《瞬間看地球》Stranger's Blog

今日行程：

秧雞展望台 → 辺戸岬 → 茅打斷崖 → 名護自然動植物公園 → 名護鳯梨園 → 沖繩水果樂園 → 名護苦瓜園 → 花人逢 → 海洋博公園 → Kanucha Resort → 居酒屋ゆきの

今日第一站去「秧雞展望台」
我見我都會去「辺戸岬」，所以就行遠少少去埋「秧雞展望台」，其實我淨係知嗰度有隻雞，不過距辺戸岬不遠，就算係順道一遊咁啦~

輸入咗 MAPCODE 之後，我有少少唔相信我對眼，要成個半鐘？GOOGLE MAP 話一個鐘咋喎！
我當然知道 GOOGLE MAP 都未必係非常準確嘅，但相差成 50%，又真係多咗啲喎~
唔......或者係 GPS 唔準呢~
白痴！呢個時候，點都希望個 GPS 係最準咖啦，你仲要靠佢咖！

本來諗住咁鬼早又去最北邊，輕輕喺啲冇人嘅地方超少少啦，結果就好似噚晚咁，九成時間都好守規矩咁跟足法定時速行......
經 58 路去最北邊，沿途風景真係超正，不過咁，一路行一路行都係啲咁正嘅風景都唔會話再有咩驚喜，但都真係十分寫意嘅~

其實我都冇計時間最後行咗幾耐，因為我有少少行錯路~
事源係咁嘅，行緊大路，佢有顯示前面左轉嘅，不過我一路都冇發現有路，原來因為路口太細，直至過咗路口先察覺到，但我都有少少懷疑，真係要入嗰條路？好似好偏僻咁喎！
之前睇 GOOGLE MAP 啲路唔係咁嘅，係正式嘅馬路，所以有啲唔敢行，唔理咁多，繼續向前，佢自然會俾條新路我行~

好快就有新嘅導航路線，不過行行吓都係要兜入望落有啲偏僻嘅路，冇計，跟啦！
行行吓又出返大街，原來佢係兜返個圈，死都指返我去頭先嗰個路口！
好，上年喺台灣嘅某晚仲驚險，而家仲要係日光日白，怕咩呀，行就行啦！

一路攀爬咁上，上到某個分岔路，GPS 話已經到達目的地，但實情現場唔係囉~
不過呢個地方係冇電話號碼，所以呢刻唔可以用電話號碼再試，我估就算有，都可能只係管理處，試問荒山野嶺，點會有個辦公地方呢，所以就算有電話號碼，都好可能去唔到個展望台~
不過其實唔關個 GPS 事，我而家個地點，真係我睇 GOOGLE MAP 個地點嚟，只係確實位置連 GOOGLE MAP 都冇，再講呢頭啲路真係非常小路，GPS 上面冇顯示到呢條路都唔係出奇事，幸好現場有指示牌，不過就寫住「XXXX(日文)展望台」，見到展望台呢幾個字，死跟啦！

一路跟住指示牌，都轉咗好幾個彎，入到咁入，全部路都已經係僅夠一架車過，就算有部單車迎面駛過嚟都唔夠過~
有時我都好懷疑，究竟我有冇入咗逆線咖？如果有就真係大件事！

最後去到一個路口，有個唔太清晰嘅指示牌，行到埋去先見到指示，向右去展望台，亦由於我本身唔知要轉右，冇靠左偷位入，心裡暗自安慰自己，好彩冇 upgrade 部 Prius C 俾我！Prius C 絕對唔算長，但點都唔夠呢部 Mirage 短，呢部車非常好扭，呢隻窄灣，如果冇咩準備，普通有尾車都一定要倒一倒偷大啲位先入到，我呢部就唔駛嘞，唔偷位都僅僅夠入~

幾十米過後，就係一個泊到四五部車嘅停車場，我深信我已經到咗，泊好車就沿樓梯行上去~
嘩！隻雞原來咁大隻咖！我一直以為高過個人少少咁上下咖咋！
計埋雞頭足有五六層樓高！好過癮！最衰唔俾上啦！
呢隻雞嘅製作都好認真咖~

