《瞬間看地球》Stranger's Blog

今日行程：
【Zürich】Grossmünster → Imbiss Riviera(Lunch) → Wienachtsdorf(Christmas Village) → Kirche Fraumünster → St. Peter → Zoological Museum → Christkindlimarkt Zürich(Christmas Market Zurich) → Singing Christmas Tree mit Wiehnachtsmärt(Singing Christmas Tree with a Christmas Market) → Simon Says(Dinner) → Hotel Limmathof(Accommodation)


今朝大家身體狀態都唔算好好，就一切放慢，晏啲先出門口~

Basel 今日係雨天，好彩我哋係噚日嚟今日走~


今日我哋會搭火車去 Zürich，一日遊之後，聽日一早就搭飛機離開，返英國~

去到火車站，有班火車啱啱開走咗，下一班係 27 分鐘後~
喺月台，我哋見到有間疑似俾人食煙嘅房仔，但外面有禁煙標誌，咁可能係用作防寒，於是我哋就諗住入去坐低等，始終喺咁凍嘅天氣下吹 27 分鐘唔講得笑，尤其我哋已經玩到身心俱疲，好易病~
(其實我已經係病病哋~)
推門入去之後，即時令我諗返起幾十年前嘅時光，充滿煙味嘅機舖......
我哋當然即刻走返出嚟啦，寧願捱凍好過！
佢老味個禁煙標誌係咪即係外面禁煙？

到咗 Zürich，都係落雨~
雨唔大，其實都冇乜影響~
而家行去旅館放低行李先~

沿途隨影~

途經藥房，買咗排藥頂一頂先，否則今日可能捱唔住~

寄存好行李，雨都停咗~
我原本個行程，就住順路，係去博物館先，不過根據天氣報告，今日應該全日都有機會落雨，趁而家冇乜雨，去咗露天地方先~

本身對 Zürich 就冇咩特別興趣，只係我哋以 Zürich 作為進出瑞士嘅城市，冇理由唔安排嚟行吓~
Zürich 嘅市景，令我諗起 Luzern，但 Luzern 係更有吸引力~
興趣唔大，再加上疲憊同雨天，可以話意志相當消沉~
消沉還消沉，總不能匿喺旅館一整天唔出去行吓~
再講旅館都未可以 check-in 住~

Zürich 嘅景點，唔係深度遊的話，主要都係三大教堂，同埋內街市景同河景~
Zürich 市中心，有條河分隔兩岸，旅館喺河嘅東邊，我哋就行咗東邊先~

跟住就行到嚟三大教堂之一 Grossmünster~

(教堂內部不准攝影~)

上塔頂要收費，有啲後悔上咗嚟~
上面有兩層，較低層，只能透過玻璃觀景，呢種設計都好常見~
由於只係普通玻璃，清晰度其實只係普通~
肉眼睇同相機唔同，相機可以放近啲塊玻璃去影，但睇景我就唔會將眼晴貼近玻璃去睇~
所以當場用肉眼睇到嘅景冇相機影出嚟咁清楚~

再上一層，環境如圖~
以睇景角度，係完全冇意思的......


隊部相機以水平角度影出嚟係咁樣~


另外兩大教堂就喺對面~
Kirche Fraumünster

St. Peter


不過而家唔過去住，沿路行到尾先過對岸~

繼續行~

差唔多到尾就到食午餐嘅地方~
Imbiss Riviera~


Currywurst mit Pommes Fries
腸仔好鹹，但個咖哩汁幾特別，好味嘅~


Cheesburger
芝士漢堡就想像中嘅味道，都唔錯~


再行落去就到聖誕市集，Wienachtsdorf(Christmas Village)~
呢個市集都幾大，仲有啲「檔口」係設計到成間屋咁，係要推門入去嘅~
呢度最少一半檔口係食肆，種類非常多，亞洲歐洲各國美食都有~
早知嚟呢度先食嘢......

直立式煙薰三文魚......


之後就行過對岸~

一向係中立國嘅瑞士，都有掛上烏克蘭旗~


行到嚟三大堂之一，Kirche Fraumünster~
入內要收費，所以冇入~

教堂對開有棵聖誕樹同雪橇，幾靚~

喺剛剛進入呢間教堂嘅時候，有個著西裝嘅男人走埋嚟，問我哋邊度嚟嘅~
跟住話見我哋對建築好似都有啲興趣，推介一個地方俾我哋去，又話冇去過嗰度唔算嚟過 Zürich~
佢推介個地方叫 Le Corbusier House，又話搭車過去好近~
睇落佢真係好有誠意，唔覺得佢有咩其他意圖~
佢離開咗之後，我哋都有上網睇過，覺得都 OK~
反正而家都係無意義咁為咗行吓 Zürich 而行~
其實啲教堂去唔去都冇所謂，只係唔去又好似漫無目的咁~
呢啲都係緣份嚟，好快已經決定去~
決定好去之後，就睇吓點樣搭車~
不過唔好衝動住，睇吓開放時間先~
一查之下，該館而家正處於季節性休息，皮已收......

