《瞬間看地球》Stranger's Blog

今日行程：
【Prague】eXchange → Chrám Sv. Mikuláše(St. Nicholas Cathedral) → Chrám Matky Boží před Týnem(Church of Our Lady before Týn) → Staroměstské Náměstí(Old Town Square)  → Havelské Tržiště(Havelský Market) → Viewpoint → Karlův Most(Charles Bridge) → Kostel Sv. Mikuláše - Malá Strana(St. Nicholas Church at Malá Strana) → Nejužší Pražská Ulička(Narrowest Street in Prague) → Tons of Swans → Restaurace Mlejnice(Dinner) → Hotel Dar(Accommodation)


今次係第一次由新家出發，仲要係凌晨，搭車方面雖然已經過功課，不過都不免有啲擔心~

根據巴士公司嘅資訊，03:06 會有車到最近我屋企個站，我哋 03:00 已經到咗個站等車~
吹咗六分鐘風，等到 03:06，仲未見有車嚟......
凌晨時份，理論上班次好大機會會準時到站，而且我哋呢個站係算近總站嘅，遲到機會更低~
不過，佢個鐘同我哋個鐘又未必絕對一樣嘅，等多陣睇吓點先~
等到 03:08，終於有車喇，個心定晒，否則一係搭的士，不過凌晨當然比較難；一係自己揸車，但係泊咁多日就肯定唔平啦~

到咗機場，個機場都幾細，同埋未開始可以搞手續，要等到 04:05 先開始~
我不停提自己，陣間記得問吓行李係咪直寄到 Prague，不過機票係一次過買，仲要兩段都係同一間航空公司，呢樣其實都應該唔駛擔心~
Check-in 時，佢話我哋買機票時冇買寄倉行李，所以我哋而家寄嘅行李就要收費~
好彩我有準備，即刻 show 啲資料俾佢睇我哋係有買到~
佢睇完皺一皺眉，再望吓電腦，成個過程都係不時皺眉，之後佢揮一揮手話冇問題就俾 boarding pass 我哋，同埋話件行李會直到 Prague~
從佢嘅表情同語氣，我都幾相信佢喺電腦係搵唔到我買咗寄倉行李嘅資料，只係佢可以處理到~
我問埋佢係咪回程都有寄倉行李，佢話係，咁就放心~

咁短程嘅機，分分鐘冇嘢食，我當然唔係好恨食飛機餐，只係想有啲嘢食吓啫~
上到機，原來都仲有件三文治食吓，咁都幾好~
飛機上，多數人都冇戴口罩，包括空中服務員~
同啲人坐得咁近，我都係想戴返個口罩，呢個世界，梗有啲人咳呀打乞嚏唔會自動自覺掩埋個口，自己戴咗，自我感覺良好~

Amsterdam 機場有要求要戴口罩，不過其實戴嘅人都係一半半~
差唔多再上機時，去個小便先~
洗手間六成滿，冇人嘅廁格我入過幾個，都係塞嘅，唔理喇，是旦入個啦~
一開始去，個廁所自己沖廁，頂我去緊途中又走唔開，好彩有戴口罩，好過冇啦！
個廁所本身就係塞嘅，沖完之後滿咗八成，好彩冇瀉出嚟~
一不離二，埋尾時佢又自己沖，呢鑊真係大劑，我又未去完，佢喺八成滿嘅情況下再沖，勢必滿瀉！
我要同佢鬥快，喺我記憶入面，好似未試過小便小得咁刺激......
吖，又好彩喎，佢去到近滿時停咗喎~
乜都唔理喇，褲鍊都未拉好，離開個廁格先，陣間佢感應到有人郁佢又沖，今次一定瀉~