 

風景，就梗係正啦！

 

下一站係「辺戸岬」
辺戸岬，沖繩本島最北點，我睇過嘅咁多本旅遊書都有介紹，不過會嚟嘅人，我相信比例上唔係咁多~
大佬，揸過幾鐘車先到，為一個景？附近又乜都冇，傻的嗎？係，我就係傻嘅，就算冇秧雞展望台，冇茅打斷崖，只為辺戸岬，來回三個鐘，我都一樣會嚟！

離開秧雞展望台，出返去向落山方向行，好快就返到落啲比較正式嘅馬路，只係幾分鐘就到辺戸岬~
時間仲早，冇咩人，非常舒服~
不過我覺得呢度咩時候都唔會多人~
呢度都幾大，唔係得一個觀景點，好正！

 

由呢度影返過秧雞展望台~
 

下一站係「茅打斷崖」
唔......呢個景點，睇人啲相就唔算太吸引，不過回程算係順路，就兜一兜過去睇吓~

去到 MAPCODE 所指嘅地點，係喺隧道入面......
其實都怪自己做功課做得唔好，整個 MAPCODE 嘅時候，係喺條隧道同路面嘅交接位附近，所以個 MAPCODE 指咗入隧道入面~
不過唔緊要，我做功課做得算足咖，我有電話號碼，有 offline map，今次我決定睇 offline map 自己搵~

呢個 offline map 真係唔錯，啲路同現場一模一樣，開埋個 GPS，個標示跟住部車郁，有埋行車前進嘅方向，只係冇條模擬路線，要靠自己決定點行~
最後好容易就搵到~

 

唔......個斷崖呢？唔通就喺我哋身處嘅地方下面？我諗係啦~

頭先喺「辺戸岬」，同而家喺「茅打斷崖」都有去洗手間，咁偏遠嘅地方，個洗手間一樣都係非常乾淨，真係好嘢！

開車離開嘅時候，經過條路可以望返上上面頭先身處嘅地方~
睇怕斷崖就係呢度啦~
 

下一站係「名護自然動植物公園」
正如我之前咁講，鍾意貓嘅我哋，都幾鍾意睇吓其他小動物嘅；植物呢，就麻麻喇......
Plan 行程時曾經想將佢捨棄，怕要用好多時間，不過經過多番調整，又可以將佢放入去行程度~

自然，又要揸返個幾鐘返落去名護，又自然，絕大部份時間都跟足行車上限嚟行啦~
呢個景點，係第一次用先前買咗所謂嘅優惠景點門票 package，希望真係用得，其實我對日本都好有信心嘅！
 

泊好車行到去收費處，戰戰兢兢咁將旅行社俾我嘅兩張文件交到服務員手中，佢低呼咗一吓：哦~~~
似係好少見，但又知係咩嚟咁~

佢開始有少少手忙腳亂，左翻右翻去摷嘢，最後就攞咗兩疊代用券出嚟，每疊有五張(因我係買五個景點嘅 package)，每張都係連住，但中間有虛線，好易搣嗰種~
再喺代用券度蓋上有效日期，禮成！
佢每疊搣咗一張代用券，咁就可以入場喇，掂晒！
我仲問埋佢呢張飛包唔包坐小火車，結果係唔包嘅~

入場前見到有兩隻鸚鵡，籠外面寫住佢哋識講「おはよう」、「こんにちは」、「ばいばい」，不過我哋係咁同佢講，佢都冇反應~
 

穿過入口，不遠處有度門，過咗度門就係動物嘅世界，門後面有大量鳥類，門前有得買糧食餵，200 円一包，自助形式~
日本人真係好嘢，咁放心都有嘅，冇人睇住咖喎，俾錢都係靠自覺，我就梗係有俾錢啦！
 

開門時都冇咩嘢，基本上佢哋唔怕人又唔係好理人~

 

