《瞬間看地球》Stranger's Blog

今日行程：
【秋田県】秋田內陸線  角館⇆鷹巣  一日遊《住宿：とどろき旅館》


噚日約咗今朝 07:00 食早餐，06:55 落到去，食嘢嘅地方門未開，入面亦冇燈光~
06:57 有多一對男女落到嚟，大家都係裝吓裝吓，覺得疑惑~
07:00 準時著燈開門，一直有人喺入面做緊嘢？但我又睇唔到有人喺入面行喎，奇怪~
同埋點解唔開燈做嘢嘅？會唔會係禮貌嚟？我真係唔識~

男店員出嚟同嗰對男女講咗句すみません，跟主係我聽唔明嘅日文，之後男嘅向浴場方向行，女嘅就行返上一樓~
隔咗一陣就過嚟同我哋講可以入去~
我哋坐低無耐，嗰對男女就一齊入嚟食嘢~
超好奇，究竟男店員同佢哋講咗啲咩呢？

早餐唔算好豐富，但都幾唔錯，有飯到肚實夠飽~
隻蛋煎得幾靚，覺得係用心煎嘅~

食完早餐就返上去沖涼浸多次溫泉~
今次一定係揀木の湯，喺條溪隔籬，朝早有光可以一邊睇景，一邊浸溫泉~

浸完返上房，先發現原來有個露台，不過積雪太多，當然就冇出到去~


離開前，走去清吓部車啲雪先~
車頂積雪太厚，比想像中要花更多時間去清理~

離開結賬時，旅館 wifi 有問題，導致卡機不能運作~
店員嘗試解決，但我估佢未必可以自己搞到，所以最後就俾現金~

今日只有一樣嘢做，就係乘搭秋田內陸線，由角館至鷹巣，再由鷹巣搭返到角館~
由於有部車跟身關係，冇得只係搭一程，一定要搭返轉頭攞車，如果景靚嘅，都值得嘅~

鐵路班次關係，要入黑前搭來回程，係冇時間食午餐，所以就要喺便利店買啲雜糧作午餐~

沿途隨影~

去到角館駅前，見到個停車場只係可以俾泊 30 分鐘，唯有根據指示去搵個長泊停車場~
不過都兜咗兩個圈先搵到~
(後記：我哋以為搵到，其實係錯，我哋泊咗個錯嘅停車場，好彩冇事發生~)
(再後記：原來我一早已經知道駅前停車場只可泊 30 分鐘，我亦一早已經搵好長泊停車場喺邊，但當時係一啲印象都冇，事後睇返啲功課先醒起......)

由於搵停車場用咗啲時間，而家可以話有啲趕，於是我哋兵分兩路~
屎塔去便利店買雜糧，我去售票處買兩張一日票~


去到售票處，本來冇人，就咁啱有個人行先我一步到售票處~
好衰唔衰，搞成五分鐘先輪到我，買張飛唔知點解要講咁多嘢同搞咁耐，咁我當然知總有原因嘅，佢哋又唔似係閒聊吹水~
到我喇，同對方講想買秋田內陸線一日票，原來我去錯咗地方，我而家呢度係 JR 駅，秋田內陸線駅喺另一邊，嘥咗五分鐘......


去到秋田內陸線駅，同對方講想買秋田內陸線一日票，佢問我去邊，我指俾佢睇去鷹巣~
唔知點解佢要知我去邊呢，可能驚我買錯飛？

秋田內陸線列車~


遲上車冇乜好位剩，最後坐咗個最差嘅位~
向橫坐，望前望後都冇窗，望左係司機背脊，望右係車卡尾~
基本上唔起身搵位望吓景係乜景都睇唔到，莫講話影相~
可能真係冇乜嘢睇到，屎塔上車無耐已經瞓著咗……

車頭向前有三隻窗，左邊係司機位，右邊窗比中間窗大~
有個阿叔一上車就佔據車頭向前嘅右邊窗，佢右邊係車側上落門，門上同樣有窗~
阿叔長時間佔據最有利位置，不停向前向右影相~
儘管有啲靚景位後面有人排隊影相(只剩中間窗可影到相，啲人係排中間窗)，都冇動搖到佢霸佔向前嘅右窗同右面車門嘅窗嘅決心，係縮少少讓啲位出嚟都冇~
不停兩邊影相，完全冇其他人可以喺呢兩個窗度影到相，佢仲揹住個中型背囊~

