《瞬間看地球》Stranger's Blog

今日行程：

琉家 → 國際通 → 神戸 BAR 仲々

今日搭香港航空嘅 1110 班機到沖繩那覇空港，未夠九點就已經到達機場~
走到港航嘅櫃檯，我哋手上已經揸住電子機票，打算直接到櫃檯辦理將行李寄艙嘅手續~
不過好快就俾港航嘅工作人員有禮貎咁截住，問我哋攞護照幫我哋辦理登機手續~

由於我哋第一次搭港航，唔清楚具體手續應該係點，反正對方叫得我哋做嘅，相信都係應該要做嘅事情~
對方接過我哋嘅護照，再喺部自助辦理登機手續嘅機度掃瞄護照，樣子有點奇怪，再看看我哋手上嘅電子機票，佢先發覺佢做緊嘅嘢係唔需要再做~
唔......其實佢可以問清楚我哋有冇預辦咗登機手續先嘅，而我哋亦可以喺做呢啲嘢之前話聲佢知我哋已經有電子機票，係咪都需要做呢啲嘢......

將行李寄咗艙，我哋通常都會即時入閘做安檢及過關先，反正出面都冇咩好留戀~

入咗閘之後，想搵杯奶茶飲吓，好自然就喺大家樂度買咗兩份早餐慢慢嘆~

班機嘅閘口係 71，即係搭完無人駕駛仲要行到最遠嘅閘口，唔知係咪同走低價路線嘅航空公司有關呢？


 

71 呢度冇得叉電，我哋走咗過 69，用三腳插同 USB 同時叉兩部手機，期間對面個男人走過嚟叉埋一份，唔通一齊叉開心啲？
不過佢點搞都搞唔掂，我八鬼卦望吓佢搞乜，原來佢用緊隻兩腳插，緊係插唔到啦，我就同佢講要三腳先得，於是就幫佢將嗰隻收起咗嘅第三隻腳拎埋出嚟，咁就搞掂喇~

屎塔放低咗部電話休息，我留意到個男人望咗部電好多次，我心諗：你咪駛旨意可以偷到我老婆部電話，我昅住你咖！

聽人講去沖繩較易遇上 delay，今次好彩呀，冇 delay，1110 準時開動，不過出到跑道前等咗好耐，可能都有半個鐘先真係起飛，其實都冇所謂啦，今日冇咩行程，遲咗都冇咩影響的~

從來對飛機餐都冇咩期待，不過今次真係有驚喜！
通常一係全餐，一係有粒糖，一係咩都冇，今次個餐係包嚟，有點意外，其實我冇所謂，咩都冇都得~
 

仲有一樣嘢令我有點意外，就係入境日本要填嘅入境表派晒，我唔知係有部份人有派到定全機人都冇，我淨係知未見過有人派，亦都見到多次有人問而得到同一個答案就係派晒~

遇到三四次氣流，見到有個空姐，每次遇到氣流樣子都有點慌~
係，呢個係好正常，我都驚咖，只不過真係未見過驚到上面嘅空姐啫~

降落時有兩個人暈機浪，係咁嘔，真係替佢哋覺得辛苦，我都係第一次遇到有人暈機浪~

到埗後，梗係成咋人堆埋一齊填入境表啦，好衰唔衰，今次唔記得帶筆，要等人填完先有得填！
之後被安排到一號櫃檯排隊過關，唉，前面個外藉女士搞勁耐，最後係差唔多成機人最尾嗰個過關，好彩有晒 delay 準備，遲都冇所謂~

過咗關再填埋申報表，哼，又嚟！
過海關嗰時，有兩邊，共有五個人，五個人都係認識嘅，只有左邊有個男人係咁用日語同關員溝通~
兩個關員又互相溝通，唔知講乜，我哋已經係最尾兩個人，等咗成五分鐘，係，五分鐘真係好短時間，但試想像吓，只要過咗呢度，沖繩嘅自由大門就會為你打開，而我心目中嘅想法係，佢哋有咩問題咪由其中一個關員去處理，另一個關員處理咗我哋先得唔得呢？駛唔駛全部關員處理同一個 party 嘅人呢？
不過諗就咁諗啦，開聲就梗係唔會開聲，除非真係等咗好耐嘅啫~
其間有第三個關員出現，向我哋後面指，問個篋係咪我哋嘅，我哋望一望，填申報表嗰度真係有個篋，不過就唔係我哋嘅，最後佢插咀問係咁講日文嗰個男人，原來真係佢嘅，篋都可以漏......