不過一灑一咋糧就全部走晒過啲糧度，形成一個圓形嘅鳥餅~
灑一次，只消兩秒就食晒，勁快~
自然，好快就灑晒呢 200 円啦~

可以騎馬，不過要另外收費，我哋就冇騎到~
 

場內好多指示牌都係用手畫嘅，好特別！
 

羊鴕(草泥馬)~
 

一講起羊鴕，我就忍唔住要貼一吓之前喺瑞士見過嘅靚女羊鴕~

 

動物園雜影~

 

唔知喺邊度見過有人話預半小時就夠，對我嚟講，半小時就少咗啲，我哋行咗近一個鐘，如果要坐埋小火車，個幾鐘走唔甩囉~
呢度作為親子景點真係一流！

下一站係「名護鳳梨園」
呢個係屎塔指定要嚟嘅，有時佢諗嘢真係好奇怪，我同佢都唔係特別鍾意食菠蘿，用嚟炒餸更加係抗拒，點解一定要嚟呢？

嚟到現場，都幾多人，一架架旅遊巴泊晒喺度，現場有人指揮交通，我覺得都真係有咁嘅需要~

入口附近~
 

我泊好車就準備定兩張代用券喺手，一路行一路行，睇吓邊度會有人收飛，一路行到去排隊搭菠蘿電車都冇見到有人收飛......
上車前一個轉彎位，會安排每組人影一張相先，咁梗係離開前可以以旅遊價買返啦~
影完相都冇收飛，唔通搭完先收？唔理啦，都到我哋上車，唔好猶豫咁多，阻住後面啲人，上車！

之前睇過人哋啲遊記，唔止一個提過搭車時唔可以影相，我就信以為真啦，其實唔係(又或者改咗？)
嚟到呢到，排隊時佢有告示唔好喺呢度(即係排緊隊嗰度)影相，以免阻礙其他人~
不過上車前就睇到另一告示，話而家可以影相喇~

上咗車，職員會問你想聽咩語言嘅導覽，語音方面有四種：日文、中文(國語)、韓文、英文
呢架電動車，係自動駕駛嘅，路程都唔算短，小朋友坐的話，肯定勁開心，又可以扮自己揸車~

沿途都係介紹菠蘿嘅品種同成長期之類，其實我哋都冇用心聽，因為而家唔係季節，成個園都只係菠蘿頭頂嗰執草......
如果撞啱季節嚟，成個園都係唔同品種嘅菠蘿，相信會幾好睇的~
 

落咗車就去到貝殼展示廳同啲商店，咦？冇人收飛嘅？唔......唔好諗咁多喇，行吓商店先~
商店就梗係主打菠蘿酒呀，菠蘿汁呀，同埋其他菠蘿嘅副產品~
試食過幾種菠蘿，有一種真係超甜，唔錯！
菠蘿酒就冇試過喇，要揸車嘛，菠蘿汁都唔錯，如果唔係怕攜帶同過境麻煩，都想買啲~

呢度啲商店，一間接一間，我都唔知行咗幾多間，有大有細，真係估佢唔到，比預期用多咗好多時間~
 

行完之後，再諗返張代用券，我相信係要走去售票處度俾飛先入嘅，不過既然我都遊完，又冇人會受罪，算罷~
買咗杯菠蘿雪糕就離開~

下一站係「沖繩水果樂園」
其實都唔知入面有咩咖，不過就喺鳳梨園隔籬，所以就順道一遊喇~

今次我就搵返個售票處換飛先至再入去~
 

其實入面真係一個水果園嚟，有好多唔同種類嘅水果，不過都係嗰句啦，唔啱季節，成個園 99% 都只係得啲草，梗係唔好睇啦~
入面最趣怪嘅係搞啲唔知咩魔法陣咁，又可以儲印，儲齊咗有啲咩送定點我就唔知喇，我見到啲小朋友見到印章就好興奮~

 

呢隻鸚鵡醒呀，本來又係俾 200 円就可以餵佢，點知佢等唔切喇，自己嚟，佢自己用個咀揭開個蓋，仲覺得入面個膠袋阻住佢，想整埋個袋出嚟，不過唔成功，佢聰明到轉個兜，喺另一邊就可以伸到個頭入去食自助餐！真係聰明！

 

下一站係「名護苦瓜園」
其實我都唔知點解會去苦瓜園咖，沖繩苦瓜出名嘛，就去吓囉，反正好近......