之後就行到去三大教堂之一，St. Peter~

教堂外廣場~

呢個應該係藝術品吧~

喺教堂入面休息咗相當嘅時間，離開時落雨，我哋決定唔再行露天嘅部份，而家搭車去博物館~

Zürich 有好多博物館，有唔少嘅，持 Swiss Travel Pass 可免費進入~
不過我哋首選會去嘅，偏偏本身係免費進入嘅~
幾時都係揀自己最有興趣去嘅，多過行駛特權嚟換取自我感覺良好~

Zoological Museum

超級無敵勁鍾意呢個博物館，可惜自己唔爭氣，喺遊覽中途已經要休息好幾次，當刻嘅心情亦令自己無法好好享受~

離開博物館，仍然落緊雨~


之後就去 Christkindlimarkt Zürich(Christmas Market Zurich)，歐洲最大嘅室內聖誕市集~
好多人，好熱鬧，係正嘅~

聖誕樹上嘅部份燈飾，係靠人踩單車嚟發電~
啲小朋友排住隊喺度落力踩，我哋就喺度落力欣賞~


下一個要去嘅地方，17:30 先開始，雖然仲有啲時間，不過都冇乜興趣再行，就返旅館休息吓先，等到差唔多時間先再出發~

有啲夜色~


下一個要去嘅地方，係 Singing Christmas Tree mit Wiehnachtsmärt(Singing Christmas Tree with a Christmas Market)，一個有合唱團唱聖誕歌嘅聖誕市集~

出門口時冇雨，非常好~
途經 Bahnhofstrasse 大街，據講呢度裝置有 23000盞 LED 燈，效果係幾好~


Singing Christmas Tree mit Wiehnachtsmärt(Singing Christmas Tree with a Christmas Market)
氣氛滿瀉，係我哋呢十幾日嚟，聖誕氣氛最濃嘅時刻，非常正！
歷時大約半個鐘，我又幾好奇，如果落雨會唔會取消呢？


隔籬有個聖誕市集，不過我哋冇行~


去旅行做功課，好多時都係睇台灣人嘅分享~
嚟 Zürich，各大群組必推嘅餐廳一定有 Zeughauskeller 份，佢哋叫軍火庫~
本來我都諗住去嘅，不過旅程中途，見到有人推介台灣餐廳，所以心思思想改去食台灣嘢~

間台灣嘢叫做 Simon Says，其實好唔就腳，腳程約 15 分鐘，本來都諗住行過去，不過落緊雨，都係搭巴士算~
好衰唔衰，送車尾，雨中等車不如雨中步行~
就係咁，就淋住雨行過去~
(後記：唔知點解當時冇放棄唔去嘅念頭，可能都真係好想食台灣嘢~)

沿途隨影~

Simon Says


坐低後睇睇 menu，其實又唔算好啱食，有啲後悔之前冇睇 menu 先決定過嚟~
辣嘢比例都幾高，以我嘅狀態，當然唔適合食辣嘢，屎塔之前腸胃不適，其實都佔據咗旅程三份二，尾聲呢幾日先叫做冇乜嘢，當然都唔應該食辣~
不過都冇計啦，坐低咗，就隨遇而安，順其自然，只係選擇少啲啫，實揀到嘅~

我後面隔籬檯坐咗四個人，但 99% 時間，我只係聽到一個女仔把聲，仲要係滔滔不絕，連珠炮發，不停係咁講嘢~
同檯其他三個人只係間中應吓~
個女仔聲浪又大，把聲又刺耳，內容主要係講佢喺美國乜乜乜，佢喺美國物物物~
聽口音就唔係台灣人嘅國語，至於係咩地方人我就當然唔知，不過心入面總有啲偏見，預設咗個答案~
成間餐廳，我只係聽到佢把聲，我同屎塔用普通聲浪交談係好難聽到對方講咩~
真係好X煩！
等咗好耐，佢哋檯終於上菜，我哋獲得間歇性寧靜~

我哋等上菜時，隔籬檯埋單，店主問佢哋覺得啲食物如何，對方話啲嘢太辣~
呢間台灣餐廳，可能真係以辣為主~

百香蔓越莓氣泡茶(無茶葉)
幾好飲，飲落幾香~


皮蛋涼拌豆腐
相當不錯，份量足，不過 menu 冇辣椒樣但都係辣嘅~


擔仔麵
好食，感覺真係台灣味道，望落份量唔算多，但食落份量算 OK~


爌肉
好鹹，唔計太鹹其實係幾好食，份量又係幾足~


由於聽日就離開瑞士返英國，我想用埋手上嘅 CHF 現金，於是就厚住面皮咁問店主，可唔可以半現金半收卡~
店主話當然冇問題~
我亦覺得自己要識做啲，所以俾咗唔少貼士(只係同自己本來會俾嘅貼士比)，店主好似好開心咁~

呢餐要 Fr75.5，真係有啲貴到難以接受，誇張啲講，叫多個餸的話，過千蚊港幣落樓，台灣嘢咋喎......

離開餐廳行去巴士站，見到巴士嚟緊，即刻跑去巴士站，否則又送車尾~