今日行程:
九頭竜ダム → 九頭竜湖 → 九頭竜ダム → 古今伝授の里 → 根道神社の池 (モネの池) → 付知峡 攻橋 → 付知峡 本谷園 → 馬籠宿 → みわ屋 (晚餐) → 犬山館 (住宿)
今日第一站「九頭竜ダム」
到咗九頭竜ダム,天都算光,但好大霧,湖面仲有啲晨霧~
紅葉都算多,但成個環境,睇就幾好,影相就......要有啲技術嘅人先影得好喇~
下一站「九頭竜湖」
九頭竜湖呢,我自己記低咗三個地方可以停車,就逐個去睇吓~
第一個停車位~
中途見到有個位可以停車,又走去睇吓~
第二個停車位~
呢個位都幾多人嚟,計埋離開同啱啱嚟嘅,都有十幾部車~
第三個停車位~
呢個位睇到嘅景完全唔同之前嘅~
下一站「九頭竜ダム」
我哋見太陽高掛,濃霧已散去,就想走回頭路返九頭竜ダム再欣賞吓,因為嗰度係幾靚~
反正唔係好遠,就決定返去~
下一站「古今伝授の里」
呢個係臨時加插嘅,因為紅葉資訊顯示已見頃~
雖然我已經對呢啲資訊冇晒信心,不過唔算好兜路,就過去睇吓~
嚟到古今伝授の里,紅葉係有嘅,但仲有好多未轉色~
不過環境相當不錯,加上有啲紅葉,冇嚟錯~
下一站「根道神社の池 (モネの池)」
呢個池,據說如果配合到天時地利人和,就可以影到有如莫內名作「睡蓮」般嘅詩意~
嚟到停車場,呢邊風景都唔錯~
根道神社の池~
可惜,唔識影相就係唔識影相,我哋就唔係好影到嗰種感覺~
下一站「付知峡」
呢個都係臨時加插嘅,又係因為紅葉資訊顯示已見頃......
付知峡我自己記低咗兩個地方可以停車,一個係「攻橋」,另一個係「本谷園」
為咗有時間去埋付知峡,我哋決定經過便利店就買啲嘢食作為午餐,慳返啲時間~
付知峡 攻橋~
付知峡 本谷園~
喺本谷園見到有個位可以行落去睇瀑布,見時間許可,就行埋落去睇~
入面環境相當不錯~
下一站「馬籠宿」
去馬籠宿,絕對係夾硬嚟,因為非常唔順路~
但我自己本身幾鍾意馬籠宿個環境,同時如果加埋紅葉處處,一定非常漂亮~
嚟到馬籠宿,紅葉唔算多,其實係直頭少~
不過都唔緊要,我相信馬籠宿,冇紅葉都好值得嚟~
馬籠上陣場展望台~
跟住就沿住「旧中山道」開始行~
中途見到有隻貓,就慢慢慢慢咁接近佢~
見佢都冇乜戒備心就慢慢慢慢咁伸手想摸吓佢~
一路接近佢,一路觀察,仍然冇乜異樣,覺得應該可以摸吓~
點知,佢突然出爪攻擊,其中一隻指甲勾到我手指一吓~
好痛好痛,因為真係勾得好深,如豆般嘅血水即時滲出~
即時清理再貼膠布~
不過痛楚完全冇減退,維持咗十分鐘有多先開始好啲~
繼續行~
中途行到水車處,屎塔落樓梯時又失平衡......
今次好彩啲,我捉得實佢,否則喺樓梯呢一跌,真係要幾傷有幾傷~
行到底,冇乜嘢睇,就回程行返上去~
回程時遇上我喜愛嘅黃昏時間~
頭先喺呢個位見到有人點燈,我哋喺再次遊覽馬籠上陣場展望台後,決定行返落嚟,等天黑~
原先計劃好嘅行程裡面,會上「根の上高原」,不過今日臨時加咗兩個地方,變咗唔夠時間去喇~
下一站「みわ屋 (晚餐)」
呢間主要係食飛驒牛,杜如風嘅節目介紹過嘅~
其實去之前都掙扎過,屎塔之前食飛驒牛食到唔舒服,係咪唔好再食呢?
經過一論商討,決定照食~
去到みわ屋,外面嘅停車場滿晒咁滯,原來咁多人嚟!
要等唔緊要呀,最怕有時係滿到等都冇得等~
我喺門口俾屎塔落車先,佢去睇吓咩情況,我就去搵位泊車先~
之後屎塔 whatsapp 返我,等大約半個鐘~
有得等就得啦~
杜如風個節目,介紹過三種飛驒牛~
A. 飛驒牛三食
B. 飛驒牛薄燒
C. 飛驒牛西冷厚燒
我哋討論緊,不如食少啲牛,叫一牛一其他~
但唔知點解,最後都係決定叫 A 同 B~
不過呢,其實我哋唔識睇佢個菜單(唔係單純唔識日文,係展示方式唔係好睇得明),所以我哋就上網擷取返杜如風個節目個畫面去叫~
不過最後我俾錯咗畫面,結果叫咗 A 同 C......
叫 A,當然係想試吓岐阜縣出名嘅三食~
叫 B,係唔想再食咁厚切嘅飛驒牛~
不過叫錯咗就算啦,唔好煩人喇~
飛驒牛西冷厚燒~
先嚟前菜~
冇特別,OK 啦~
主菜~
厚切飛驒牛以外,仲有蔬菜~
第一口咬落去,竟然有種抗拒嘅感覺!
可能當日油膩嘅感覺,就喺呢一口再次喚醒返~
味道呢,山武稍為好一點,可能因為山武喺肉上面灑咗啲胡椒~
蔬菜呢,亦都係山武嘅甜少少~
最後仲有甜品~
雪糕同果凍~
記得阿珊(屎塔個妹)話過,和牛+雪糕,係必瀉組合~
咁又係呀,油加奶製品,係有啲危險~
不過我唔怕,我腸胃應該頂得住~
屎塔就唔敢喇,唯有我一人獨享~
雪糕同果凍都好食~
飛驒牛三食~
第一食係就咁食~
初時都怕佢個汁會好甜,結果唔係,甜度啱啱好,相當不錯!
第二食係加埋啲配菜同山葵一齊食~
嗯......係幾獨特,但唔覺得加咗其他嘢好食啲~
第三食,就係茶漬~
不過個茶好鹹,我完全唔識欣賞......
都係最簡單嘅就咁食最好食~
呢餐同山武差唔多價錢,但多好多嘢食~
無論係量或款色都比山武好~
雖然味道上,山武係稍稍優勝,但如果要二選一,完全唔駛諗,一定係みわ屋~
食完嘢就去犬山館 (住宿)~
駕車途中,出現不適嘅,唔係屎塔,係我~
不過唔係腸胃,係喉嚨痛~
我自己就冇乜話食熱氣嘢會喉嚨痛嘅,況且今晚呢餐都唔算好熱氣~
咁就麻煩嘞,唔係感冒嘛......
去到旅館,見到有朝市資訊,逢星期日(聽日就係星期日),喺木曾川旁都有朝市,正正就喺旅館樓下~
不過我同屎塔對朝市一向普通,都係瞓晏啲好過~
屋企啲日本感冒藥用晒,咁啱今日入咗貨,為免真係感冒,都係食一包鎮一鎮佢先~
之後睇電視時,廣告賣喉嚨痛嘅喉糖,我正需要......
留言列表