《瞬間看地球》Stranger's Blog

今日行程：
【山形県】最上川(遊船) → 芭蕉庵(午餐) → 銀山溫泉 → 布丁 酒茶房クリエ(下午茶) → スシロー(晚餐)《住宿：コンフォートホテル天童》


一早起身，又去浸貸切溫泉~

噚晚我只係見過一個男住客，屎塔話見到一男一女，我哋就諗，咁少人，大浴場可能冇人，不如過去浸吓~
去到大浴池，原來係男女混浴~
(以下原圖來自官網，再以線上 AI 放大工具放大~)


早餐係傳統日式早餐，味道普通~


食完早餐就結賬離開~
行到去部車度先知有人已經幫手清咗雪，開車就走得~


開車時，一男一女喺旅館門口揮手道別，直至我哋出咗大路，仍然在揮手中~
好耐之前都經歷過，好傳統嘅日式溫泉旅館招待，實實在在感受到咩叫賓至如歸~

而家開車去最上川(遊船)~
最上川嘅冬景，被稱為東北必去之一，確實有啲期待~

沿途隨影~

到咗最上川，由於我事前有預約，只要講自己個名，對方就即刻搵到我資料~
對方突然問我有冇揸車，心入面覺得奇怪，點解佢會咁問？但我都冇諗太多，就答佢有~
跟住佢俾咗搭巴士嘅資料我，我先醒起，最上川遊船，一般係單程，雖然可以跟船返轉頭，但就要預先話佢知，等佢安排，否則一般都係落船就散，或者有需要返轉頭嘅，可以搭巴士，就好似我哋咁，有揸車嘅，當然要返轉頭攞車~
功課做完太耐，唔記得晒~

行完商店冇咩做就行去搭船~

沿住樓梯行去隻船度，見到呢啲標示~
原來幾年前啲水位去到咁高，勁誇張！


去到隻船度先醒起，好似有人話坐右邊啲景好啲，不過其實都冇得揀~
船尾已經有一對男女，船扶叫我哋坐該對男女嘅對面，好自然係因為要保持平衡~
不過又好彩喎，我哋呢邊就係右邊~

船係暖房船，冬天獨有嘅~


陸陸續續有人上船， 最後好似都係得返一兩個位~
中間有對男女被迫分開坐，因為兩邊人數唔平均，而佢哋對面又有一個空位，所以佢哋就要分開坐~

船上有兩個工作人員，一個係船扶，一個係主持人~
好明顯，扶負責開船，主持人負責講嘢~

成程船，主持人不停講嘢，有時講幾個英文生字，有時又唱吓歌，見到瀑布又會話我哋知~
期間問到有幾多人係第一次嚟，多數人舉手~
佢再問冇舉手嗰啲，有人話兩次，有人話四次~
四次......佢真係好鍾意，可能春夏秋冬，所以今次冬天嚟係第四次~

至於被譽為東北必到嘅最上川冬景，真係有點過譽，全程景色千篇一律，坐右邊還好，坐左邊係真係差好多~
我而家知點解要有個主持人搞吓氣氛喇......
不過其實呢，主持人不停講嘢，為表尊重，其實係真要聽吓佢講咩，聽唔明都要有眼神接觸，唔可以完全無視佢，否則太唔禮貌~
但，真係好坦白咁講，上船真係唔係為咗聽佢講嘢，又想睇景(雖然冇乜好睇)，又要同佢有眼神接觸扮有聽，呢個安排真係好咩？
好彩我哋坐最後，唔駛扮嘢扮得咁用力，試想想，坐得前又聽得明佢講咩嘅，睇佢好定睇景好？

雖然景就真係普通，但今日天氣唔錯，天色唔算太暗，有點飄雪，都好適合遊船河~
隻暖房船又幾特別，遊吓船河都幾唔錯嘅~

上岸後就有間商店，都係賣手信為主~
不過 15 分鐘後就有巴士，唔係好夠時間行~

上咗巴士，我發現如果早一個站落，會比較近我計劃好要去嘅巴食堂食午餐，於是我哋就早一個站落~
原先要行 10 分鐘，而家 1 分鐘都唔駛~


入到去，冇店員喺舖面，咁就自己搵位坐低睇 menu~
我諗我哋坐低咗都有 10 分鐘，完全冇店員出現過，但至少我聽到廚房係有聲嘅~
入嚟嗰時，其中兩張檯坐咗共有三個人，全部檯面冇食物，唔知佢哋叫咗嘢食未......
期間有位女士自外進入，行入少少講咗句すみません，咁啱舖頭電話又響，入面有個男人走出嚟聽電話同同個女士講咗兩句，個女士就準備錢，男士講完電話就 走返入去~
如是者又等咗 5 分鐘，我決定唔等~
等到佢出嚟落單，都唔知等幾耐先有得食~
就此離開~

