今日行程：
永平寺 → 福井県立恐竜博物館 → Dino Café (午餐) → 御誕生寺 → かずら橋 → ヨーロッパ軒 (晚餐) → Chisun Inn 福井 (住宿)
一泊二食，所以早餐自然係喺旅館食~
我自己好少住一泊二食嘅旅館，之前試過嘅，早餐都係同其他房嘅人一齊喺一個大廳度食~
今次唔同，今次嘅早餐，雖然唔係喺自己房食，但都係自己一間房，而且空間感仲好大~
呢樣真係令我有少少驚訝，真係有種尊貴嘅感覺~
我呢啲冇乜見過世面嘅，好易滿足~
我數過，早餐房就得四間，有私人溫泉嘅房得三間，咁我當呢三間房嘅住客都係有自己嘅一間房食早餐，咁其他住客呢？絕對唔可能迫埋喺第四間房一齊食~
實情係點就唔知喇~
早餐呢，其實唔係好合脾胃，都係條魚最好食，不過要自己燒~
唔係話要人服侍，係怕自己燒得唔好，嘥咗條魚，又冇咁好味啫~
離開時，嗰位女侍者堅持幫我拎個重篋，仲要拎上樓梯去到停車場~
其實我自己就覺得非常唔好意思，但亦明白佢哋覺得呢啲係佢哋嘅工作，做唔好反而覺得唔好意思，就由她吧~
上到停車場，我知道佢會等我哋開車走，等到見唔到部車先會返入旅館，但我哋又想喺停車場影吓相，於是就直接同佢講，佢就話好多謝我哋嘅光臨，叫我哋隨便，之後就帶住微笑行返入旅館~
停車場隨影~
今日第一站「永平寺」
知道永平寺紅葉應該只係開咗少少，不過寺本身都好值得去參觀，冇紅葉都會照去~
去到附近，越近永平寺，停車場收費就越貴，近嗰啲仲限時添，過時要加錢~
最後我哋都係泊咗個最近嘅，收費最高，但其實我覺得可接受~
不過限 1hr30mins 就爭啲，順其自然吧~
永平寺紅葉只有好少，比那谷寺少得多~
不過寺廟本身可觀性相當高~
而且仲見到好多僧侶一齊念經~
我哋都唔係好悠閒咁行，返到停車場，睇睇時間，都要個半鐘~
如果真係要好靜心咁欣賞，隨時要三個鐘~
下一站「福井県立恐竜博物館」及「Dino Café (午餐)」
見到佢，就知道就嚟到恐龍館~
恐龍館設計成蛋形，都幾有心思~
恐龍館外圍~
恐龍館呢，都係想像到嘅嘢，不過呢個館好多模型，好有心，係我睇過最好嘅~
行行吓聽到廣播，有 show 睇，於是我哋就走去睇 show 先~
睇完先知，場 show 係俾小朋友睇嘅，對大人嚟講，真係悶到抽筋......
睇完 show，隔籬就係「Dino Café」，就去食嘢先~
化石発掘オムライス (蛋包飯)
一貫蛋包飯嘅美味~
フクイティタンプレート
呢個應該係兒童餐嚟，好有驚喜，估唔到樣樣都好食，尤其個炸雞，係特別好味~
食完嘢就行埋餘下部份~
下一站「御誕生寺」
御誕生寺，又稱貓寺，我哋去呢個寺都係為咗啲貓~
一到每日嘅餵飼時間，啲貓就會空群而出，所以我哋一定要喺餵飼時間前到達~
雖然只係為貓而嚟，但都要影吓個寺，留一個念嘅~
喺寺嘅另一邊，見到十幾隻貓，同時亦有十幾個人~
今日啲時間有啲緊，嚟咗唔係好耐已經到餵飼時間~
喺另一邊都有另一檔，呢幾隻貓，好似知道實有得食咁，唔會跑過去多貓嗰邊爭食，只係靜心等待飼主餵完另一邊先再過嚟呢邊~
臨走時，見到屋裡面仲有一隻貓，至於點解要分開就唔清楚嘞~
下一站「かずら橋 (藤橋)」
原來要收費的，我事前都唔知道~
不過呢邊冇收費站，我諗可能要過咗橋先~
かずら橋~
類似嘅藤橋，喺四國祖谷遊覽過一次~
而家呢條就唔同祖谷嗰條，祖谷嗰條係全藤蔓同木造嘅，而家呢條，我見到有鋼纜亦有其他金屬組件，只係喺外面綑上藤蔓~
不過行呢啲橋，係要極小心，因為腳踏嘅木條，有時啲虛位係可以攝到隻腳落去，即係話，如果岔錯腳，係有機會造成斷腳嘅意外，非常恐怖！
過到橋嘅另一邊，見到收費站，準備俾錢時，發現我冇錢喺身！
啲錢留咗喺車上面，屎塔都係，於是我就叫屎塔返車攞~
咦，奇嘞，點解我會叫屎塔返去攞而唔係我自己返去？
更奇嘅係，屎塔又完全冇覺得奇怪咁，「哦」一聲就走咗去~
之後我就同收費站嘅伯伯解釋，初時伯伯以為我自己返車攞，仲叫我留低部相機做抵押~
我再次向佢解釋，我會留喺度，我太太返車攞錢，伯伯終於明白~
由於停車場有點遠，都等咗相當嘅時間~
期間，伯伯問我來自哪裡，我見佢手持數種小冊子，大概都係睇吓俾啲咩語言嘅小冊子我~
我同佢講我來自香港，伯伯呆咗半秒，神情有異~
跟住佢揀咗幾份中文字嘅小冊子俾我，然後.......
