今日行程：
箱根一日遊、桃源台ビューレストラン(午餐) → 橫浜 大さん橋 → BEER NEXT(晚餐)
今日早餐喺旅館食，意外地係西式早餐，不錯~
今日行程主要係箱根一日遊~
遊箱根，有一條經典路線，我哋就跟住呢條路線走，走一圈就會返返原地~
即係下圖 1 → 2 → 3 → 4 → 1 咁走~
(圖片來自鉄道官方網頁)
呢條路線，會搭乘以下五種交通工具：
箱根登山電車
箱根登山ケーブルカー (纜車)
箱根ロープウェイ (空中纜車)
箱根海賊船
箱根登山バス (巴士)
至於部車，旅館容許我哋放低部車，晏啲先攞返~
首先由旅館行去「箱根湯本」站~
去到箱根湯本站，就去買「箱根周遊券」，咁樣乘搭上面提到嘅交通工具都唔需要再額外俾錢~
買完張 PASS，屎塔覺得奇怪，點解咁平嘅？
原來買錯咗，好彩對方話可以換返~
呢度仲有個告示，箱根ロープウェイ (空中纜車)，「早雲山」至「大涌谷」一段停駛，改以巴士接駁~
咁陣間上到去要留意吓~
跟住就搭「箱根登山電車」，由「箱根湯本」搭到「強羅」~
期間行行吓會去到盡頭，車長會步行過列車嘅另一端，以反方向再行駛，此時會改行另一組路軌繼續行程~
成段路程，總共會有三次咁樣嘅位~
好彩我哋跟足箱根一日遊嘅經典玩法，搭晒咁多種交通工具，冇貪方便自己揸車，否則真係有排塞~
噚晚咁多人湧入箱根，好自然會有大部份人喺今日嚟個箱根一日遊~
而唔諗住走回頭路嘅人，就實要揸車~
到咗「強羅」站，就要轉車~
搭「箱根登山ケーブルカー (纜車)」，由「強羅」搭到「早雲山」~
箱根登山ケーブルカー，只係一條上山嘅直路，中間設有交匯處~
先前已經知道「早雲山」至「大涌谷」一段要搭接駁巴士，嚟到早雲山，跟住人潮排隊，一出站就有巴士，跟住上就得~
沿途非常塞車，同噚晚一樣，停車嘅時間仲多過郁車嘅時間......
辛苦司機哥哥了~
由「早雲山」至「大涌谷」，搭箱根ロープウェイ (空中纜車)的話，只需約 8 分鐘~
而我哋由上巴士至仲有幾百米到大涌谷，已經用咗 1 小時 35 分鐘......
冇計啦，撞正日本假期~
突然間，巴士開咗車門，有幾個乘客落車，之後就有人跟住落，反正仲有二三百米就到，所以我哋都跟住落~
行咗無耐，路面一線變兩線，左線直去巴士站，右線轉右塞入大涌谷停車場~
就係因為咁，部巴士好快就喺我哋身邊經過，之後仲暢通無阻，冇落車嘅仲快過我哋，又唔駛行......
停車場路口完全塞死晒，揸車嚟都幾惡搞~
大涌谷呢度人頭湧湧，我諗箱根真係日本人嘅渡假地方，現場所見嘅多數都係日本人~
嚟到大涌谷，自然要試吓呢度嘅名物「黑玉子」，傳聞食一隻可以長壽三年，真係信不信由你~
不過店外標示，要 12:10 先再開賣~
睇睇時間，仲有唔夠十分鐘，就唔走遠住~
等咗一陣，就見到成車黑玉子運緊過嚟，唔知係咪真係由大涌谷上面運落嚟呢~
佢一袋五隻，仲要呢度咁多人，應該會瞬間售罄，嗱嗱聲走去排隊~
舖頭入面唔止一條人龍，究竟邊條打邊條呢？
望真啲終於知道，短嘅係排餐廳；長嘅係排黑玉子~
不過就算知道應該排邊條龍，都唔容易去到龍尾~
舖頭入面，所有通道都係人，想離開都唔容易，莫講話想行入啲......