差唔多時間上機，拎本護照出嚟睇吓，咦？個印嘅日期係 1.04.2022 嘅？今日 30/4 喎！
再望真啲，有個字給咗喺啲花紋入面唔係幾睇到，如果真係給咗 1.04.2022 嘅，都仲叫正常啲，原來佢給咗 31.04.2022！
我唔知點解即時諗起套電視劇「2 月 29 日」，但其實兩者唔同，一個每四年會出現一次，一個係唔存在嘅日子......
呢刻都冇諗回程會唔會有問題，因為其實都要上機，到時再算，反正唔係我哋嘅問題~

呢程都係短程機，都係有件三文治，同一間公司出品，但餡料不同~
講唔上飽，但起碼唔會肚餓先~
我冇安排到咗 Prague 之後去食嘢，不過我覺得應該短時間內都唔會肚餓~

到咗 Prague，一去到輸送帶就見到自己行李，跟住指示行就已經到咗大堂~
咦？唔駛搞入境手續嘅？
呢一秒有呢個問題，下一秒已經有答案，同樣係歐盟嘛，我哋咪已經入咗歐盟境囉~

由機場去市中心，要搭巴士再轉地鐵~
喺 Prague，搭車買飛主要係計時間，分 30 分鐘、90 分鐘、24 小時同 72 小時~
如果我哋要搭嘅呢兩程車，完全唔駛等車，其實可能買 30 分鐘都得，不過邊個知駛唔駛等車喎，當然要買 90 分鐘飛啦~
同埋呢，如果行李超過指定尺寸，係要買行李票嘅，我哋個大篋就要喇~
(後記：幾日後先醒起我呢程車唔記得買行李票，好彩冇俾人捉......)
買完飛就有巴士到，到轉地鐵時又係即刻上車，其實真係買 30 分鐘都得~
不過都係講出嚟當記錄吓，當然冇「早知」呢回事~
呢兩程車，冇一個人有戴口罩，似乎大家都已經回歸正常~
咁我都入鄉隨俗，唔戴了~


今日第一站：eXchange
呢間係網上面有人推薦，地點方便，匯率又相對好啲嘅~


我預咗 £150 過嚟兌換捷克克朗(CZK/Kč)，其中一半，足夠俾已知只收現金嘅旅館同其他已知嘅支出~
剩返嘅備用，總有機會遇到其他只收現金嘅情況~
不過，出發前一星期，匯率突然明顯下跌，兌到嘅捷克克朗就比預期少咗，希望夠用~
匯率明顯下跌，無論俾現金定碌卡，整體支出會高咗，唔係好夠運仔，哈~

嚟到 eXchange 嘅櫃檯，我拎咗啲英鎊出嚟，我都未遞俾櫃檯入面嗰個人，佢就同我講：唔收蘇格蘭紙幣
出發前我已知有兩張 £10 蘇格蘭紙幣，我都有諗過佢哋未必收，不過就算唔收，兌 £130，我覺得都應該夠用~
不得不讚，對方真係夠晒眼利同經驗~
最後用 GBP130 兌換到 CZK3731，匯率為 £1 兌 Kč28.7，出發前一星期睇係 Kč3X......

之後就去旅館 check-in 放低行李先~
行去旅館時，經過舊城廣場，都幾多人~
出發前都知道，歐洲好多地方都放寬疫情相關措施，出外旅遊活動勢必暴增，而且 Prague 本來就係一個非常熱門嘅旅遊城市，多人自是正常~

撞啱仲有幾分鐘就三點，舊城市政廳上嘅機械鐘會有表演(09:00~23:00 每整點有表演)，鐘下聚集咗唔少人~


不過呢刻我哋乜都唔理，去旅館先~

旅館名叫 Hotel Dar，係近舊城廣場嚟講比較平嘅選擇，包早餐的~
Check-in 俾錢時，比原先收多 Kč158，問返原來本身個價係以歐羅為準，匯率有變，所以收嘅捷克克朗係會浮動~
咁即係之後嘅旅館都會貴咗......
撞啱佢個 contactless 壞咗，好彩有帶實體卡嚟~
最後，佢提醒我哋，呢度好多 pickpocket，要小心~


下一站：Chrám Sv. Mikuláše(St. Nicholas Cathedral)

