今日行程:
Hallstatt (哈爾施塔特)、St. Wolfgang (聖沃爾夫岡)、Zwölferhorn (茨沃爾費山)、St. Gilgen (聖吉爾根)
今日第一站 Hallstatt (哈爾施塔特)
係,又係 Hallstatt,因為有一樣嘢我哋想做而未做嘅,就係遊湖,遊 Hallstätter See (哈爾施塔特湖)~
今次遊湖,唔係搭船,係親自揸船!
喺 Hallstatt,可以租部船仔自己揸,用唔同角度去欣賞呢個美麗嘅小鎮~
不過我哋都唔知邊度有得租船,只係知道有,所以要周圍搵吓~
最後當然都會搵得到,不過未開門,所又周圍行吓先~
一早又有人喺度影婚紗相~
早晨呀~
到九點喇,就走去租船~
租船嗰度......有啲似係人哋屋企,都唔係好敢入去,喺外面又唔見有人......
咁都冇計啦,敲吓門等人應囉~
店主係位女士,態度慵懶,咁又係嘅,啱啱開工就要做嘢~
(雖然我唔係好同意咁係正常......)
我哋刻意咁早嚟,少啲人,湖上交通疏落啲,咁就自在啲又安全啲~
船有兩種,主要係分馬力大細,我哋租咗細馬力嘅,遊湖啫,唔駛咁快~
一小時夠啦,唔駛咁耐~
不過,原來馬力細嘅船,個馬力真係好細好細......好細......
想去遠啲都唔夠時間......
湖上面得幾隻船,撞船風險漸近係零,正~
唔計 Hallstatt,遊湖可以話係冇咩睇~
反正又唔夠馬力/時間去到湖嘅盡頭,倒不如早啲折返,欣賞吓湖上角度嘅 Hallstatt~
由湖上面望返 Hallstatt,好靚好靚~
一上岸就見到佢,好靚女~
(當係女先)
我哋租嗰隻船~
又見到第二隻貓,好靚仔~
(公平啲,當係仔先)
佢一聽到我哋嘅呼喚就有反應~
沿途見到嘅商品~
要離開 Hallstatt,實在有點不捨~
臨離開前,遇到有人向我哋問路,對方係講國語嘅~
佢問我哋想去鹽礦應該點去~
你問啱人喇!
我仔細咁教佢,仲提佢一定要去 World Heritage View,同埋記得喺車站攞 audio guide~
不過我見佢喺應該轉嘅路口冇轉到,繼續直行......
於是我就跑上去再話佢知~
下一站 St. Wolfgang (聖沃爾夫岡)
St. Wolfgang 係 Wolfgangsee (沃爾夫岡湖) 湖畔嘅一個小鎮~
沿途風景~
去遊小鎮前,先去位於 St. Wolfgang 嘅旅館,放低部車先再出去玩~
去到旅館,對方話搵唔到我哋嘅 booking......
但佢見我哋有晒 confirmation,都知道問題唔會喺我哋度先~
於是佢再上網查吓,最後都搵到,虛驚一場~
Check-in 完就出去玩嘞~
St. Wolfgang 呢個鎮對我哋嚟講係冇咩好行,只有商店,極其量走上山腰睇吓風景~
我選擇嚟呢度落腳,最大原因係我計劃好會坐齒軌列車上 Schafbergspitze (沙夫貝格山)~
但係,我哋而家密謀造反,想改行程,取消呢個咁重要嘅景點!
