《瞬間看地球》Stranger's Blog

今日行程：
上高地散策 → 嘉門次小屋 (午餐) → 上高地散策 → よし本 (晚餐) → 安房館 (住宿)

一早起身，梗係問吓屎塔情況先~
如果唔係咁理想就取消今日行程，好好休息~

我起身時唔見佢喺下格床，不過好快就見佢行返嚟，原來佢去咗沖涼~
佢話佢噚晚屙咗兩次，同埋基本上冇瞓過......
再問咗佢幾句，知道佢大概情況~
我唔係醫生，但我覺得佢唔係食錯嘢，係飛驒牛太油膩，腸胃頂唔順所以肚屙~
希望係咁，因為咁嘅情況唔會屙好多次，但食錯嘢就好難講喇~

我同佢講，今日唔好上上高地喇，休息吓~
不過屎塔話佢覺得冇問題，照去~
身體嘅嘢，只有佢自己先知，尊重佢決定~

今日行程，只有上高地同兩餐~
要進入上高地，只可以搭官方嘅巴士進入，所以我要揸車去巴士總站嗰邊先~
我嘅計劃係搭 08:20 (あかんだな駐車場 → 上高地) 呢班車~
我而家身處高山市，揸車過去要差唔多一個鐘~
其實又係求其惹的禍，正路就應該噚晚過定嚟平湯溫泉呢邊，咁今朝就唔駛咁早出門~

去到あかんだな駐車場，明顯凍咗好多，要即刻著返件褸~
但係我見好多人都好單薄，冇我哋咁誇張~
可能佢哋底層有保暖衣物啦~

巴士總站~

喺等開車期間，屎塔又去洗手間，我都講唔出究竟係好事定唔好事......
佢去完返嚟話有改善，咁就好喇！

巴士 08:15 就開，早咗五分鐘，唔知係咪滿咗呢？
下一個大站係平湯溫泉，如果總站已經滿咗，咁平湯溫泉上車嘅人咪冇位坐？
定可能佢有留位？我望唔到，都唔知係全滿定有留位~

去到平湯溫泉，見到有十多人排緊隊，但巴士冇扭入停車場，直接飛站~
不過我都幾相信巴士公司會另有安排，平湯溫泉係大站，冇理由咩措施都冇就咁飛站~

上高地總站係「河童橋」，但我相信好多人都唔會到總站先落車~
遊覽上高地，係要慢慢行，否則就會錯過好多美景~
我都係跟人哋嘅玩法，喺「大正池」落車開始行~
有部份人去到「河童橋」，食吓嘢就會喺總站坐巴士離開~
亦有部份人會繼續行去「明神池」，再走對岸或原路返回巴士總站離開~
我哋係後者，一場上到嚟，想行多啲地方~

 

講到想行多啲地方，我諗起「涸沢」呢個地方~
喺做功課睇網頁時，見到兩張相，好靚，好特別嘅紅葉景色，就睇吓係咩地方嚟，呢個地方就係「涸沢」~
咁我就記低咗呢個地方，再搵吓相關資料~
一查資料，原來要步行六小時先到，即時放棄~
(當時仲未知有上高地呢個地方~)

到後來知道有上高地呢個地方，又做吓功課，原來涸沢就喺上高地上面~
曾經有過一刻想法，上得上高地，不如去埋涸沢，因為我真係幾鍾意佢有紅葉時嘅景色~
不過，自己知自己事，平時又冇行開山，突然間咁樣行法，隨時累人累己，仲要諗埋屎塔呢？都係算了~

喺寫呢個遊記時，我發現我電腦有兩張涸沢嘅相，係當時做功課時留低，來源已追查不到，都係喺網上睇到~

我哋喺大正池落車，感覺又再凍啲，我都唔算好夠暖，只係啱啱好~
望吓其他人，有啲人縮住咁行，又啲企喺度但對腳係咁郁~
其實都明知上高地一定凍，點解唔著多啲衫呢？
上嚟幾個鐘，你哋點算呀~~~
不過著實又有啲睇落少衫但又唔覺佢哋凍，好嘢，我諗呢啲人平時做開運動，血液循環好，冇咁易覺得凍~

一落車就係「大正池」~
湖面平靜，但爭啲太陽~

繼續向河童橋方向進發~

呢個叫「燒岳」~

 

繼續行~

植物表面都結晒霜~

跟住行到嚟「田代池」~
相當漂亮！

喺田代池附近見到隻猴子~
完全唔怕人，就咁喺人類腳邊行過~

繼續行~

跟住行到嚟「田代橋・穂高橋」~

嚟到「田代橋・穂高橋」，可以行過對岸繼續行程，一樣可以行到去「河童橋」~
不過我選擇喺本身嗰邊岸繼續行，因為喺嗰邊繼續行就會行到去一處好靚嘅地方，行對岸係冇睇得咁清楚~

繼續行~

上面講話好靚嘅地方就係呢度嘞~
行對岸的話，要識搵路行出石灘，但個視角點都係呢邊好啲~

 

