《瞬間看地球》Stranger's Blog

今日行程：
【Prague】Staroměstská Radnice(Old Town Hall) → Staroměstská Mostecká Věž(Old Town Bridge Tower) → Klementinum → Coffee & Waffles(Lunch) → Prašná Brána(Powder Tower) → Church of Saints Cyril and Methodius(Kostel sv. Cyrila a Metoděje) → Španělská Synagoga(Spanish Synagogue) → Budget Car Rental → 【Karlovy Vary】Pizzeria LOCALE(Dinner) → A. Dalia(Accommodation)


食早餐前，喺間旅館入面周圍行吓~

頂層係 Café，不過未開門，冇得行出去~


食早餐嘅地方喺旅館嘅地庫，睇個環境，以前可能係酒窖嚟，幾正~


早餐就普通西式早餐，選擇夠，味道不錯~
我哋落嚟時就冇乜人，而家到咗 08:30，已經坐滿咗，啲人都算早起身~

食完早餐，諗住去個洗手間先出去玩~
由於我哋已經 check-out 咗，冇得返房去，只好問吓接待處小姐邊度有洗手間~

去完之後，好似有條快啲嘅路出去，不過就唔小心入咗佢哋間餐廳~
未開始營業，但可以進入~
入面有個郁緊嘅機械鐘，又幾正，真係估佢唔到~



今日第一站 Staroměstská Radnice(Old Town Hall)
有近 700 年歷史嘅市政廳~

原先嘅計劃係今早 09:00 睇天文鐘表演，不過個表演噚日睇完，今日就唔睇喇~
行過去時都冇留意時間，過咗 09:00 都冇所謂~

2020 年做功課時，要入舊市政廳，要跟 tour 入，限時限刻要 book 的~
2022 年，可以自己入內慢慢睇，亦可以跟 tour 入，我哋會揀自己行~

舊市政廳入口~


入口處嘅天花同牆壁有啲畫~

舊市政廳開 09:00，09:00~10:00 呢段時間買飛有半價優惠~
去到舊市政廳售票處，有十幾二十人排緊隊~
條龍好慢，個個都好多對答咁，比預期耐先完成一個~
我哋前面係一個大人加兩個小朋友，最多對答係佢哋，買飛啫，咁多交流嘅？
最後等佢哋等咗超過五分鐘，買三張飛可以買超過五分鐘，真係好想知佢哋搞乜......

輪到我哋喇，我哋一行埋去就講明係買 self-guided 同 adult，等佢唔駛問咁多，爽手啲，大家好，包括排我哋後面嘅人~
點知佢仲有嘢問我哋......
問我哋買唔買介紹舊市政廳嘅小冊子，又問我哋搭唔搭𨋢上塔頂~
搭𨋢要成 Kč100(約HKD$35)，好貴！
六七層樓高咋喎，我寧願行吓~

雖則話嚟到時有人龍，以為都多人趁半價時間嚟遊覽，點知買完飛望一望，原來我哋後面係一個人都冇......

舊市政廳嘅遊覽主要分四部份：Gothic tower, Historical halls, Chapel & Romanesque-Gothic basement
其中 Romanesque-Gothic basement 係要另外買飛嘅，我哋就唔打算睇嘞~

上塔頂嘅位置，同售票處喺同一層，就上塔頂先~
呢部就係收成 Kč100 來回嗰部𨋢，又幾靚喎~

我哋就行圍繞住佢嘅斜路~


搭𨋢就直上到塔頂，我哋行嘅，仲要轉梯~
第二段樓梯有交通燈管制，要等綠燈先可以行~


塔頂風景好好~

上嚟要等燈，落去都要等燈~


食早餐時見啲人都早起身，以為都多人開始活動，不過其實塔上塔下(廣場)都唔多人~

之後就到 Historical halls & Chapel~

舊市政廳室內隨影~

下一站 Staroměstská Mostecká Věž(Old Town Bridge Tower)

舊城橋塔開 10:00，10:00~11:00 呢段時間買飛有半價優惠~

沿途經過間遊戲機中心，走咗入去睇吓~
主要擺放大型遊戲機，仲有夾公仔機~

行完遊戲機中心返出嚟，睇吓時間，咦，原來時間緊迫，要立即起程去舊城橋塔，否則去到就會過 11:00，冇咗半價~
我哋而家正常步速行過去都趕得切，所以就冇特別同屎塔講~