呢間教堂閂四點鐘，我預咗隨時趕唔切嘅，不過今日到目前為止都好順利，唔駛趕都去得到~
其實睇過咁多歐洲教堂之後，我對教堂嘅熱度係有啲下降，做功課嗰時，覺得呢間都算靚嘅，但係趕唔切入唔到的話，又唔會覺得好可惜~
會去都主要因為佢就喺舊城廣場，就去行吓~

睇完之後，原來呢間都相當唔錯，啲細節位幾靚，值得入嚟參觀吓~
不過佢封咗大部份位置，可以活動範圍好細，未能細心欣賞~

下一站 Chrám Matky Boží před Týnem(Church of Our Lady before Týn)

呢座教堂同上面嗰間一樣，都係喺舊城廣場，一座擁有美麗雙塔嘅哥德式教堂~
呢間教堂有個特別嘅地方，佢係沒入咗其他建築物入面，唔知道點解會咁樣設計~


入口~


室內禁止攝影，下面相片來自維基百科~


本來計劃好聽日朝早九點先去舊城市政廳睇天文鐘表演，貪佢人少啲，不過睇完教堂行出嚟，仲有幾分鐘就四點，時間啱啱好，就走過去睇吓~
四點鐘比之前三點鐘嘅人仲多，想搵個好啲嘅位都難~
(當刻真係太多人，唔係幾影到相，呢張相都係後補嘅~)


搭正四點，有個公仔出嚟敲鐘，敲完鐘就走返入去，之後，大家都期待仲有嘢睇，不過，原來個表演已經完咗，係完咗都冇人知......


下一站 Staroměstské Náměstí(Old Town Square)

睇完天文鐘表演，就喺個廣場四圍行吓~

Památník Jana Husa (Statue of Jan Hus)


Palác Kinských - Národní Galerie Praha(Kinský Palace - National Gallery Prague)


Štorchův Dům(Storch House)

Dům U Minuty(The House at the Minute)



下一站 Havelské Tržiště
呢個市集，喺 1232 年已經有，有近 800 年歷史~

途經一間糖果店，真係齋睇都甜到頂唔順......


啲眼好恐怖，點食......


去到市集行完之後，真係失望到不得了~
賣嘅嘢冇乜趣，又大同小異，最最最主要係細到不得了，行完之後真係「吓」一聲，行完咖嗱！？


不過有樣食品都幾吸睛，Original Czech Marcipan，相信係捷克嘅傳統食品？不過就冇乜興趣試......


行完市場，其實已經完咗我今日計劃好嘅行程，時間比原定早咗成個鐘，要搵啲地方去吓~
話唔定而家去咗啲之後先去嘅地方，咁之後就可以有時間喺 River Vltava 遊吓船河~


下一站 Karlův Most(Charles Bridge)
始建於 1357 年，直到 1841 年，都係連接舊城區同布拉格城堡，跨越 River Vltava 的唯一橋樑~

真係行上邊橋之前，去周邊地方，望吓條橋先~
我事前已經搵好去邊度比較好~


橋上面都多人，不過都相信比高峰期少得多~


我事前都唔知道可以划艇遊河~


跟住行咗去個近啲嘅觀橋點~


跟住就行去條橋度~
期間，經過一條少少窄嘅行人路，有架電車經過，感覺有啲貼，呢刻其實都真係有啲驚，唔敢行住~
雖則話行人行行人路係唔會俾部電車撞到，講就咁講啫，有時傾偈會有啲自然動作，唔覺意伸咗隻手出去，都幾牙煙......


