今日行程：
【London】London Eye(倫敦眼) → Big Ben(大笨鐘) → The Palace of Westminster(國會大廈) → Westminster Abbey(西敏寺) → Phoenix Palace(Lunch)/The British Museum(大英博物館)) → Buckingham Palace(白金漢宮) → Tate Britain(藝術館) → NALA Japanese Restaurant(Dinner) → AirBnb(Accommodation)
喺寫呢編遊記之前，我必需先說明，我會野蠻地不合理地無限放大我對今次 London 之旅嘅感覺~
由於我哋搭通宵車去 London，所以係夜晚先上車~
我到呢日嘅朝早先開始認真啲搞行程方面嘅事，之前真係冇乜心機~
我真係未試過咁的唔起心肝去計劃行程~
亦因為咁樣，我哋比原先計劃好出門口嘅時間遲，仲已經係匆匆完成需要做嘅嘢衝出門口~
遲咗少少到車站，不過唔緊要，所謂遲，係講緊我本身會預早到車站，而家係遲過呢個時間，並非開車時間~
到咗車站，搵到條隊，都幾多人，梗係啦，今日係星期五，聽日星期六，多人都正常~
好彩上到車都仲搵到雙人連座，可以坐埋一齊~
呢部車啲位算闊落，呢程車唔算坐得辛苦~
到咗 Edinburgh，要轉車去 London~
我哋兩個平時坐車唔係一定要坐埋一齊嘅，可以當然好，但冇都唔緊要，不過呢程車唔同~
第一，呢程車要坐成 9hrs30mins，同平時唔同~
第二，通宵車呀，安全起見，一定要坐埋一齊~
由於呢程車係可以加錢留位嘅，我都有加到，所以都冇好緊張要排得前啲去霸位~
上到巴士，搵返自己嘅座位，有 Reserved 字樣同編號在椅背上，但座位上坐咗兩位女士~
於是我就禮貌地問佢哋係咪留咗位，佢兩個望一望我自行執嘢離開走上樓上~
又，前方有四個對坐嘅座位，坐咗四個人，有一個男人嚟到，我冇留意個男人點同佢哋講，我淨係見到嗰四個人冇同個男人溝通，一味自己四個攞部手機出嚟對呢樣對嗰樣~
嗰個男人企喺度一啲唔耐煩都冇，相反，佢個表情係喺度睇戲，睇吓你哋想點，佢係 100% 深信眼前嘅座位就係自己留咗嘅位~
巴士上四人對坐嘅座位得兩組，一組係通道嘅左邊，一組係通道嘅右邊，留位時係有同一樣嘅圖可以睇到啲座位嘅分佈係點嘅，而右邊嗰組係另有人坐~
咁嗰四個人，一係就冇留位，喺度扮嘢；一係佢哋留嘅係右邊嗰組~
擾攘咗兩分鐘，嗰四個人執嘢行上樓上，完全冇猶豫過右邊嗰組先係佢哋嘅座位~
個男人真係好嘢，完全冇催過佢哋，冇唔耐煩嘅表情，咀妙妙一心睇大戲咁款~
而嗰四個人，真係......冇留位就讓返個位俾人囉，扮咩呢~
到呢刻，已經有好多人上咗車，佢哋而家先走上樓上搵位坐，我諗真係未必搵到一齊坐嘅位~
呢程係長途車，但反而啲座位夠晒窄，後面有人坐就費事挨後個椅背~
結果當然係瞓唔到，後面嗰兩個人又不停傾偈，全個下層就只有佢兩個人講嘢，偏偏就坐喺我哋後面，唉~
開咗車約一個鐘到，而家係 23:30，司機將部車停埋咗一邊，又唔係有站，又著車又熄車咁，似係部車有問題~
司機搞咗半個鐘，終於可以再開車~
到咗 01:00，司機又將部車停埋一邊，今次短啲，停咗 15 分鐘啫~
02:00，到咗 Newcastle(原本應該係 01:15 到)，係其中一個站，亦另有司機上車，應該係換司機吧，因為一定唔會係一個司機揸足全程的~
不過好明顯，佢哋又喺度嘗試修正部車嘅問題，停咗 15 分鐘之後開返車，但行得好慢，睇嚟部車嘅問題有啲嚴重~
行咗唔夠 10 分鐘又再次停車~
今次停車，係棄車......
