2013.02.20 清境、高雄 (台灣第二天)－《瞬間看地球》Stranger's Blog

今日行程：

博望新村 → 青青草原 → 小瑞士花園 → 高雄六合夜市 → 捷運美麗島站 ~ 光之穹頂

一早起身，預期般嘅天氣，多雲~

早餐有西式有中式，不錯的，最欣賞佢杯豆漿，聲稱「有機現磨豆漿」，唔太甜，好有豆味，正！

噚晚揸上去泊車條路，當時覺得有點窄，朝早睇落，其實都唔係好窄姐~

呢度就係招待處，有相當數量嘅 DVD 可供借用~

第一站「博望新村」

其實本來都唔諗住上嚟，因為睇相都知大約係點，只係兩邊平房咁，冇咩特別，反正又唔打算上嚟食嘢~

不過距離黃慶果園只係一公里路程，揸車的話，都懶得去理大約要幾耐啦，就上去望望~

呢度有間民宿~

用咗一萬種方法都固定唔到個 GPS，是鬼旦，求其放，齋聽聲就算，反正清境呢度，冇 GPS 其實都冇大問題~

落山時順便入滿油，準備定今晚揸過高雄~

下一站「青青草原」

第一次上嚟清境，入青青草原可以話係指定動作~

好容易就走到南票口，就泊部車喺馬路邊嘅停車格~

我哋跟指示去搵咗洗手間先~

就喺洗手間隔離，有好多嘢飛嚟飛去，睇真啲原來係蜜蜂！

我同屎塔走埋去啲裝蜜蜂嘅箱度睇，對於啲蜜蜂係咪可以由個箱度走出嚟，我同屎塔嘅想法存在住分歧~

(膠板覆蓋住嘅空間先有蜜蜂)

睇吓第二邊，咩分歧都冇晒......

我哋先由南票口走到北票口~

綿羊秀場地~

不過今日冇秀睇，都冇咩所謂嘅~

冇秀睇，但有馬騎~

先嚟小馬，相信係俾小朋友騎嘅~

再嚟大馬，兩個大人一齊上去都得~

現場睇，真係覺得啲馬好巨型！

費用呢~~~

全場只係見到兩隻咖啡色嘅羊，就好似係羊群中嘅明星咁，呢隻係其中一隻~

肥騰騰咁，好鬼得意~

呢隻呢，好似有啲急事好趕咁，由橋頭開始跑過嚟，不過跑到中途冇晒氣，一路索氣一路慢慢行~

綿羊城堡，不過只係得個名，冇咩特別的~

喺綿羊城堡有隻貓，同佢玩咗好耐，啲毛勁柔順，佢又好痴我哋，玩得好開心~

相信係表演完嘅演羊......

行返轉頭時就行經萬里長城棧道~

其間買咗啲羊糧餵羊，NT$10 一盒，份量唔算少~

不過呢，有消毒濕紙巾先好餵呀，放一堆喺手，啲羊只係舔一吓，已經可以將手上嘅糧黏晒入口，跟住成隻手掌都係羊嘅口水，其實都幾核突吓~

又扮得幾傳神~

現場嘅指示牌，參考吓好喇~

呢個指示牌顯示果四個亭嘅名分別係：草春亭、原風亭、青雲亭、青海亭

你現在的位置指示正確~

呢個指示牌顯示果四個亭嘅名分別係：含煙亭、攬翠亭、天長亭、地久亭

唔知點解啲亭嘅名會唔同咗......

你現在的位置指示並不正確，因為呢個牌嘅位置正確係喺地圖中綠色嘅地方入面~

呢個指示牌嘅你現在的位置，並沒有出現在地圖中......

青青草原嘅其他雜影~

走返到南票口，覺得有啲熱，於是就返車放低件褸~

去到車度，見到差唔多所有車位都被佔用，而且仲有人喺度等緊位，我哋嘅出現，自然會令人誤會我哋開車而俾咗個假希望人......

點解有人等緊位，但又只係差唔多所有車位都被佔用而唔係全部呢？

因為......