上橋之前，見到間教堂，反正有時間，又走入去睇吓~
呢間教堂叫 Kostel svatého Františka z Assisi(St. Francis Of Assisi Church)~
(睇返相先知道忘了影教堂外部，以下教堂外部相片來自維基百科~)

行完教堂出返嚟，見到有個花圃，啲花開得好靚~

花圃呢邊望過對岸風景不錯~


上橋前，先要穿過舊城橋塔，Staroměstská Mostecká Věž(Old Town Bridge Tower)~


橋嘅兩旁，據聞有 30 座雕像，不過都係複製品嚟~
橋上面好多賣藝者，有表演音樂嘅，同時賣佢哋自家嘅 CD，有畫人像嘅，有賣精品嘅~

遊人都幾多，之後幾日，唔知會唔會去到邊都咁多人呢~


據說有三座雕像，上面有啲地方，依照傳說去摸，就會帶嚟好運~
不過遊人實在太多，加上我對呢啲傳說都冇咩大興趣，所以都冇話搵佢出嚟~

回望返舊城橋塔~

橋上風光~

行到尾就到小城橋塔，Malostranské Mostecké Věže(Lesser Town Bridge Towers)~


光線足，時間仲早，又搵個地方去吓~


下一站 Kostel Sv. Mikuláše - Malá Strana(St. Nicholas Church at Malá Strana)
呢間教堂，個名同舊城廣場嗰間教堂一樣，所以都經常有人提起，搞到我都好有印象，就過嚟行吓~

穿過小城橋塔後嘅呢條街好熱鬧~


見到間小食店，排晒長龍，龍尾過晒條馬路~
八卦行埋去睇吓，嘩，佢嗰卷嘢上面全部都係糖咁嘅嘢，我哋估都應該好甜吓~
仲好，唔駛諗排隊試~
(後記：原來呢種食品喺捷克好出名，係肉桂卷嚟~)

去到教堂，原來要收費嘅，咁就唔入嘞~



下一站 Nejužší Pražská Ulička(Narrowest Street in Prague)
據說係全布拉格最窄嘅街道~

途經 Shakespeare 莎士比亞書店~


差唔多到最窄街時，有團旅行團剛到，幾十人圍住街口~
不過幸運嘅係，佢哋停留咗兩分鐘就拉隊走人~

最窄街本身我覺得冇乜賣點，主要係窄到要裝紅綠燈呢吓幾有趣~

落到去，只係停留咗幾秒鐘，連現場環境係點都好似冇乜印象就已經俾人趕......
有個男人向我重複同一句說話，由於口音好重，我頭一兩次聽唔到佢講乜~
第三次，我聽到喇，佢話：Restaurant or upstairs
佢語氣好差，好似我做咗啲咩錯事咁~
咁好啦，我就行入啲，叫埋屎塔一齊走，個男人跟住我行入啲，再重複 Restaurant or upstairs~
我喺行四五步去搵屎塔嘅呢段時間，周圍望吓，先意識到下面呢度係一間餐廳嚟，並沒有通向其他地方嘅道路~
可能呢位阿叔真係經常被遊客騷擾，所以語氣差咗啲~
不過阿叔你又試吓喺我角度諗吓，其實我落嚟嗰吓，都唔知呢度係你嘅地方嚟(假設係佢嘅地方)，唔駛搞到我做錯咗啲咩咁吖~
上返去嗰吓，我見到原來係佢控制盞紅綠燈嘅~

呢件事，我係有啲想法嘅，但其實未必係事實，真係純粹一啲推測~
盞紅綠燈係佢控制嘅，其實盞燈係咪佢(佢好有可能係間餐廳老闆)裝嘅？
如是，咁係為咗噱頭定為咗有需要？
如果為咗噱頭，其實你冇得又要吸引人落嚟，又唔想非顧客走落嚟~
如果唔係你裝嘅，究竟你喺度開餐廳時，有呢盞燈未？
總之，意想不到嘅情況出現咗，就睇吓點樣改善，冇辦法就只好接受~
你咁樣將你嘅不滿發洩喺其他唔關事嘅人身上係大家都唔會開心~


下一站 Tons of Swans
純粹係一個河嘅岸邊，有啲鴨同天鵝，最主要係一個觀賞 Karlův Most(Charles Bridge) 嘅好地方~
Tons of Swans 呢個名，我記得係喺 google maps 度睇返嚟，不過之後再睇又冇，當係囉~

