2019.11.05 宇奈月、黑部、欅平、輪島 (日本第六天)－《瞬間看地球》Stranger's Blog

今日行程：
宇奈月散策 → 黒部峡谷電車 → 欅平散策 → 白米千枚田 → 輪島温泉ホテルこうしゅうえん (住宿)

一早起身，屎塔問我黒部峡谷電車可唔可以改時間，佢想喺旅館休息耐啲先~
即場改其實我唔知得唔得，就算得，紅葉季節有冇位改都成問題~
不過，冇咩重要得過屎塔需要休息呢個訴求，大不了唔搭小火車，全日休息~

我本來諗住梳洗好就出門口去車站睇吓改唔改到時間先，不過屎塔突然話佢想睇醫生......
佢嗌得要睇醫生，佢都真係好唔舒服~

喺佢嗌要睇醫生之前，佢已經搵過吓去邊度可以睇醫生~
不過而家仲早，咁早過去都冇用，診所未開~
咁我哋就落去車站先，睇吓改唔改到時間，之後先開車去睇醫生~

我哋將部車泊咗喺同旅館有合作關係嘅嘅地方，再行去車站~
去到車站，睇睇顯示屏，似乎座位唔係好緊張，我諗只爭在俾唔俾改啫~

走埋去櫃檯問，對方話可以，咁就即刻睇吓可以改咩時間~
本來我預訂好嘅班次為：
宇奈月 (07:57) → 欅平 (09:12)
欅平 (11:46) → 宇奈月 (13:04)

而家改為：
宇奈月 (11:48) → 欅平 (13:06)
欅平 (16:01) → 宇奈月 (17:16)

改好車票之後，我哋坐低再睇吓睇邊間好~
屎塔焦點係醫院，因為如果搵診所，唔知呢度點分，所以去咗醫院先係比較妥當~

就算係醫院，亦未必間間啱，所以我哋諗住問吓呢度嘅旅客中心職員~
不過唔知係咪因為太早，冇人......

於是我哋決定返旅館問人~
屎塔就應該幾唔舒服咖喇，佢留喺車站休息，我馬上返旅館求助~

不過，同旅館職員溝通唔到，點講佢都唔明......
好彩，旅館有個女職員識講普通話嘅，咁就得嘞~

不過就算對方知我問乜，都好似未處理過類似問題咁，面有難色~
佢哋傾咗一陣，又篤吓電腦，最後就喺我手機地圖上點咗間醫院俾我~

我行返去車站匯合屎塔時，查到車程大約 25 分鐘，咁都算近~

匯合咗屎塔，講返成件事俾佢知，我哋決定去旅館職員講嘅嗰間，唔去自己搵嗰間~

去到醫院，大約 08:10，診症時間 09:00 先開始，不過已經非常多人等緊~
登記時，一樣係好難溝通，拜科技所賜，對方用 iPad，我哋用手機，大家都開著個翻譯 app 嚟溝通~
屎塔提對方可以用日本漢字，咁我哋都有機會睇得明~

對方最想我哋明白嘅係，我哋冇保險卡，係要全費支付，同埋係要俾日本貨幣~
以上兩樣我哋當然係知道，不過對方責任上一定要講明~

成個過程，一個人做主導，另有幾個人圍埋一齊睇吓可以點幫手，真係麻煩晒~

我哋要做嘅都做晒，佢哋背後要搞幾耐就唔知，始終係外國人，一定麻煩啲~

不過我哋坐咗十分鐘到，就帶咗我哋上樓，喺上面再等，我諗佢哋係分咗科先再排隊~

上到去，再溝通咗最少 15 分鐘，睇情況，應該有排搞~
屎塔怕真係搞成日，主動問對方，10:30 ~ 11:00 有冇機會可以睇完離開？
對方話答佢唔到，因為今日非常多人~
今日梗係多人啦，三連休之後嘅第一個工作日~

之後佢哋幾個係咁討論，講乜嘢我哋當然唔明，只係靜靜咁望住佢哋~
其後，佢哋俾咗間診所資料我哋，佢哋話睇門診會快啲~
仲好有心咁話，只係五分鐘步程~
臨走時仲充滿關懷咁講咗句：Take care
呢句 take care，真係包含無限祝福同溫暖~
對方由頭到尾都好照顧我哋，真係好感謝每一個幫助過我哋嘅人~