行行吓唔見咗屎塔，望返轉頭，原來佢睇緊啲大麻產品，佢都係心思思想買想試吓~
我拉住佢，同佢講，而家冇咁嘅時間，否則會冇咗半價，我遲吓再帶佢返嚟~

再次嚟到舊城橋塔~


到咗入口行入幾步，轉右係落地庫，寫明係 paid area，咁我哋未買飛，正路售票處唔會喺地庫~
向前行，開始係向上嘅樓梯，但又有個箭咀喺地下係向反方向嘅~
不過都冇得揀，向上行咗先算，反正落地庫肯定唔啱~

樓梯夠兩個人同時上落，唔算窄，兩面都係牆壁，一路上一路上，其實上到咩高度係完全冇概念~
現場又完全冇指示，都唔知啱唔啱~
最後，終於見到入口，係售票處嚟，好彩冇行錯，否則再搵路的話，一定過 11:00~
上到售票處，有一對男女都係啱啱到，唔知點解，佢同售票員又係好多對答，時間一分一秒咁過......
最後，買飛嗰刻係 10:53，其實緊又唔算好緊嘅~

上塔頂其實只需 Kč150(約 HKD$50~52)，就算冇半價，都絕對唔算貴~
只係知道佢有，而我又安排到，而又實行到，偏偏就係咁唔好彩到咗都買唔切飛，就會覺得好唔抵~
如果原先冇呢個優惠又或者我安排唔到，咁又好樂意俾原價~

現場顯示可以俾信用卡嘅，不過埋到去佢又話只收現金，可能部機壞咗啦~
最怕遇多幾次咁嘅情況，現金會唔夠用~

買完飛就繼續向上行，行到見到第二度門，有個男仔企喺門口，問我哋攞飛睇，佢要 scan 的~
喺呢層行咗個圈，冇乜嘢睇就繼續向上~

終於嚟到塔頂，風景好好~

望查理大橋呢邊嘅風景非常靚！我哋都停留咗好耐先捨得走~

上嚟之前，有個 paid area 喺地庫，而家就落去睇睇~
嗯......地庫好細，唯一可睇嘅就係呢個螢幕，但螢幕又冇嘢睇......



下一站 Klementinum
Klementinum 的歷史可以追溯到11世紀一座朝拜聖克萊門特的小聖堂。在中世紀，多明我會建立了一座修道院，在1556年改為耶穌會大學。1622年，耶穌會將查理大學的圖書館轉移到 Klementinum，而學院在1654年併入了查理大學。耶穌會的存在直到1773年，那時奧地利女皇 Maria Theresia 將 Klementinum 建成一座天文台、圖書館，和大學。1990年起，它成為國家圖書館。

進入 Klementinum 係要跟 tour，每半小時一團，根據官網所講，每團上限為 25 人，但到網上售票時，每團只有 23 人~
由於呢啲隨時會冇位嘅，所以出發前就喺網上買定飛，官網亦冇提及現場買飛得唔得~

個團有四樣嘢睇，包括：Observatory hall, Baroque library hall, Meridian hall, Astronomical tower
不過我一心入去係想睇有「最美圖書館」稱號嘅 Baroque library hall~

我買嘅時段為 12:00，15 分鐘前要到達，而家係 11:25~
仲有 20 分鐘，我提議不如去返之前買大麻產品嗰度~
雖然未必趕得切，大不了中途返轉頭，睇情況而定~

行到中途，又見到一間賣大麻產品嘅舖頭，咁掂啦，又唔係一定要去返之前嗰間~
非常多唔同種類嘅產品~

最後我哋買咗 Cannabis milk chocolate~
(後記：小小苦味，我哋分幾晚食，有時食完就瞓，有時食完個幾兩個鐘先瞓，一啲感覺都冇......)


