今日行程：
法國【Colmar】Saigon : Traiteur Vietnamien(Lunch) → 瑞士【Basel】Pfalz(Palatinate) → Basler Münster(Basel Minster) → Spielzeug Welten Museum(Toy Worlds Museum) → Basler Münster(Basel Minster) → Weihnachtsmarkt Münsterplatz(Christmas market Münsterplatz) → Weihnachtsmarkt Barfüsserplatz(Christmas market Barfüsserplatz) → Fish & More(Dinner) → ibis budget Basel City(Accommodation)
今日第一站：閒逛 Colmar
今朝起身，喉嚨嘅不適感比噚晚嚴重，希望唔會嚴重落去......
嚟 Colmar 時買嘅係指定嘅火車班次車飛，離開時亦都一樣，我買咗 13:23~
我哋最少仲有半日留喺 Colmar，但其實噚日已經行夠~
反正又唔係幾舒服，就休息多陣，唔理本身計劃係點~
呢間旅館包早餐，休息夠就落去食早餐~
早餐選擇都幾多，食到好飽......
食到咁飽，唔係好願郁，又上返房休息~
其實我哋都知道主要係冇興趣再行，否則，只係飽同咁輕微嘅不適，又點會阻到我哋~
休息咗陣，喺房太無聊，都係忍唔住出咗去周圍行吓，但感覺同樣無聊~
時間尚早，條街冇噚日咁多人，冷冷清清反而更加沒趣~
我哋無聊到搵個地方坐低，捱到算係食午餐時間先動身~
下一站：Saigon : Traiteur Vietnamien
位於 Marché Couvert(Covered Market) 內嘅一間食肆~
都唔記得叫過啲咩，淨係記得兩個人一人一個餐(叫埋同一樣嘅)~
全部都非常普通，叫做填飽個肚咁囉~
我哋嚟嗰時一個客都冇，覺得奇怪，因為經驗上喺外國地方，越南嘢都幾受歡迎~
我哋仲諗會唔會因為質素實在太普通，所以冇乜生意~
最後發現，其實係我哋太早嚟，未到繁忙時間~
到我哋走嗰時，已經滿座~
Marché Couvert(Covered Market)
食完嘢就去搭火車，離開 Colmar，向瑞士嘅 Basel 出發~
嚟 Colmar 前，真係冇諗過 Colmar 同個悶字扯上關係~
當時個馬來西亞女仔話悶，我都覺得難以置信，只係覺得可能每人喜好不同啫~
有時我覺得自己都唔係好了解自己......
下一站：Basel 嘅 Pfalz(Palatinate)
河邊嘅一個觀景台，風景唔算好吸引，不過佢就喺我哋會去嘅教堂隔籬，就去行吓~
到咗 Basel，要行一段路先到旅館，之後又要行一大段路先到 Pfalz~
我唔知係我啲功課做得唔好定點，我發現由火車站去旅館，再到 Pfalz，交通都唔係咁方便，搭車只係比行路可能慳幾分鐘，咁我寧願行吓~
Basel 啲交通環境有時都幾複雜，有啲路唔係跟人行的話，真係唔敢過馬路......
沿途隨影~
Pfalz(Palatinate)
下一站：Basler Münster(Basel Minster)
教堂對開有棵大聖誕樹~
下一站：Spielzeug Welten Museum(Toy Worlds Museum)
行過去嘅時候途經 Weihnachtsmarkt Barfüsserplatz(Christmas market Barfüsserplatz)，不過而家冇時間，要去咗玩具博物館先~
Spielzeug Welten Museum
玩具博物館樓高四層，地下主要係售票處及商店，地下之上共有三層，每層都放滿展品，數量多得驚人！
持 Swiss Travel Pass 可免費入場，不過呢個展館，自費都值得入場睇，相當不錯~
展館相當有心思，有唔少展品係會郁嘅，例如遊樂場上嘅設施或行駛中嘅汽車~
不過現場反光極為嚴重，好多時都要將相機靠近玻璃先影到啲展品~
離開時，展館外圍都幾靚~
下一站： Basler Münster(Basel Minster)
而家又返返去教堂，今次係要喺入黑後上塔頂，可以睇到聖誕市集嘅燈海~
沿途隨影~
塔上面有三層，一層比一層大風，一層比一層凍，一層比一層多冰喺地下，好鬼跣~
個夜景都可以，不過用燈海做宣傳就有點名過其實~
行完塔頂，我哋需要啲緊急救助，就係保暖！
對手凍到冇晒感覺，再唔做啲措施保暖，恐怕凍到甩咗都唔知......
我哋坐喺教堂，直至對手暖返啲先離開~
下一站：Weihnachtsmarkt Münsterplatz(Christmas market Münsterplatz)
市集就喺教堂隔籬，即係教堂塔上睇到嘅所謂燈海所在地~
下一站：Weihnachtsmarkt Barfüsserplatz(Christmas market Barfüsserplatz)
屎塔話唔想去呢個市集，想直接去食嘢~
我話，行去食嘢會經過呢個市集~ XDDD
我嚟 Basel，真係為呢個市集，呢個市集算係多人推介嘅市集，否則我應該唔會嚟 Basel~
(後記：其實為個玩具博物館都值得嚟 Basel，反正算係順路，不過事前又唔知嘅~)
但如果去食嘢唔經嘅，我都可以放棄嘅，畢竟都行咗咁多聖誕市集~
結果，屎塔喺呢個市集度買到嘢~
世事就係咁奇妙，好多嘢都係一念之間，一個小小決定，可以有好多可能性~
市集隨影~
下一站：Fish & More
位於 Basel Markthalle 內嘅一間食肆~
做功課時睇到 Fish 呢個字即兩眼發光，基本當刻已經決定要嚟咁滯~
咁當然要睇睇價錢，話晒係海鮮嚟，我當刻就諗，如果二人唔超過 Fr200 我都會嚟~
始終「瑞士」+「海鮮」= 預咗會有一定價位~
不過喺網上面睇唔價錢，去到再算~
埋到去 say 個 hi，就問吓佢有冇英文 menu，佢只係講咗一個字：Me
咁又冇理由叫佢翻譯晒 menu 上所有嘢，唯有叫佢推介吓~
佢推介拼盤，咁聽落拼盤都好嘅，可以食多啲唔同嘅嘢~
佢話 Fr34 一位，要兩位咁上~
即係二人 Fr68，What？！咁平？好，就拼盤！
呢盤嘢由我喺店面拎到返檯面，沿途吸引唔少目光~
拼盤上嘅海鮮，只作基本調味，適度煮熟，視覺上真係吸引到咁多人望？
(但對於我嚟講係好吸引，因為我聞到海鮮嘅味道，而且我好快就可以放入口，怎不吸引？)
魚好滑，又好味，熟度啱啱好~
蝦好有鮮味，食落感覺新鮮~
帶子質感有啲怪，同埋好鬼鹹~
魷魚爽口，味道亦不錯~
薯仔都好食，但啲菜就超級鹹，喺上面仲食到鹽粒......
總括嚟講，滿足！
今晚住呢間旅館，喺火車軌隔籬，就算我哋間房喺七樓，每逢有火車經過，我哋都聽得好清楚......
留言列表
