去到，首先係睇天氣，因為太大風的話，船係會停航，即係冇得去~
就算船冇停航，都要有位先得，因為隻船只有 30 個座位(不計船員)，名額實在係太少~

搭唔到頭班，咁第二班呢？
講講有咩班次先~
每日嘅班次如下：
長浜港 → 青島港
0800 → 0835
1430 → 1505
青島港 → 長浜港
0845 → 0920
1615 → 1650
註：島上沒有供遊客使用嘅宿泊設施，遊客必需要即日來回

睇完以上班次資料，唔難發現，搭頭班船入去，可以選擇搭 0845 或 1615 返出嚟~
基本上係唔會揀前者，但揀後者的話，逗留間有成 7 小時 40 分鐘，其實真係太多~

咁，搭第二班船又點呀？
咁就只有 1 小時 10 分鐘嘅遊玩時間~
山長水遠嚟到，只有一小時，真係驚唔多夠喉，況且，既然嚟到呢個小島，都會周圍行吓卦~

7 個幾鐘定 1 個鐘好呢？
其實，又唔到你揀，因為仲有一個原因，令你唔會揀搭第二班船~

先前提過，遊客係要即日來回，據說船公司係有計入去嘅遊客數量，確保回程嘅尾班船夠位載返啲遊客出嚟~
假設，頭班船 30 個名額都係遊客，而正路係冇人會搭 0845 船返出嚟，咁第二班入去嘅船，係唔會載遊客，否則回程唔夠位載晒咁多遊客出嚟~
咁，即係分分鐘搭唔到第二班船入去，講到尾，其實係冇得揀，實係搭 0800 入、1615 出......

今日 0800 呢班船，真係志在必得，我哋計劃好 0700 就到長浜港，相信都夠早了~
一直睇返嚟嘅資料，都話碼頭有位泊車，我喺 GOOGLE MAPS 搵到一處空地，可以泊好多部車，一廂情願以為嗰度就係可以免費泊車嘅地方~
點知去到，寫住係有料停車場，但附近又一個人都冇，幾錢又唔知，想俾錢就更加係冇人收~
就喺停車場隔籬，有間舖頭有貼住船航班嘅資料，但 0720 先開，咁直覺就覺得船飛同停車場錢都可以喺度搞掂~

阿飛諗住去火車站去個洗手間，佢返嚟時就話我哋知，有個地方有人排緊隊，因為有隻船喺隔籬，懷疑嗰度先係排隊買飛嘅地方~
咁我哋梗係即刻過去睇吓啦~
過到去睇，都幾肯定排呢度先係啱嘅~
再望吓附近，有個停車場寫住「定期船駐車場」，原來免費嘅停車喺呢度！
我即刻揸返部車過嚟泊~

我哋搭嘅就係呢隻船~


終於等到賣飛喇，不過船家同頭幾個人講咗一大堆嘢，當然係講日文，頭幾個人都係日本人~
佢哋聽完，冇即刻上船，亦冇離開嘅意思，只係同朋友互望，又傾咗一陣咁~
究竟做乜呢？
等咗一陣，頭幾個就開始上船，之後嗰啲，同樣係同船家傾咗一陣，又考慮咗幾秒先上船~
終於輪到我哋，預期中嘅言語不通，佢指住船期班次，又講咗一輪~
我哋估到佢想講有一班船唔開，但經過來來回回都搞唔清究竟係邊班船唔開~
唔理喇，你俾得我哋上船，留幾耐都好，照上！

當然，我哋自己喺船上面各有推測，初時好難相信係取消 1615 班船，全部人要搭返 0845 班船出嚟~
因為冇人打退堂鼓，全部人都接受只係逗留十分鐘？(從成個上船過程，估計多數都係遊客~)

不過當我哋睇埋船上面，電視播放嘅天氣資料，而家風速係一級，但下午四時嘅風速係九級......
再唔願相信，都知道下午班船會取消，我哋只可以逗留十分鐘......
唯有安慰自己，起碼好過歐錦棠，佢嚟到碼頭，天氣好好，但海面大風，航班停駛，連島都冇得去......

開船之前，見到有個日本人同個外籍人士交談，我哋係聽唔到佢哋用咩語言，不過我哋覺得個外籍人士可能知道咩情況~
到咗青島之後，阿飛走去問個外籍人士，得到嘅回覆係：I think 10 mins
唉，接受現實吧~

跟住我哋就拆開啲貓糧，啲貓就開始過嚟聚集，我仲分咗啲俾個外籍人士同兩位小妹妹~

大約 20 分鐘後，船家響號，示意所有人要上返船返出去喇，就係咁，完結咗青島嘅旅程......


眼前全部都係貓，如果可以留耐啲，一定好開心！

咁早回程，有咩好做呢？
我哋喺回程嘅船上面已經定好行程~

飛珊決定去行街，我哋三個就去今治踩單車~

下一站係「今治(踩單車)」
由今治←→尾道，全長約 70 公里，係日本唯一一條可以踩單車橫越瀨戶內海嘅路線~

我哋喺愛媛縣，當然係由今治開始踩~
而我哋當然冇諗過亦冇時間同能力踩畢全程，我只係諗住踩上來島大橋，過咗對岸就折返交車~

去踩單車之前，就送飛珊返松山市中心先，我目標係送佢哋去一個大型嘅商場，不過又費時嗰度唔方便上落，就喺附近嘅 Starbucks 放低佢哋~

放低咗佢哋之後，就直驅往今治租單車嘅地方~
差唔多到嘅時候，我發現 GPS 帶我哋上咗一條好大嘅橋，一條咁宏偉嘅橋，喺呢頭嚟講，沒有其他，肯定係來島大橋！
點解會咁？租單車嘅地方係喺橋嘅下方，計劃中係我哋踩上嚟，而唔係揸車行過......
不過到發現時已經太遲，沒有回頭路，只好直駛，過咗對岸喺第一個出口離開~

