今日行程:
國立科學工藝博物館 → 旗山 → 美濃 → 高雄光之塔 → 愛河之心 → 城市光廊 → 瑞豐夜市
早餐準時八點送到~
台式飯糰 + 燒餅油條及葱蛋
豆漿 + 紅茶
味道不錯!
今日第一站係「國立科學工藝博物館」
本身對呢個館嘅常設展覽就真係冇咩興趣,不過,做功課時見到就喺我哋去高雄果段時間有個「立體書的異想世界」展覽,好似幾有趣,反正去旗山時會經過,就順道一遊~
入停車場閘口時,攞咗枚貎似硬幣咁嘅停車票卡,到離開時可以經自助繳費機繳費便可離開,非常方便~
展場與展品~
由於展場內 95% 嘅地方都係禁止攝影區,所以都冇咩點影到相~
呢個立體書展覽嘅展品,比我想像中精彩~
由於展品都係放在玻璃箱中,維持揭開嘅狀態,所以我根本就睇唔到揭開或關閉時嘅情況,有啲展品複雜得實在很難相信佢係可以好順利咁閂得埋嘅~
有啲展品,只有幾頁,但就可以將本書嘅封面同封低打開後底面貼住,形成一個圓柱狀,入面有數頁立體作品,就好似有幾間房咁,非常精美!
另外有幾本可以俾遊人隨意揭開嘅,不過都只剩殘骸......
睇完呢個展館,又行吓其他常設展覽,不過都冇咩特別,走人~
下一站係「旗山」
揸咗個幾鐘車就到旗山,泊車方面,之前 search 到有個位係合法及免費泊車嘅,不過嚟到我就覺得有啲怪.....
我睇中果個地方係「旗山生活文化園區」嘅停車地方,怪嘅事情係,一街都係違例泊車,但呢度合法又免費嘅地方就仲有空位......
再睇清楚啲,唔知係資料有錯定還是情況有變,原來而家呢度係要收費嘅停車場嚟~
不過,點俾錢呢?點記錄到我幾時泊到幾時呢?
睇到現場有啲車嘅水撥有啲紙繞住,我諗吓,我有啲模糊嘅印象,繳費可以去 7-11 搞掂~
於是我就假定咗個情況係咁:
泊好車,有人嚟巡,見到部車嘅水撥未有果張紙,就發一張俾佢,以果一刻開始計時,直至繳費時作為計費時段~
我知道有啲位係計時,有啲位係計次,呢度就計次嘅,後來睇到呢度 NT$30 一次,即連續可以泊六個小時,超級抵泊!
我哋首先行去旗山老街~
成車香蕉糕,好似好好食咁喎!
跟住就行到天后宮~
入去行咗一圈,不過又唔係嚟拜神,無謂阻住人,匆匆行過就算~
再行落去就係福德祠~
唔......用日久失修嚟形容,應該幾貼切吧~
沿住老街行到尾,就會去到旗山車站~
喺車站呢度,有位小姐同我哋傾偈,或者因為我哋啲國語太爛,講兩句已經露底,今朝喺國立科學工藝博物館又係咁,呢度又係咁,講兩句就已經俾人問:香港來的?
跟住就行落去搵旗山農會碾米廠~
不過最後都係搵唔到~
沿途見到嘅塗鴉~
我哋就唔打算上山,所以,旗山基本上已經行完,而家就返老街食嘢~
火車頭當歸鴨~
我自己都幾鍾意食有藥材味嘅菜式,所以就揀咗呢間~
鴨肉麵線
鴨本身冇咩特別,係有淡淡嘅藥材味,但更喜歡個湯,有濃濃嘅藥材味,正!
乾拌豬腳
淨食豬腳,都已經幾好食,加埋啲薑絲一齊食,夾到不得了,可以話係提昇到另一個層次呀!
(都唔知邊Q個影到 out 晒 focus......)
香焦係旗山嘅名產之一,縱使我有怪病纏身,醫生叫我唔好食香蕉,我都唔理得咁多,破戒就破戒啦!
買咗舊香蕉糕食,顏色真係比我見過嘅都黃,好似好好食咁,不過食落呢,同以前食過嘅冇咩分別,如果因為咁樣死翹翹就真係唔抵喇!
點咗:
紅豆牛奶冰 + 香蕉冰淇淋
(冰淇淋另有黑色可選,我唔夠膽試......)
紅豆牛奶冰幾好食,枝香蕉冰淇淋就真係好嘢,成條嘢由外到內,再由內到外,完全冇味嘅!
食完嘢就行返去攞車~
咦,水撥上面咩都冇嘅?咁係咪唔駛俾錢?我估......係卦,唔理喇,開車!
