《瞬間看地球》Stranger's Blog

今日行程：

旗津 → 打狗英國領事館 → 西子灣夕陽 → 夢時代

早餐準時八點送到~

三明治 + 大湯包及小煎包

豆漿 + 紅茶

今日呢份就好一般，但唔係難食嘅~
 
今日第一站係「旗津」

搭捷運再搭船就到~

一出西子灣捷運站，已經有兩個人行上嚟派傳單，傳單內容係租單車嘅，不過我哋唔諗住租單車，所以就話俾佢哋知我哋唔諗住租~

對方話唔租都攞去睇吓，單張上面有地圖~

見對方咁有誠意，就攞咗張放落袋~

行咗幾個街口就到鼓山輪渡站~

上咗船無聊拎張單張睇吓，咦，有電動三輪車喎！

原先呢，都諗住踩單車遊旗津，不過礙於屎塔踩單車技術麻麻，至少佢都對自己冇咩信心，無謂搞喇，有咩意外就唔好~

所以呢，就計劃到時睇情況，想行吓就散步咁行，唔想行就搭巴士~

不過而家見到原來有電動三輪車，安全又唔駛行，掂喎！

過到旗津再格吓價先~

到咗旗津，先上旗後燈塔~

行行吓見到有指示......似乎多咗個打字......
 
又見到貓，又同佢玩咗一陣~
 
呢個指示就正式得多喇~
 
唔知有冇人諗住踩單車上去呢......
 
上咗一段斜路見到有個觀景台~
 
今日比較多煙霞~

 
旗後燈塔~

 
跟住就行落去旗後砲台~

 
海水浴場~
 
防波堤~
 
跟住就去星空隧道，由砲台去星空隧道，我就見唔到有指示，都係見路就行，見樓梯又行去睇吓咁~

最終都搵到，不過如果唔係咁仔細去搵，真係未必搵得到~
 
睇人哋啲相，隧道有用燈光砌成嘅星座圖案，點解現場冇嘅......
 
穿過咗隧道就到防波堤，當然係禁止進入啦~

 
跟住就行返去碼頭果邊租返部電動三輪車先~

沿途見到啲車都係咁，有咩用呢？防止貓狗小便落車轆度？
 
我哋就係租呢種電動三輪車，舊電足夠由碼頭去到風車公園來回~
 
呢部好搞鬼~
 
攞咗戰車，先去萬二小吃部~

一路上喺條馬路度風馳電掣(自我感覺良好)係咁行，期間互有交換位置，原來坐後面都唔係咁過癮，每逢經過啲凹凸不平嘅位都好"凳"，"凳"到條腰骨都痛果隻~

經過一輪煎熬，終於嚟到萬二小吃部~

內部係一間極為普通嘅食肆~

大部份嘅食品都係 NT$100，先買餐飲券，再攞想要嘅食品，連埋食品走到收票嘅阿姐，繳交同等價值嘅餐飲券，咁就搞掂~

白飯及茶免費無限量供應~
 
魚趐焿

放喺檯面嘅係一大盤，我以為只係樣版，點知原來真係眼見到咩就係咩......

對於兩個人嘅份量嚟講，實在太多喇~
 
今日限量 ~ 焗烤蝦姑 (呢份要 NT$200)
 
涼拌過貓菜
 
柳葉魚
 
未嚟之前，以為係點完食物先再煮，原來唔係，擺喺檯面果啲就已經係製成品......

涼嘅海鮮，其實真係幾唔好食，我覺得嘥晒啲食材，徹底失望嘅一餐~

食飽飽就去「風車公園」

呢度個環境真係好舒服，如果本身係高雄嘅居民，得閒過嚟坐吓確係爽~

 
回程諗住經過海岸公園又遊吓咁，可惜，海岸公園正在維修當中......

 
海岸公園嘅其他部份~

 
行行吓見到海水浴場，就打算泊好部車行入去睇吓~

眼見前面有幾部機車泊埋一邊，就泊喺佢哋隔離~

泊好之後有位女士同我講，泊呢度會抄牌，仲話我知泊邊度最好~

雖然我唔知單車點樣會被抄牌，不過人哋一番好意，梗係要聽吓人講啦~

我本身諗住呢度周圍都泊晒車，跟人泊的話，出事機會會細啲~

跟果位女士嘅指示泊好車就行過去旗津海水浴場~

 
租咗部戰車都差唔多三個鐘，夠鐘交車~

交完車就行咗陣海產街，買咗啲嘢就搭船離開~

下一站係「打狗英國領事館」

由旗津搭船過對岸嘅鼓山輪渡站，過條橋再行過去就可以去到~

橋上風景~

 
由鼓山輪渡站到打狗英國領事館，有兩條路可行~

睇 google maps 時，路程差唔多，一條大路，一條小路，我本來就計劃行大路嘅~

不過過咗條橋之後就見到有個指示牌，上面寫住「打狗英國領事館官邸景觀步道」

以呢條路嘅位置，我相信就係喺 google maps 睇到嘅所謂小路~

既然係咁，梗係跟指示牌嘅方向行去啦~

 
行到中途又見到貓，有成三四隻，不過我估呢頭冇咩陌生人行，呢度啲貓全部都怕人嘅~
 
再行上去，見到啲難以置信嘅嘢......

