2019.11.06 輪島、金澤 (日本第七天)－《瞬間看地球》Stranger's Blog

今日行程：
白米千枚田 → 兼六園 → ターバンカレー (午餐) → 金沢21世紀美術館 → ひがし茶屋街 → 自由軒 (晚餐) → ひがし茶屋街 → 兼六園 → クルトンモースト兼六 (住宿)

今日起身，望吓啲行程，發現有錯誤嘅地方~
我計錯咗時間，今日要去嘅地方，係唔夠時間去晒~
最後我刪咗「金澤城」，冇辦法~

嚟咗日本後，收到今晚間旅館嘅通知，兼六園喺 2/11~24/11 期間有晚燈~
咁我就加咗兼六園喺今晚晚飯之後去~

今日天氣唔好，起身時係落緊雨，時大時細~

今日第一站「白米千枚田」
我哋之前未睇過梯田，雖然噚晚到過，但其實只係睇燈飾，唔算睇過梯田，所以今朝再去~

去到白米千枚田時仲落緊雨，不過唔大，勉強唔駛用任何雨具都可以~

我行出去圍欄時，聽到屎塔大嗌咗一聲，擰轉身望一望，屎塔瞓咗喺地下......
唉，佢梗係又仆街啦，都唔明咁大個人點解成日仆街......

咁我就梗係即刻走去慰問吓啦，見佢仲笑得出都好啲~
原來佢俾停車格嗰啲壆撠親~
就係佢喇！

手就有少少擦損，基本上都冇乜嘢，關節骨頭嗰啲都應該冇事~
部相機就......啲痕跡都唔知係上次定上上次定再上上上次仆街時造成嘅，咁就無從稽考~
至少試影咗幾張相都冇乜問題~
(後記：鏡頭有個環鬆咗，zoom 完會阻礙收返支鏡，經過九十幾次嘗試，終於整返好~)

雨中嘅白米千枚田~

睇到啲冇著燈嘅燈膽，其實對個景色係有少少影響，不過呢樣就冇辦法嘅，又要有燈飾睇，又要見唔到燈泡，唔通要做個機關收起佢咩，痴線~

下一站「兼六園」

去兼六園之前，要處理好部車先，因為喺金澤範圍我都係選擇步行，唔駛用車~
初時我以為呢間旅館冇免費泊車，所以自己都搵咗附近嘅停車場資料~
直至喺車上面同屎塔傾開，先知旅館原來有停車場~

不過呢，佢個停車場，係指定咗邊間房就泊邊個位~
即係話，就算個停車場有好多空位都好，屬於我哋間房個停車位有人泊咗，我哋都唔可以泊其他位~

由於呢間係自助式 check-in，事前已經知道我哋住邊間房，咁就自然知道邊個停車位係屬於我哋~
為此，我哋傳咗個訊息俾房主，問佢我哋可唔可以提早泊咗部車先~
不過佢一直都冇覆，咁我哋就諗住過咗去個停車場睇吓先~

每日嘅 check-out 時間係 10:00，我哋去到時預計係 10:30，即係話，10:00 後，只要個停車位冇車，我哋泊部車入去都唔會算係無恥地強行泊咗人哋個位~

輪島天色好差，但睇天氣報告，金澤天氣就好好，希望準確啦~

沿途風景~

車程約需兩小時，但我哋行咗個幾鐘都仲落緊雨......
不過，就嚟到金澤時就開始放晴~

去到停車場，屬於我哋房嘅車位有部車喺度~
雖然個場仲有好多位，不過真係唔可以亂泊~
咁冇計啦，唯有泊返我之前諗住泊嘅收費停車場~

泊好車，天色唔算好好，都係去「金沢21世紀美術館」先，室內地方冇所謂，希望晏啲冇咁多雲~

沿途風景~

途經「金澤城」

呢組交通燈，係點睇嘅呢？
左前右都行得，但又有盞紅燈，即係點？

經過有間舖頭叫「今井金箔」，有金箔軟雪糕賣~

就買咗兩杯嚟食~
味道同普通嘅冇分別，口感同普通嘅，分別只係感覺到好似有層「衣」咁，冇咩特別，都係噱頭嘢嚟~

佢門口個擺設，好似道符咁......