其實，一樣可以泊到入去嘅，只要唔好泊咁盡，司機落車就一就應該冇問題，不過就唔知點解冇人泊~

跟住就由南票口向馬術秀場方向行去~

幾個字後就有馬術秀睇，不過我哋對馬術秀興趣不大，所以呢，一路都係慢慢行，行到去有得睇就睇，過咗時就算數~

一路行過去，相信就係觀山步道，呢度有一排櫻花，估計就係民宿噚晚提過，比櫻花步道更多櫻花嘅地方~

如果天氣夠好，喺呢度觀吓山應該會幾正~

行到去馬術秀場，馬術秀已經開始咗，就坐低睇陣~

睇完馬術秀就向步步高昇方向行，途經大自然劇場，不過冇咩睇~

去到步步高昇，但就冇行落去~

跟住呢，我哋想去畜牧步道，因為聽講果度嘅羊比青青草原更多，但係唔同地圖所指嘅畜牧步道位置都有啲出入，喺呢度問咗人，確認由北票口步行五分鐘就到~

又要行返去北票口......好彩清境呢度都幾舒服，行吓都唔怕嘅~

行到南票口附近，買咗兩支雪條，一支牛乳，一支羊乳~

買羊乳雪條係我嘅主意，屎塔就話唔係好敢食~

食咗一口，真係超後悔，勁難食，直情食到想嘔！

一向唔浪費嘅我，最後都頂唔順，食剩五份一就掉咗......

長途跋涉，終於嚟到傳說中嘅畜牧步道，可惜，現場莫講話期望中啲羊多過青青草原，就連一隻羊蹤都冇！

只有牛......

失望之餘，更發現愚蠢！

點解我哋唔喺南票口揸車上北票口泊低部車先再行去畜牧步道呢？

嚟嘅時間行多咗咁多路，返轉頭又行返咁多路，真係蠢到爆！

離開咗畜牧步道，就去攞車再揸落旅遊中心食嘢~

攞車時俾我見到兩單好危險嘅情況~

1. 呢度啲人泊車興用頭入，咁離開就自然要用尾倒車出，我見到有部私家車倒緊出大路，正好有部泥頭車自斜路上面高速(以咁重型嘅車落緊斜嚟講絕對算係高速)落緊嚟，部貨車不停咁響號，但部倒駛緊嘅車並沒有因此而停止，最後部貨車係踏住中線越過部私家車~

2. 一行三人，其中一個係小朋友，大約四五歲，沿斜路向上行，男嘅行馬路邊，個女嘅同個小朋友友行馬路，個小朋友仲要係行最開邊，與多輛落斜嘅車擦過，咁又唔係話真係好近咁擦過，但係都夠危險啦！