去到苦瓜園，先行佢個種植場先，唔......可能又唔係季節啦，得極少量嘅苦瓜，同場仲有其他植物，行咗幾個單位就直入商店~
 

入到商店，個阿姐好和善咁遞上兩杯熱苦瓜茶，幾好飲喎，好甘香！
跟住行吓個商店就離開~

下一站係「花人逢」
本來唔諗住去咖，睇靚景，其實我都去好多展望塔啦；食 Pizza，又唔係話「好想食呀！」咁，所以都冇咩好強烈嘅衝動想去，不過去海洋博公園前唔知去邊食晏好，所以就安排咗去花人逢~

開車去花人逢，真係要膽大心細~
由大路入小路後，全部啲路都好靚，但有一段路真係好猶豫入唔入好，得一條線，又睇唔到尾，行行吓有車點算？
本來都冇咁猶豫，好衰唔衰，嗰度有啲標示整路嘅路牌，左右各有一個，但係兩個都唔係向我嘅，究竟點咖？
不過 GPS 又指示係行呢條，我等咗一陣，又冇車上，又冇車落，唔理喇，衝呀~~~

話就話衝啫，咁梗係唔係啦，想死咩，睇得清嘅就揸快啲，務求盡快離開呢段路；睇唔清嘅，梗係要慢啦~
平平安安，過咗呢段路就已經到達停車場~
 

之前喺書店度睇過一本旅遊書，作者話平日下午約一時去到，要等位等一個鐘，嘩，真係嚇親我，如果上到嚟要等超過半個鐘我就唔會等，睇景算數~
佢又話嚟到要自助登記，記低姓氏，等人叫名~

行到門口，見到都唔係好滿喎，我就諗住唔駛登記啦，同個職員講兩位，不過個職員都係要我登記~
登記表格上面只需填三樣嘢：姓氏、人數、坐出邊定入邊

我填好姓氏，填緊人數時，個職員就問我坐出邊定入邊，答咗佢之後就帶我哋坐低，其實我仲未填好晒咖~
至於係咪有冇位都要填就唔知喇~
 

我哋揀咗坐出邊，不過個位唔多睇到景，唔緊要啦，食完再睇過~

呢度主要都係食 Pizza 同沙律，所以我哋就叫咗個細 Pizza 同沙律~
另外叫咗杯石榴汁同凍檸茶~

我哋估未有咁快到，就行出去睇吓景先~
頂吖！好彩有上嚟，呢度睇嘅景同平時嗰啲展望台好唔同，係第二種美！

 

食物到喇，頂吖！好彩有上嚟，呢度個 Pizza 勁多芝士喺面，又夠熱辣辣，好味！
不過餅身太軟，基本上唔可以用手揸住嚟食，唯有用刀叉當扒咁切嚟食~
 

沙律就幾清新，不過太多洋蔥，食完好大味......
 

杯凍檸茶，味就冇乜特別，不過個賣相相當骨子！
 

石榴汁非常濃，好味道呀！
 

所以有啲嘢真係唔係睇相可以感受得到，一定要親身嘗試先得！
 

食完嘢又走咗去睇陣風景先走~

下一站係「海洋博公園」
海洋博公園分三個專區，分別係「海洋專區」、「歷史與文化專區」、「花卉與綠地專區」
而我哋今次只會集中遊覽海洋專區，同會行埋過「Emerald 海灘」，黃昏時份會過埋「夕陽廣場」

本來呢，我離開花人逢之後想去瀬底島行個圈，再行吓個海灘嘅，不過今日遲咗好多，就算而家即刻去海洋博公園都比我預期嘅遲咗到，所以就唔去瀬底島喇~

去水簇館呢邊，記得要泊 P7 停車場，我去到先知原來係室內停車場嚟嘅~
 

附近環境~

 

好彩仲趕得切去海豚劇場睇海豚表演~
無論係屋企人定網友，都話比海洋公園嘅精彩，說實在的，海洋公園嘅海豚表現係點嘅，其實都冇咩印象，實在太耐冇睇過喇~

去到海豚劇場，仲未開始，現場當然已經坐咗好多人啦，不過又好得意咖喎，通常呢啲情況，無論坐咗幾多人，都總會搵到啲一兩個位冇人坐嘅，真係咁少人係一個或者兩個人嚟咩？
亦由於係咁，我哋咁遲嚟都唔難搵到算係幾唔錯嘅位~

 

呢位阿叔，希望你嘅手臂冇過人嘅耐力啦......
 

