2019.10.31 常滑、白川鄉 (日本第一天)－《瞬間看地球》Stranger's Blog

今日行程：
Budget Rent a Car (租車) → とこなめ招き猫通り及とこにゃん (招財貓「常喵」) → 川島 SA (晚餐) → Guesthouse AntHut (住宿)

入境日本後，出奇地冇乜人，平時去襯日本都排長龍入境~

今日第一站「Budget Rent a Car (租車)」

喺機場搵租車公司嘅櫃檯，根據指示，都唔算太易咁搵到豐田，但由於同豐田有段距離，見唔到其他租車公司~
咁我哋就繼續向豐田行過去，越近就越見到其他租車公司，咁就掂啦，相信幾間租車公司都係喺晒度~

行到過去，好以都有四間租車公司，不過來回望過幾次，都唔見 Budget Rent a Car~
見到其中一間租車公司間口有位女士抹緊玻璃，厚面皮咁走過去問吓~
佢話我知 Budget Rent a Car 唔喺呢度，要搭車去~

我即刻醒晒！頂！係喎！Budget Rent a Car 喺常滑市喎，唔喺機場！
都話今次計劃行程好求其咖啦~
我又諗吓，點解我會搵間唔喺機場嘅呢？咁好正路係因為貪平~
咁，點解我冇睇過點去租車公司呢？
我又再諗起，我個概念一直當佢係機場店，機場會有櫃檯，搞完手續會有車車過我去......
再有一啲記憶嘅碎片浮現，我租車時好似 uncheck 咗「接送」.......
成個錯誤嘅過程出晒嚟！唉，一落地就錯得咁離譜，都唔知之後仲有咩錯事等緊我......

睇返地圖，距離鐵路站有成十分鐘步程，拖住個篋就真係唔多想行咁遠~
但係都冇計啦，一係搭的士，一係搭鐵路再行路，最後揀咗後者~

到咗常滑，行緊去租車公司途中，又諗到啲嘢~
其實點解我唔安排攞車前去とこなめ招き猫通り呢？
不過呢刻都行咗一半，唔會行返轉頭啦~
睇吓陣間可唔可以寄存個篋喺租車公司再行過去~

Budget Rent a Car

到咗租車公司，同佢講我哋想去一去とこなめ招き猫通り先，轉頭再返嚟，問佢可唔可以放低個篋一陣~
不過溝通有少少困難，佢哋唔係好明我哋講咩，本來都諗住放棄，但佢同手機翻譯 app 問我哋係咪想寄存行李~
我哋話係，但佢話唔可以，咁唔可以就算啦，但其實佢會唔會誤會咗我哋想寄存十二日......
不過都唔再問喇，無謂俾麻煩人哋~
再講，呢間租車公司都幾細間，唔俾寄存都合理~
其實揸過去都唔係咩大問題，只係費事搵位泊車啫~

係喎，我又唔駛揸車進出機場，咁，之前預留咗嘅 AIP 其實咪冇用？
問吓佢可唔可以取消先，唔可以都冇計，鬼叫自己十吓十吓咁~
問完對方話可以，咁又慳返啲~

租車過程順利，可以出發了~

下一站「とこなめ招き猫通り及とこにゃん (招財貓「常喵」)」

とこなめ招き猫通り

とこにゃん (招財貓「常喵」)

回程返去攞車時，咦？點解好似有啲肚餓咁嘅？
正常唔會呢啲時間肚餓咖喎~
梗係啦，我哋搭廉航嚟日本，邊有食過嘢啫，頭先喺機上面淨係瞓瞓瞓......
計劃行程時唔記得咗呢樣嘢~
我出發前都同屎塔講，今次行程係求其計劃，預咗路線唔順路又錯漏百出~
只係估唔到連午餐都冇安排......
不過又唔係話真係好肚餓，或者陣間經過高速公路啲休息站食啲嘢啦~

餘下時間就一直揸車上白川鄉區域，由上面「$」形咁玩返落嚟~

下一站「川島 SA (晚餐)」

一路行一路行，又唔係話好肚餓，索性行到大約六點前後先食嘢，當晚餐~

就係咁，途中見到有個休息站，就入咗去，呢度係川島 SA~
呢度有個摩天輪，又有樂園，唔係一般休息站咁簡單~