過咗關就攞旅遊資料，不過啲資料都冇咩大作用，咁梗係攞咗先，以備不時之需嘛~
那覇空港國際航廈真係幾細，不過都早有聽聞，所以都不感意外~

今日行程係行國際通，住近單軌電車站，聽日去外島玩成日咁滯，所以唔會一落機就攞車，好自然就搭單軌電車過酒店先~
聽過人講話一落機就去攞車，但喺機場要等埋其他人，試過等大半個鐘先開車去 OTS，我聽到都怕怕，呢個都係我唔想一落場就攞車嘅其中一個考慮~

搭單軌電車係要過咗國內線嗰邊先嘅~
搭單軌電車，有種暢遊樂園嘅感覺，就好似遊覽嗰啲主題樂園嘅遊園電車咁~
原來單軌電車都會換軌嘅~
 

今次住嘅酒店，最近嘅單軌電車站係美栄橋駅，由電車站行過去都真係有啲距離，不過方便我聽日嘅行程，都 OK 嘅~

講起呢間酒店，出發前都有段小插曲~
通常去旅行，都係我 plan 行程，住宿就交俾屎塔搞，佢同我講會住東橫INN，咁我就記低晒東橫INN嘅所有資料，包括電話地址座標步行路線等等~
隔咗一排，買咗機票就訂酒店，email 睇到嘅資料，咦，點解唔係東橫INN，係 Tune 字頭嘅？細問之下，原來屎塔改咗唔記得話俾我知......
如果冇留意個名唔同咗，到埗後實去錯~ XDDD

Check-in 完，出發前就請酒店幫我哋致電到「百年古家 ~ 大家」及「普天間宮」訂位先~

今日第一站係「國際通」
國際通，聽唔少人講話賣嘅產品都係差唔多，有點悶~
其實我都怕今日餘吓嘅時間全部花晒喺呢度有點悶，尤其我哋都唔好去旅行時 shopping 嘅~
不過點都好，第一次到沖繩，唔係完全唔行國際通吓化？

出咗酒店無耐，見到 Family Mart，即時走入去買飛先~
本來諗住去國際通先買，不過而家見到就梗係買咗先~
買咩飛呢？就係買 Kanucha Resort - Stardust Fantasia 晚燈嘅門票~
佢個收費規則有少少特別，唔係計人頭，係計車(軽、普通車)，總之一部車就買一張飛，唔理你自己一個嚟定坐滿五個人，都係收同一個價錢~

入到便利店，將我準備好嘅嘢拎俾店員睇，店員就帶我到另一邊部機度~
買飛時都有啲誤會咖，好彩我準備充足~
因為佢都唔清楚收費係計車，而唔係計人，我就將我啲功課俾晒佢睇，咁就明晒喇~

買完飛就去食嘢先，我睇中咗「琉家」
琉家出名嘅係黑蒜麵，我都幾鍾意食黑蒜麵，所以就去試吓~

由酒店行去琉家都幾遠，途中仲落雨添，不過好細，冇咩影響~

附近環境~


 

途經著名嘅「我那覇焼肉店」
 

途經收費停車場，唔貴喎！
 

長途拔涉行到去琉家，門口掛住個牌「準備中」，頂，未開，又信錯旅遊書！
咁冇計啦，餓又唔係真係肚餓嘅，為食多啲~
 

食唔到嘢，就走去買優惠嘅景點門票先~
臨出發前喺網上面見到有關優惠嘅景點門票資料，比許田更平，所以就嚟試吓~
其實都有啲冒險咖，又唔係出晒名嘅 OTS，都唔知得唔得嘅，試吓囉，唔得都係一種體驗，一種回憶，最多都係蝕少少錢啫，冇咩大不了嘅~

途中經過「塩屋」，隊返杯雪糕先！


 

有好多種味嘅鹽~
 

種種都試過，其實都冇咩特別，我同屎塔都不其然諗起「weird」呢個字！
唔落最好食！塊鹽餅都唔錯~
比較值得講吓嘅係「炸药盐」，辣辣地鹹鹹地咁啦，拎出嚟講吓都只係因為個名唧~
 

根據地址順利搵到賣優惠券間嘢，亦成功買到，成功咗第一步！
用唔用到就要下回分曉喇~

我喺呢間嘢度順便問埋「美ら海水族館」嘅入場券，出乎意料，以原價出售......
咁梗係唔駛喺度買啦，國際通有間嘢似係 OTS 嘅附屬公司，喺佢度買就同喺 OTS 租車嗰度買一樣價錢~