表演開始喇，一般嗰啲擺尾呀、轉體呀、頂波呀梗係有啦~

 

特別可觀嘅係佢跳得好高，印象中比我見過嘅都高，成支炮彈咁射上嚟！

 

另外仲有一條海豚可以好似啲海獅\象\豹\狗咁就咁跳上地面，我印象中就未見過，可能係我孤陋寡聞啦~

 

表演非常精彩，有人講過嚟海洋博一定要睇海豚表演，我都非常認同！

睇完海豚表演，就過隔籬海豚潟湖，仲有十分鐘就有關於海豚嘅講解~
過到海豚潟湖已經有好多人聚集咗喺度，不過都仲未滿(現場不設座位)，仲搵到個可倚靠欄邊嘅位~
 

講解過程全程用日文，不過從講解員同海豚嘅動作，唔難估到大概~
啲海豚真係好配合，有啲個樣又善良，同埋我哋同佢係好近距離，係有機會摸到佢嘅，不過我估係唔可以摸嘅~

 

幾乎所有海豚表演時會做嘅動作，呢度都有做~
講精彩，海豚表演當然精彩，而海豚潟湖嘅精彩，絕不比海豚表演低，而且更值得睇！

握手動作都維持咗一陣，好嘢！
 

條海豚好配合咁將佢嘅性器伸出嚟~
 

條海豚將佢嘅呼吸孔開開合合~
(可惜影唔到開)
 

拋出去嘅圈，順次序咁執返返嚟~
   

咁樣抬返嚟，有趣！
 

之後就講咗一堆日文，絕大部份嘅人就開，我哋梗係跟住散開啦~
原來跟住落嚟係群豚亂飛！

 

海豚戰機嚟喇！
 

就喺群豚亂飛嘅時候，有一撇水花正一正飛濺咗落個兩歲到嘅小朋友度，小朋友即時大喊，而其他人就一齊大笑，幸災樂禍之情，真係表露無為~
唔知係咪屋企人有心嘅呢，還是個小朋友自己咁啱行前咗，係得呢個小朋友企到咁出~

最尾梗係要講聲拜拜啦~
 

精彩精彩！睇完咁精彩嘅講解，就去啲靜態非常嘅地方攝攝時間先，去睇「海龜館」同「海牛館」

「海龜館」同「海牛館」，預咗係細館，亦估計係單一物種，我覺得唔會花太多時間，就喺睇潛水員表演前攝一攝，反正我覺得遲咗去睇潛水員表演都冇咩所謂~

海龜館~

 

海牛館~

 

有隻叫 RYU，唔知佢識唔識出波動拳呢~
 

睇完就行返過海豚劇場睇潛水員表演~
所謂潛水員表演，就係海豚同潛水員之間嘅互動，欣賞海豚高度配合潛水員嘅表演~

過到去已經開始咗，不過見到仲係打緊招呼，應該啱啱開始啫~
 

呢一部份，睇相就顯示唔到啲咩，我就講講其中兩樣可觀性比較高嘅項目~

1. 訓練員喺水缸外面用口大聲說話嚟俾指令，我望實缸入面個潛水員，係靜止狀態，全完冇任何動作，但條海豚又真係做到訓練員所叫佢做嘅動作，唔知係點樣做得到嘅呢......
 

