2016.03.06 愛媛、德島 (日本第五天)－《瞬間看地球》Stranger's Blog

今日行程：

Day 05：道後溫泉本館 → 乘搭少爺列車 → 松山城 → 五志喜 → 毛巾美術館 → ししくい海女料理 → 酒店(鳴門海月)

今日出發去玩之前，喺酒店食個靚早餐先~
據屎塔所講，呢間酒店其中一樣主打，就係佢嘅早餐~
食品種類夠多樣化，質素亦非常不錯！

自助鮮榨橙汁~

今日第一站係「道後溫泉本館」
係呀，又係道後溫泉本館，唔係又浸溫泉，只係想喺朝早嚟欣賞吓~

下一站係「乘搭少爺列車」
外表係蒸汽火車，實質係柴油推動嘅觀光列車，幾有味道，就搭吓佢~

本來諗住搭 0949 嘅車，不過去到買飛時已經滿咗，所以就改搭 1017 嗰班，就係因為咁，可以睇吓火車站附近嗰個機關鐘表演~
原本冇諗住睇，因為呢類咁嘅表演，真係睇得太多，亦冇邊一個覺得值得睇，講白啲，我覺得幾無聊......

機關鐘表演~

少爺列車~

下一站係「松山城」
四國內比較有名嘅古城~

時間差唔多，佢哋四個就去搭少爺列車，之後行去松山城，而我就將佢哋今朝買嘅嘢全部拎上部車度，我自己揸車落去松山城停車場，再喺松山城售票處匯合~
喺我揸車落去嘅途中，遇到佢哋，不過佢哋見我唔到~

我到咗停車場之後，發現得返一個大嘅私家車位，真係好彩！
泊好車就行過去松山城售票處，不過就唔見佢哋，咁我就走去買飛先~

買好飛，等咗成二十分鐘，仲未見佢哋......
於是我就打電話俾佢哋，但又冇人聽，咁冇計，唯有繼續等......
最後佢哋都有出現，原來佢哋一路行嚟一路入啲舖頭睇嘢，飛珊仲走去試埋盔甲~
等吓冇所謂，最緊要冇咩事發生~

問返佢哋嗰趟火車如何，佢哋只係話好逼，好似沙甸魚咁......

登上松山城，可以坐纜車，可以坐個人吊車，我哋就全部都係坐個人吊車上~

途中仲有櫻花睇~

松山城，同其他城一樣，有公園，有唔同嘅建築，當然包括天守閣，不過我哋唔打算行晒，只集中行天守閣~
飛珊話，佢哋去過咁多次呢啲古城，都冇入過天守閣，其實我哋都唔係好有興趣入，不過同媽咪嚟，就一齊行吓囉~

唔知係一時貪玩定認真成咁呢？
(註：又唔係全部係咁喎......)

回程時，媽咪話想搭纜車落，屎塔就陪媽咪搭，我哋三個就坐返個人吊車落~

去攞車時，遲咗幾分鐘，不過佢冇計我多一個鐘，真好！

下一站係「五志喜」
一間喺愛媛縣很有名，食五色麵嘅食店~

睇 MENU，都係以貎取食，叫咗幾個餐~
不過佢啲 MENU 其實唔係好清楚，連最主打嘅五色麵，嗰幾個餐有冇都唔係好肯定，只係估佢有，因為其他餐更加唔似有......

食物嚟喇，睇睇個麵先，嗯......點解好似得一隻色咁嘅，夾起嚟睇吓，原來都有其他顏色，不過我就睇唔到有五隻色~
麵質就好似一般嘅蕎麥麵，係幾好食，但就唔覺得呢種五色麵比起蕎麥麵有咩特別之處~
至於其他食物，又係幾好食，不過冇話好特別咁囉~

下一站係「毛巾美術館」
一間幾特別嘅美術館，由毛巾如何編織而成，到用毛巾製成嘅場景、公仔、畫~

入美術館之前，行經賣小朋友衫嘅地方，一款衫有好多唔同嘅顏色，全部排晒出嚟，幾得意！

美術館入口前~

入咗美術館，係一部又一部嘅大型編織機器~

跟住就係姆明嘅畫廊同布偶~

再嚟就係由毛巾製成嘅畫~

我自己就比較喜歡呢個角落~

美術館外環境不錯，不過由於落緊雨，都係唔出去行嘞~

下一站係「ししくい海女料理」
一間燒新鮮海鮮嘅料理食店，非常期待！

由呢度去ししくい海女料理，差唔多成三個鐘頭車，所以我喺中途停一停休息站，等大家可以去個洗手間先再上路~

嚟到休息站，除咗去洗手間，當然唔少得行吓，睇吓有冇嘢啱買啦~
傾開偈先發現，原來飛珊同媽咪都唔知有呢啲休息站嘅存在，咁就好嘞，無意中帶埋佢哋嚟行吓~

去到ししくい海女料理，由於我哋訂咗檯嘅，佢哋見到我哋嚟到，基本上感覺係等緊我哋嚟咁，佢哋笑容滿面，態度就同喺味劇場ちか一樣，令人感覺非常舒服~

食物種類其實唔係太多，主要係有幾款套餐，同埋餐入面嘅食物可以散叫咁~
我哋叫咗兩份最多嘢食嘅餐，另外再叫咗兩個餐，再散叫咗其他嘢食~

由於全部嘢都係生嘅，所以呢頭叫完，嗰頭就上檯~
咁新鮮嘅食材，如果由我哋呢啲唔識控制火喉嘅人去燒，真係可能嘥料~
幸好，係職員燒俾我哋食，唔單止佢燒，佢仲分埋俾我哋，佢盡量做到平均分配，不過梗有分唔到嘅時候，咁佢就會問我哋點樣分~
服務真係一流！

食物方面，刺身只有龍蝦、鮑魚、蝦，其他全部都係即場燒熟嚟食，包括龍蝦、鮑魚、蝦都另外有燒熟嚟食~

刺身龍蝦上檯嘅時候，啲抓係仲郁緊嘅，人類呢，就會將此解釋為神經細胞嘅自然反應，無意識嘅，更重要係無痛楚，係咪事實呢，我只係保持住寧願相信嘅態度~
其中有一隻直情好似仲生咁爬住行，我哋即刻話俾職員知，佢衝過嚟接住快要掉落地面嘅龍蝦~
如果真係跌咗落地下，啲刺身應該會散落一地~
再一次說服自己，只係神經細胞嘅自然反應，無意識，無痛楚，無意識，無痛楚，無意識，無痛楚......

刺身蝦，食完個身，啲頭頭尾尾一般都當廢物，點知個職員放埋上去個爐度燒，但係燒完都唔認得邊個頭邊條尾之前係邊個食過......

不論刺身定熟食，真係無話可說，鮮！甜！正！
真係食到飽一飽都仲想食，冇得頂呀！