兩日前先知道,St. Gilgen (聖吉爾根) 嗰邊有纜車可以上到 Zwölferhorn (茨沃爾費山)~
St. Gilgen 亦都係 Wolfgangsee (沃爾夫岡湖) 湖畔嘅一個小鎮~
我哋都好鍾意喺湖邊搭纜車,一邊上,一邊欣賞湖光山色~
但係,如果要搭呢程纜車上 Zwölferhorn,就冇時間搭齒軌列車上 Schafbergspitze~
搭齒列車上 Schafbergspitze,可以話係嚟到 Wolfgangsee 嘅一個重點行程嚟~
要喺當中犠牲一個,真係好難揀~
最後,我哋憑直覺,決定搭纜車上 Zwölferhorn,犠牲 Schafbergspitze~
旅館距鎮中心唔係好遠,不過呢邊就非常寧靜,絕無半點旅遊氣息~
睇到呢張長椅,自然諗起「寫意」兩個字~
迷你高爾夫球場~
行到碼頭,順便買埋船飛,之後繼續向前行先,閒逛完 St. Wolfgang 先搭船過 St. Gilgen~
行完商店部份,就向高地進發~
Hello~~~
繼續行~
有間小教堂,門口冇鎖,不過入面有欄,未有開放~
之後就抄小徑返落地面~
喺呢度爆返出嚟~
落到嚟附近就係湖邊~
山腰望向湖嘅風景實在不甚麼樣,但總比行商店有趣~
行到返碼頭,想食嘢但又唔係好肚餓,食甜品好似比較啱而家嘅胃口~
一人一杯雪糕,再加個蘋果批,啱啱好~
下一站 Zwölferhorn (茨沃爾費山)
要上 Zwölferhorn,就要搭船過 St. Gilgen 先~
沿途風景非常漂亮!
上層實在太曬,我哋坐到中途頂唔住走返落下層坐~
落咗船就行去纜車站~
去到纜車站,一般嚟講,會好容易搵到售票嘅地方~
但呢度,要入咗間餐廳,再轉 180° 先見到售票處~
纜車沿途風景~
上到嚟,見到有個 Sonnenterrasse 嘅指示,都懶得去翻譯,相信都係觀景台嘅嘢嚟,就跟住行~
不過指指吓冇咗......
唔理啦,總之向上行啦~
行行吓,我諗我哋到咗~
向湖嗰邊個景係幾好,不過如果坐低就乜都睇唔到~
所以我哋決定再行高啲~
又見到有人玩滑翔傘~
之後就坐低放空~
坐咗幾耐唔記得,淨係知道最遲要坐到尾班纜車落山就得,其他嘢,呢刻乜都唔想理~
坐到夠就動身落山~
我尤其喜歡落山呢一程,特別係臨近地面時,我都唔知點解~
下一站 St. Gilgen (聖吉爾根)
我知道 St. Gilgen 冇乜特別,不過一場嚟到,都行吓啦~
期間見到有兩個男人裸泳,撞啱有團日本團行過,其中一個裸男仲刻意向住佢哋(日本人)把玩下體......
要行嘅都行晒,嚟到碼頭係 17:10,不過要等到 18:00 先有船返過 St. Wolfgang~
冇咩做就買兩杯雪糕食吓先~
終於等到船嚟喇,得幾個人上船~
上層好大風,但我哋都堅持住,因為上層只有我哋兩個,好不寫意~
返到 St. Wolfgang 就搵嘢食~
唔知點解見到呢間嘢就自自然然咁走咗入去~
Kaspressknödel in Klarer Rindsuppe
Clear beef soup with a traditional Austrian cheese dumpling
個 cheese dumpling 幾好食,湯都唔錯~
Hendlbrustfilet vom Grill
mit Kräuterbutter, Marktgemüse und Reis
Grilled filet of chicken with herb butter, fresh vegatables and rice
雞肉......又鞋又乾又鹹,唔好食~
Rumpsteak vom premium Rind (250g - medium)
mit Kräuterbutter dazu Kartoffel - Wedges und frisches Gemüse
Grilled Rump steak (250g - medium), with gerb-butter, fried potatoes, fresh vegatables
牛扒一啲牛味都冇,而且佢實在太熟喇,根本係 well done 嚟(menu 寫 medium),唔好食~
呢次旅程,到現時為止,呢餐係最貴最唔好食,性價比超級差!
不過其實坐落都見到少少端倪,因為中途有兩團大陸團嚟咗~
呢度地方好大,我估佢專做團客~
可能係我偏見啦,總覺得一般做團客嘅,通常都唔會好好食~
食完晚餐就步行返旅館,沿途冇街燈,勁黑~
經過一間車庫,由於實在太黑,見唔到有人,但就聽到兩個男人交談嘅聲音,真係迷信啲都俾佢哋嚇死~
留言列表