今日行程:
龍磐公園 → 台灣最南點 → 鵝鑾鼻公園 → 龍磐餐飲 → 砂島 → 船帆石 → 籠仔埔 → 觀景台 → 墾丁國家公園遊客中心 → 青蛙石 → 輝哥生魚片 → 貓鼻頭 → 高山巖 → 關山夕陽 → 墾丁大街
今日第一站係「龍磐公園」
去龍磐公園,係為咗睇日出,不過呢幾日啲煙霞好犀利,雲又厚,我哋有晒心理準備,唔會睇到啲咩~
今日嘅日出時間係 0630,我計劃好 0600 前就要嚟到~
可惜,呢一個景點,成為咗呢次旅程最失敗嘅安排~
出門口時,個天仲係好黑,點都估唔到,短短十數分鐘車程,個天可以由全黑,變到全光......
唉,我冇咩睇日出嘅經驗,以為早半個鐘到已經好穩陣~
不過咁,嚟到現場,天係就係好光,但係完全睇唔到個太陽,我相信我哋再早嚟到都唔會睇到日出的~
只好咁樣安慰自己......
現場勁大風,我哋竄咗入車,慢慢嘆埋個早餐~
食完早餐,兩條友唔覺意瞓著咗,好彩冇人以為我哋雙雙自殺......
下一站係「台灣最南點」
據說,遊人可以去到嘅最南點,並非真正嘅台灣最南點,只可以話係本島嘅最南點~
而真正嘅台灣最南點,係距本島數海里嘅七星岩~
而所謂最南點,對一個普通嘅遊人嚟講,其實都冇咩特別意思~
不過既然有一個咁樣嘅景點,我亦樂意以一個最普通嘅遊客,做最普通嘅事,到此一遊~
離開咗最南點,再向深入啲嘅地方行,去到「長南露營區」,不過唔知係咪已經荒廢咗~
喺呢度露營,我諗都幾正!
下一站係「鵝鑾鼻公園」
做功課時,睇到各種關於收費嘅資料,總括嚟講有三個:
A:公園收費;燈塔免費
B:公園免費;燈塔收費
C:公園及燈塔都免費
都唔知道個先係真,都唔緊要嘅,個個景點都係咁就會失預算嗟,一個半個,冇咩影響嘅~
嚟到現場,當然可以即刻知道答案啦,答案係 A,公園收費;燈塔免費~
呢個公園睇落都幾大,我就預咗要行兩個鐘~
公園預設咗有兩條路線,我哋就揀咗條長嘅嚟行~
不過,今日燈塔唔開放的,因為今日係星期一......
跟住就行到嚟海濱棧道,無遮無擋咁喺巴士海峽邊慢步,真係寫意~
跟住就行到去迎賓亭~
可以遠眺墾丁嘅地標 - 大尖山
呢舊叫做親吻石~
跟住就行返入公園入面,向返出入口離開~
其他風景~
其間仲行咗啲自然生態環境嘅地方,不過就冇咩特別,行過就算~
都行咗一小時四十五分鐘,如果可以入到燈塔參觀,兩小時應該行唔晒~
下一站係「龍磐餐飲」
喺網上面見到,多數評價都唔錯,又近鵝鑾鼻公園,就去呢度食個晏~
把風扇......
叫咗個二人餐,貪可以試多啲嘢~
野生橫紋烏賊~
新鮮爽口,很不錯的~
香橙蝦球~
有人話這道燈配蝦係絕配,我就唔係好識欣賞~
蝦本身係唔錯的,但我就唔覺得加埋燈嘅味道而令佢有咩層次上嘅升華~
蔥爆鹹豬肉~
(跟餐本身係鹽焗雞,但上檯係鹹豬肉,問完佢,佢解釋咗一輪,大意係新年期間會改為鹹豬肉)
預期嘅味道,不過不失~
滑蛋吻仔魚~
原來吻仔魚即係白飯魚,除非有心大整蠱啦,否則都唔會唔好食嘅~
過貓~
呢種菜味道好特別,好清新又有菜味又爽口,我都幾鍾意~
鮮海魚湯~
呢個就普通咗啲,冇乜驚喜~
跟餐嘅就係咁多,另外再叫咗個人人都點嘅鬼頭刀魚炒飯~
味道不錯,但唔算得上必點咁啦~
涼椰子~
廢物利用,我相信係用嚟放骨嘅~
總括嚟講都幾好嘅,不過實在未到非來不可吧~
下一站係「砂島」
順路經過,就停一停,睇吓風景,順便去埋「貝殼砂展示館」
砂島呢邊風景真係幾靚~
好有 resort feel~
下一站係「船帆石」
又稱「尼克遜頭」
相信佢轆落嚟果時嘅畫面會幾震撼~
呢啲景點,真係到此一遊,check point 咁,唔會留得耐,現場又好鬼曬,留咗一陣就開車走~
下一站係「籠仔埔」
聽聞上面風景如畫,又有機會遇到野生動物,所以就上去睇睇~
不過,呢個係預咗去唔到嘅地方,因為進入籠仔埔嘅道路係未經舖設嘅道路,一般私家車係難以應付此等路面~
我就抱住嚟到睇情況再決定嘅心態前往~
嚟到現場,進入咗未經舖設嘅道路約一百米,我決定放棄~
路面間有大石突起,稍為不留神好易撞到車底,實在係博唔過~
唯有喺附近周圍行吓~
下一站係「觀景台」
離開籠仔埔,附近有一塊舖好咗嘅地,約可停兩三部車,google maps 顯示「P」,有啲書就標示觀景台,一於去睇吓~
下一站係「墾丁國家公園遊客中心」
時間比預期嘅早,諗住入社頂公園行吓,不過今朝行過鵝鑾鼻公園,都唔想再行太過類近嘅嘢,結果就喺社頂附近行過,冇入到~
今次最失敗嘅係冇帶到旅遊書嚟,只好靠印象去諗吓啲咩地方冇 plan 到又可以去吓嘅~
最後就諗到墾丁國家公園遊客中心,反正唔太遠又冇咩做,就過去行吓~
喺社頂附近見到啲山羊,佢哋都幾怕人,所以都冇行得好近,費事嚇親佢哋~
呢頭附近有好一段路係限 15km/h,真係要好有心先做得到......