我哋準時 11:45 去到學院~


俾咗購票証明佢睇，就叫我哋企埋一邊等~
等咗五分鐘都係得我哋兩個，唔通冇其他人？

喺等待嘅期間，發現咗一樣百思不得其解嘅事~
可以現場買飛，但買即場的話，要俾現金；唔係即場的話，先可以俾卡~
有人嚟買 13:00 飛，售票員同佢講 12:30 仲有兩個位，不過就要俾現金，問來者有冇興趣~
即係已經去到 12:00 & 12:30 呢兩場都只收現金~
真係點諗都諗唔明，點解有咁嘅安排/規矩~

等多幾分鐘，陸陸續續有人嚟，越嚟越多，開始冇位企~
其實，點解要人早十五分鐘嚟？根本冇意思，我哋 11:45 嚟到，企足 15 分鐘，期間咩都冇做過~
驚有人遲到？遲到就責任自負，我哋嚟到淨係睇吓我哋有冇買飛，個團開始時又望咗一眼，係咁多，嘥咗我哋十五分鐘，仲要得我哋咁聽話~
個團開始時，一樣有人遲到，後來加入~
人齊時，我數過，唔係 23 人，唔係 25 人，係 32 人......

人太多，位置太少，好多時係大家靠牆圍個圈聽導遊講解~
但其實現場位置係唔夠所有人貼牆圍一個圈的，大家又唔識大家，其實企得太貼係好鬼尷尬~

相就冇乜點影，太多人面對面，舉機影相好似影人咁，唔係幾好~
參觀次序為：Observatory hall, Baroque library hall, Meridian hall, Astronomical tower

入大門前，見到告示話 Baroque library hall 禁止攝影，不過入到嚟，導遊話可以，但只限手機同埋冇閃光燈~
Library 前有個圍欄，頂多俾三至四個人平排，所以就要排隊參觀，想望耐啲都有壓力......

Baroque library hall 係幾靚，不過現場幾暗吓，又冇乜時間欣賞，所以其實印象真係冇乜，冇得細心觀賞~

之後去 Meridian hall 同 Astronomical tower，沿途有唔同嘅樓梯，有螺旋型，有普通木樓梯但感覺唔太穩實嘅~
參觀者當中，有人拎埋篋嚟，有人著短裙嚟~
拎篋嚟嘅，真係相當痛苦，因為啲樓梯，冇拎嘢就咁行都麻煩，一係又窄又不停螺旋型咁上；一係每步都要好小心咁行，拎埋篋行，真係想像唔到有幾咁麻煩~
著短裙嚟嘅，仲要係鬆身短裙，佢都顯得相當尷尬，基本上係一定，係一定會走光，佢有男伴一齊嘅，所以上樓梯時，個男嘅一定係跟佢尾~

塔頂風景又係好正，不過今次已經係今日第三次登塔頂看風景，真係有啲飽~
計劃行程時都冇留意，係而家上到嚟先有呢個覺悟~
不過又咁講，其實每個塔頂望出去嘅風景都唔同嘅~

Astronomical tower



下一站 Coffee & Waffles(Lunch)
呢間餐廳有一個幾奇怪嘅賣點，就係窩夫上配搭鹹味食品~
興趣係冇嘅，預咗唔會好食，只係好似冇乜地方見過，就試吓佢~


嚟到門口，見到有六個人等緊，似乎都要等好一陣子先入得座~
嗰六個人係一齊嘅，咁就唔知有冇機會攝到啲二人位，先過佢哋嘞~
最後都係人哋先，我哋後，前後等咗十五分鐘，其實都算快~

等位等十五分鐘，算快；嘢食等咗半個鐘，算慢嘞卦......
Cappucino  & Home-made lemonade


Thai waffle
其實好唔夾，窩夫係好食嘅，但泰嘅部份普通，加埋就真係麻麻地，純食噱頭~


Eggs Benedict Salmon
served on waffle and holland sauce
蛋還好，而三文魚刺身，唔夾嘅程度，比泰菜更甚，只可以話入到口嘅~



下一站 Prašná Brána(Powder Tower)
火藥塔修建於1475年，是布拉格的13座城門之一。最初興建時，它通過小橋連接皇宮。但是它尚未完工，在1485年，國王 Vladislav Jagellonský 就將他的住處遷到了布拉格城堡。但是，火藥塔對於君主們仍然重要，一直到1836年之前，他們都要通過此門前往 St. Vitus Cathedral 加冕。隨著城市在老城牆之外的增長，火藥塔的重要性降低。到了17世紀，它被用作火藥儲存設施，因此而得名。

行過去火藥塔時，經過舊城廣場，有反俄羅斯活動~


之後經過 Museum of Torture 同 Gallery Of Steel Figures~
Museum of Torture 呢，做功課時，官網話暫停開放嘅，亦冇講幾時開返~
而家經過見到開咗，睇屎塔反應就知佢有興趣，不過時間關係，今日我就安排唔到喇，睇吓過幾日再返嚟布拉格時安唔安排到啦~
Gallery Of Steel Figures 呢，我本身冇乜興趣，亦冇諗過屎塔會有興趣，點知屎塔又話想睇，咁又睇吓過幾日點安排啦~
Boat trip, Museum of Torture, Gallery Of Steel Figures......邊有咁多時間......都唔知點找數......