司機叫去 Sheffield 嘅乘客轉搭第二部車，呢個時候我先留意到對面停咗部巴士~
所有去 Sheffield 嘅乘客就係過對面轉乘嗰部巴士~
而去 London 嘅，就要等另一部巴士~
多數人一早落咗車(包括我哋)，就喺地面等，天氣有啲凍，幸好唔算大風，又唔係話真係凍得好辛苦~
少數人冇落車，就喺車上面等~
轉得巴士，就會有變數，我哋未必可以坐得返我哋預留咗嘅位，所以都係喺地面等，務求可以快啲上車，霸返個雙連位~
等咗 20 分鐘，終於有巴士到，而呢部巴士嘅座位編排同分佈，係完全唔同之前嗰部~
呢部巴士只有上層有座位，我一上到去就揀咗兩個比較闊落嘅座位，後面係樓梯位，點挨後都唔怕影響到人~
由於我哋真係好少挨後，到呢刻先如夢初醒，其實啲巴士座位唔會容許挨得太後，挨盡都只係少少而已，都好過冇嘅~
至於點解要分兩部巴士，可能因為一架去 Sheffield，一架去 London，去 London 呢架可以唔駛去 Sheffield 而唔駛兜路，慳返啲時間~
搞完一輪，開車時間為 02:52~
05:00 到達 Leeds(原本應該係 03:30 到)，有約十個人上車，呢十個人真係慘，佢哋可能喺唔知情嘅情況下喺街等咗個半鐘頭車......
05:35 到達 Sheffield(原本應該係 04:10 到)，咦？點解部車仲會去 Sheffield 嘅？係喎，Sheffield 都有人上車去 London 嘛，咁部巴士當然要去 Sheffield 上客~
咁，點解要分兩部巴士呢？其實好可能單純因為呢架巴士座住較少，根本載唔晒原本嗰啲乘客，所以用兩架巴士做分流，同追返啲時間冇關......
而等上車呢班乘客，唔單止可能喺唔知情嘅情況下喺街等咗個半鐘頭車，仲要爭上車！
因為部巴士唔夠位俾所有乘客上車，最後點解決我就唔知~
期間有一個站喺 London 嘅 Finchley Road，沿途啲住宅建築，都幾肉醜吓......
09:10 到達 London 巴士總站(原本應該係 07:55 到)，我，一夜未眠，係完全冇瞓著過，但真正嘅煎熬，而家先開始~
屎塔好啲，佢咩環境都可以瞓得到，只差瞓得好唔好啫，半夜要轉車都係我叫醒佢先至知~
喺巴士度瞓唔到，我仲可以合埋眼當休息，但離開咗巴士，行程亦只有兩日，我係唔會選擇再休息~
幾十歲人，通宵冇瞓，仲要展開全日嘅行程，係相當辛苦嘅事，但都冇計......，一切一切都係自己揀嘅~
到咗最近嘅火車站，再跟指示行去 Underground，啲指示真係清楚到呢，應該唔會有人搵唔到 Underground 喺邊......