離開後落返地面，我停埋一邊再研究吓個 GPS~
再跟住佢行，係會帶我哋上返橋，咁就奇嘞，如果你話個定位錯咗，設定咗喺對岸，所以就帶我哋過嚟，咁都仲有得解釋~
但佢而家係帶我哋過對岸再經來島大橋返轉頭，除非你話俾我知，個目的地，唔上橋再返轉頭係冇路去，但，有咁嘅可能咩？
點都好啦，經條橋過返嚟今治就肯定要咖啦，咪跟住佢個指示，睇吓佢帶我哋去邊~

上返橋向住今治方向行駛，行行吓佢話已經到咗目的地......
我明喇，嗰段橋面同租單車嘅地方非常相近，個定位認錯咗，以為係橋面，所以就搞成咁！
用咗咁多次 MAPCODE，今次係最嚴重嘅錯誤，但其實出錯機率係低，我仍然相信 MAPCODE 嘅~

今次 MAPCODE 冇用，唯有用電話，不過屎塔話唔駛，佢用手機上面嘅 MAP 帶我去~
差唔多到嘅時候，雖然都有行錯咗少少路，不過最終都去到~

呢度就係租單車嘅地方，陣間就踩上去後方嘅來島大橋~


嚟到呢度，有一個意外收穫，現場有幾十棵滿開嘅櫻花！
明明呢個時候唔係花期，原來眼前嘅係河津櫻，河津櫻係會早啲開同花期會長一點(現場有牌係咁講)
咁，踩單車之前，梗係賞吓櫻先啦~

有人喺度影婚紗相~


來島大橋~


我哋仲喺櫻花樹下野餐~
(其實係食埋本來準備好喺青島食嘅人糧~)

賞完櫻就去租單車~

我哋租咗兩部普通單車，一部電動單車~
多年冇踩過單車嘅我，試車時真心覺得奶嘢......
不過踩單車嘅嘢，學識咗就係學識咗，只係差少少信心而已，踩多兩嘢其實都可以嘅~

部電動單車，佢兩個試完都話唔鍾意，而我就覺得幾好，咁就好嘞，各取所需~
初時我以為係電動單車，睇真啲，其實係電動「附助」單車~
起步時係好明顯有額外嘅動力加速，非常輕鬆，上斜尤其明顯，幾爽，哈哈~

成個踩單車嘅過程冇乜特別，我本來最擔心嘅屎塔就冇出過咩事，而媽咪呢......
試過一兩次撞咗埋欄，留咗少少血......
過程都算順利嘅~

踩過咗條來島大橋，我本來諗住落返地面沿岸行吓，不過我見大家(不包括我，我有電動附助嘛)都踩得有少少辛苦，都係唔落地面，否則回程上斜真係踩死人~
就係咁，踩返回程再還車，完成咗呢項壯舉~

下一站係「酒店(道後やや飯店)」
之後嘅活動都喺酒店附近，所以就去酒店泊好車 check-in 埋先~

去酒店前，先去接返飛珊先~
今日朝喺 Starbucks 放低佢哋，但我忘了記低位置，淨係知喺嗰個大型商場附近嘅 Starbucks~
我可以去到個商場，但就去唔返今朝嗰間 Starbucks~
幸好，屎塔喺嗰刻(放低飛珊時)去過洗手間，落車時見到有間學校，佢嘗試喺地圖度搵返間學校，咁就可以去返間 Starbucks~
當然最後都成功去得到，多謝屎塔~

去到酒店，除咗 check-in，仲買埋「道後溫泉本館」神の湯 2 階嘅門票，因為喺度買有優惠~
神の湯 2 階，除咗可以浸溫泉，仲有休息嘅地方，附有一杯茶及一塊餅乾~

我哋換晒浴袍先行出去道後溫泉本館一帶，不過著嗰對木屐真係好辛苦，人字嗰個位，每一步都好似想劏開隻腳咁，好痛苦，行落斜路直頭好似已經劏開咗咁款......

下一站係「道後麦酒館」
呢間酒館，佢有幾款啤酒係攞過獎嘅，知道媽咪同阿飛都飲啤酒嘅，所以嚟試吓~


食物方面，都係居酒屋嗰種食物，冇邊一款係特別出色，不過全部都幾好食，非常不錯的~
(啲相又 out 晒 focus)

至於啤酒方面，媽咪同阿飛俾嘅評價唔算太好......

下一站係「道後商店街」
呢條街唔係好長，亦都好普通，只係嚟得道後溫泉本館，冇理由唔順道到商店街行吓~

商店街對我嚟講，一向都係冇期望冇失望~

下一站係「道後溫泉本館」
道後溫泉本身，據說有三千多年歷史，而呢座道後溫泉本館，則有百多年歷史~

呢座道後溫泉本館真係古色古鄉，好有歷史嘅味道，亦很優雅~


我哋買咗嘅飛係包埋休息嘅地方，我同屎塔唔浸，留喺休息嘅地方，其他人就各自去浸~

休息嘅地方對出有個露台，有少少向下斜，感覺有啲危險~


等到佢哋都浸完返嚟，工作人員就為每一個人奉上一杯茶同一塊餅乾~

成個過程限時一小時，基本上係幾充足的~

浸過溫泉嘅成員，都話只係一個好普通嘅溫泉，不過大家都明白，溫泉就係溫泉，入面唔會有座遊樂場嘅~

浸完溫泉，就著住對刑具般嘅木屐痛苦地步行返酒店，完結今日行程~