我都好想好似佢咁，可以霸佔最有利位置，企兩三個鐘對我嚟講完全唔係問題~
但正常會考慮別人感受嘅人都知唔應該咁做~

中途開始落大雪，車內嘅窗開始起霧，但向前嘅車窗未起霧，不過中間隻窗已經越嚟越多水珠喺窗外面，初時望吓景仲可以，但影相就唔得~
阿叔隻窗比中間嗰隻大少少，而且司機開水撥係會撥埋佢嗰邊，企喺阿叔隔離挨近佢的話，都可以睇到景，但影相就難好多~
過程中，無論幾多人排隊影相，幾多人嘗試挨近佢，阿叔仍然不動如山，揈住背囊兩邊影相~
還好，阿叔半路落車，但就換咗另一個男人上前，長駐，但佢見到有人上前佢會側一側身等人可以影吓相~
我自己就覺得算吧，影到就影，要人讓就費事，只好將畫面收藏於記憶中~

到咗阿仁合站，超過一半人落車，之後就再冇人佔據右窗，連上前影相都冇，可能全部都係常客，遊客落晒車~

呢程火車，感覺有點無聊，可能係因為風景未如想像般詩意~
單程兩個多小時，沿途風景變化不大，沒有令我驚嘆嘅畫面~
真係要形容心情的話，可謂相當失望~

車廂內環境~

兩個多小時後，到達鷹巣駅，等十幾分鐘，就有回頭車~


不過呢班車，只係開到阿仁合駅，要喺阿仁合駅轉車去角館駅~
回程人唔多，基本上任坐~

到咗阿仁合駅，所有人都急急腳咁落車再上對面部車，我哋都跟住上~
之後先發現原來呢班車有三個車廂，最前面係貨切車廂，不過見唔到有人~
我哋身處中間車廂，大半滿~
後面唔知係咩車廂，但都係見唔到有人~
唔怪得個個都急急腳，上慢啲都冇好位坐~
前後都有車廂，即係前後都冇風景睇，只剩左右車窗~
但天氣關係，車窗外好多水珠，基本上呢程車係乜都睇唔到~
不過都已經唔重要，反正風景都係普通而已~

今日呢個行程，我真係覺得浪費咗一整日，不過唔試過又唔知嘅~
睇返官網，佢個秋景又係普通，冇乜紅葉，唔知係真係冇紅葉定啲相嘅問題，反而春夏好少少~

返到角館駅就行去攞車，去今晚嘅溫泉旅館~
沿途隨影~

到咗旅館，泊好車就發現旅館門外有位女士，我估都係等緊我哋~
真係久違了嘅感覺，好耐未試過~
不過我哋都好少住溫泉旅館就真嘅~

溝通方面，可以話難，可以話易~
難，係難在語言；易，係易在文字~
老闆娘(我當佢係啦)好聰明，佢知我哋睇得明漢字，乜都寫漢字嚟問，溝通即時變得無障礙~

晚餐係喺房入面食，算幾多嘢食，但整體味道算係普通~

第一次食馬刺，真心唔識欣賞~


魚同天婦羅算係合格~


呢片唔知係咩肉，但呢種肉味係我哋未食過嘅，我哋估都係馬肉，味道......唔太鍾意~


其他~


甜品，個士多啤梨唔係幾甜~


食完飯，休息咗一陣，就去浸溫泉~
嚟到旅館嗰時，停車場只有一部車，計埋我哋就兩部~
可能真係得兩組客~

呢間旅館，房冇得沖涼嘅，咁要落去睇吓~
貸切溫泉冇人，亦有供沖涼嘅地方，不過就室外嘅，唔係好頂得順~
反正冇乜人，就去大浴場沖涼~
成個沖涼過程都係得我自己一個，沖完涼仲跳埋落溫泉池浸熱個人先~

貸切溫泉嗰邊就一邊有頂，一邊露天~
對外都被竹棚圍住，冇景嘅~

浸完返到上房，被舖已經準備好~
成間旅館俾我嘅感覺，似係好老牌嘅溫泉旅館~
對方嗰種熱情，殷勤服務，真係似曾相識，但已經唔記得幾時同邊度遇過~
今晚呢間 HKD$2000 有找，我覺得抵到爛！(我唔係太在乎食物係咪真係好食)