經過見到 Dům U Černé Matky Boží(House of the Black Madonna)~

終於行到火藥塔~
火藥塔同查理橋塔有啲似，但明顯係宏偉好多~
一樣可以上去參觀，不過我就冇打算上去~
(如果本來有安排上去，今日係第四次上塔頂~ XDDD)

穿過火藥塔，到佢嘅另一面，黐喺佢隔籬嘅係 Obecní Dům (Municipal House)，係一個音樂廳嚟~



下一站 Church of Saints Cyril and Methodius(Kostel sv. Cyrila a Metoděje)
一間有近 170 年歷史嘅教堂~

行過去時，經過 Billa 超市，就走入去買支水~
超市啲水真係夠晒平，1.5L 只係賣 Kč8.XX，出面街舖頭係賣緊 Kč49.9~Kč99.9！

喺布拉格，有兩間好靚嘅教堂我幾想去嘅，呢間係其中一間~
當然，喺布拉格，靚嘅教堂又點止兩間，但呢兩間嘅靚，我印象中好似冇乜喺其他地方見到~

教堂隔籬有 food truck party~
現場播放嘅音樂非常大聲，喺教堂入面又一啲都聽唔到喎~

下一站 Španělská Synagoga(Spanish Synagogue)
Spanish Synagogue 是一座摩爾復興式的猶太會堂，建於1868年。第二次世界大戰期間，德國人將這座建築改為奪取的猶太人財產的倉庫。1990年代後期進行了修復，由布拉格猶太博物館所有，用作博物館和音樂廳。這座猶太會堂雖然名為西班牙會堂，卻從來沒有被西班牙猶太人或塞法迪猶太人使用，事實上是早期猶太教改革派會堂。

今次要搭路面電車過去~
車上有售票機，用卡俾錢就得，方便~

做功課時，其實都幾掙扎，因為要參觀西班牙會堂，就要買綑綁式嘅套票~
套票有分兩種：Prague Jewish Town (Kč500 / 約 HKD$170) 及 Jewish Museum in Prague (Kč350 / 約 HKD$120)
Prague Jewish Town 包八個地方；Jewish Museum in Prague 包七個地方~
Prague Jewish Town 包嘅八個地方入面，其中七個，係同 Jewish Museum in Prague 一樣~
Prague Jewish Town 多出嘅一個地方為 Staronová Synagoga(Old-New Synagogue)~
套票有效期為七天，七天內可進入每個地方一次~
而八個地方入面，我只係對西班牙會堂有興趣，如果只為西班牙會堂而買套票，咁就實在太貴~
不過最後都係決定去，話唔定其他會堂都有啲吸引嘅地方呢，就算冇，其實都冇所謂嘅，到此一遊囉~

今日，我哋淨係會參觀西班牙會堂，張飛七天有效，過幾日會再返嚟布拉格，到時有時間剩就會過嚟睇埋其他，睇到幾多就幾多~

西班牙會堂門面簡潔~


內裡，有少少金碧輝煌嘅感覺~

行到一半，我醒起買飛嗰時，售票姐姐同我哋講閂五點，但網上面係話閂六點嘅~
再諗吓，猶太地方，好多都係星期六休息，所以有啲喺星期五就會早收一個鐘~
我以為自己諗通咗，原來越諗就越錯~
今日係星期日，唔係星期五，關咩事呢......
再拎返佢張小冊子嚟睇，係講閂六點喎~
我諗緊，如果所有地方都係閂五點，我之後嗰啲就好可能去得好少，咁係破壞晒我嘅計劃~
咁樣買咗嘅套票就好唔抵喇~

