《瞬間看地球》Stranger's Blog

就住嚟緊屎塔轉工，所以就趁轉工前去玩吓~

今次唔想去台灣，又冇咩心理準備去太遠嘅地方，東南亞地區就只剩日本會考慮~

一月份，唔想咁凍嘅，又只剩沖繩，反正未去過，就沖繩啦！

沖繩，可以話去十次日本都未必會想去嘅地方，當然係因為無知，係因為對沖繩完全冇認識所致~

我同屎塔都唔好陽光與海灘般嘅渡假地方，一來覺得悶，二來我哋都唔好水~

不過佢始終係日本，我哋都相信一樣可以好好玩~

開始做功課，本來都係諗玩四五日，點知，原來沖繩除咗水上活動，仲有好多其他吸引嘅地方，反正一般優惠機票都係限八日，就去足八日！

有唔止一個朋友覺得出奇，沖繩唔玩水都可以玩八日？我初時都以為唔得，仲諗住去埋石垣島果邊，plan 吓 plan 吓，唔夠時間去石垣島添呀，咁下次先去啦！

我去旅行時，鍾意搵啲冇咩人去嘅地方去吓，今次去沖繩，仲為數不少添，可能因為咁，比人用多咗好多時間，所以玩到八日~

原來喺沖繩，一月尾就可以有機會睇到櫻花，冇理由唔就吓啲時間去睇櫻花咖~

知道一月尾就最有機會睇到櫻花，不過由於屎塔同事嘅去留問題，我哋未必可以月尾去，早一個星期出發就冇問題，要等吓先知~

踏入冬季，去沖繩除咗可以睇到櫻花，仲可以出海觀鯨！

嘩，原來沖繩嘅冬季仲啱我哋去玩！

租車方面，就幫襯最大路嘅 OTS，貪佢有優惠景點門票出售嘛~

其實計數呢，買景點門票，去許田買最平，不過我嘅行程就唔到，北上時經過，可能太夜趕唔切，南下時經過，又已經去咗若干景點，唯有喺 OTS 買咗先~

一路等一路等，終於等到沖繩嘅優惠機票，來回連稅 $1998，唔算特別平，但總好過 $2130 + Tax 吖~

買就真係想買，不過未定到出發日期，唔買得住......

之後，港航再劈價，來回連稅 $1393，唔等喇，就早一個星期出發，再用「30天割引」訂埋車，再訂埋酒店！

出發！