2013.02.22 高雄 (台灣第四天)－《瞬間看地球》Stranger's Blog

今日行程：

左營自助新村 → 眷村文化館 → 蓮池潭 → 新台灣原味餐廳 → 市民藝術大道 → 駁二藝術特區 → 真愛碼頭 → 苓雅夜市 → 85大樓

早餐準時八點送到~

割包 + 大湯包及蛋餅

豆漿 + 紅茶

個割包好似梅菜扣肉包咁......

味道都可以~

今日第一站係「左營自助新村」

做功課時，關於左營自助新村嘅問題，清一色為：拆咗未？

綜合我搵到嘅資料，冇一個人好肯定咁話拆咗，但又冇見到有人話今年內去過並確認仲未拆，我初時都心大心細，去唔去好呢？

其實都唔知有咩好掙扎，去一去咪清清楚楚，又唔係要長途跋涉，諗咁多做咩......

上咗車，自然要喺 GPS 度輸入目的地資料，不過無論我將左營 / 東 / 新村 / 自助新村 / 眷村呢幾個字眼作唔同組合去輸入，GPS 都搵唔到相關地點~

好啦，咁我哋就叫 GPS 帶我哋去必勝路，去到心勝路再算~

竟然，竟然連必勝路都話冇！

唔緊要，仲有青海工商，青海工商唔會冇嘞呱？

結果當然係有啦，最後順利到達青海工商，自然都搵到左營自助新村~

左營自助新村已經係一條荒廢咗嘅村落，四處都係破舊嘅房屋~

唔駛行得好深入已經可以見到圖畫，呢度嘅圖畫，有相當嘅部份帶有政治色彩，同之前睇過嘅彩虹眷村好唔同~

仲有其他用廢物堆砌而成嘅作品~

「高級街友要過年，懇請大爺賞點錢，千元起跳，佰元拒收，謝謝！」

「請問能開發票嗎？」

反共抗咩呢？諗咗好耐，原來係個俄字~

「一日陸戰隊，終生掉眼淚」

可能我哋太早，加埋我哋，呢度只有四個遊人~

呢度話大又唔係大，但又不停有新發現，好似尋寶咁~

下一站係「眷村文化館」

時間比我預期嘅早，我印象中附近有間眷村文化館，就過去睇睇~

好喇，係時候同部車講拜拜喇，真係夠鐘要交車~

去到和運高鐵外站，揸埋入去放車嘅地方，但無論辦公室內定放車嘅地方，都係一個人都冇~

就好似睇戲嘅情節咁，通常咩人都冇，都係有啲事發生過咁......

我哋落咗車，諗住四圍望吓，突然有兩個人唔知喺邊度跑出嚟，係真係跑出嚟，問：是交車的嗎？

究竟果兩個人之前匿埋咗喺邊？又做緊啲咩呢？我唔敢諗太多......

之後，就好正常咁進行驗車及交收~

油量同取車時一樣，FIT！

下一站係「蓮池潭」

由高鐵站行過去蓮池潭，話遠唔遠，話近唔近，我就唔係好怕行嘅，屎塔，辛苦你喇~

嚟到潭邊，首先行咗去一個島，呢個島係經由連續 W 形嘅橋連接嘅~

島嘅另一邊有七八個人喺度釣魚，認真寫意~

跟住就行過去孔廟果邊，不過孔廟正在維修中，不能進入~

孔廟附近~

都係時候休息吓，就喺附近搵咗個有樹陰嘅地方坐吓~

呢個位真係正，有樹陰又有啲風，仲可以靜靜咁欣賞呢個蓮池潭~

其間見到有隻貓，佢由初時戰戰兢兢，到最後直情瞓喺我同屎塔之間做出一啲親暱行為，我哋同佢都玩咗好耐，我諗最少都有半個鐘~

玩夠休息夠就繼續行，途經天府宮，不過就冇入去~

再行落去就到北極亭及玄天上帝~

呢度有部自助求籤機，見平平地，就試吓~

屎塔先試，結果各方面都幾好，咁我又跟住試吓，又係各方面都幾好~

本來我哋都唔係好信呢啲嘢，睇完個結果，我哋似乎開始有啲相信~

喺附近見到個池~

再行落去就到春秋閣~

春秋閣前有條龍，龍口有樓梯，我哋就走上去睇吓有咩睇~

進入咗龍口，我赫然發現，原來成條龍就係一條橋，可以一直通到去龍尾！

真係好意外，完全冇諗到係咁嘅~

過咗條龍，向潭中心行出去就係五里亭~

再落去就到龍虎塔~

遊人必需要由龍口入，虎口出，否則就唔吉利咁話~

塔嘅階梯模擬咗龍虎嘅脷，好認真！

龍虎塔對開嘅位置，係慈濟宮~

圖下方嘅私家車司機，扭入去慈濟宮嘅時候，撞咗埋圖左下方色嘅紅色圍欄度......