走嗰時出去問返個售票姐姐，我拎住張小冊子，指住個 18:00 問佢~
佢帶點尷尬咁答我：係呀，改咗收 17:00，不過網上面同小冊子都未改~
咁都得？小冊子印晒唔想浪費，又費事逐張改，我明吖，網上面呢？點解唔改呢？點解呢？
不過反正剩返嗰啲興趣唔係話好大，去到幾多就幾多，順其自然吧~

出咗西班牙會堂門口，右邊會見到 Statue of Franz Kafka，著名作家卡夫卡嘅雕像~



下一站 Budget Car Rental

時間差唔多，而家要返旅館攞返行李，再過去 Budget Car Rental 租車~
行到去 Budget Car Rental 喺 google map 嘅位置，完全唔覺有 Budget 嘅蹤影~
根據返個地址去搜尋，其實個地址唔詳細，只係成個火車站嘅地址~
我問咗幾個人，完全冇人知......
我開始有啲擔心，但咁大間公司，冇理由冇咗都俾人 book 咖~
望向遠處，見到有個停車場，有 Budget 個 logo，就諗住過去睇吓~
不過拖住個篋就無謂周圍行，反正未必啱~
於是我就留守睇住個篋，屎塔過去探個究竟~

隔咗唔知幾耐，終於見到屎塔喺對面(隔住六線來回主幹道)出現~
佢走咗入 SixT 問人，不得要領，又周圍行睇吓~
我就繼續搵人問吓，不過都係冇結果~
咁大間租車公司竟然冇本地人知，好弔詭~

又隔咗唔知幾耐，屎塔終於有訊息俾我，係Budget 本身嘅指示相嚟~
跟住佢約我喺某個地方匯合~
見到面之後，佢話我知，啲指示係喺攞車還車處影嘅，但 office 唔喺嗰度~
吓？係人租車都要先去 office 搞手續先再去攞車，你個指示喺個停車場度？
邊個天才諗出嚟......


最後原來 office 喺火車站入面，並非地面~
我不得不承認，我都有啲問題，睇過 google map 嘅定點位之後，太過一廂情願以為 office 會喺地面~
喺火車站入面，我當你冇權周圍擺指示牌，咁喺官網講清楚啲得嘞卦？
官網得個火車站本身嘅地址，就唔可以將你喺停車場嘅指示放埋上個網度，等人易搵啲咩？
又或者講埋火車站入面邊個舖位都好吖~
無論點做，都好過乜都唔講啦！

搵 Budget 用咗大半個鐘，嘥晒啲時間，主要問題係會遲咗到今晚嘅旅館 check-in，麻煩到人~
喺 office 辦嘅手續，過程順利，收咗我 Kč20000(約 HKD$7000) 按金~
之後佢就俾咗張紙我哋，上面有教點樣去攞車~
不過屎塔係由停車場過嚟，自然識行返去停車場~

期間職員有講過，會經過一度閂咗嘅門，要大力推先推得開嘅~
好嘞，到我哋經過佢講嘅呢度門，我用盡飲奶力都推唔開囉......
不過唔經呢度門其實都冇問題嘅，行落車路行入停車場都可以~

跟住個車牌去搵部車，頂，唔係俾部咁醒目嘅車我哋呀~~~


好彩，車牌有相似啫，最後部車係黑色嘅 Škoda Fabia~
記得十幾年前去北京時，喺機場見到呢個牌子，係我哋第一次知道有呢個牌子~
我哋當時話個讀音係「是鳩旦」，我深信我哋唔係唯二兩個會咁讀啦~
真係估唔到會有機會揸~

我揸過嘅車極小，對車嘅認識又係極小，呢部車 1.0 公升引擎，絕對係我揸過同級最大部，尤其個尾廂，一公升車嚟講，大得驚人！
我孤陋寡聞，真係未揸過咁大部嘅一公升車~


下一站【Karlovy Vary】
到埗後，我哋會先去旅館「A. Dalia」check-in 先

部車力水以一公升嚟講正常，冇力係一定，但還好~
我以為咁大部車夾一公升引擎，力水應該明顯不足，佢又唔係，唔知係咪啱啱換完油，仲好鬼順~

我拎咗屋企部車個電話座過嚟用，不過可能抆過就用唔返，成日甩......
而家仲要揸成兩個幾鐘車，睇唔到導航，點搞......

