今日主要景點:
Paris
Tour Eiffel (艾菲爾鐵塔)
Notre-Dame (聖母院)
今日第一站係 Tour Eiffel (艾菲爾鐵塔)
今日早餐繼續食噚日食剩嘅蛋糕,食完就出門口,由酒店搭 metro 過去,好方便,未夠八點半就到咗 Parc du Champ de Mars (戰神公園)
只有幾個人喺度遛狗~
今日勁好天,嚟咗 Paris 幾日,今日最好天,連雲都唔多舊,真係好好彩~
呢幅相就好似用軟件做出嚟嘅圖咁,但其實只係隨意向天按一下快門,就影到一幅好假嘅真相~
Tour Eiffel (艾菲爾鐵塔)
出發前已經喺網上面預訂咗門票,嚟到呢度唔需要再排隊買飛,我哋訂咗 0930~
見仲有一段時間,我哋好悠閒咁慢慢行,又搵啲有樹蔭嘅地方坐吓~
直至到九點,諗住行過去睇吓情況~
過到去俾我哋見到塊告示牌,寫住有一部 lift 正在維修中,只有一部 lift 可以運作~
呢刻真係有啲錯愕!亦覺自己太過大安旨意~
出發前幾個月已經知道有一部 lift 因維修而暫停使用,但我都冇咩為意,因為仲有幾個月,我以為到我哋嚟到嘅時候都應該維修好,之後都冇理到~
其實我又真係太過天真,法國人做嘢未必會好高效率,呢部又唔係一部普通嘅 lift,幾個月都未整好一啲都唔出奇~
本來都冇咩問題,預訂咗飛嘛,人龍再長都應該影響唔到我哋~
不過,之前有人去完返嚟,話就算預訂咗都一樣要排隊~
咁而家部 lift 仲未維修完,預訂咗都要排隊,即係我哋都要排隊啦,頭先仲喺樹蔭下休息,嘥晒啲時間,唉~
行到去鐵塔底,已經有好多人排緊隊,不過一條長一條短,一時間我又睇唔到兩條龍有咩分別,唔理咁多,我叫屎塔排條長嘅,我排條短嘅,因為我呢邊比較近預訂入口嘅位置,一見有職員就可以捉住佢問吓~
預訂入口果邊,相信因為未夠鐘,冇職員喺度,入口亦有拉帶攔住,我都係排住隊先,見步行步~
排緊隊嘅時候,我同後面果個人講我想行開一陣,轉頭返嚟,跟住我就走去確認一下係咪如我所想,一條排 lift,一條排樓梯~
結果係短嘅排樓梯,長嘅排 lift~
我又返返去原位等,其間俾我見返上少女峰果兩個印籍導遊,團員係咪同一班就唔知喇,佢哋都幾多人,好彩早過佢哋,否則仲要排耐啲~
到咗 0930,預訂閘口仲未見有職員,可能真係預訂咗都要排隊啦......
大約到咗 0940,預訂閘口有個疑似職員喺預訂閘口徘徊,我又厚住面皮咁同後面果個講,我要行開一陣,轉頭返嚟~
我都知我煩住人,但都冇辦法咖......
我走去個疑似職員度問吓佢,預訂咗係咪可以喺度入,佢要求我出示証明,我俾咗佢睇,佢即刻鬆開咗條拉帶俾我過,不過我仲要去匯合屎塔,我同佢講我帶埋我太太轉頭返嚟~
我首先去返我之前排隊果度同後面果個人講我唔排喇,再走去搵屎塔,再行返去預訂入口度,就係咁,我哋可以直接去 lift 度,只係等到第二部 lift 就到我哋上~
之前有人話預約咗都要排隊,我相信呢個都係事實,由於時間仲早,我哋先可以咁快上到去,否則,得一部 lift,相信真係預約咗都要排隊,始終放人都要兩邊放,冇理由放晒預約咗嘅人先~
喺 lift 口到又見到 beware of pickpockets 字眼,同一樣嘅疑問,啲小偷真係會俾錢上鐵塔偷嘢咩?
Tour Eiffel 分三層,我哋先到第二層~
上到去第一樣感受到嘅嘢係超大風,真係吹到頭都歪埋!
第二層又有分上下層~
跟住就上第三層,即係頂層,真係好高好高!
第三層都有分上下層,下層係室內嘅,上層就室外,風就自然係更加大啦,吹到個頭甩咁滯!
見到有人影緊婚紗相~
鐵塔嘅倒影~
睇夠就返落第一層,呢層有餐廳有影院,仲有微型展館~
下一站係 Charlotte Palace (夏洛宮)
由呢度去 Charlotte Palace,步行便可~
由另一邊望返過 Tour Eiffel~
我都係鍾意由鐵塔望落嚟嘅景多啲~
下一站係 Notre-Dame (聖母院)
噚日上唔到教堂頂,今日再去,希望成功啦!