墾丁國家公園遊客中心,對我哋嚟講就真係冇咩嘢睇,比較適合作親子式遊覽吧~
下一站係「青蛙石」
其實呢,先去青蛙石,再去遊客中心比較順路,不過先前唔醒起,都唔緊要嘅,揸車嘛,好快到~
到咗青蛙石附近,望到舊大石,不過覺得唔係好似,唔知會唔會係角度問題,定還是根本就唔係呢舊石?
勉強都似嘅~
行吓行吓,見到啲景點嘅介紹牌,就走埋去睇吓~
牌前方有三位老人坐咗喺度,我哋只好離遠望吓個牌~
望望吓,其中一位老人開聲:不要看了,問比較快!
哈,好!就問吓你......哋啦,結果呢,三個人,有人話向左走,有人話向右走......
唉,都唔知俾咩反應好,謝謝完一輪,左左右右都行過,冇咩收穫,算數~
下一站係「輝哥生魚片」
其實呢個世界,係咪有人睇嘢嘅視線可以轉彎?
行到一個視野受阻咗嘅左轉道路,慢出望清楚有冇來車時,我後面架車竟然俾油加住速咁走去我左邊逆線轉左!
真係好危險,我起油的話又有機會撞到佢,佢亦有機會撞到大路嘅車!
除非佢睇嘢可以轉彎,否則點可以咁有信心?家吓拍警匪片咩!
我哋本來諗住唔食輝哥生魚片,試吓其他冇咁出名嘅,不過,嚟到現場,實在冇辦法唔幫襯佢~
因為只有佢間舖先擠滿人,其他果啲唔係完全冇客就接近冇客~
食魚生嘅嘢,流轉得快啲點都好過擺咗一段相當時間先食~
就係因為咁,我哋真係唔敢幫襯其他食店~
我哋只係點咗兩樣嘢~
綜合生魚片(30片)
我哋實在太高估自己,30 片厚切魚生,份量比想像中要多~
魚生本身幾新鮮,真的很不錯,不過份量太多,食到好膩~
風螺
好味道!
不過又令我諗起台北嘅胡椒螺,相比之下,台北嘅胡椒螺更勝一籌~
附近風景~
下一站係「貓鼻頭」
開車往貓鼻頭時,就喺下圖呢一個位,迎面而嚟,有部車佔用咗我半條線,一如呢幾日習慣做嘅事,急急踩停部車俾佢過先~
註:圖片來自 Google Maps
只係喺台灣揸咗幾日車,驚險場面一單接一單,當然可以只係巧合,但我更相信係普遍~
求神拜佛,剩餘嘅行程有驚唔緊要,最緊要係無險~
嚟到貓鼻頭,必需要將部車停泊喺佢個收費停車場先可以入園~
嚟到見到個公園以為好大,不過行到入去就知可以行嘅地方唔係咁多~
呢舊石都真係幾似貓,相信有養開貓嘅會更加覺得似~
下一站係「高山巖」
去關山睇日落前,順便過嚟行吓~
福德宮~
福靈龜~
飛來石~
呢舊石其實係礁岩,以前啲人以為佢俾巨風吹到嚟,所以叫佢做飛來石~
福德宮對開嘅風景~
下一站係「關山夕陽」
上網 search 睇關山夕陽,唔難搵到「福德宮旁一座雙層涼亭為最佳眺望據點」呢句說話,喺唔同 blog 或網站都可以搵到~
不過我哋圍住福德宮行,唔好話旁邊,就連喺視線範圍內都搵唔到一座涼亭......
或者,以前有?咁就唔知喇~
沿住日落步道行落去,一路行一路行,兩旁都係樹,都唔似有地方係俾人睇日落嘅~
其實呢,我自己對於搵唔搵到位睇日落就唔係太緊張,都係果句啦,咁多雲,點會睇到靚嘅日落吖~
繼續行繼續行,心態上真係完全冇期望,不過世事就係咁,喺冇期望嘅情況下,就會搵到~
喺觀景台度邊休息邊等日落~
睇嚟今次嚟台灣冇咩緣份睇到靚嘅日落,唯有等下次啦~
離開關山,就去墾丁大街買明日早餐,再返民宿休息一陣先出去食晚飯~
下一站係「墾丁大街」
原本呢,就諗住去鮮魚客棧食晚飯嘅,佢就喺我哋住果間民宿對開馬路,好近~
不過當我哋休息完行返出去時,發現間嘢已經唔存在,唉,呢頭仲要冇咩食,唯有揸車去墾丁大街搵嘢食啦~
可能晏晝食魚生真係太多太膩,呢刻我哋都冇咩胃口,又唔想掃街,真係超求其咁食咗少少嘢,求其到都唔想多提......
滷排骨飯同牛肉麵~
味道比賣相好~
留言列表