睇相同親遊真係好唔同，出發前對於遊覽蓮池潭，會唔會有啲悶呢？嚟到就發覺，完全係兩回事，覺得都值得一遊~

下一站係「新台灣原味餐廳」

呢間餐廳嘅陳設同台北嘅台灣故事館有啲相似，我個人興趣就唔係好大，不過屎塔有興趣，就將佢編埋入行程入面~

喺龍虎塔呢度去新台灣原味餐廳，我選擇搭公車~

等咗約十分鐘就有車，見到有車時，同一張凳上嘅四個人，係同一時間，一齊起身，其實就冇咩好笑，不過置身其中，感覺又實在很有趣~

落咗車行兩分鐘就到~

嚟到啱啱好過咗午市時間，只好叫下午茶~

可能呢段時間人手比較少，等咗好耐先落到單，又等咗好耐都未有嘢食，於是我哋就四圍行吓先~

食物方面，下午茶都有 full set 嘅飯餐，只係選擇少啲~

干貝獅子頭飯 + 巧克力派對冰淇淋

個獅子頭都幾好食，杯冰淇淋就麻麻地~

鮪魚蛋沙律鬆餅 + 焦糖拿鐵咖啡

個沙律幾好，不過呢種沙律都好難整得唔好食嘅，咖啡就冇咩特別，都係咁啦~

食個普通下午茶就用咗超過個半鐘，對我嚟講，算係誇張！

下一站係「市民藝術大道」

搭捷運就到~

不過，都怪自己做功課做得唔夠足，其實呢度冇咩睇，又唔算太順路，嘥咗唔少時間~

呢幾舊嘢係顯示月蝕時嘅進程~

下一站係「駁二藝術特區」

搭捷運就到~

唔......呢度不如我想像中咁多嘢睇，展品唔算太富豐~

自己比較喜歡，印象比較深刻啲嘅~

呢度四圍都有呢啲公仔，我諗超過二十個，印象中冇見過相同圖案~

又走咗入間舖頭行吓，都幾多嘢睇~

行到攰攰哋，屎塔就坐低休息，而我再喺周圍行吓，見到有個展覽，又走入去睇吓~

呢個係一個攝影展，作品唔多，約十多幅，每一幅相嘅背景都係沙漠，入面都有駱駝同一位女士，而呢位女士係完全赤裸嘅，粗俗啲講，三點盡露~

休息夠就繼續行，去到幾個關於「字」嘅展館~

冇咩特別，行過就算~

下一站係「真愛碼頭」

其實我哋對個碼頭同遊愛河都冇咩大興趣，不過既然個碼頭咁出名，就刻意行一行過嚟，到此一遊~

我哋由駁二藝術特區，經過鹽埕碼頭，以散步形式咁，慢慢行過去真愛碼頭~

其間經過一條橋，入口寫明兩輪或以上車輛不准進入，但橋上面竟然有部 SUV......

橋下有市雜同警局~

真愛碼頭，到此一遊~

奇怪，沿途嘅圍欄都有人放好相機腳架，人就坐低晒，有啲就得腳架但冇人喺度~

所有靠河嘅位置都已經被佔，似乎晏啲會有 show 睇咁喎~

開 show 嘅嘢，一係整點一係搭半，而家距七點鐘仲有十分鐘，一於坐低一齊等，睇吓七點會唔會有嘢睇~

十分鐘過後，冇事發生，空腳架嘅主人亦都未返嚟，咁即係說明咗未夠鐘開 show 啦~

咁就唔等啦，繼續行~

下一站係「苓雅夜市」

苓雅夜市，睇書講係比較多本地人行嘅夜市，就係因為咁，所以就有啲興趣~

繼續向前行，嚟到一處好大嘅空地，好多人，遠處又有個台，似乎又係有 show 開咁喎~

台上面有個人行出嚟，佢開始講嘢，佢透過個擴音器講嘢，現場勁大聲，大聲到我同屎塔講嘢要嗌出嚟，對方先勉強聽到......

擴播內容大概係話個 show 現在開始，同埋今晚九點鐘有煙花~

唔怪得啦，原來有煙花！

不過我同屎塔都唔係好恨睇煙花嘅人，所以唔打算到時返嚟睇啦~

但係諗諗吓，今晚上 85 大樓喎，到時可以居高臨下咁睇喎，不過唔知到時會唔會好多人呢？

期間見到個廣告，真係信不信由你......

苓雅夜市，人唔算太多，不過，多數人都係講台語(我估係台語啦)，果然係多本地人！

首先入咗南豐~

叫咗魯肉飯~

都幾好，不過我都係鍾意台北嘅金峰多啲，啲肉好甘香，真係諗起都想食！

冬粉魚丸~

可以啦~

求其搵咗間食鱔魚麵同炒花枝~

鱔魚麵

鱔魚肉質扎實，味道不錯，麵略帶甜味，幾特別，幾好幾好~

炒花枝

真係未食過咁鬼爽口嘅花枝，味道又好，好正！

下一站係「85 大樓」

嚟 85 大樓，純為上觀景台睇吓夜景~