FOR BIKE???

不是說笑吧！有咩可能呀！

 
呢條景觀步道，其實都冇咩景可觀......

上到上面，首先見到呢個廟~
 
不過呢度非常多人，我哋買咗雪糕雪條行埋一邊嘆吓先~
 
呢度望出去都幾靚呀~
 
食完就買飛入場~

  
朦朧嘅 85 大樓~

 
旗後燈塔~
 
天色開始暗~

 
離開時就行經呢條咁標誌性嘅樓梯~
 
下一站係「西子灣夕陽」

西子灣夕陽有高雄八景之一嘅美譽，不過以今日咁嘅天色，都應該感受唔到有幾美啦~

行過去西子灣嘅時候，係同埋近百人一齊行過去嘅，估計絕大部份都係旅行團嘅旅客~

睇嚟都應該冇咩好位剩......

行吓行吓，咦，原來呢近百人唔係去西子灣，係去返部旅遊巴度咋，咁都好啲！

我哋行到去西子灣海水浴場果邊~

呢度啲風景認真唔錯~

 
嚟到搵咗個位坐底，只係見到一 pat 太陽~
 
有啲人行到去防波堤果邊釣魚，真係有啲危險~
 
開始日落~
 
成個過程，呢個時候睇得個太陽最清楚~
 
呢日最後見到佢~
 
西子灣夕陽，希望將來有機會見到你最美嘅一面啦~

下一站係「夢時代」

去夢時代，唔係行商場，純粹係為咗坐摩天輪~

不過去夢時代之前，先去格上租車嘅建國站~

本來聽朝先攞車過墾丁嘅，但係原來夢時代都幾遠，預計我走嘅時候都冇穿梭巴士搭，所以決定提早攞車揸埋去~

大後日七點就要交車，而家七點去到攞車，唔需要額外收費~

刻意經西子灣隧道行去捷運站~

途中經過國立中山大學~
 
西子灣隧道~
 
隧道內展示緊 LED 設計比賽嘅作品~

 
過咗隧道，行吓行吓就見到呢間嘢，喜歡 Hello Kitty 嘅屎塔，梗係要入去行吓啦~
 
今次喺格上租 Toyota Vios 1.5，部車行咗近四萬，都有啲舊，不過都冇咩所謂嘅~
 
順順利利到咗夢時代，呢度有多層停車場，仲係免費嘅添~

泊好車就搵嘢食先，我哋先落去地面，諗住睇吓服務處有冇啲咩可以攞嚟睇吓~

奇怪，啲簡介只有英文同日文，咁我哋就問吓啲服務員啦，對方竟然很冷淡咁回覆：只有英文和日文

既然係咁，冇計啦，咪睇英文果份，不過呢份簡介真係好簡，基本上想睇吓呢度有咩食肆，喺呢份簡介入面係搵唔到答案嘅~

唔知係咪自己唔識睇啦，最後，只能逐層逐層睇，而每層所展示嘅指示，亦只有該層嘅資料~

到最後，都係去咗 food court，求其揀就算~

劉家冠軍牛肉麵~

很不錯，但我還是較喜歡台北嘅良品牛肉麵~
 
麥可叔叔的意大利海鮮意粉~

唉，難食到食唔晒......
 
食完嘢就上頂樓坐摩天輪，不過入口貼咗告示......
 
真係黑仔，就係咁啱維修到今日，聽日都去咗墾丁啦，今次旅程都冇機會再嚟囉~

唯有齋影相啦~

 
喺度坐咗一陣就離開，揸車返民宿時經過美麗島捷運站，每個出入口都有一線光射出，原來呢幾條光線，會在空中某點匯合埋一齊的~
 
今日夜返，聽朝又早走，都費時泊部車返民宿，下下要等人控制部車 lift，就喺附近搵咗個位泊車~

附近只有一個車位，雖然係高費率停車位，都唔緊要啦，又唔係泊得耐，有限錢而已~
 
泊好車行幾分鐘就返到民宿，今晚都係住返前晚住過果間，前晚發現有小強 BB，已經殺無赦，今晚又有，你唔好彩，願你安息啦~