2019.11.01 白川鄉、菅沼、相倉、砺波、高山 (日本第二天)－《瞬間看地球》Stranger's Blog

今日行程：
荻町城跡展望台 → 白川鄉散策 → いろり (午餐) → 天守閣展望台 / 荻町城跡展望台 → 菅沼合掌造り集落 → 相倉合掌造り集落 → 礪波平原散居村展望廣場 / 礪波平原散居村展望台 → Sora-AMA Hostel (住宿)

旅館門前風景~

今日第一站「荻町城跡展望台」

沿途風景~

上到荻町城跡展望台，俾舊大雲遮住啲大陽，冇乜陽光~
白川鄉，的確係一個幾童話感覺嘅地方，加上有少少紅葉，風景係幾唔錯~
但就有少少睇相靚過現場嘅感覺，可能好多人都好識影相~

紅葉唔算太多，例年紅葉都係呢啲時候見頃，唔通今年遲咗？

我哋決定晏啲有太陽時再上過嚟，所以就唔刻意走去「天守閣展望台」嘞~

下一站「白川鄉散策」

沿途風景~

停車場及であい橋一帶~

過咗橋之後，趁早仲未係咁多人，行去三間小屋先~

沿途風景~

傳說中嘅三間小屋~
其實我哋就沒有覺得很特別，不過嚟白川鄉又冇理由唔過嚟朝聖一下~

跟住就真正散策嘞~
途經一個地方，都幾靚~

途經一間賣紀念品嘅商店，屎塔走咗入去~
原來，有人唔記得帶襪嚟，要即刻入貨~

白川八幡神社~

明善寺~

喺明善寺呢度，突然聽到有人用大聲公講嘢~
現場都有啲人，本身都絕對唔係靜，但用大聲公就真係有啲騷擾~

講開多唔多人，紅葉季嚟講又真係比想像中少人，唔知點解~

庫裡郷土館~

個池好清，條魚個影好清楚咁見到喺池底~

長瀬家~

神田家~

和田家~
我哋有入和田家參觀，上面兩間就冇~

入嚟主要都係想睇結構~

二樓向外望~

遊覽完和田家，本來想上觀景台，但呢刻觀景台好多人，都係食完嘢先再上去~

下一站「いろり (午餐)」
試吓鄉土料理~

朴葉味噌定食~
成碟嘢好普通，朴葉味噌又好，條魚又好，都係好普通~

山菜丼~
啲山菜又幾好食，加上滑蛋，好味道~

飛騨牛コロッケ~
飛驒牛可樂餅都係好普通，賣 210 円，唔會期望有幾多飛驒牛，不過真係好普通~

下一站「天守閣展望台 / 荻町城跡展望台」

行上展望台唔係好遠~

上到今朝冇去嘅「天守閣展望台」，原來呢度視野比「荻町城跡展望台」好~
今朝就冇太陽，而家就猛得滯，仲要有啲面向佢......
所以影相定現場欣賞都好，其實都唔理想~

天守閣展望台呢邊仲有專人幫手影相，識多國語言，每國識少少咁，我覺得好有誠意~
佢哋似係官方嘅，會有人接更，可能現場實在太曬~
佢哋影嘅，可以俾錢買，仲會話「買唔買冇問題」~
如果你有興趣，佢仲可以用你嘅攝影器材(包括手機)幫你影，免費的~