唔知係咪過咗春節又只係平日嘅關係，旅遊中心呢度好冷清，冇咩人又冇咩舖頭開咗~

我哋見到有間餐廳，初時都唔確定係咪營業中，望入去一個人都冇，連燈都冇開~

行入去再四圍望，先見到有幾個店員同顧客，費事兩頭騰，就呢間啦~

我哋點咗：

奶油燻雞佐檸檬雞

法式海鮮什錦飯

其他配菜

不過不失，正常味道~

越坐就越大霧，好彩一早去咗青青草原~

食完出嚟，成個人都濕濕地咁~

下一站「小瑞士花園」

小瑞士花園停車場~

喺門口行陣先~

花園入面冇咩人，唔......似乎夜晚吸引啲~

離開小瑞士花園，見到對面好似有啲嘢睇，又走咗過去行吓~

下一站「高雄民宿」

開車前，我哋又研究咗一陣個 GPS 點搞好，終於俾我哋搵到方法，呢個方法唔算好，但好過冇~

我哋發現車廂頂部有個小空間，有個蓋，僅僅夠放個 GPS 入去，又唔影響接收訊號，係睇得冇咁方便，唯有自己看著辦啦~

一路落斜途經「老英格蘭莊園」，又停車睇睇~

一路開車開到山腳，望到遠方有部貨車，我同貨車之間大約有十多部車~

貨車行得好慢，貨車後面嘅車不停逆線扒頭，但有時唔係扒一次就可以過到部貨車，十幾架車加埋經過幾十次扒頭動作，我同貨車之間就只剩下一部車~

其間嘅情況可以話係險象環生，有時兩架車一齊抽出隔離線，形成後車要煞車；有時有對頭車，但原線又冇位入，只好夾硬駛回原線，強迫後車煞車俾佢入~

自然，我同前車保持有較長嘅安全距離，因為我實在覺得極有可能發生串燒事件~

沿路都有雙黃線分隔唔同方向嘅行車道，雙黃線對於果啲司機嚟講，彷彿係「歡迎超車區域」

屎塔未到山腳就已經瞓咗，我要一個人負責駕駛同睇一個喺頭頂嘅 GPS，幸好行嘅都係大路，唔駛經常望住個 GPS~

雖然聽聲都可以，但如果知道大約幾時要轉彎，對控制車速同選擇行車線有著極為重要嘅幫助~

喺日本揸過長途車，知道中途都會有啲休息區域，唔知台灣係咪都有，最好就有啦，我好想去洗手間呀~~~

行行吓見到「南投服務區」，會唔會就係有我需要嘅服務呢？唔理咁多，過去睇睇先~

落到去就知道，正正係我需要嘅地方，呢度仲大過我去過日本果啲好多~

見到有間文化藝術館，又走入去行吓~

睇完就繼續行程，行咗唔係好耐就到第一個收費站~

咁多個收費亭，只有一個適合我通過，我離遠已經金精火眼，減慢車速，叫埋屎塔幫眼~

一路行一路行，由有日光行到夜晚，經過五個收費站，連續揸幾個鐘頭車，係手腕有啲攰，但絕對無損我嘅興致，真係爽到盡呀！

喺高速公路，揸私家車嘅都唔算太狠，冇咩車係特別快，只係有啲人到收費亭前都死衝爛衝，差唔多到先急煞換線，有啲仲入晒線要喺雪糕筒中間穿過~

公車呢，就真係狼喇，唔係慢過私家車好多咋，咁大架車揸咁快仲要左穿右插其實都真係幾危險~

有啲老舊貨車仲離譜，冇尾燈咖！痴鬼線，夜晚冇街燈又冇尾燈，鬼睇到你咩！

無驚無險就到咗民宿~

呢度嘅泊車位係要入 lift 嘅，我就同大廈管理員去處理泊車事宜，屎塔就處理 check-in 事宜~

可能因為啱啱有部車上咗去，導致我喺 lift 前都等咗成十分鐘，我見到屎塔同個接頭人好似有啲爭拗，但又見佢笑笑口咁，唔算太勞氣~

我手勢問佢有冇問題，佢又示意 OK，咁我就冇落車幫手喇~

泊好車就同屎塔會合，自然，我問返佢頭先係咪有啲嘢唔順利，唉，結果真係好唔如意，同類事情上年都中過兩次......

屎塔同佢確認房間時，對方話冇預約資料，冇為我哋留房......

那只好將準備好嘅電郵副本拎出嚟俾佢睇，不過確認有預約都冇用，冇房就係冇房~

最後只有斬件上，唯有接受~

Book 四晚，要住三間唔同房，以為有一晚唔駛搬啦，但其實都要搬足四晚~

假設三間房分別為 A、B、C 房，四晚次序為 ABCB......

住唔到心水房間其實好閒，睇相佢啲房都幾好，邊間都冇咩大問題嘅，只係朝朝都要 pack 好行李，等佢幫我哋搬囉~

上到房放低晒嘢，影好相諗住出發，點知俾我發現有一隻小強 BB，梗係殺無赦啦！

我哋嗱嗱聲將所有嘢撤離地面，免得喺唔知情嘅情況下偷運小強返香港！

下一站「六合夜市」

睇旅遊書呢，高雄最大最出名嘅夜市就係六合夜市，由民宿去六合夜市只係十分鐘步程，都幾方便~

嚟到夜市，心中有個疑問，究竟係旅遊書言過其實，定還是「最大最出名」嘅稱號已成過去呢？

呢度同熱鬧完全扯唔上關係！

返港後睇過一篇文章，解釋咗為何六合夜市人流不再~

文章來自4月8日的蘋果日報，作者：高慧然

嚟夜市，主要都係食嘢~

喺「莊記」叫咗海產粥同鹽蒸蟹肉~

冇咩驚喜，但總算不錯，料足抵食~