2013.02.24 恆春鎮、墾丁 (台灣第六天)－《瞬間看地球》Stranger's Blog

今日行程：

恆春鎮海的雜貨 → 滿州花海 → 港口吊橋 → 佳樂水 → 風吹沙 → 龍磐公園 → 墾丁鬼屋 → 恆春鎮 → 出火特別景觀區 → 墾丁大街

早餐準時八點送到~

菜包及燒餅 + 大湯包及菜包

豆漿 + 紅茶

都係一般啦~

今日第一站係「恆春鎮海的雜貨」

去海的雜貨，當然唔係買雜貨啦，而係去買門票~

喺海的雜貨買墾丁鬼屋同國立海洋生物博物館門票會平少少，反正由高雄落墾丁，可以話係順路~

離開民宿，就去攞返部車先~

真係好運，儘管泊咗部車喺高費率停車位，但未收到停車票仍然係唔需要繳費的~

沿途天氣都好好呀，係有段路勁大風，大風到部車明顯向隔離線飄，要減慢車速並且握緊軚盤先得~

到咗海的雜貨，雖然我唔係嚟買佢啲貨物，不過我有睇過佢賣嘅嘢，有啲都真係幾別緻的~

下一站係「滿州花海」

出發前睇過資料，甚至到某台灣討論區問過，確認咗地點，同埋二月份係會睇到花海~

不過可惜，嚟到咩都睇唔到，仲落雨添......

我哋喺附近兜咗幾個圈，都唔見有花海嘅蹤跡，只好放棄~

好彩喺美濃都睇到，冇咁失望~

下一站係「港口吊橋」

由滿州開車落港口，天氣開始好返啲，雨開始細啲，心情都好啲~

去港口，當然係為吊橋而嚟，行去售票處，個售票員竟然在熟睡中！

我同佢講嘢好，敲窗好，佢都冇反應，其實可能係我太細聲或者太輕力，因為怕太大聲會嚇親佢~

於是我加大力度，諗住如果佢再唔醒就算數，反正條橋都係自出自入嘅~

呢次佢醒喇，嘩，佢直情好似唔知發生咩事咁......

收咗錢俾咗兩張飛我，佢就繼續毫不避忌咁即刻伏低繼續瞓......

喺呢度可以租艇划，而且仲可以划到不想划~

港口吊橋~

喺橋上面，望向大海，喺遠處見到有個人喺個灘上面，就咁望好似好危險咁~

過咗橋之後，見到前面好似有路行，唔通就係經呢度去到遠處嘅灘？

我哋行咗約有五分鐘，不過越入就越覺得危險，結果都係行返轉頭，免得再入可能有咩事都冇人知~

過返條橋，我刻意留意果位售票員，狀態仍然係熟睡中......