之後行去荻町城跡展望台都冇乜影相，條件太差~

經大路行返去停車場~
有太陽時嘅であい橋及停車場一帶，當然比今朝靚~

白川鄉隨影~

下一站「菅沼合掌造り集落」

行車途中，擋風玻璃出現幾點小水點~
一時間都唔確定係雨水還是前車清洗擋風玻璃嘅水點~
一路行，水點數量並沒有增加，睇嚟應該係後者~

不過好快就知道事情並非這樣......
因為真係落雨了，雖則只係微雨，但離開白川鄉時咁好天，真係冇預期會落雨~

到咗菅沼合掌造り集落，再唔係微雨，雨勢開始有點大，唔著雨褸都最少要擔遮~

呢度有個地方叫「展望広場」，以為會有咩睇啦，但其實係乜都冇，純粹係一個普通廣場~

想有個好啲嘅視角，就要沿住車行方向向前行大約 100 米~

回程行返去停車場~

返到停車場就停咗雨，好！

想落去集落的話，可以步行，亦可以搭 lift~
係，呢度竟然有 lift 落去，有點意外，所以我哋選擇咗搭 lift~

出咗 lift 係咁嘅樣，成個防空洞咁~

轉左係去青少年旅行村，轉右就去集落嗰邊~

中途見到有度閘，閘入面有啲空間，越嚟越覺得呢度似防空洞~

行到盡頭就喺呢度出嚟~

沿住步道行落去就到集落~

呢度環境幾好，加上非常寧靜，幾舒服~

呢度好細，好快就行完~

睇睇時間，有啲尷尬~
今日餘下嘅行程只剩「相倉合掌造り集落」，我十分相信相倉嗰邊都用唔到幾多時間~
咁，今日行程咁早完成，有咩做呢？附近係完全冇地方可去~
一係就有個遠少少嘅，但又好似唔多夠時間~
所以我哋決定，行埋青少年旅行村嗰邊，陣間相倉嗰邊又慢慢行~

行到過青少年旅行村嗰邊，原來冇咩行，咁唯有過相倉先~

回程時見到呢樣嘢，可能曾經係用嚟運載物資~

下一站「相倉合掌造り集落」

有條小路可以上觀景位置，上咗去先~

中層位置~

觀景台~

相倉呢度個景就爭啲，不過就一樣咁寧靜~

而家係 16:00，相倉集落嗰度相信一陣就可以行完~
我睇睇 maps.me，如果去「礪波平原散居村展望廣場」，16:30 就可以到~
經過商議，決定唔行集落，反正都係嗰啲嘢，立刻動身去礪波平原散居村展望廣場~

下一站「礪波平原散居村展望廣場 / 礪波平原散居村展望台」

maps.me 嘅預測到達時間，一路行一路延遲，我突然諗起一樣嘢......
我喺相倉度睇過 maps.me 話 16:30 可到目的地，其實以呢兩日嘅經驗，我係知道 maps.me 啲時間唔準，點解我仲會毫不猶豫咁信佢？
我都唔知點解，嗰刻睇完乜都冇諗~
可能呢排真係心緒不靈，集中唔到精神~
如果嗰刻夠清醒，我絕對唔會過嚟~

嚟到「礪波平原散居村展望廣場」已經係 17:00，個天都暗晒，加上厚雲，其實係咩都睇唔到~

不遠處仲有個「礪波平原散居村展望台」，再過去睇吓~

展望台呢邊比展望廣場個視野好啲~

之後就過高山嘅 Sora-AMA Hostel (住宿)~

maps.me 時間錯啫，導航方面又冇乜問題，所以我就繼續用，只要唔理個時間就得~

Set 好 GPS，睇返啲資料，兩地相距 96 公里路程，但就話需時 1hr4mins~
計計數，即係平均時速 90km/h~
唔怪得佢啲時間計錯晒，呢個速度根本係冇可能~
我而家喺山區呀，單線雙程嗰啲路，時速 30km/h 都已經好危險啦！

一路跟住導航行咗好耐，全程山路，覺得奇怪，唔應該係咁~
正常應該帶我盡快離開山路，上高速去高山市~
諗吓諗吓，我知點解喇！
計錯時間，只係表面，實際錯嘅嘢，遠遠比單純計錯時間大鑊！

以而家呢程車做例子：
山路：『96 KM』『1hr4mins』

高速：『100 KM』『1hr13mins』

就以上資料，maps.me 計嘅距離，山路最短；計時間，山路最快，所以佢一定點你行山路~
但其實行山路所需時間，分分鐘要三個鐘，甚至更多！
因為山路大部分係單線雙程路，真係每隻彎都要收得好慢，睇清楚有冇車嚟先可以行，平均時速一定冇 30KM/h~

我停埋一邊，睇吓用車嘅導航會有咩建議~
得兩條路：
1. 繼續行山路，行埋餘下嘅 50 公里
2. 掉頭行，帶我上高速，但要行 155 公里

Google maps 呢？呢度冇網絡，上唔到 google maps......