行到去「金沢21世紀美術館」，嘩，好多人排隊，都係去「兼六園」先，反正呢刻天色又好返啲~

「兼六園」，係日本三大庭園之一，我對呢個地方都有啲期待~
園區都幾大，但又冇乜特別，都係行行行~

行完就覺得......完成咗一個景點咁，冇乜滿足感，唔覺得特別靚~
主要係覺得環境相似度高，冇乜新鮮感，好似度度都差唔多咁~

下一站「ターバンカレー (午餐)」
據說金澤咖哩，有自己獨特嘅味道同風格，仲話一定係用不锈鋼碟盛載，否則就唔係金澤咖哩~

沿途風景~

「ターバンカレー」

Lセットカレー (Lset curry)
呢個係店內人氣 No.1 嘅菜式，有漢堡、豬扒同腸仔~
個咖哩真係好食，有種獨特嘅香味~
唔單止個咖哩，漢堡、豬扒同腸仔，通通都好食！
我唔係咖哩迷，但我真係覺得好好食！

エビフライカレー (Fried shrimp curry)
蝦都好食，新鮮~

下一站「金沢21世紀美術館」
認識金沢21世紀美術館，係源於佢個泳池，對泳池以外嘅，冇乜認識亦冇乜人提~
關於個泳池，原本池面係免費參觀，池底就要收費~
不過喺出發前數星期，改咗池面池底都要收費~
我自己就冇乜興趣，不過屎塔有興趣，咁就當然要嚟參觀吓啦~

嚟到美術館，仍然有好多人排隊，只係比之前少咗......可能五個人卦~
排緊隊時，就留意吓點解條隊郁得咁慢~
原來佢對每位顧客都講好多嘢，我哋咁遠就聽唔到佢講乜，陣間到我哋就知~

原來呢，佢對每個人都要講解票種，又講邊間館唔可以影相，又講路線唔可以一路行到尾，有一部分係要兜路行，又要檢查埋隨身嘅袋，睇吓係咪必需要放入儲物櫃咁~
其實，以上種種，係可以有更有效方法去處理，唔駛等啲人排隊排咁耐~
尤其唔可以影相呢部份，唔俾影相嘅展館，門口係有告示，每個展館都有一位工作人員，根本唔需要喺買票時就講埋~
而當中，我哋被告知邊啲館唔可以影相，佢係即時用筆記低喺小冊子上，但可惜同現實不符，造成混亂，簡直係費時失事~
不過又咁講，可能佢係刻意嘅，咁樣就可以控制人流，等館入面唔會太擠擁，希望佢原意真係咁樣啦~

票種方面，分兩種，一種係通行票，可參觀館內全部展館~
一種自然係只可參觀部份展館，當中包括最為人熟知嘅泳池~
一場嚟到，我哋一定會買通行票~

展館外~

講講個泳池先~
泳池在展館內，就在售票處隔籬，所以我哋就去咗先~
泳池個概念係，池面望落去係一個正常有水嘅泳池，但池底嘅人，冇人著泳衣，個個著便服並且活動自如，有人仲帶埋 BB 車落水~
當然，大家都知池底係冇水嘅，呢個泳池係一個藝術品~

池底呢，我哋係行晒所有展館先去嘅~
當我哋去到嗰時，排緊長龍，真係咁多人？
原來大家都好合作咁，等人影完相先入去，咁就形成池底內一次只係有一個 party 嘅人入去~
我哋參觀池面時，池底嘅秩序唔係咁，頂多係扶手位，先至係一個跟一個~
唔知係有人安排定自發~

而我哋呢，其實冇諗住行埋去影有自己嘅相，理論上係唔駛排隊~
但喺呢個情況下，就咁行埋去亦一定會令人誤會，所以，都係跟住排啦~

我哋影相，只係想記錄吓自己嘅足跡，起碼有個記憶~

展館內，不停有聲音係人扮狼叫，就係由呢個電視機度發出~
我真係唔識欣賞，覺得好煩......

有個展館係展示呢座過山車，入面係有好多模型車行緊~
刻意拎出嚟講，唔係因為我覺得有幾正，其實啱啱相反~
呢座過山車，係需要有工作人員(還是藝術家本人？)不停喺唔順暢嘅地方拎起啲車，又放返喺第二度~
又有啲車因為衝力過大，會自己跌出軌道~
個工作人員係不停要處理，甚至可以話一個人係處理唔切~
咁，呢座過山車其實係咪一個失敗嘅展品？還是呢個展品嘅概念其實係「失敗」？
或者只係我睇唔明個藝術家想帶出啲咩訊息俾參觀者啦~

呢個公仔，照解說就話有個人喺入面，其實我唔信，我同屎塔好細心咁注視，完全睇唔到有呼吸嘅起伏，個公仔係完全唔郁~
或者，話佢有人喺入面，但其實冇，都係藝術嘅一種展示？

展館內其他藝術品~

個美術館，我哋覺得好普通，唔係好啱睇~
初時見咁多人入場，仲有啲期待添~

而家時間唔上唔落，有啲唔知點安排好~
天色開始暗，一係行快啲過去「ひがし茶屋街」，一係就行吓「金澤城」，再去「兼六園」(17:30 開始有晚橙)
但係諗諗吓，而家行金澤城都睇唔到啲咩，同埋太早去兼六園，天又未黑晒，更加唔上唔落~
所以都係決定而家行過去ひがし茶屋街~
ひがし茶屋街呢，其實又唔係話好想去，而家去到都天黑，但係唔緊要，始終都係想咁決定，隨心吧~

下一站「ひがし茶屋街」

我哋行小路過去，會比較快少少~
其間經過條橋，都幾靚~