等咗陣，開賣喇，呢刻先發現，原來排隊買黑玉子嘅人唔係想像咁多，我以為係排隊嗰啲人，其實係想買嘢結賬嘅人嚟，佢哋只係行唔到去俾錢~ XDDD
我哋買咗一袋五隻黑玉子，同埋一杯黑色軟雪糕~
黑玉子呢，其實味道同普通烚蛋冇分別；杯雪糕就少少甜味咁啦~
食完嘢就周圍行吓~
登山步道沒有開放~
咁多人排隊影隻蛋~
大涌谷隨影~
行完大涌谷，就搭「箱根ロープウェイ (空中纜車)」，由「大涌谷」搭到「桃源台」~
一條直線落到底就到~
去到桃源台，就去「桃源台ビューレストラン」食個午餐先~
陣間就係搭呢款「箱根海賊船」，都幾得意~
喺度食嘢，持箱根周遊券可獲 95 折優惠~
朝霧高原豚のカツカレー
我啲味覺開始好啲，呢個幾好食~
箱根相原ソーセージ
呢個都 OK 喎，起碼比賣相好~
食完嘢就去搭船，搭「箱根海賊船」遊覽芦ノ湖，由「桃源台」搭到「元箱根港」~
落咗船，諗住行去箱根神社，其實主要係想去神社嘅平和の鳥居~
途經見到有水上單車租，不如由水面過去仲好啦，特別啲嘛~
1500 円 30 分鐘，都幾貴，唔理喇，照殺~
回程認住 5 號碼頭，就唔會搞錯其他公司，好清楚~
30 分鐘，真係只夠你去一去神社，影吓相就回程上岸......
之後就行去巴士站，搭「箱根登山バス (巴士)」，由「元箱根港」搭到「箱根湯本」~
落咗巴士，行經商店街，買咗兩個吉士食，再行返旅館攞車~
本來有個後備景點「箱根ガラスの森美術館 」，不過今日時間上失晒預算，去唔到了~
下一站「橫浜 大さん橋」
唔去箱根ガラスの森美術館，比預期仲早咗少少開車，不過今日假期尾，返東京嘅車想必唔會比噚日少，預咗塞車~
結果，上咗高速無耐就開始塞車，塞塞吓仲見到路旁顯示牌寫住事故 16 km 涉滯......
塞成 16 公里都幾大鑊......
前面遠處都一片紅海(brake 燈)......
離遠聽到警車般嘅響號，大家就好自動靠兩旁，俾響號嘅車通過~
通過嘅原來係高速公路工程車，我哋去到前面唔知幾多公里，見返部工程車，工程車前面有 4 部電單車停埋一邊，又唔覺有啲咩，不過過咗呢度，雖然非常多車，但總算正常返~
本來預計七點到旅館，而家要九點先到~
搞埋啲手續即刻行去「大さん橋」睇夜景~
睇睇吓，屎塔話陣間去嘅餐廳 22:00 Last Order，即刻嗱嗱聲走過去~
我哋其實冇指定邊間，出發前諗到兩間，嚟到先再揀~
兩間都喺「横浜赤レンガ倉庫」內~
下一站「BEER NEXT(晚餐)」
嚟到横浜赤レンガ倉庫，兩間目標餐廳都截咗單，只可以叫飲品同甜品，儘管而家未到十點......
附近見到有間 BEER NEXT，就走過去睇吓~
接待員話而家截單，如果我哋可以即刻落單都可以~
咁我哋當然話冇問題啦~
我哋坐低咗唔夠一分鐘就落單，算係咁啦~
ステーキガーリックピラフ (Steak Garlic Pilaff)
食落感覺似豬多啲，但味道幾好~
蟹のトマトクリームソーススパゲティ (Spaghetti with Tomato Sauce and Crabs)
呢個幾有鮮味，醬汁亦唔錯~
食完嘢就行返旅館，完結今日行程~
留言列表