下一站係「美濃民俗村」
其實就冇咩嘢睇嘅,只不過一場嚟到美濃,冇理由揸車行個圈就走咖,都搵啲地方去吓,咁呢度都幾舒服嘅~
最意外係佢放咗啲玩具喺度,其中一樣係高蹺,我哋玩得好開心,大家都大笑咗好幾分鐘~
離開嘅時候,遇到一個幾可愛嘅老人家~
有個公公走埋嚟叫我哋幫佢同婆婆影相,講晒要求,要有咩景,向咩角度~
佢講完埋位嘅時候,"拮"高雙腳,等自己望落高啲~
我真係覺得佢好可愛~
下一站係「中正湖」
去中正湖嘅途中,巧遇花海~
我哋喺度都逗留咗相當嘅時間~
去到中正湖附近,就搵位泊埋一邊,再步行過觀湖平台~
喺呢度,除咗我倆就再冇其他人,成個湖都好似屬於我哋咁~
下一站係「客家文物館」
成個館,得兩個顧客,靜到行步路都好似發出過多嘅嘈音咁~
雖然 NT$80 就可以包場,但其實都冇咩吸引到我哋,可以話,幾悶~
其中有一間房,入面有個工作人員坐喺度,檯面標示住,如果有需要,可請他為遊人解說展品~
唉,我都替佢覺得悶,莫講話遊人都唔多個吖,就算有,又有幾多個真係會請你為佢哋解說吓啲展品呢~~~
下一站係「東門樓」
本身呢,設計行程時,唔想太夜返到高雄市中心,所以唔打算去「東門樓」同「敬字亭」,不過而家時間比預期早,決定去原鄉緣紙傘文化村嘅時候兜一兜過去東門樓~
下一站係「原鄉緣紙傘文化村」
期間經過油站,都係入吓油先,費事聽日交車前唔記得,要俾租車公司徵收比油站高嘅油費~
駛到部車埋去嘅時候,油站職員話我停錯邊,我同屎塔都覺得奇怪,真係呆咗一陣~
我入嚟時見到有標示住柴油同電油係唔同線,咁毫無疑問,梗係走去入電油果條線啦,點會走錯邊呢?
唔知係我哋呆得太耐定對方冇咩耐性,我哋準備問返佢嘅時候,佢已經唔理我哋,開始做佢要做嘅嘢~
嚟到呢度,我哋明喇......
部機嘅位置,喺部車嘅右邊,而部車嘅油缸蓋喺部車嘅左邊,原來佢條喉係唔夠長!
以往入過咁多次油,都未試要就住個油缸蓋嘅位置去選擇停車位置嘅~
條喉唔夠長,但佢又做緊嘢,係點做嘅呢~~~
就係扯住條喉嚟入......
不過都唔係話扯得好行嘅,但呢啲情況,最好都係唔出現較好啦~
原鄉緣紙傘文化村,容我再次講句,都係冇咩嘢睇......
下一站係「敬字亭」
由於本身冇計劃到去敬字亭,所以都冇記低資料,而家唯有靠車上面嘅 GPS 去搵吓敬字亭喺邊~
點知搜尋完有三項結果,我從來都唔知原來呢度唔只得一個敬字亭,哎吔,咁去邊個先好呀,梗係想去個返高雄市時順路去得到咖啦~
又冇旅遊書喺手,又冇地圖,好彩,離開原鄉緣紙傘文化村時,攞咗本好簡單嘅地圖,街名就冇喇,附近有啲咩都仲睇到~
於是我哋就搜尋想去果個敬字亭附近比較有機會用 GPS 搜尋得到嘅地方,去到附近再搜尋敬字亭,揀最近果個就應該冇問題~
所有計劃好會去嘅美濃景點,似乎都唔係好吸引,不過嚟到美濃,就係有一種好寧靜,心靈被洗滌過嘅感覺,我絕對係帶住一種好舒暢愉快嘅心情離開美濃嘅~
下一站係「光之塔」
揸車嚟到光之塔對開嘅馬路邊,好容易就搵到停車位,計次嘅~
遊覽光之塔之前,去咗對面客家文物館搵洗手間~
嚟到客家文物館,我不禁諗起計劃旅程時,曾經打算將美濃同高雄嘅客家文物館都納入行程之內,好彩左度右度都度唔掂,放棄咗高雄呢個,實在係冇咩興趣~
嚟到光之塔嘅時候,個天仲未黑,仲未睇到塔身開燈嘅情況~
由光等到黑......
都已經入黑,塔身都係冇咩光,唔通要黑齊先開燈?