由呢度去 Notre-Dame,又係搭 metro,Paris metro 嘅覆蓋範圍真係好廣,至少我哋想去嘅地方,全部都可以搭 metro 去到~
喺呢程 metro 入面,仲遇到有人喺列車入面獻唱,用意當然係想人俾啲小費啦~
去到 Notre-Dame,見到有幾十人排緊隊~
幾十人,唔算多,諗住唔駛排好耐啦~
點知......好耐先郁一郁,每次郁好少,我哋都知道有排等,索性過對面買兩個包當午餐~
我都幾鍾意食呢啲包~
條隊真係郁得好慢,現場又勁大風,好鬼凍,最後排咗個幾鐘先可以上去,真係始料不及~
不過上到去就知點解條隊郁得咁慢,原來上面空間有限,可容納人數約十人~
呢度有圍網圍住,好安全~
我幾鍾意呢度望出去嘅景同埋上面果啲向外望嘅雕像~
Sainte-Chapelle (聖禮拜堂) 嘅尖頂~
同時上嚟嘅人,都已經慢慢行到尾,喺呢度見到有個工作人員,有晒對講機,再睇埋隔離塊告示牌,大約知道呢度係點運作嘅~
由呢度繼續行,可以再上一層,但上上面果層係有時限嘅,每放一次人限五分鐘就要返落嚟,等上面啲人走晒先可以再放人上去~
上面同樣有圍網圍住~
Notre-Dame (聖母院) 嘅尖頂~
下一站係 Opéra Garnier (歌劇院)
由呢度過 Opéra Garnier,都係搭 metro~
外表都幾靚~
門口有一隊人喺度演奏~
不過今有有預演,暫不開放,冇得入去參觀囉~
唯有就咁喺僅餘開放嘅部份行吓休息吓~
下一站係 Galeries Lafayette (老佛爺百貨)
休息夠就行過去,本來有安排行吓嘅,不過為咗擠啲時間上返 Notre-Dame 上面,只好減咗行 Galeries Lafayette 嘅時間~
不過就算唔花時間行街,都要嚟一嚟,因為想上天台睇吓風景,同埋欣賞吓佢嘅圓頂天花~
下一站係 Printemps (春天百貨)
聽聞 Printemps 都有靚嘅圓頂天花,所以就行過去睇睇,兩間百貨可以話係相鄰咁滯~
不過幾邊都入過去睇,都搵唔到有圓頂天花,算吧,見到就見,見唔到亦冇咩可惜~
百貨入面其實都好普通,連行吓嘅興趣都冇,門口影吓相,記錄住自己到此一遊就算~
呢兩間百貨附近都見到好多有中文字嘅商店,亦見到好多疑似中國人,多到我哋根本就唔可以喺行人路度行,要行出馬路~
下一站係 L'église Sainte-Marie-Madeleine (教堂)
都係步行可達,不過行行吓開始落雨,但唔算大,急急步咁行過去,喺門外冒雨影吓相都仲可以嘅~
就喺準備上樓梯時,見到有兩位女士同埋一架 BB 車,其中一位女士就喺架 BB 車裡面抱起個 BB,另一位女士就嘗試逐級逐級咁推架 BB 車上去~
我哋見佢好辛苦先上到一級,我同屎塔就喺佢哋隔離,我哋都好自然咁,幫果位女士一齊托部 BB 車上去~
嘩,原來部 BB 車係勁重,完全出乎我意料之外,如果我哋唔幫佢,我覺得佢一個人未必托到部車上去,托到中途都冇晒力啦,到時就危險喇~
托到上去,果兩位女士同時報以微笑同講咗聲 merci~
教堂內部~
出面落緊雨,我哋就喺入面休息吓,入面同其他教堂一樣,寧靜,喺度坐吓都真係幾舒服~
我行咗出門口幾次,睇吓停雨未,雖然而家天色麻麻地,但雨勢叫做細返啲,係時候再次起程~
下一站係 Place Vendôme (廣場)
呢個廣場,據說係全球知名嘅珠寶廣場,而我哋嚟呢度,當然唔係為咗珠寶啦~
嚟呢個廣場冇咩特別原因,除咗佢嘅歷史背景,主要都係覺得個廣場幾靚~
步行過去 Place Vendôme 時,突然落大雨,我哋只好躲在只有尺半蓬頂嘅首飾店外~
其間我同屎塔講,不如唔好去啦,雖然我覺得廣場都幾靚,但又未到值得咁樣冒雨過去,就算過到去都唔可以慢慢欣賞~
不過屎塔話睇吓點先,睇吓啲雨落成點先~
其實我知佢諗咩嘅,佢知我安排得去,一定係有興趣嘅,去到就去啦,儘管未能慢慢欣賞都唔緊要~
等咗約十五分鐘,雨勢減弱,我哋就再次起程~
一路都仲係落緊雨,我哋去到廣場,瑟縮喺廣場嘅一角,只能作定點觀賞~
廣場中間豎立咗一根柱,名為 Vendôme Column,柱頂嘅人物就係 Napoléon~
下一站係 Leon de Bruxelles
的確,呢間嘢唔係話真係好食到要一試再試,不過我同屎塔都想食多次,可能純粹因為成盤成盤咁隊落口,食得夠過癮卦~
急步咁走入 metro 站,搭 metro 去到 Bastille,Bastille 呢邊冇落雨,幾好天~
今次就叫啲同上次唔同嘅嘢~
第一 set,點咗 Tradition:
Starter:Shrimp Croquette with Salad
Dish:Mussels - Marinière styled
Dessert:3 Scoops of Ice CreamCreme
第二 set,點咗 Gourmand:
Starter:Cheese Croquette with Salad
Dish:Sirloin Steak
Dessert:Crème Brûlée
Starter,兩個都幾好,不過不失,正常味道~
Mussels,都係 Original 好食啲~
Steak,熟得滯同乾得滯,味道都係麻麻地~
Dessert,叫嘅同之前一樣,味道,當然都係同之前一樣~
食飽飽,睇睇時間,返到酒店應該未到九點,應該可以去酒店樓下間超市睇吓~
返酒店都係搭 metro,去到超市,買咗啲蕃茄仔,好甜好好食,又多汁,好清新,正!
留言列表