2. 海豚能夠發出聲波，靠聲波嘅回彈嚟收集唔同嘅資訊，呢樣嘢相信好多人都聽過。訓練員就做咗個實驗去証明呢樣嘢~
潛水員佈置咗一個籠門咁上下嘅陣，中間有個波，條海豚就去咬走個波~

 

之後就蒙住佢雙眼，再做一次，的確，今次做得冇咁準確同自然，但起碼佢都真係可以再咬走個波~
睇完表演，就行去「Emerald 海灘」
Emerald 海灘，評級係 AA 級海灘，點為知係 AA 級？唔知喎，淨係知係好嘢咁囉~

行過去 Emerald 海灘大約要十分鐘~
不過行過去嘅時候，沿路都大興土木，都唔知係咪連海灘都唔俾入，一路行一路望，都睇唔透~
真係要行到好近先睇到原來去海灘嘅路冇封到，係四周圍封晒啫~

啲水真係好清！(廢話......)
其實我就唔係好識比較，同之前睇過呢海灘，我覺得一樣咁正！不過呢度個景又好似靚啲~

 

好嘞，行完個海灘就到海洋專區嘅最後一個景點 - 水簇館
我留返俾水簇館嘅時間唔多，因為相類似嘅水簇館都睇過幾次，今次呢度最重頭戲，應該都係「黑潮之海」

入場時過咗四點，入場費會平啲，所以會退返個差價俾我，不過我計過又唔係退足，唔知佢點計嘅呢？

唔......水簇館，都冇咩好講，貼相把啦~

 

都等咗好一段時間先等到三條一齊游過~
 

成隻豬咁嘅......
 

鯨鯊垂直進食表演~
真係有趣，點解會咁嘅呢？
 

差唔多 1730，我計劃係 1730 離開海洋博公園，跟住去夕陽廣場嘅，而呢一刻我的確已經可以離開，不過我面臨兩條路~
一係照計劃去夕陽廣場；一係呢，啱啱見到 1730 就有「黑潮探險之旅」，即係上去最上層，由黑潮之海嘅上面望落去~
但其實都唔係太難揀，天色差成咁，邊有日落睇吖，就等到 1730 睇黑潮探險之旅~

 

睇完黑潮探險之旅，見仲有少少時間先到日落，不如都試吓過去夕陽廣場啦~
離開前影咗兩張相~

 

過去夕廣場，就要揸架車過去 P8 停車場~
其實呢個 P8 停車場，同 P1~P7 唔同，佢冇一個大路口可以一轉入去就係，但係由邊度轉入去，都只係靠估~
喺 GOGLE MAP 度睇，P8 嘅出入口，好似喺 P2 入面~
一路揸到去 P2，真係冇估錯，P2 嘅指示牌下面有個好細嘅 P8，掂！

過到去差唔多 P8，俾保安員截住，係咁講日文加雙手胸前打交叉，咁我以為只係唔俾車入啦，於是就喺前少少位置泊好部車行過去~
不過再次被截，佢又係咁講日文，咁我問佢「Closed？」佢猛然點頭~
夕陽廣場在夕陽前已經關閉，真係唔知講咩好......

下一站係「Kanucha Resort」
呢個就係我第一日嚟到就喺 Family Mart 度買飛嘅睇燈飾地方~

呢間 Resort，完全偏離晒一般遊客會去嘅地方，自成一角~
揸到過去，個天就算未黑晒，都應該差唔多~

結果未到 Resort，個天已經黑晒，又係要行經嗰啲冇街燈，雙線雙程嗰啲路~
不過呢邊好唔同，真真正正冇車，我都不自覺咁揸快咗，不過仍然阻住人......
行咗一段路，終於都見到有避車處，可以讓人行先~
嘿嘿，既然有車開路，就跟住你！

條友揸得勁快，要跟住佢行，係要有過人嘅膽識，更重要有魯莽嘅心態先得，但呢個唔係我囉......
梗係安全重要啲，於是我又開始放慢車速，好快就真正連佢嘅尾燈都見唔到......