呢個位風景相當不錯~

睇夠，都係時候去食飯了~


下一站 Restaurace Mlejnice(Dinner)

喺 Tons of Swans 行返轉頭，見到有個 boat trip 檔口，就走埋去睇吓~
50 分鐘 Kč350，比我出發前睇到嘅 Kč290 貴少少~
但 Kč290 上船點比較遠，如果我要玩 boat trip，我願俾多少少玩呢個~
就記低佢，睇吓之後玩成點，有冇時間加插 boat trip 行程~
今日已經去咗啲本來之後先去嘅地方，如果之後要加插 50 分鐘嘅 boat trip，其實都有相當可能性~
呢隻 boat trip 係用船仔，好似正過大船咁，希望安排到啦~


途經有間舖頭有大麻嘅副產品賣，我淨係知荷蘭先合法，所以呢度見到嘅，可能唔係嗰種大麻~
行咗個圈，其實都有啲興趣試吓，本來諗住買啲返屋企，不過即時都諗到，過關可能會有問題，都係咪搞~


呢隻船好定，一啲都唔郁嘅，唔知係河水夠靜，定還是隻船其實係固定咗嘅建築物~


嚟到 Restaurace Mlejnice，一人一杯飲品，一人一個主菜~

飲品呢，其實我自己真係飲水多，平時好少叫嘢飲，不過歐洲文化普遍都會叫杯嘢飲先，否則可能被視為冇禮貌，所以都係叫啦~
一時間都唔知叫咩好，求其叫咗杯 Orange juice~
又細杯又酸，過後睇返餐牌，早知點 Hot Chocolate~
屎塔就叫咗杯 Home-made lemonade，唔錯~


Beef cheeks on root vegetable and red wine, Carlsbad dumplings
牛頰肉好夠稔，味道不錯，有啲紅色一粒粒唔知咩嚟，都幾好味，不過肉嘅份量稍嫌覺得太少~


Roasted duck leg with white cabbage and potato gnocchi
鴨腿皮幾脆，味道好，但唔算好特出，同埋食落有啲膩口~


埋單時，侍應煞有介事咁指住張單話價錢不包含服務費~
再仲指住張單嘅下面，話建議貼士為 10%，而張單仲好「貼心」咁計埋 10% 同 12% 即係幾多錢~
之前上網睇人講，好多都話貼士一般為 3%~5%，甚至有啲話尾數加到 5 或 0 便可(咁就真係好少)，而覺得服務差的話係可以唔俾~
侍應煞有介事咁樣講，我真係覺得有少少呃遊客咁款，但如果網上嘅講法可能不合時宜呢？會唔會而家真係普遍都係 10% 呢？
我俾多少少我唔會唔開心，但佢收到比一般正常為低就一定會唔開心，所以，最後我都係俾咗 10% 貼士~
再講，我相信全世界嘅飲食業，呢兩年都難做，而且捷克駛費唔高，就唔好咁計較~

侍應聽到我話俾 10%，佢表現得好開心，好似成功氹到個傻仔咁~
而事實上，個侍應俾我感覺其實都舒服嘅，我都樂意做呢個傻仔~

離開時，門口有十幾人排緊隊，好彩我哋嚟得早~


上到旅館房，開窗望吓條街，一開窗，勁嘈，有個男人講嘢勁大聲~
隔咗一陣，真係頂唔順，閂返窗，當然會細聲咗，但仍然覺得騷擾~


之後又到門外有個男人講嘢勁大聲，好鬼煩~
不過，我發現，下面嘈，上面就唔嘈；上面嘈，下面就唔嘈，我懷疑噪音係來自同一個男人......

我本身用緊嘅 sim 卡上網，可以直接喺捷克繼續用，原來諗住好正啦，不過嚟到捷克，上網就變得好慢~
聽日要租車，要用 google map 做導航，但上網咁慢，應該用唔到~
趁旅館個 wifi 唔算太慢，下載定 google 嘅捷克 offline map 穩陣~

今日隨影~