繼續行~

行到去巴士總站，見到好似有啲商店，就走去睇吓，主要係想買啲嘢食吓同休息吓~

喺「河童焼」買咗幾個河童燒~

喺門外坐低慢慢食~

 

食完仲未抖夠，梗係啦，屎塔就算係過咗最差時候，身體都仲未復完，一定冇平時咁好體力~
於是我哋就入咗遊客服務中心坐多陣先~

都休息咗相當嘅時間，屎塔亦嘗試過再去洗手間，但已經冇乜事，好彩咋~

休息夠就繼續行~
「河童橋」就在不遠處~

嚟到河童橋，可以繼續向前行，亦可以過橋到對岸繼續行~
我自己嘅計劃係唔過對岸，繼續行到去「明神橋」，回程先喺對岸行返轉頭~

繼續向明神橋方向前進~
過咗河童橋，人少咗好多~

 

離開河童橋唔係好耐，係一個露營區~

 

繼續行~

終於行到嚟「明神橋」，呢邊又多返啲人~

行到嚟呢度，屎塔話陣間返轉頭，不如原路返，好似近啲，當然冇問題啦~
的確係，行對岸可能要預多十至十五分鐘~

遊覽完明神橋一帶，我哋就去食午餐先~
我揀咗「嘉門次小屋」，主要係食川魚~
嘩，咁多人嘅！真係估佢唔到~

 

嘉門次そば (岩魚の甘露煮と山菜入り)
幾特別，味道不錯~

 

岩魚の塩焼き定食
日式鹽燒魚，好似條條都差唔多，可能製作方法一樣，鹽味已經蓋過魚味，但都好味嘅~

 

食完嘢就行去「明神池」~
「明神池」有分一池同二池~
但其實兩個池係相連的~

去到一池嗰陣，見好多人排隊，唔知排乜呢~
原來係祈福~

其實呢，祈福嗰個位個視角應該幾好，好想走上前去望吓，不過又怕影響到人，最後都冇行上去~
就喺其他位置欣賞吓啦~
明神一之池~

由一池行過去二池，就要行呢啲木棧，另外仲有大量樹根同有大有細有尖有平嘅石頭陣，隨時扭親腳，都幾危險~

明神二之池~

行到盡頭~

行完明神池，屎塔話可以照原定路線，由對岸行返去巴士總站，佢狀態可以~
咁就好嘞，好，並非因為可以照原來計劃喺對岸行返去，而係佢話佢狀態可以，即係正在復原中~

由明神池開始行去巴士總站~

行到嚟「岳沢湿原」~

繼續行~

行到去巴士總站，終於完成上高地嘅行程~
上高地，擁有「只應天上有」、「係神住嘅地方」等等美譽~
雖然有啲誇張，但上高地嘅美，絕對值得花一整天時間去細味~

巴士站呢邊，勁多人等車，幾條巴士線都係人龍！
我哋要搭嗰條線，唔係最長人龍，但都排第二，要兩部巴士先載得晒~

不過我哋都唔理喇，屎塔想食河童燒，我想食雪糕，食完先算~

 

本來可以一邊排隊一邊食嘅，反正肯定冇咁快上到車，不過呢刻都真係想坐低慢慢食，所以就坐低食完先排~

食完嘢再排隊，等咗 20 分鐘有車，我哋上唔到第一架，再等，兩分鐘後又有車嚟，今次上到了~

我本來預五點先離開上高地，而家係四點鐘，早咗一個鐘頭，都好，返旅館休息吓~

落咗車，再去攞返自己部車，開車過去平湯溫泉嘅「安房館」~

Check-in 時，旅館俾咗兩張「平湯之森」嘅入浴券我哋，話可以過去浸溫泉~
當然旅館本身都有得浸，咁我諗「平湯之森」嗰邊應該有相當優勝之處，否則唔會咁樣~
我呢，從來唔浸公眾溫泉，屎塔話不如陣間過去「平湯之森」睇吓有冇貸切風呂，都好~

休息咗一陣，就出門口去食飯先~
附近選擇唔多，我揀咗「よし本」~

 

ぶた丼 (味噌汁附き)
呢個真係唔好食，豬肉完全冇味，又油膩~

 

山菜うどん
呢個就幾好，山菜好甜~

 

食完飯就行過去「平湯之森」~
細問之下，要係住客先可以使用貸切風呂~
我就同屎塔講：一場嚟到，不如你喺度浸啦，我自己返去先~
屎塔話唔好，一齊行返旅館~

今次係我哋第一次住溫泉旅館但只係素泊，唔知係因為素泊關係，定間間溫泉旅館唔同，呢間係要自己舖床的~

喺呢間旅館，見到有種昆蟲，唔知係咩昆蟲嚟，識飛嘅，見親都只係見到一隻，但處理過後就會再見到另一隻~
成晚都係，同一時間只會見會一隻，好神奇，今晚都分別見到五六隻~