咁我哋將個焦點放返落車個導航度~
喺選擇 1 定 2 之前，其實仲有個重要問題，就係邊條路可以趕得切 21:00 前到旅館 check-in！
選擇 1，車導航話 21:30 到
選擇 2，車導航話 22:30 到

即係點都趕唔切，而車導航可信性高，無論距離定時間，都冇可能唔揀選擇 1，即係繼續行山路~
不過揀行山路其實係冒險過行高速......
山路冇街燈，而家天已經全黑，我行咗咁耐，一架車都冇遇過，即係話，成個山頭(山路計)可能得我哋兩個喺度行緊車~
喺全黑嘅深山行駛，絕對係一件非常危險嘅事，但，掉返轉頭行 155 公里，我又真係唔係好想......
其實喺日本就相對安全嘅，喺第二度就唔敢講喇~
最後我哋都係揀行山路，繼續行埋佢~

屎塔就聯絡旅館，睇吓可以點處理~
對方話可以喺電話 check-in 咗先，但要喺 messager 俾晒所需資料佢先~

再行多唔知幾多公里，真正嘅問題先出現，條山路封咗！
連車導航都唔知條山路封咗，咁相信唔係封咗好耐~
不過耐唔耐關我鬼事咩，總之而家唔行得啦，唉~

呢度仍然冇網絡，呢刻只可以行返轉頭，跟住車導航嗰條 155 公里嘅路線行住先，到有網絡時先再上 google maps 睇吓點~

奇怪，上唔到網，點解屎塔可以用 messager 聯絡到對方呢？
屎塔話其實都好窒吓，每個動作都要等~
但我就真係上唔到 google maps~

行咗一段路，有返少少網絡訊號，好弱，但總算上到 google maps~
查詢一下，google maps 俾咗條路我哋，106 公里，20:50 到達目的地~
係咪真咖！
喺香港，我好怕用 google maps，成日叫你喺啲唔可以 u-turn 嘅地方 u-turn，但係呢一刻，我當正佢係救世者，我信晒佢！

我車導航同埋 google maps 一齊用，當然主要跟 google maps 先，但怕陣間又冇網絡，都有車導航參考吓~

今晚本係係去「山武商店」食飛驒牛，而家就當然唔駛諗~
好彩我聽晚仲喺高山市，可以聽晚先去~
而原本聽晚安排好嘅晚餐，我花咗非常多時間去搵，而家去唔到喇，雖然唔係好可惜，但真係嘥時間囉~

一路行一路行，車嘅導航失靈過幾次，google maps 一直運作正常，但我呢刻都仲未放心，要確定可以離開山路先會放心啲~
再行多一段路，出返大路，再上埋高速，放心晒~
雖然一路上 google maps 都有唔理想嘅地方，不過今次佢真係救咗我哋，而且呢刻我只信佢~

終於嚟到高山市，原本個半鐘嘅車程，而家搞到要差唔多四個鐘，仲要行埋啲要高度集中精神嘅路，真係人都癲！

嚟到高山市，比預期仲要早少少，本來諗住唔理咁多，衝去旅館先，但時間有早就不如去咗停車場先，拎埋要拎嘅嘢上去 check-in，唔駛陣間要行返轉頭~
高山市都幾難搵到間旅館，收費在可接受範圍內又有提供停車場的~
所以我事前就要做吓功課，睇吓部車泊邊好~
去到目標停車場，個收費同我做功課時睇到嘅唔同，如果照泊會好貴~
咁唔理喇，去咗旅館先，可能對方有提議~

屎塔上去 check-in，我就喺樓下睇住部車~
屎塔之後 whatsapp 我，係一張附近停車場嘅地圖，有晒收費資料，係旅館提供嘅~
上面提到有七個停車場，不過就算有一萬個都唔關事，因為佢已經 highlight 咗其中一個，又平又近，只要有位泊就唔駛諗其他嘅~
呢個停車場，比我睇到嘅更平，如果有位就正~
咁，點解我唔知有呢個停車場呢？
雖則呢次做嘅功課係比較求其，但今次就唔關我事~
事關呢個停車場，google maps 係冇標示嘅，我當然唔知佢嘅存在~
(後記：旅館係屎塔訂嘅，原來旅館官網都有呢張停車場嘅圖，今次賴屎塔定自己好呢？ XDDD)

車同旅館都搞掂，而家就要醫肚嘞~
而家都九點幾，唔周圍去喇，落街睇吓附近有咩食肆仲開就衝入去啦~

最近嘅，睇到有間居酒屋，同埋 7-11，屎塔就想簡單快捷，咁就去 7-11 買嘢食啦~
呢間 7-11 有檯有櫈，可以買啲微波爐食品坐低食，都好~

半熟玉子のビリ辛ホイコ—ロ—丼
味道出奇地好，不過就幾油膩~