去到診所登記，對方沒有一絲驚訝~
如果連醫院都對外國人求診感到陌生，一個小社區入面嘅一間專科診所，理應更加陌生~
或者醫院有打過電話過嚟講聲？咁就唔知喇~

對方講嘅嘢都係一樣，冇保險卡，要全費支付~

由於本身唔知呢度有冇得停車，所以都冇揸車過嚟~
嚟到知道有停車位，就喺等候時間，我走返去醫院揸返部車過嚟~

返到嚟，屎塔話俾我知，佢已經做咗啲檢測，繼續等見醫生~
真係快手~

再等咗大約十五分鐘就可以見醫生~
醫生問咗幾句，就話可以走得~
可能因為做咗啲檢測，基本情況醫生都已經掌握到~
同醫生溝通就相對易啲，雖然都唔算非常順利~

最後收費為 9540 円~

藥呢，就要過隔籬間藥局攞~
唔知仲駛唔駛俾錢呢？

過到藥局，做咗基本登記，都有問保險卡嘅事情~
等咗一陣就見藥劑師~
藥劑師問嘅嘢同醫生相約~

喺香港成長嘅我哋，其實真係唔係好明，點解仲要見藥劑師？
醫生都斷咗症，開埋藥，點解又要經藥劑師呢關呢？
唔通最後佢會推翻醫生決定俾唔同嘅藥咩？我諗唔會卦~
最後都係俾返醫生開嘅藥......

原來喺度仲要俾錢，收費為 1860 円~

搞掂晒！屎塔藥都未食就覺得好返啲~ XDDD
點都好啦，心情好返啲，對件事點都有幫助嘅~

返到宇奈月，喺開始行程之前，仲有樣嘢要做~
乘搭黒部峡谷電車嘅時間改遲咗咁多，會影響今晚到達旅館嘅時間，我哋必需要通知咗對方先~
於是我哋又走返去旅館，請求對方幫助~

今次呢個唔係今朝嗰兩個，咁就煩嘞~
溝通到就冇問題啫，否則人哋都唔知你兩個乜水，無啦啦走入嚟要人幫手打電話......
點都好啦，硬著頭皮都要~

向對方說明來意，都知咖喇，對方只係明少少，但明個重點就得~
住宿就屎塔訂嘅，當然要講屎塔個名俾對方知，但唔知點解，對方走去搵自己嘅訂房資料，仲指住屎塔個名問係咪佢嚟~
我哋唔理佢點解有咁嘅舉動，總之佢而家知道我哋係住客，亦知道我哋有咩請求，咁就得嘞~
最後順利完成~

今日第一站「宇奈月散策」

步出旅館，見到車站內有部小火車坐滿晒人，呢部就係黑部峡谷電車~

我知道就嚟有一班車開出，應該係呢部~
原本我係想喺「舊山彦橋」影小火車行走於「新山彦橋」時嘅風景，亦知道呢班車就嚟會開，如果而家跑過去仲嚟得切~
不過屎塔唔舒服就無謂喇，反正 15 分鐘後有小火車返宇奈月，一樣可以影到，只係方向唔同~

繼續向舊山彦橋進發~
行到一半，小火車開出了，再見......
從遠處睇睇啲地理位置~
下圖中，藍圈為「新山彦橋」；藍箭為「舊山彦橋」；黑箭嗰條橋就唔知有冇名，陣間都會去行吓~

行到去舊山彦橋，小火車仲有十分鐘先到，周圍影吓相先~

「新山彦橋」

不知名橋~

舊山彦橋橋上風光~

回程返宇奈月嘅小火車行經新山彦橋喇~

跟住就行去條不知名橋~

有隻蜘蛛開緊餐~

行完呢邊，見仲有啲時間就行埋去「やまびこ展望台」
原來個展望台係可以正面望向新山彦橋，我事前都唔知道~

影咗幾張相，時間都差唔多，諗住離開~
就喺呢個時候，遠處傳來火車嘅響號聲，唔通附近有火車行駛？
無論係去程定回程，都一定經過新山彦橋~
於是我哋就等多陣睇吓點先~

