今日行程：
然別湖 → かき揚げのかきはげ(午餐) → ザンギの横綱(晚餐) 【旅館：天然温泉「白鳥の湯」スーパーホテル釧路駅前】
我其實都冇太上心噚晚翻譯小姐話今日天氣轉差嘅事，因為噚晚天氣實在太好~
今朝起身望吓窗外，白茫茫一片，原來落緊雪，不過都睇唔清係咪好大雪，我諗今朝個森の散歩團都有可能會取消，希望晏啲天氣會好啲~
之後我走去睇天氣報告，全日落雪，咁我估個團好大機會取消了~
今日嘅計劃，除咗然別湖嘅森の散歩同埋氷上村嘅活動(例如冰上電單車)，基本上都冇乜景點，主要都係搭巴士去帯広再轉 JR 去釧路，所以彈性都好大，只要唔好遲過尾班車就得~
如果個團取消，可以選擇早啲去釧路，仲有機會睇到世界三大日落之一嘅幣舞橋日落~
(睇日落，首先要有好天氣......)
早餐普通，唔太多嘢食，都難怪嘅，呢度生意真係一般~
食完早餐，就返房著返對雪靴，去氷上村行吓~
行到大堂，有個男人問我係咪阿邊個，佢想知我哋今日嘅行程係點，我以為佢想將個森の散歩團褪遲啲睇吓有冇機會~
佢知道我哋要去釧路之後，查咗一陣資料，話我哋知今日所有去釧路嘅特急列車因天氣關係停駛~
佢仲話，搭嚟緊嘅巴士去帯広，仲有少少希望搭到慢鐵去釧路~
嘩，原來咁大鑊，真係估唔到！(咁當然，森の散歩團就一定取消啦)
如果今日去唔到釧路，係直接影響未來幾日嘅行程，因為啲交通真係好難先夾得到~
不過去唔去到都唔係我可以控制，船到橋頭自然直，見步行步吧~
距離最早嘅巴士仲有啲時間，我哋就繼續行落去氷上村~
朝早同夜晚好唔同~
冰上活動就當然要暫停~
其實出到戶外就知有幾大雪~
跟住就返旅館攞齊行李同 check-out~
Check-out 時攞埋免費乘車券~
跟住行埋去還雪靴~
噚晚見過嘅旅客，呢刻都喺大堂見得到，全部人都等緊最早嗰班巴士離開~
天氣只會越嚟越差，再唔走，可能今日都唔可以離開然別湖了~
終於等到巴士開~
去到帯広，第一件事就衝去綠色窗口，睇吓有冇車去釧路~
排緊隊時，見到呢個牌，14:22 有班快車去釧路，人生充滿希望呀！
不過當然，要等到職員確認先好當真啦~
結果係有車，我哋手上嘅車飛亦可以搭~
放心晒~
真係好彩，得呢班咋，之後就停駛，全靠然別湖旅館職員嘅協助先可以搭到呢班車~
而家 12:00 都未夠，費事照顧行李，寄存咗喺 locker 先~
仲有成兩個半鐘，時間太多，天氣太差，又未肚餓，就喺車站百無聊賴玩電話就過咗半個鐘~
無聊到極就走出去行吓~
為咗用吓啲時間又好，為免晏啲會肚餓又好，儘管而家未肚餓，都去食啲嘢先~
喺車站行咗個圈，求其就揀咗「かき揚げのかきはげ」，食天婦羅的~
大地と海のかき揚げ丼 セット
套餐有天婦羅飯及冷麵，啱晒唔肚餓嘅我哋~
味道不錯~
之後仲買咗杯雪糕食~
時間差唔多，就攞返行李行去月台等~
入閘時職員告知會延遲 20 分鐘~
其實我就唔係好聽到係遲 20 分鐘開車定到達~
不過都唔重要，總就而家去月台等車，上車，坐到去釧路，就完成今日嘅目標~
喺月台等車嘅時候，大雪到呢......
等到 14:54，終於有車到，見住佢係咁推開啲雪，爽！
未夠 17:00 就到釧路，今日目標達成！
落咗車，大風大雪，好彩旅館唔遠~
落車時，順便睇吓車站有咩食肆，要諗定今晚食咩~
(本來喺帯広北の屋台食)
不過車站絕大部份店舖都閂咗門，呢場風雪好似好勁咁，個個都提早收工~
拖篋先慘，拖埋啲雪係越拖越重，但拎上手離地咁行又唔夠力，行唔到幾多步~
雖然好大風雪，但都只好慢慢拖，拖一陣又清吓雪咁~
到咗旅館，check-in 完就喺房休息吓~
其實我哋唔係攰，係冇嘢做~
之前因為時間關係，安排唔到去幣舞橋睇日落(世界三大日落之一)~
而家得呀，仲未到日落時間我哋已經喺釧路喇，幣舞橋又唔遠，不過邊有人喺咁大風雪嘅時候仲覺得可以睇到日落呀......
悶到發癲，決定去商場行吓，反正都要搵嘢食~
我哋行去一間叫 Moo 嘅商場~
條街好少人好少車，好似死城咁，搞到我哋都有啲驚，其實係咪唔應該出嚟呢？
但唔出嚟又食咩呢......
Moo 就喺幣舞橋附近，咁不如行過去幣舞橋先，到此一遊啦~
痴線，橋呢邊特別大雪！仲有一陣陣嘅強風~
啲雪兜口兜面咁打埋嚟，都幾痛......
我哋好似行咗去 Moo 嘅後門？
連間商場都好似唔開咁，好彩推門入係可以開嘅~
不過入面絕大部份店舖都係閂咗，我好懷疑搵唔搵到嘢食......
行咗兩層，終於有間食肆係營業中，好感動呀！
呢間類似屋台嘅食肆叫「ザンギの横綱」，乜都有得食咁滯，梗有樣啱~
不過講時講，成間商場可能得一間食肆有開，但仍然係一個客都冇......
唔諗咁多喇，開餐！
刺盛定食
(魚生拼盤定食)
魚生鮮甜，好食！
ホッケ焼定食
(烤六線魚定食)
魚烤得非常香，魚肉多汁嫩滑，好好食！
可能係唯一一間有開嘅食肆，喺冇得揀嘅情況下食到咁好食嘅一餐，大滿足喔！
回程天氣一樣咁差，幸好平平安安咁行到返旅館，完結今日行程~
留言列表
