《瞬間看地球》Stranger's Blog

今日行程：

Day 06：鳴門公園展望台 → 大鳴門橋架橋記念館エディ → 渦之道 → 乘搭うずしお汽船 → かっぱ寿司(泉大津店) → ORIX還車(関西空港店)

今日一起身，就望到外面超大霧，係大霧到咩都睇唔到~
落到大堂，向海嗰邊嘅落地玻璃，白茫茫一片，又係咩都睇唔到~
仲諗住今日可以去酒店隔離嘅「千畳敷展望台」睇吓景，唔去啦，展望台就喺酒店隔離，睇到嘅嘢係一樣，行過去冇意思~


今日第一站係「鳴門公園展望台」
可以飽覽鳴門大橋一帶嘅風景~
上呢個展望台，要搭一條好長嘅扶手電梯，係號稱全日本最長！

本來呢，我見咁嘅天氣，上去都應該冇咩睇，不過經過商討後，團友話一場嚟到，都照上去睇吓咁話~
去到之後，仲有半個鐘先開門，同我做嘅功課有啲出入，又冇理由齋等咁嘥時間，所以就行去大橋上面嘅行人天橋過對面行吓~


上到行人天橋，睇到大橋上一架架車喺濃霧中突然出現，哈，有趣！

下一站係「大鳴門橋架橋記念館エディ」
過咗橋之後，就到咗「大鳴門橋架橋記念館エディ」，大家見冇嘢做，就入去行吓~

呢間記念館講嘅，當然都係同鳴門大橋有關嘅嘢，條橋嘅建築過程呀，大輪船呀，漩渦呀咁囉，冇乜特別~

大橋鋼纜其中一部份~


行完記念館，基本上都冇時間返轉頭上鳴門公園展望台，算吧，反正應該乜都睇唔到~

下一站係「渦之道」
渦之道係鳴門大橋下層，供遊人行出海面嘅上空去觀賞漩渦的~

漩渦喺唔同時間有唔同大小，一般會分小潮、中潮、大潮~
而呢度嘅漩渦，係世上最大嘅漩渦之一，撞正大潮，又夠運氣的話，就有機會睇到直徑有成 20 米咁大嘅漩渦，相信非常壯觀！

而今年嘅第一個大潮，就係今日早上十一時正，喺呢個時間嘅前後 90 分鐘都係大潮，即有總共三小時嘅大潮~
我計劃好喺大潮開始時先嚟渦之道，之後再坐船，同漩渦嚟個埋身肉搏~

咁大霧，會唔會又係咩都睇唔到呢~

一路行出去海面，只係見到少少又細又一瞬即逝嘅漩渦~
行到差唔多盡頭，開始有啲大啲，似返真正螺旋狀嘅漩渦，不過都係維持唔耐~
我哋周圍行周圍睇，始終睇唔到比較大嘅漩渦~
睇嚟今日都冇咩運，撞正大潮都冇咩睇，失望~

下一站係「乘搭うずしお汽船」
搭呢啲船，可以以超近距離觀賞漩渦~
但前提係要有漩渦......

我哋預約咗坐 1030 嗰班船，十點多少少就到咗船公司~
到咗櫃檯，說明來意，佢就叫我哋等一陣~

其實喺渦之道睇唔到有可觀嘅漩渦，我好懷疑出海係咪都一樣，不過一場嚟到，實會出去睇吓嘅~
除咗呢樣隱憂，其實仲有一樣，就係天氣~
今朝咁大霧，相信都唔會出到海，不過嚟到呢刻，霧已經散咗少少，但係咪適合出海呢？


我哋一路等，等到 1020 都未有咩動靜，我就走去問吓佢~
原來佢哋觀察緊啲霧嘅情況，基本上 1030 呢班船都應該會取消......

咁我哋只好等下一班船， 1100 呢班，不過由於今日晏啲要喺関西機場搭飛機返香港，時間上一定要預好啲，唔能夠太緊~
所以，如果成功出海，就未必會去計劃中想去嘅「かっぱ寿司」食晏，可能直接喺機場食算~

最後，連 1100 呢班船都取消埋......唉~

經過討論，我哋決定上機前唔食嘢都等多一班船！

等等等等，等到 1120，職員話 1130 呢班都取消，唉，冇計喇，唔可能再等多班，否則路上有任何阻滯，都可能令我哋趕唔到飛機~
幾條友拖住沉重嘅腳步走去部車度準備離開~

上到車，坐好晒，入咗 MAPCODE 入埋波，手掣都放埋，準備放迫力之際，媽咪話好似未影團體相，跟住大家都猶豫咗一陣，就係咁，就唔開車住~
就喺決定唔開車住嘅呢一刻，船公司嘅職員走出嚟，係跑出嚟，一路向住我哋跑，一路揮手，走到司機位，佢同我哋講 1130 嗰班船會開~
嘩，成車人即刻歡呼，一秒後已經衝晒落車！

世事真係好奇妙，開車前其實有兩樣嘢延遲咗開車時間~
其中一樣當然係媽咪話要影團體相，其實佢喺呢次旅程都冇提出過要影團體相，就係今次唔知點解會提出~
如果媽咪冇提出，我就早咗幾秒開車，真係只差唔多過五秒，即係我已經扭出咗行車路，職員跑出嚟我都未必留意到~
另一樣就係，因為陣間程車都有成兩個幾鐘，大家都排隊去埋洗手間先起程~
就係呢兩樣嘢，令到我哋無啦啦又可以搭到船出海！

睇嚟呢次應該冇問題，因為佢即時安排埋收錢，照計日本人做嘢好謹慎，收得你錢應該好有信心~
而且我哋目測海面能見度真係好咗好多~

十幾人上咗船，一路等，都等咗三四個字，有啲唔對路......
跟住之前向我哋揮手嗰位小姐走埋嚟，講咗一堆嘢，再九十度鞠躬，所有人都露出失望嘅表情，但又冇人有離開嘅意思~
過咗幾秒，開始有人走，係全部人跟住走，其實都明啦，即係都係取消......
事實上，呢刻望返出海面，能見度比起上船一刻真係差咗好多，咁真係冇計，點謹慎都好，又點敵得過變幻莫測嘅天氣吖~

返到櫃檯退款，佢仲送咗少少糖果俾我哋，同埋不停講唔好意思~

返到上車，大家都希望佢再次追出嚟，不過其實除非即刻開船，否則我哋都趕唔切~
其實就算即刻開船，玩完揸車去関西機場，還埋車，時間上係啱啱好，當中有任何唔順利嘅情況都好有機會趕唔切上機~
到開車都冇人再追出嚟喇，死心了~

下一站係「かっぱ寿司(泉大津店)」
之前喺京都食過，覺得平靚正，所以今次再嚟呢間食~

其實離開汽船公司時，都怕去呢間嘢食埋先過機場會有啲趕，點知入咗 MAPCODE 之後，佢顯示所需時間只係兩個鐘多少少，比我之前上網睇嘅少，唔理喇，行住先，邊行邊評估~

未到大阪時，交通尚算暢順，不過入咗大阪範圍，開始多車，而且仲有好多貨車，佢哋又揸得快，係呢度算係有少少阻滯~
不過最後到達かっぱ寿司嘅時間都唔算太遲，覺得都可以食埋先去機場~

今次食呢間就覺得質素冇京都嗰間咁好，不過都可以嘅~

食完嘢入埋油就去 ORIX 還車，俾埋啲過路費就走得~

CHECK-IN 時發現行李超重，要補錢，好彩唔係補好多，所以照俾就算，費事煩~
原來呢度五個人，都係第一次行李超重要補錢，哈~