等咗兩分鐘，真係有小火車經過！真係好彩！

宇奈月隨影~

下一站「黒部峡谷電車」
小火車由宇奈月開往欅平，中間仲有幾個站~
不過預約就只可由總站至總站，想要買中途上落嘅車票，就要即日往售票處買嘞~
其實中間有一兩個站我都有興趣，但基於上述安排，都係預約好啲，費事即日買飛冇位~
所以今次就只好直接搭到欅平~

車廂方面分三種：
普通客車(基本收費)：冇窗冇玻璃冇遮冇擋，坐椅沒有椅背，一排四個座位
特別客車(每位加收 370 円)：有窗，坐椅有椅背，但不能調整方向，一排四個座位
リラックス客車(每位加收 530 円)：有窗，坐椅有椅背，並且可以調整方向，一排三個座位

我訂嘅係普通客車，平唔係主因，而係冇遮冇擋，更能貼近大自然，影相亦方便啲~
不過缺點係，如果撞正落雨都幾麻煩，唔落雨但氣溫低就可能變僵屍......

今朝換票時，票上已經直接編好坐邊一卡車~
我哋去程坐三號車~

呢程車都要坐個幾鐘，而家有啲肚餓，都係喺上車前買啲嘢食先~
為求方便快捷，就買鯛魚燒~
屎塔竟然話要自己一個人食兩件，好好胃口，GOOD！

普通客車，有九排坐椅，每排可坐四個人~
我哋去到三號車，一個人都冇，任坐~

睇過地圖，去程頭七成路，左邊係山，右邊係川河，咁當然係坐右邊好啲啦~
其實如果冇乜人坐，中途點調位都得~

見到今朝嗰車滿晒，我以為今日就算唔係假期都一樣會好多人~
但等到開車，我哋呢卡車都只係得六個人，咁就真係點坐都得嘞~

頭段紅葉較少，中段開始多返啲~
總體嚟講，未算見頃，但都好滿足了~

不過呢，冇遮冇擋，就算氣溫唔係特別低，坐喺部小火車度係咁撞埋啲風度，都真係幾凍~
越接近攑平就越凍，唔知係真係越入越凍還是被冷風吹久了先覺得越嚟越凍~

部小火車過山洞時，係好貼牆，伸手出去一定可以摸到牆~
唔好話成隻手，就連伸隻手掌出去都有點怕~
好似玩緊某啲園區嘅過山車咁，好正~

黒部峡谷小火車沿途風景~

下一站「欅平散策」

嚟到欅平，站頂有個「屋頂暸望台」，就上去睇吓先~

呢條叫「奧鐘橋」，而家就行落去~

中途見到呢個告示~
咁即係去唔到「猿飛峡展望台」了......

沿途風景~

「奧鐘橋」

呢度叫「人喰岩」
遊覽呢度，要注意安全，因為岩上間中會有石頭掉下，所以現場有頭盔提供，戴唔戴就自己決定喇~

再繼續行落去就係「名劍橋」

做功課時，都唔知道名劍橋之後係咩地方，又冇乜人提，所以都冇諗住行~
不過嚟到呢度，又見有好多人行，於是就繼續行落去睇吓有咩睇~

都冇諗住行到盡頭，其實可能冇盡頭，覺得行夠就折返~

再嚟就係「欅平河原展望台」

「猿飛峡展望台」去唔到，但沿路仲有個地方叫「河原園地」
步行去河原園地，大約要二十分鐘~
沿途風景~

「河原園地」，不過呢度個景好普通，冇乜好睇~

再行落去就到盡頭~

睇返地理位置，前方就應該係「猿飛峡」

要行嘅都行晒，就上返去個站度食嘢~

行到去，仲有五分鐘就 last order，要即刻買票先得~
想食飯但所有飯類冇晒，只好叫麵~

海老天そば (大蝦天婦羅蕎麥麵)
個麵幾好食，但隻蝦就真係差得好緊要~
其實我成日覺得天婦羅同湯麵呢個組合，天婦羅另上會好啲~
咁都唔緊要啦，好多地方都唔會分開上，呢啲係我個人問題啫~
講返隻蝦，蝦唔算大隻(但佢話大蝦嘛)，炸粉厚到不得了~
我第一下夾落去蝦頭度，斷咗......
原來頭嗰三分一都係炸粉嚟，唔係蝦身，浸到腍晒，咁當然係一夾就斷啦~
蝦本身亦冇乜味道~
食到最後，成碗湯都係一堆堆嘅炸粉~