《瞬間看地球》Stranger's Blog

今日行程：
【山形県】立石寺(山寺) → 蔵王山 → 樹氷高原駅(午餐)《住宿：小野川温泉 河鹿荘》


今日起身，第一時間查吓蔵王山嘅天氣，因為我只搵到一個網頁可睇到未來幾小時嘅蔵王山天氣~
同山寺一樣，成朝都係好天氣，直至大約 13:00 先轉為陰天~
雖然我知道山上天氣通常變幻莫測，但至少預告係咁，都起碼有啲希望~

旅館望出去都幾靚~


早餐就普通西日式，普普通通咁啦~

為咗趕及喺好天氣時拜訪山寺及蔵王樹冰，我哋 08:00 就出發~
沿途隨影~

去到山寺附近，好多停車場，唔諗咁多，就泊本身記低咗嗰個，反正全部都係 500 円~
泊好車見附近冇人，唔知點俾錢就周圍望吓~
都係冇人，可能太早，咁返嚟再算~

就喺我返車著褸時，有個男人自對面商店行過嚟，俾咗張地圖我，教晒點行，又話泊車 500 円~
我拎緊錢俾佢時，佢話「after」、「shopping」，我感覺佢個意思係返嚟先俾，入嚟舖頭俾，順便買嘢~
咁好啦，就返嚟先俾，買唔買嘢就......

研究完佢張地圖，行上山寺原來唔係過橋後直上，係過橋後向右行到過埋日枝神社先轉左上，咁樣就最順路又唔會錯過根本中堂同日枝神社~
沿途隨影~

如果由日枝神社上，就會錯過根本中堂~


第三個路口轉左上，就係根本中堂~


就喺呢段路，我見到幾個停車場都係 300 円，竟然越近越平，真係離奇！
雖然心有不甘，不過其實都係蝕咗 200 円啫~
同埋泊得太近，就睇唔到上面啲相嘅風景~

根本中堂~

日枝神社~

日枝神社對開，正！


呢度就係山寺(立石寺)嘅入口，開始收費嘅區域~


入口處有隻好有型嘅貓~


時間尚早，得幾個人行緊上山~
之前有人話上山寺一定要用冰爪，不過以今日嘅情況，似乎唔太需要~

對山寺嘅印象，最主要都係五大堂外望嘅水墨畫風景，原來行上山寺呢段路，本身都相當不錯~

終於嚟到傳說中，山寺五大堂嘅漂亮水墨畫風景~
不過今日太好天，個太陽對到正一正，打咗啲折扣~

回程經一經奥の院就落山~

落山呢，係有啲跣，因為已經有好多人踏去冰上面嘅雪，底層嘅冰露晒出嚟~
不過地面並唔係 100% 被冰覆蓋，只要小心啲其實還好~

返到去部車度，就走入商店俾 500 円泊車費，之後就行吓商店睇吓有冇咩想買~
結果都買到嘢，俾完錢之後，老闆娘俾返 500 円我~
咁我知喇，即係購物滿 500 円就免費泊車~
本來係蝕 200 円，而家係賺 500 円，因蠢得福~

完成咗山寺行程，嗱嗱聲衝去藏王山~
沿途隨影~

去到停車場，外面有個滿字，即係今日好多人上山~
今日係星期日加咁好天，多人上山自是必然~
之前聽網上嘅人講，有啲排咗個半至三個鐘不等，最誇張嗰個排咗四個鐘~
如果我哋要排四個鐘，排得嚟都尾班車了......
不過唔理咁多，一場嚟到，當然係排咗先~
停車場雖然滿咗，但仍然有人招手叫我埋去~
收咗停車費就指示我泊邊個位~
我泊緊嘅位，唔係本身劃好嘅停車格，不過車太多，都只好咁做~

泊好車就走去排隊~
現場有多部旅遊巴，隊中亦有唔少日本老人家，應該都係跟團嚟吧~

條龍嚟講，又唔算真係好長，我諗應該唔駛四個鐘，我諗......兩個鐘卦~
排咗 30 分鐘，去到見到個牌寫住由此起要排 90 分鐘，咁即係前後我哋要排兩個鐘~
不過我覺得奇怪，而家我哋嘅位置，距入口唔係好遠，真係要排 90 分鐘？可能入面打晒蛇餅~


排排吓被工作人員要求排成四人一行，後面排嗰兩個人就行上前排我哋隔籬~
之後排到入口，只能容兩人一行，本身上咗前嗰兩個人就讓我哋行先~
喺日本排隊，真係好放心，唔會驚俾人打尖~

排到去售票處，有自助售票機，亦有人手售票，但就完全冇人走去買飛，呢刻我真係好疑惑，咩事？
咁我相信因為我哋前前後後都係跟團嚟嘅人，佢哋唔需要自己買飛，所以呢刻售票處係一個人都冇(工作人員除外)~
咁我就走去自助售票機買飛~