下一站係「佳樂水」

由港口去佳樂水，只係幾分鐘車程，其間，我哋見到有個地方好似好近個海咁，於是就泊好部車，向海邊行過去~

原來呢度行出去，就係頭先喺橋望向大海果邊果個灘！

橋果邊就非常平靜，大海果邊就波濤洶湧~

好快就嚟到佳樂水~

各式各樣嘅遊覽車，都等咗十五分鐘先開車~

眾所周知，佳樂水嘅岸邊，好多石都被形象化~

可能我嘅想像力實在太差，好多我都覺得唔係好似佢哋所講嘅物體~

就貼上我自己覺得比較似嘅相啦~

臥豬石

蟾蜍石

呢舊唔記得佢有冇提過，我覺得似河馬，就當佢係河馬石~

台灣石

大面石

睇到都覺得危險~

遊覽車去到盡頭會停十分鐘，我哋喺度除咗欣賞風景，又玩咗陣貓~

其它佳樂水嘅風景~

之後就去咗佳樂飯店~

去佳樂飯店，當然係為咗食海膽啦，NT$100 一隻，都真係幾抵~

不過呢，做功課時，搜索到有關呢間嘢嘅負面消息，而呢個消息係四圍都有，唔同論壇，唔同遊記都有佢嘅蹤影，但內容係完全一樣~

其實我對此有啲懷疑，覺得唔排除係被陷害嘅，所以我都冇因此而唔幫襯~

本來就點咗下圖右邊嘅菜，不過上檯時就嚟咗中間果種，都唔緊要嘅，反正都幾好食~

炒蜆，味道不錯~

生海膽，份量足，不過味偏淡，不如想像般鮮味，同期望有少少出入~

多寶魚，呢條魚真係正，肉厚鮮甜，好好味，NT$400 真係抵食~

老闆仲話每日限量八條，不過而家下午兩點喇喎，仲未賣晒嘅？

真係估唔到，呢餐令我回味再回味嘅，唔係海膽，係條多寶魚！

下一站係「風吹沙」

揸車要打醒十二分精神，係老生常談，喺台灣就更加要~

過去風吹沙時，又遇到不顧安全嘅逆線扒頭，如果果刻我分咗神，冇及時煞車，或許對方會煞車，或許對方會以為夠過加速避免相撞，或許對方會判斷錯誤和我撞個正著，誰知道？

有啲書介紹風吹沙時，並冇提到佢係有季節性嘅~

冬天啲風由海吹上岸先會睇到啲沙被風吹晒上馬路嘅情況；夏天呢，啲風係掉返轉，向海嘅方向吹嘅~

由佳樂水影過去風吹沙~

嚟到現場，真係勁大風，唔怪得可以將咁多沙由遠處吹到上嚟咁高~

本來諗住行埋上籠仔埔，睇吓景，不過風吹沙呢度嘅景已經非常靚，根本就唔需要再行高啲去睇~

下一站係「龍磐公園」

本來冇諗住今日嚟嘅，諗住聽朝嚟睇日出先嚟，不過揸車經過見到呢度好靚，又見到有停車嘅地方，就停低睇睇，就係呢個時候先知呢度係龍磐公園~

龍磐公園比風吹沙果邊更大風，誇張啲講句，想跳崖都唔係咁容易！

不過呢度個景真係靚到不得了~

部車好得意~

下一站係「墾丁鬼屋」

墾丁鬼屋，玩法同海洋公園哈佬喂一樣，呢度就分 A 及 B 館~

揸車過去，搵咗好耐都搵唔到，結果要停埋一邊搵個當地人問吓，佢都好似唔太清楚咁，但最終都指咗個方向俾我，最後都去得到~

仲有一種叫無敵風火輪，不過我哋冇咩興趣，冇玩到~

雖然 B 館可以影相，我哋都只係係咁二影咗張相~

A 館就唔可以影相喇~

喺 A 館入面，有四個蓋印處，玩完出嚟如果蓋齊四個印，就會獲贈紀念品乙份~

一如所料，全程係遛狗狀態，屎塔全程拉住我係咁跑，唔好話蓋印，連一個蓋印處都見唔到......

出到去個職員問我哋有幾多個印，我同屎塔相視而笑，個職員就笑住問：一個都沒有？

呢個 A 館同海洋公園有啲唔同，佢同玩者係有少許身體接觸，佢會捉腳，同埋，成個館，只有我同屎塔兩個人，成為眾鬼焦點，喺海洋公園係絕對冇可能嘅~

鬼屋出面，可以玩四驅爬山車，不過我哋通常都唔會玩啲要戴頭盔嘅活動，總係覺得啲頭盔唔會好乾淨~

竟然，屎塔竟然話想玩！好，玩就玩啦！

玩之前，教練會教我哋點樣操作部車~

一嚟就問我哋：玩過未？答案係未~

再問：那機車開過了吧？答案都係未~

個教練有點愕然咁笑，我都明嘅，喺台灣又有幾多成年人未開過機車吖~

到實戰時，頭一圈由教練帶住，第二第三圈就自己行~

玩就梗係好玩啦，不過其實都幾危險，操作得唔好係好容易受傷嘅活動~

離開時先知原來今晚會住嘅民宿一點鐘打過過嚟，可惜打返俾佢又冇人聽，冇計~

不過我哋俾咗訂，唔會冇房住嘅~

下一站係「恆春鎮」

恆春鎮，今朝嚟過啦，不過就冇咩人~

其實而家近黃昏，都只係比今朝多少少人咋，仲有好多鋪頭冇開~

嚟到呢個古城鎮，點都要參觀吓個古城門嘅~

呢度有分東、南、西、北城門，不過集齊晒又唔係有獎嘅，所以我哋只係到咗南同西門~

附近有海角七號嘅場景，不過我哋都唔係呢套戲嘅粉絲，冇咩大興趣~

本來嘅計劃係食夥計鴨肉冬粉嘅(多本旅遊書都推介嘛)，不過我哋都未肚餓，又唔係好想食嘢住，所以都係路過而已~

呢楝嘢幾靚~

喺南門附近買咗啲生果，非常清甜！

下一站係「出火特別景觀區」

我哋冇諗住玩 light painting，其實都唔知過嚟做咩咖，不過是旦啦，過咗嚟先算~

揸車過去嘅時候，見到有部車嘅車牌係「前有車隊」，不過，前面係冇車隊嘅......

嚟到出火特別景觀區，一如所料，有啲火喺地面自燃，當然係因為地下有易燃氣體滲出嘅緣故，除此之外，咩都冇~

無聊透頂，走人~

就喺呢個時候，民宿又打俾我哋，佢好細心，知道我哋冇台灣電話卡，就叫我哋到埗後喺出面巡邏隊果度借電話打俾佢，可以慳返啲電話費咁話~

上到停車場，見到售賣煙花嘅攤檔，唔知道邊度嚟嘅興趣，屎塔話一場嚟到，不如玩吓 light painting，就係咁就買咗啲煙花類嘅物品~

都畫咗好幾十幅，我自己畫果啲真係唔係好見得人，屎塔嘅就好過我好多~