今日行程:
妙立寺 → Tokyu Hands → 尾山神社 → 近江町市場 → 刺身屋 (午餐) → 荒俣峡 → 那谷寺 → 日本自動車博物館 → 割烹旅館 越前満月 (晚餐及住宿)
今日第一站「妙立寺」
妙立寺,又名「忍者寺」
但其實佢同忍者係完全冇關係,純粹因為寺內有好多機關,所以先有忍者寺呢個別名~
今日喺金澤嘅行程,都係全部步行,車就放喺停車場先~
行去妙立寺,要差唔多半個鐘,我知道可以搭巴士,不過半小時嚟講,我比較傾向行吓~
沿途風景~
妙立寺~
由於參觀妙立寺係要事前預約嘅,我哋就入去睇吓點樣報到先~
一入到去,嘩,咁多人嘅,我 book 嘅時間已經係當日最早嗰場~
真係估唔到會咁多人,好彩我好早 book 定~
報到過後就除鞋進入寺內,坐下來聽講解~
對方只會用日語講解,我哋當然聽唔明~
但我諗只要人做就跟住做,人唔做嘅就唔好做就應該冇問題~
同埋有好多嘢其實係常識嚟~
聽到一半,有人走埋嚟俾兩本嘢我哋,原來係介紹整個妙立寺嘅中文翻譯本嚟,正!
由於太多人關係,會分兩批人出發,經唔同路線參觀~
呢個安排幾好,同時可多人遊覽又唔會造成擠迫~
不過寺內嚴禁攝影,就冇相可貼~
關機呢,唔算得上驚為天人,但以以前冇乜科技嚟講,算係好有用,真係可以用嚟救命~
成個過程好好睇,非常值得嚟!
下一站「Tokyu Hands」
頭先行去妙立寺時,屎塔見到 Toyku Hands,話陣間返轉頭時想行吓~
沿途風景~
Tokyu Hands~
不過屎塔最想睇嘅嘢,呢間冇,所以都唔係行咗好耐~
下一站「尾山神社」
入口這個建築樣式,喺日本好似很少見,唔知係真係少定我見得少~
尾山神社隨影~
下一站「近江町市場 / 刺身屋 (午餐)」
近江町市場~
我哋對呢啲市場興趣一般,行咗一陣就去食飯~
刺身屋 (午餐)
のど黑定食 (喉黑魚定食)
喉黑魚係金澤其中一樣名物,就試吓佢~
呢款定食,喉黑魚嚟講,有四食,分別係湯、刺身、炙、燒~
個湯就冇魚味嘅~
刺身同炙都冇乜特别~
不過燒呢,就好好食!
夠大條,又夠魚油,肉嫩又有魚香,好正!
海鮮丼
呢個都相當不錯!
刺身鮮甜,食到有幸福嘅感覺~
食完飯,諗住試吓杜如風介紹嘅煤氣蝦,點知一時心急買錯蝦......
唔知呢款係咩蝦,不過都好好食,好鮮甜,買錯都唔緊要~
都幾飽吓,所以都冇諗住再買返煤氣蝦食,有緣先再試啦~
下一站「荒俣峡」
噚晚睇紅葉資訊,顯示荒俣峡已見頃,今日即刻改行程,唔去那谷寺,改去荒俣峡~
差唔多到時,心感不妙,附近絕大部份植物都係綠色,只有少數係開始轉色,唔通真係去到先見到見頃?
去到停車場,好失望,只得好少紅葉~
行人步道就封咗,亦唔覺得行入去會見到見頃~
由呢度過去那谷寺只係十幾分鐘車程,事不宜遲,即刻開車過去~
下一站「那谷寺」
好彩有嚟到那谷寺!
那谷寺只係開始轉色,已經好靚,見頃的話,肯定靚到不得了!
下一站「日本自動車博物館」
我哋唔係車迷,對車呢樣嘢認識唔多,但都好鍾意睇~
去到停車場,只得幾部車泊咗喺度,咁少人嘅,唔通冇乜嘢睇?
入去望咗兩眼,唔係喎,好多嘢睇喎!
我哋睇到唔捨得走,但冇辦法嘞,人哋閂門喇,想唔走都唔得~
成個館真係冇乜人,好正,好似包場咁~
離開時,落緊好大雨!
好彩泊得夠近,都唔諗住等,衝上車算~
下一站「割烹旅館 越前満月 (晚餐及住宿)」
嚟呢間旅館,主要係為咗食越前蟹~
一泊二食,晚餐係蟹,對我來說,價值不菲~
不過屎塔想試吓,咁人一世物一世,試就試啦~
食越前蟹貴就預咗,不過真係估唔到咁貴啫......
呢晚一泊二食要成 131000 円,即係差唔多一萬蚊港幣一晚......
真係好痴線,我唔係話佢收得好痴線,我係話我哋咁都照去呢吓痴線......
其實到寫遊記呢刻我都仲未接受到,我諗我呢世都唔會接受到......
開車時落好大雨,幸好行咗大半個鐘開始細雨,之後仲停埋~
去到停車場,已經有人行出嚟,準備迎接我哋~
其實太好服務,我會覺得唔好意思~
上嚟迎接我哋嘅,係一位女士,佢想幫我拎行李,我都同佢講我自己拎就得~
其實個篋咁重,仲要拎住落樓梯,我作為一個男士,真係唔想佢幫我拎~
最後佢都有堅持由佢拎,不過佢一拎上手就話佢拎唔到~ XDDD
其實唔緊要嘅,氣氛係喺好輕鬆嘅情況下由佢拎變成我自己拎返~
Check-in 時,佢問我哋晚餐會唔會想喺房食~
我哋唔知道,如果唔喺房食,係咪會同其他人一齊食~
所以我哋決定享用吓呢個選擇權,喺房食~
房好大,係我住過最大嘅房(二人入住計)~
而且房內仲有埋半露天溫泉,正!
跟住就嚟到蟹宴~
一開始嚟個刺身先~
好食~
跟住就係蟹刺身~
嗯......覺得麻麻地......
再嚟就係蒸蟹~
呢個好好食!好甜!正!
之後就係侍者即場燒~
蟹肉有點普通~
蟹蓋啲膏就好好食!
再之後就係侍者即場煲~
都係普通~
蟹就完晒嘞,咁就仲有個飯~
雖然好飽,但個飯係好食嘅,可能因為食太多蟹,只要有樣唔係蟹,都會覺得好食......
最後係果凍~
呢個幾好食~
食後感~
蟹嚟講,係蒸最好食,原汁原味,鮮甜!
其他都係一般~
同埋其實一般人真係食唔晒,除非真係好鍾意食蟹~
否則,一係飽,一係太膩,至少我食唔到滿足,食唔到幸福~
不過唔緊要嘅,唔試過又點知呢~
食咗兩個鐘,真係夠晒皮~
一泊大房連私人溫泉,二食越前蟹宴加早餐,十三萬円,其實又唔算好貴,只爭在係咪自己想要嘅嘢~
留言列表