我知道最上川碼頭有嘢食，就去返嗰度食嘢，行過去要大約 10 分鐘~
越行越大雪，行到返碼頭，個袋已經濕晒~

芭蕉庵


傳說呢度嘅烤魚好食，但睇 menu 唔覺有~
經過 google 翻譯，只得一項係魚，就叫佢，雖然我覺得佢唔係我想食嘅烤魚，但係魚都 OK~

鮎魚そば
條魚係天婦羅，唔係烤魚，同埋認真麻麻地~


天ぷらそば
個天婦羅就幾好食，炸得好好，可能因為同條魚有比較，呢個天婦羅直情係有少少驚喜~
蝦同菇最好食~


食完嘢就去銀山溫泉~
聽說冬季嘅銀山溫泉，唔可以揸車入去，只可以搭穿梭巴士~
其實我都唔知係非住客唔可以揸車入去，定係純粹路況差時唔可以揸車入去~
唔同情況都有人講，都唔知信邊個好~
所以我決定唔好煩喇，就用一個一定唔會錯嘅方法，搭穿梭巴士~

要搭穿梭巴士，可以將車泊喺大正ろまん館，再撳鐘仔召喚巴士~
第一次咁樣撳鐘仔召喚巴士，好新鮮~


巴士到了，有個女人(佢實在太無禮貌，唔配我將佢稱呼為女士)自車外同司機講嘢，我當時唔知呢個女人係咩人，喺車外講咗最少都有三分鐘，跟住走上車又講咗兩三分鐘，跟手仲買咗一疊車飛~
跟住佢落車企喺車門，向遠處招手及大聲呼叫(此時佢講嘅係國語，我覺得係國語，唔係普通話)，跟住成村人陸續走過嚟上車，直至上滿了整部巴士......
車下面等上車嘅人，全部人都充滿問號......
但巴士司機俾佢上，又必定有佢嘅理由~
最後，巴士司機叫我哋兩個上埋(我哋排最前)，之後就閂門~

屎塔問嗰個女人，點解佢哋可以上車先，個女人話佢預約咗~
佢不停重複，佢預約咗，呢度係日本，如果冇預約，司機唔會俾佢哋上車~

我自己成日都提醒自己，做人要客觀啲，但有時我都好討厭自己做人有時太客觀，今次我就嚟主觀一吓~
個女人喺車外同司機講咗成超過三分鐘，如果係預約咗駛講咁耐？
之後上咗車講咗超過兩分鐘，如果係預約咗駛講咁多嘢？
個司機嘅神情，十足十做遊客服務做到厭世咁，佢唔在乎呢啲嘢我係一啲都唔驚訝，就算係日本都一樣可能發生呢啲事~

到咗站，我哋落咗車，睇緊呢度係咪終點站，個女人走埋嚟叫我企開啲，話我阻住其他人落車~
佢真係超級冇禮貌，我並唔覺得我哋有阻住人落車，但我都冇理呢樣嘢，我有啲火遮眼，一開口就提返佢叫其他人上車呢件事~
我話你應該讓他們先排隊，你想想如果你是下面上不到車的人，你會怎樣想？
我不得不承認，我講嘅呢句嘢邏輯上未必站得住腳，如果預約咗都要排隊，咁預約嚟做乜？
個女人只係重複我預約咗我預約咗~
佢個格好有潑婦嘅潛質，所以我哋都冇同佢嘈落去~

事後我上網睇返，係冇得預約嘅~
咁當然，我唔排除佢有辦法預約啦，呢樣我證實唔到~


銀山溫泉真係超多人，明明呢幾日去嘅地方都算少人，我以為呢段時間東北少遊客，但睇返銀山溫泉呢度，真係人頭湧湧~
要避開人潮，其中一個方法係喺度住一晚，不過要 book 一晚房相當唔容易，據網上面啲人講，有啲係半年前開放預訂，有啲係三個月前，但全部都係一放出嚟就會被秒訂，邊間旅館都一樣~