咁不如行去下一個景點先~
下一站係「愛河之心」
沿河邊行過去,有人散步、有人跑步、有人踩單車,非常寫意~
心......邊度睇到有心呀......
左睇右睇,到真係想放棄嘅時候,又俾我勉強見到個心型~
不過真係有啲夾硬嚟,你話係......咪係囉~
遊完愛河之心,又沿河邊步行返去光之塔~
天都已經黑齊,塔身本身都係冇光,但佢本身被塗上唔同嘅顏色,靠其他燈光照射落塔身而形成塔身有唔同顏色嘅光~
我本來以為塔本身會有光亮著,睇嚟係我諗多咗......
部車都停咗好一段時間,我十分相信已經有人攝咗紙仔俾我,要去七仔俾錢~
哈,點知都係冇,又可以免費合法泊車,正!
下一站係「城市光廊」
本來嘅行程係食嘢先嘅,不過我同屎塔都唔肚餓,所以就跳一跳去下個景點先~
雖然係好唔順路嘅事,不過揸車去其實好快,唔順路都冇咩所謂~
自駕真係好,想去邊就去邊,GoGoGo!
到咗附近,就要煩泊車,咁繁忙嘅地方,自然唔可以周圍泊阻住晒,但要搵個合法位真係一啲都唔容易!
我喺五福三路嘅環形馬路兜咗好多好多個圈,兜到個人都暈暈地,再加上螞蟻般嘅機車,真係煩死人~
點解部車唔可以摺埋放落袋呀,枉我一直都咁信任叮噹,原來呃人嘅......
兜咗大約第二百個圈,終於俾我搵到位喇!仲一嚟嚟兩個!
五福三路附近嘅一座建築物~
嚟到城市光廊,行咗一陣,四周圍都黑媽媽,完全睇唔到做功課時見到嘅光廊,唔通真係要聰明人先睇到?
我睇到刻意用光做裝飾嘅地方就只有兩處~
喺附近見到隻貓,佢心入面可能念緊咒語:你睇我唔到......你睇我唔到......
回程返去攞車嘅時候,終於俾我哋見到巡邏攝紙中嘅工作人員~
而呢個人係向緊我哋部車嘅方向前進,我哋急急腳咁行,希望先過佢去到我哋部車度~
自然,有心快過佢絕對係輕而易舉嘅事,因為佢一路行一路有嘢做,我哋實會快過佢~
當然,十元八塊,仲要係台幣,俾錢真係完全冇問題,不過要記掛住搵地方俾錢都幾煩人,免得過就免啦~
下一站係「瑞豐夜市」
最原先嘅計劃,係唔會揸車嚟夜市,費事搵地方泊車~
不過最後都敵唔過心癮,船到橋頭自然直,去到自然有辦法~
嚟到夜市附近就已經見到有停車場嘅指示,都話唔駛擔心咖啦~
嘩,NT$80 停一次,呢度算係幾貴,不過,貴都要泊咖啦,你仲有其他辦法咩?
行到停車場入口,有個阿嬸喺度,由於我唔知入場時俾錢先定走時先俾錢,我停低部車,我諗佢會話我知點做~
佢好刻意咁靠近我,細細聲講:八十
咁鬼祟做乜嘢......
泊好車就行返去大門口,由頭行落尾~
呢度嘅熱鬧情況,絕對係一個夜市應有嘅熱鬧,多人到只能用蠕行嘅步伐~
我哋其實都好怕多人嘅地方,但有啲地方少人就唔過癮,就好似夜市咁,越熱鬧越開心~
先講好食嘅~
海味鮮蝦棒
外層魚肉非常彈牙,內層鮮蝦美味,非常不錯!
阿利無骨牛小排
有牛味有肉汁,又夠稔,正!
火魂德國豬腳
食豬腳好怕一味得個鹹字,但呢檔唔會,鹹度適中,燒得好香又唔會太燶,外皮夠脆,好食!
真蝦胡椒蝦
上次去台北食咗胡椒螺冇食到胡椒蝦,今次補數~
蝦夠新鮮,胡椒夠惹味,唔錯~
跟住就唔好食嘅~
烤鴨夾餅
唔好話鴨味,連一啲肉嘅味道都冇,如果本身唔知係咩嚟,合上眼咬一啖,肯定食唔出有鴨!
野味燒
雞軟骨
肉多過骨,入咗口直情要刻意搵吓舊骨喺邊,咬兩吓就消失得無影無蹤,成串嘢冇味嘅!
雞腿肉
完全冇味嘅!
豬肉
柴皮豬用串,一樣係冇味嘅!
整串燒整到咁嘅境界,真係高手!
留言列表