右手做了一下加油 (或者可以話 fighting) 嘅動作
然後說「television」「police」
之後右手做了一支鎗嘅手勢
然後說「student」「not happy」
香港所發生嘅事，真係全世界都留意住~
かずら橋位於福井県嘅池田町，一個伯伯喺咁偏遠嘅地方工作，都知道香港發生嘅事~
同伯伯傾咗兩句，屎塔返嚟喇~
俾咗橋費之後就周圍行吓~
過咗橋之後，係一個小花園，我事前又係唔知，只係為條藤橋嚟~
呢度環境都幾好，除咗小花園，又可以行落下面條川河度~
伯伯五點鐘準時收工，我哋又咁啱行完，諗住問吓伯伯行返過去駛唔駛俾多次錢~
伯伯見到我哋，我哋都未開口，佢就話幫我哋影相~
其實我哋好少影自己，合照更少，不過伯伯一番心意，我哋亦樂於配合~
影咗幾張相後，仲示意我哋可以行返條橋離開~
下一站「ヨーロッパ軒 (冕餐)」
差唔多到餐廳時，屎塔問我泊車泊邊，佢話呢度咁市區，唔似門口有得泊車喎~
俾佢一問，我即時語塞，係喎，泊車泊邊？
其實我真係點諗都諗唔到安排好部車泊邊~
我只係答佢，我實有睇過泊邊嘅，雖然我冇乜印象，但冇得泊車我應該唔會嚟，費事煩嘛，我諗去到就自然記得~
去到門口，視線範圍內都唔覺得有屬於餐廳嘅停車場~
反而附近就有好多收費停車場~
我哋決定兜個圈睇吓點先~
兜完一個圈，冇計，泊收費停車場啦~
我哋泊咗個最平嘅，又夠近，正~
不過我到呢刻仲未諗到點解我會嚟一間冇得泊車嘅食肆~
就算係因為附近有收費停車場，我都冇理由一啲印象都冇，奇怪~
唔理喇~
ヨーロッパ軒
カツ丼 (炸豬扒丼)
呢個係招牌炸豬扒丼，有三大塊豬扒~
好好食！味道好，肉又嫩，個汁又好味又夾，好好食！
3種盛スペシャルカツ丼 (三款炸物豬扒丼)
三款炸物分別為：豬扒、漢堡、蝦
豬扒同招牌豬扒係同一款，當然係好好食~
漢堡都唔錯，蝦就真係普通~
到櫃檯俾錢時，見到啲泊車資訊，恍然大悟！
我記得返晒！我見佢附近有好多停車場先諗佢，因為唔駛煩泊車~
我做功課時係有睇到部車泊邊，絕對係有研究過！
用得研究咁緊要，係因為呢度嘅泊車資訊，係我喺日本從未遇過嘅~
車係可以泊喺指定嘅收費停車場，消費過後，可以向店家攞代用幣，代替 100 円硬幣，變相免費泊車~
我即時同店家講我有揸車，佢俾咗兩個代幣我，咁就可以慳返泊車費，雖然呢個停車場都幾平，慳唔慳到都冇所謂~
去到停車場，入個代幣落去，即時跌返落找錢個出口，試咗幾次都係咁~
我諗，我泊嘅呢個停車場未必係可以用呢種代幣嘅停車場~
冇計啦~
跟住就開車到 Chisun Inn 福井 (住宿)，完結今日行程~
留言列表