上公路前，唯有靠屎塔拎住同帶路~
上到公路，知道有一大段路都係沿住公路行，屎塔就有時間諗方法搞吓個電話座~
睇住佢試咗好多次都失敗，但佢屢敗屢戰，終於，俾佢試到成功......喺佢嗰邊咋......
佢嗰邊成功係冇用，用喺我嗰邊成功先得~

我哋搵咗個安全地方停好車，就試吓移過嚟我呢邊~
試咗幾次，得咗！
佢又好嘢喎，佢成功係因為唔依常規去用，佢上下掉轉嚟用，又俾佢成功到~

一路繼續行，突然醒起，頭先租車時唔記得問一樣好重要嘅嘢！
就係高速公路費用係咪包埋，如否，咁我要點俾錢呢？最怕俾人告咋~
我記得睇過就係包埋嘅，但真係唔記得喺邊度睇到~
如果包埋，會唔會好似德國咁，有個貼紙要貼喺擋風玻璃呢？
但係而家用電子化唔駛貼又一啲都唔出奇~

於是我叫屎塔搵個 email send 過去問吓~
不過一般呢啲 email 都真係未必有人覆，仲要而家已經黃昏~
咁都冇計，行住先~

之後我再叫屎塔 send message 通知旅館，我哋會遲啲先到到~

我又唔記得睇吓捷克高速公路限速幾多，都唔緊要嘅，跟大圍行就得~
不過跟大圍行都好，個個都飛住去，最慢嗰部車都超過 140km/h~
我長時間匿喺慢線，唔敢行太快，係遇到貨車先爬吓頭再入返慢線~
(後記：事後睇返，原來高速公路限速為 130km/h)

Book 旅館嗰時，有問會幾點到，我哋話 19:00 ~ 20:00 到~
我哋而家到嘅時候係 20:05，不過搵間嘢搵咗五分鐘，即係 20:10 先到，我諗，唔離譜卦......

接待我哋嘅，係位伯伯，我哋一見面打完招呼就為我哋嘅遲到道歉，伯伯笑住話唔緊要~
伯伯非常和善同健談，我哋問佢行高速公路點繳費，佢話要去油站買 vignette 貼喺擋風玻璃~
啊~~~即係同德國一樣，佢知道我哋冇買，話我哋好好運，冇俾警察捉~
(但其實我心底裡仍然覺得租車包埋嘅~)

伯伯又問我哋聽日會去邊度玩，我就拎個行程出嚟~
伯伯見到我哋會去 Obora Svatý Linhart(St. Linhart Game Reserve)，話呢度冇嘢睇，極其量見到一兩隻野豬~
(Obora Svatý Linhart 係一個野生動物園)
佢見到我哋之後會去【Klatovy】同【Český Krumlov(CK 小鎮)】，即刻按住我哋嘅動線，推介咗幾個地方俾我哋，非常有心！


跟住伯伯帶我哋入房，佢問我哋來自邊度，之後佢話佢年輕時，因工作關係，去過亞洲好多地方，每個地方都會住幾個月甚至更耐，但就未去過香港~
傾完一輪，佢話佢哋聽日有事，朝早五點就會離開，早餐佢會放外面，我哋用完餐後，就咁放喺房就得，而鎖匙就照插房門就得~

呢間旅館，冇私人浴室，要共用的，但佢同我哋講，個浴室係我哋專用，冇其他人會用~
佢仲喺浴室門口黐咗張紙~


呢度得兩間房，我哋係 1 號房，咁 2 號房啲人呢？唔駛去洗手間？
如果 2 號房今晚冇客，其實又唔駛黐紙啦，實係得我哋用~
唯一解釋係 2 號房有私人浴室，但其實我唔覺得有囉......

最後，佢俾咗張 coupon 我哋，話去呢度食嘢有 5% OFF~
我睇吓張 coupon，咦，就係我定好今晚會去食飯嘅地方(Smíchovský Pavilon)~
不過又咁講，呢頭其實得一間餐廳......又唔係真係咁蹺嘅......