出返大街就直奔頭先講嗰間 OTS 附屬公司買「美ら海水族館」嘅入場券，仲有嘢送，小毛巾及環保袋各一~
初時以為送晒俾我哋，我哋邊多謝邊擸嘢，但俾佢哋截住咗，經過幾次來來回回嘅身體語言，終於明白了~
原來係二選一~
咁我又唔明喎，我哋揀咗小毛巾，佢就送咗兩條俾我哋，即係數量上係送「二」啦，如果我分開買，一人買一張飛，咁係咪都可以二選一？
如是，我先前每樣擸一件咪一樣，冇分別咖喎，不過是旦啦，人哋送嘢俾你，收咗就算，唔通仲難為人咩~
 

跟住就正式閒逛國際通，一如其他人咁講，間間賣嘅嘢都差唔多~
一路行一路行，就行咗入平和通，呢條街就冇咁遊客，不過都唔代表好吸引~
喺呢度買咗生果，再去埋廁所~
點解連去廁所都要提呢，喺平和通入面，行咗條橫街，都有近百米，係一間公廁嚟，真係乾淨得難以置信！
 

喺平和通出口，見到啲有趣嘢~
 

其實佢係雪糕嚟，咁樣食嘅~
 

出返國際通，我哋決定唔再行落去，對面全部都唔行喇，真係有啲悶~
悶到都冇咩點影相，就貼幾張記念吓~














 

由平和通出嚟，過咗對面三越地庫幫家姐茶葉~
不過搵極都搵唔到，問埋人，幾經轉折，只係得到雙手打交叉嘅手勢~
咁冇計啦，行埋對面 Calbee 就正式離開國際通~

下一站係「神戸 BAR 仲々」
嚟沖繩，都想試吓石垣牛，不過要自己燒呢，就唔多喜歡~
我成日覺得，食咁靚嘅牛，我自己又唔識燒，怕嘥咗啲牛(同埋錢......)，所以就揀咗呢間有讚冇彈，又係用炭火燒嘅石垣牛店，仲聲稱每隻牛都有証書的~
出發前已經上網訂咗位，因為我知道間中會被包場，訂位先穩陣啲~
不過由於我哋提早離開國際通，預計到達時會比訂位時間早，可能要等吓都未定~

呢間嘢離國際通唔遠，好快就行到......附近......
只係到附近，係因為搵嚟搵去都搵唔到，其間碰到幾個香港人，佢哋都係搵緊某店舖，我不禁懷疑佢哋都係搵緊神戸 BAR 仲々~
再搵咗陣，唔掂喇，真係要搵個人問吓~
附近有間好光猛嘅舖頭，就走入去問吓~

行緊去嘅時候，先前嗰幾個香港人就喺呢間舖頭度走出嚟，唔通佢哋又係入去問路？
入到去見到位小姐，我哋一開口問，佢個表情話我知，頭先嗰幾個香港人都係搵緊神戸 BAR 仲々！
我諗年終都有唔少人走嚟問佢，打搞晒真係唔好意思~
呢位小姐好有禮貌咁話我哋知點去，原來就喺隔離......
 

個招牌就喺棧燈度，都真係幾難察覺到~
 

我哋入去嗰時，係跟住嗰幾個香港人入去嘅，佢哋同啲店員講咗幾句就行返出嚟，原來今晚已訂滿座，冇位囉~
好彩我哋有訂到位咋！
跟住到我哋行埋去，個店員本來都想同我哋講冇位，不過我哋俾佢睇返張訂位確認信佢先至請我哋坐~
嗰幾個香港人仲問我哋點解有位~

呢度環境好暗，現場採 BAR 檯式設計，計埋我哋得四個客，可能仲早啦，訂咗座嘅客未嚟呱~
咁嘅環境，唔係幾好意思影入面相，淨係影咗門口位~
 

叫咗兩個餐，跟餐有飯有沙律有漬物~
 

100g 脊里肉，好有牛味，十分好吃！
 

100g 沙朗，入口溶化，口感很好！
 

兩款牛都係，落少少海鹽會更好味，但千其唔好多，少少就夠~
不過以 11000 円埋單計，真係覺得唔值！好食係好食，不過下次再嚟沖繩都應該唔會再試囉，上次喺大阪「燒肉M」度食滿足得多！

食飽飽就步行返酒店，途經便利店，買咗啲宵夜同早餐，完結日行程~