到咗之後，有個閘口，我俾張飛佢睇，跟住佢又係咁同我哋講日文，來來回回，始終都係唔明~
佢好快就氣餒，沒好氣的咁俾我哋入，指住閘口左邊嘅草地，示意我哋泊上去~

呢刻我哋都有啲迷茫，泊完草地跟住點呢？
原來草地上面有個帳篷，負責處理燈飾活動嘅事情~
不過我哋同呢個人一樣係雞同鴨講~

佢俾咗張地圖我哋，用手指圈咗兩個地方俾我哋睇，原來呢度都幾大，每個區域之間都有一段距離~
不過最重要係，唔可以俾我哋自己揸車入去的，佢俾咗三個選擇我哋：
1. Walk (佢講完唔笑嗰吓好嘢......)
2. Free Bus (即係穿梭巴士啦)
3. Car (呢樣初時唔知係咩嚟，又唔係自己車，又唔係佢車我哋，淨係知要收費嘅)

Walk 又冇可能；Car 呢，初時完全溝通唔到，即係呢個選擇冇得揀；淨返嘅就係 Free Bus~
我哋問佢 Free Bus 幾耐一班，佢話 15 分鐘，咁都可以啦，點知講講吓就有車，嗱嗱聲返上車攞返啲必需拎嘅嘢再衝上穿梭巴士~

去到第一個燈飾點，我哋就明佢第 3 個選擇係咩嘞~
Car = Kart = Golf 車！
即係租架 Golf 車自行遊覽，1575 円兩小時，如果喺門口已經知，我哋都有可能會租嚟玩吓，不過而家冇啦~

燈飾講唔上十分靚，OK 啦~

 

睇夠就等巴士去第二個燈飾點~
喺等車嘅時候，無聊睇過吓個巴士站牌，原來有分 AB 兩條線的，兩條線行嘅方向唔同，但都會走晒全個 Resort 的，我哋搭 B 線就快啲，不過都唔揀啦，總之有車就上~
喺等車嘅時候，屎塔話想補影少少相，講完就行咗去，我同佢講：「實喺呢個時候有車！」
世事總係咁，喺呢段時間，架 A 車嚟到......
我不停向入面望，唔見佢身影，司機都等咗我一陣，最後都係離我而去~

等到屎塔返嚟，再等咗一陣就有架 B 車到~
所謂「塞翁失馬，焉知非福」，我哋到達目的地嘅時候，影咗陣相，先見到頭先架 A 車到，我認得車上面嘅乘客係同一班人~

都係嗰句，燈飾講唔上十分靚，OK 啦~

 

之前帳篷嗰個人，除咗俾咗地圖我哋，仲俾咗副眼鏡我哋~
原來用佢嚟睇嘢，啲燈會變做哈哈笑嘅樣！
由於我哋冇拎腳架，仲要分別用兩隻手揸相機同眼鏡，呢度當然又唔夠光，啲相真係震過貓王......
 

睇夠走喇，就走返去門口等車~
排我前面嘅，其中有一對年輕男女，喺上車嘅時候，特意讓我哋上先，唔知係咪知我哋係遊客，特意以禮相待，定有其他原因，點都好，我哋連忙表示謝意，再上車~
搭返車到門口，攞返自己部車就走人~

下一站係「居酒屋ゆきの」
呢間居酒屋，據說好多本地人幫襯，又話食物質素好，價錢合理咁，又特別提到個苦瓜炒蛋好食(旅遊書嘛)，就試吓啦~

到咗之後，入面視線範圍內都坐滿晒人，店員帶我哋去咗間好入嘅房，房入面有三張矮檯，中間嗰張有兩個人~
眼見就全面都係坐塌塌米，真係唔明啲日本人點解可以坐得咁自在......
(入面勁多人，費事影相，只影咗門口)
 

我出發前已經記低咗苦瓜炒蛋嘅日文，不過唔知係我指錯咗定佢睇錯咗，總之嚟到嘅唔係苦瓜炒蛋，是旦啦，唔通要人換咩~
 

跟住就再叫咗個牛肉定食~
 

兩碟嘢不過不失，好家常菜嘅感覺，感覺環境真係好地道，大家嚟到呢度都係飲吓酒、傾吓偈，食物其實真係未必係重點，只要唔係唔好食就已經可以了~
旅遊書就形容價錢合理，計我話非常抵食就真！碟牛肉定食都只係 800 円，實在描述得太保守喇！

食完飯就揸車返酒店，途經便利店，買咗啲宵夜同早餐，完結今日行程~