由於今次有點衝忙，其實都冇好好驗証從網上面得返嚟嘅資訊，一開波遇到嘅，同我喺網上面睇到嘅已經有唔同~
網上面睇到，買 Oyster Card 為 £5，退卡時可以退返呢 £5 同按金~
但買卡時，係 £7，同埋呢 £7 好似唔可以退，由於過咗個畫面睇唔返，於是我就上官網睇吓~
結果係，呢 £7 係唔可以退，亦要增值咗先可以用，最少為 £5，之後就係 £10、£15、£20，如此類推~
而餘額少過 £10 係可以退(嗰 £7 並非計入餘額內)，退咗餘額嘅卡亦同時報廢，唔可以再用~
咁我相信我之前喺網上面見到嘅資訊，好可能係幾年前嘅，係我自己太過衝忙冇上官網睇清楚最新嘅資訊~
而買呢張 Oyster Card 係唔可以用 Contactless 俾錢買，今次係屎塔醒，佢話帶定張卡穩陣啲，好彩有帶到~
後記：原來用 Contactless debit/credit cartd 係最好！因為唔駛俾呢 £7，同埋用幾多扣幾多，唔會有多出嘅餘額，而且同 Oyster Card 一樣有 daily cap~
完咗旅程，張卡入面仲有 £4.6，連埋買卡呢 £7，兩個人就蝕咗 £2x，今次真係笨實！真係實到冇眼睇！都怪自己冇認真做功課！
I HATE LONDON!!!
原本嘅行程，係去 River Thames(泰晤士河)嘅兩岸，欣賞吓 London Eye(倫敦眼) / Big Ben(大笨鐘) / The Palace of Westminster(國會大廈)~
不過由於我買咗 Westminster Abbey(西敏寺) 09:00 呢段時間嘅入場票，亦由於怕唔夠時間行 Westminster Abbey，所以就冇行到河嘅兩岸~
只係由車站行去 Westminster Abbey 嘅沿途，望到幾多就幾多，但其實感覺一啲都唔覺可惜，唔知點解~
好可能「我對 London 冇興趣」呢個概念太過根深柢固，導致我對今次旅程冇乜期望~
買完笨實 Oyster Card 就搭 Underground 去 Westminster Abbey(西敏寺)~
Westminster Abbey 初建於 1065 年，其後經過數次加建及重建，是一座位於倫敦市中心西敏市區的大型哥特式建築風格的教堂，一直是英國君主安葬或加冕登基的地點。1987 年被列為世界文化遺產。
叫做望過 London Eye(倫敦眼) / Big Ben(大笨鐘) / The Palace of Westminster(國會大廈)，真係好求其~ XDDD
之前提過怕唔夠時間行 Westminster Abbey，係源於收費，£27 一個人，我會有啲期望應該有唔少嘢睇，即係要花比預期多嘅時間~
但參觀完過後，呢 £27 嘅收費，真係貴得嚇人！
Westminster Abbey 係非常有歷史意義，係好靚係好宏偉嘅教堂，入面亦有展示唔少資訊，但喺我自己參觀過嘅教堂當中，其實好多都好有歷史同意義，但印象中冇一間收費超過 £27 嘅「一半」~
I HATE LONDON!!!
不過就我自己而言，一場嚟到 London，再貴都應該參觀吓嘅......
同埋佢有樣好，可以憑門票升級做年票，一年之內可以入內參觀三次~
呢樣所謂好，唔知有幾多人用得著，而我，就好有可能用得著，因為屎塔媽咪好可能今年會嚟探我哋，到時帶佢行吓 London 似乎係必需，咁我就用得著呢張年票~
Westminster Abbey 隨影~
之前部相機已經壞壞地，但唔影響最主要嘅攝影功能，但當部相機嚟到 London，佢嘅問題開始嚴重~
個電子觀景器有時會黑屏，咩都睇唔到，但我知道轉返用螢幕係行唔通，因為扯電扯得好快~
我唔理，我係唔會轉返用螢幕嘅，話之佢，London 之嘛，是鬼旦~
或者，連部相機都唔鍾意 London......
後記：返嚟睇返啲相，有部份對焦唔係對得幾好，睇嚟係 London 整壞佢~
IT HATES LONDON!!!
I HATE LONDON!!!
遊覽完 Westminster Abbey，我就陪屎塔過 Phoenix Palace 嗰邊，佢就去見朋友，我就獨自搭車去 The British Museum(大英博物館)~
沿途買咗件三文治嚟食，好普通嘅餡料，芝士呀火腿呀咁，得兩塊麵包夾住，塊麵包嘅大小只有方包嘅三份二，咁就 £4.85......