現場人太多，興緻大減，旅遊品質相當差~
我當然知道，我嘅存在亦都影響緊他人嘅旅遊品質，事實就係咁，都冇辦法~

銀山溫泉本身氣氛相當好，古色古鄉，好似穿越咗時空，返返去古時咁~
今日天氣又幾好，唔係藍天白雲嗰隻好，係陰天得嚟但夠光，仲有啲飄雪~

由於我想睇銀山溫泉嘅日景同夜景，所以安排好睇完日景就去食啲嘢，攝吓時間等夜景~
我安排咗嚟布丁 酒茶房クリエ，原來係長龍店嚟，由啱啱嚟到嗰陣見到條龍，到我哋遊覽完，條龍都係咁長~
不過我哋而家有時間，花時間排吓隊都冇乜所謂~


喺排隊嘅時候見到呢舊冰，驟眼睇以為係隻結咗冰嘅白鴿......
究竟係咩情況先可以形成到呢舊咁奇特嘅冰呢？


排咗大半個鐘，終於輪到我哋入座，好好彩，被安排到上二樓窗邊，對住能登屋~


呢度限定一人要叫一杯食料一份甜品~
我點嘅~
焼きココア
最高人氣嘅朱古力~
賣相係靚嘅，噱頭嘢，都係一杯唔錯嘅朱古力~


パウンドケーキ(安納芋と黑胡麻)
Pound Cake，淡淡嘅甜味帶點香氣，唔錯~


屎塔點嘅~
クリームソーダ
雲尼拿味雪糕加蘇打水
唔記得問佢覺得點~


プリン
布甸，呢個好食，好食過晒喺便利店食過嘅~
(咁我都知冇得比嘅......)


食完嘢，天色已暗，係時候又去行吓~
黃昏時份嘅銀山溫泉，又有另一番味道~

入黑時份嘅人潮，一啲都冇比下午少~
我哋都冇諗住留到天色黑齊，一來怕搭唔到車，咁多人喺度，尾班車前可能載唔晒，雖然冇揸車嘅應該係搭第二條路線嘅巴士，但都係安全啲好~
二來人太多，都冇興緻留低~
三來冇腳架，越黑越影唔到相，冇意思~
越夜越大雪，仲喺現場嘅人應該好開心~

搭穿梭巴士返到大正ろまん館，喺車上面，我俾咗兩個選項屎塔，去 Big Boy 定スシロー(寿司郎)食晚餐~
Big Boy 係類似之前喺九州食過 Fulljoy 咁樣，西餐為主，好多選擇~
屎塔揀咗スシロー~

到咗スシロー，例牌喺門口影張相，但見到有兩部車啱啱入停車場，都係嗱嗱聲走入去先，唔駛排佢哋後面~
入到去冇人等位，諗住可以即時入座，原來係啱啱滿座，要等~
攞完飛等咗陣，已經有超過二十人等緊位，好彩當機立斷入咗嚟先~

當有廣播時，我哋聽唔明，但我覺得係我哋，望一望個店員，佢笑容滿面咁一支箭咁飛奔過嚟幫手~
我個人唔駛真係要咩服務，咁樣嘅工作態度，我已經可以俾 100 分~

食物方面，雖然只係集團式連鎖店，但我哋都覺得唔錯，滿足~

食完嘢就補影返門外相~


之後就開車去旅館~

瞓之前，要諗諗聽日行程~
聽日有兩個行程，山寺及藏王樹冰~

我嘅掙扎點係，兩個都要天氣好先有意義，我而家確定山寺聽朝係好天，但下午麻麻，而我自己都好想去山寺，亦都確定藏王聽朝好天，但下午麻麻，不過呢個只係藏王，而非藏王山~
可能我唔識搵，我搵唔到比較好嘅藏王山嘅天氣預報，只係搵到一個預測未來幾小時嘅藏王山天氣預報，想睇多啲係要俾錢，咁當然就免了~

講順路就一定係去山寺先，之後先藏王樹冰，但我哋已經錯過咗八甲田山樹冰同森吉山樹冰，如果再錯過埋藏王樹冰，今次為樹冰而成嘅行程，就冇樹冰行程~
冬季嘅東北，我覺得我未必會再嚟，咁即係我呢世都可能睇唔到樹冰了~
問題係要取捨，去山寺先，再去藏王就順路，但好天氣唔等人；去藏王先的話，我應該唔會返轉頭去山寺，唔想走咁遠返轉頭~
經過商量，決定去山寺先，而我更加決定早啲去山寺，早啲完成山寺行程，早啲去藏王，多啲時間碰運氣~