喺日本排隊，真係好放心，唔會驚俾人打尖~
Well......世事無絕對......
我哋由二人一行，再次被要求以四人排成一行~
排排吓，因為係行樓梯上一層樓嘅關係，會有 180 度轉嘅樓梯轉角位，喺呢啲位，條隊就好難好整齊~
喺呢個時候，我睇到兩種情況~
一個情況係，先前讓我哋行先嗰兩個人，無論情況點樣佢都唔想行喺我哋前面~
一個情況係，有個排我哋後面嘅阿姨比較進取，不停想鑽前啲~
轉彎位空間大，如果佢有心鑽上前，係一件好容易嘅事~
四圍都係阿姨阿叔或以上嘅老人家，就當讓吓佢~
期間，呢位阿姨，不時轉身招手，叫另一個人上嚟，不過佢個朋友就係唔上，相信佢知道唔應該咁做吧~
去到收飛位，原來呢位阿姨手上冇飛，佢只好行返去佢朋友度攞飛同排隊，所以結果都係打尖不成~

由一開始排隊到收飛位，共排咗 90 分鐘，比預期快咗 30 分鐘~

上藏王山頂，要搭兩段纜車~
第一段係大型纜車，得幾個座位，多數人都係企~
第二段係小型纜車，全部坐位，唔可以企~
喺我哋行入部小型纜車時，之前打尖嗰位阿姨，一個箭步走在我同屎塔之間~
屎塔行緊去窗邊位，打尖嗰個女人快速衝向屎塔~
我估佢想快過屎塔進佔窗邊位，但其實除非佢推開屎塔，否則係冇咁嘅空間俾佢喺呢個情況打尖~
當佢知道唔會成功後，即係高速掉頭，差點整個撞上我，之後快速咁繞過我離開~
我冇理佢走咗去邊，我只係覺得成個過程好有趣，我會形容佢整個動作就像被貓追嘅老鼠咁亂竄~

沿途隨影~

山頂天氣唔多好，有啲風，能見度低~
但總算見到樹冰，因為我知道能見度係可以低到乜都睇唔到~

唔知而家山頂幾多度，據先前睇嘅天氣報告就係 -9℃~
(後記：上面係有地方顯示度數，不過當時冇睇到~)
-9℃ 加上有風，體感一定更低~
身體係夠暖嘅，但我隻手就真係冇晒感覺，要返入室內暖吓先~

入到室內，見到有熱嘢食，我哋又未食午餐，就喺度食~

行埋去睇吓有咩食，不過超過一半嘅嘢已經售罄，唔可以再諗，排咗隊先算~
主餐只剩咖哩~
特製ビーフカレー (Beef curry and rice)
一貫日式咖哩味道，唔錯，係啲牛肉太多肥膏~
フランクフルト (Frankfurter sausage)
腸幾好食~
肉まん (Meat bun)
肉包就普通，冇乜味~


食緊嘢嘅時候，太陽出來了！
不過所有靠窗嘅位都有人坐緊，所以就影唔到相~
而坐咗喺最靚位置嘅，係一對講廣東話嘅男女，我相信佢哋係香港人嚟，個女嘅影完相就行開咗，我就問個男嘅我可唔可以行埋窗邊影吓相，個男嘅話可以~
不過此時太陽已經再次被雲遮蓋~

食完嘢，見天色好過最初上嚟嗰時，又走出去行吓~

上頂樓係由呢個出口出嚟，我感覺佢本身個建築唔係咁，只係因風向加結冰而成而家呢個形狀~

用部手機影全景相，部手機凍咗傻咗～

時間差唔多，亦都睇夠就返落山~
沿途隨影~

今日兩大行程可謂完美完成~
而家就直接去旅館，今晚住嘅係溫泉旅館，所以安排咗早少少到~
沿途隨影~

到咗溫泉旅館，即刻有人出嚟幫我哋拎行李~
入到去就詳細講解成個溫泉旅館嘅大大小小事情~
貸切風呂係要預約嘅，但只可以預約一次~
咁我哋揀咗夜晚，但係夜晚要去到 22:00 先有位，時段係 22:00 至 22:40~

今晚嘅晚餐，我哋點咗米沢牛~
米沢牛有兩食，佢有問我哋想食邊樣先，不過我哋就冇乜所謂，是旦答咗樣~
首先嚟嘅係壽喜燒，切到好薄片，牛味唔係好重，但整體係幾好味~


之後嚟嘅係燒牛扒~
量唔多，就只有三塊~
不過佢唔多都好，因為我實在唔識欣賞，脂肪多過肉，成口都係油，要喺口入面刻意搵啲肉嚟咬吓~
由於油脂嘅味道太重，牛肉本身好唔好食，我就食唔出嘞~


其他嘅都係冇乜特別~

差唔多夠鐘就落去浸溫泉~
個貸切溫泉係室內嘅，雖有落地大玻璃，但就冇乜景~