同伯伯傾完偈，屎塔話我知，Budget 覆咗佢，捷克境內嘅高速公路費用係已經包埋，安樂晒~


下一站 Pizzeria LOCALE(Dinner)

餐聽(Smíchovský Pavilon)閂 22:00(後記：原來星期日閂 21:00)，我哋到嘅時候係 20:50，覺得都唔會太夜吖~
點知推門入去時，侍應話已經閂門......
我知道附近係冇其他餐廳，唯有問佢知唔知道度仲有餐廳未閂~
佢一時都有啲唔知點答，當佢知道我哋有揸車嚟時，佢即時就推介咗間餐廳(Pizzeria LOCALE)俾我哋~
間餐廳喺市中心，揸車落去十分鐘就到，間餐廳閂 22:00，佢話應該冇問題~
咁我哋就即刻動身去攞車再揸車落去~

呢刻，其實我有個主意，佢推介間餐廳閂 22:00，我覺得去到都過 21:00，好似唔係幾好~
不如去另一間，呢間餐廳(U Švejka)，我計劃聽日下午會去嘅，閂 23:00，理論上會更好~
不過，google map 帶咗我行一條我唔敢行嘅路，好窄，僅夠一架車過，而且好斜~
我寧願捱餓都唔會冒險揸車行落去~
於是我就掉頭，等 google map 帶我行第二條路~
佢終於帶我行返大路，不過，行到中途，條路夜晚係唔准入嘅......
咁冇計喇，唔想再嘥時間，硬住頭皮要去 Pizzeria LOCALE~

去到 Pizzeria LOCALE，我去泊車先，屎塔就飈去餐廳問吓仲可唔可以點餐~


我知，都成 21:15，人哋閂 22:00，梗係唔想仲有人嚟，但唔咁做，今晚就要捱餓喎，厚面皮啲都要啦~
屎塔問佢嗰時，對方有啲勉強咁答可以~
我上到去時，首先道咗歉先，再話我哋會好快~

嗱嗱聲睇餐牌，叫咗嘢飲先~
飲品方面，佢話剩返 soft drinks，OkOk，就求其叫咗可樂同雪碧~

食物方面，比較易揀嘅一定係 pizza，但其實我哋唔敢叫 pizza，驚焗要時間~
最後好快手咁叫咗兩個主菜~
Linguine with shrimp on garlic, cherry tomatoes and chili
有啲鮮味，幾好，略嫌辣咗啲，尤其底嗰啲比較多汁嘅，幾辣吓~


Grilled pork tenderloin
好嫩，好好食！又有我鍾意嘅火箭菜~
只可惜而家三扒兩撥但求快趣，未能好好享受~


由入嚟坐底，叫飲品叫嘢食，等上菜，食完再賣單，用咗半個鐘，真係盡晒力~
我哋有用到旅館俾嘅 coupon，不過貼士就俾多啲~


到走嗰時，佢哋態度唔同晒，明嘅，我哋入嚟嗰時，將心比己，梗係唔樂見呢個鐘數仲有人嚟，但見我哋又道歉在前，速食在後，我諗佢哋條氣應該都順返卦~
總之就唔該晒，今晚唔駛捱餓，仲要呢餐非常不錯~
我臨走時再 say 多次 sorry 同埋話啲嘢好好食，大家都開心咁 say goodbye~

返到旅館，就要研究吓伯伯推介嘅幾個地方~

Bečov Castle (google map 只係搵到 State Castle Bečov)
收藏著捷克第二珍貴嘅歷史文物~
星期一休息，聽日正正就係星期一，咁唔駛諗~

Loket Castle
一座有近 800 年歷史嘅中世紀城堡~
之前做功課時，有睇過吓，不過就冇將佢加入行程內，點解就唔記得嘞~
不過而家經本地人一介紹，就突然變得有興趣~ XDDD

Plzeň
伯伯話呢度有世界上最好嘅啤酒~
可惜我哋唔飲酒嘅~

其實呢，我哋係冇可能去晒，因為啲旅館係訂好晒，冇得任意改行程~
一日之間要遊覽晒 Karlovy Vary, State Castle Bečov, Loket Castle, Plzeň 同 Klatovy，就算一日有 48 小時都未必得......
所以呢，最後就只會加插 Loket Castle，同埋好可能去唔到 Klatovy 喇~
我哋去 Klatovy，其實只係去 Katakomby Klatovy(Catacombs Klatovy) 睇乾屍，如果要取捨，我哋會去咗 Loket Castle 先，睇時間再決定去唔去 Catacombs Klatovy~

今日隨影~