I HATE LONDON!!!
去到 The British Museum，其實個人好攰，對眼又澀，有諗過放棄，直接去旅館 check-in 瞓返陣~
其實當時已經決定咗，不過睇睇時間，未夠鐘 check-in，就諗住捱一陣睇吓點先~
捱咗幾個字，覺得又幾好睇，個人精神返啲，一直睇落去~
今次我的確係有點走馬看花咁睇，一來精神狀態不佳，二來其實好多相類似嘅嘢都睇過~
直至我睇咗成個館嘅一半，真係覺得夠喇，身心俱疲，再支撐唔到落去，聽日同屎塔嚟嘅時候，就可以睇埋餘下嘅一半~
不過呢刻屎塔又未俾訊息我，我又唔想再留喺博物館，於是我決定去旅館 check-in 先~
就喺呢個時候，屎塔傳訊息俾我，話佢而家離開 Phoenix Palace，睇嚟我要繼續撐落去了......
不過其實轉吓環境，走返出室外，個人已經可以精神好多，所以其實都冇問題嘅~
我哋分開前，已經約定好匯合地點，就係喺最近 Buckingham Palace(白金漢宮)嘅 Underground 度等~
不過我相信佢會俾我快，因為 The British Museum 好大又好多人，要行去出口都唔係咁容易~
再加上博物館離 Underground 有一段距離，要行去 Underground 再搭車，仲要轉車，要啲時間~
行到去 Underground，門口有幾個女人揸住個兜大聲叫，原來係為土耳其地震籌款~
不過感覺有啲鬼，佢哋有時對望笑，又有個女人一直喺佢哋附近冇份叫但會同佢哋講嘢又不時影相，好似影佢哋開工咁......
我就算順順利利，都會遲過屎塔，而我，竟然喺呢個時候搭錯車......
我搭錯咗線，去咗第二個站，但 Underground 內係上唔到網，查唔到而家要點搭先啱~
我唯有試吓向出口方向行，希望可以近返啲地面，上到網先~
點知好衰唔衰，呢個出口係焗出，冇得返轉頭搭車，我唯有出咗閘先，再喺地面查好點搭車，再搵另外入口落返去搭車~
I HATE LONDON!!!
唔知點解要去 Buckingham Palace，又唔會入去參觀，又唔係嚟睇換兵，但屎塔話又唔係遠，冇理由唔到一到~
到宮一遊之後就搭車去 Tate Britain(藝術館)~
Tate Britain 好好睇，我哋都好鍾意，不過我條腰真係頂唔順，要行吓坐吓休息吓，成個阿伯咁......
屎塔睇到網上有人推介 eat tokyo，睇片的確係吸引嘅，所以本來今晚會去食~
不過屎塔下午見面嘅朋友話呢間麻麻地，推介咗另一間俾我哋~
呢間叫 NALA Japanese Restaurant，佢話只要唔好叫拉麵就得~
喺進入餐廳之際，見到有人同我哋揮手，原來係屎塔下午見面班朋友嘅其中三個，另有一個男嘅，估計係其中一位女士嘅另一半~
唔知佢哋係嚟撞我哋，定單純因為有人推介，所以嚟試吓~
喺 London Soho 區食日本嘢，縱使只係一間普通日本餐廳，相信價錢都唔會係平~
所以我都冇理會價錢，想食咩就叫~
好耐冇食日本嘢，一睇餐牌，見到寿司刺身就唔理咁多，就叫寿司拼盤、刺身拼盤~
跟住想叫多個熟食，就叫牛肉便當~
求其叫咗兩支 Ginger Ale~
Suchi C (六款十二件)
生魚片味道不錯，雖未至於香甜，但感覺算新鮮，大小厚薄亦合格~
飯量則實在太少，難免俾我有種慳飯嘅成本，同時亦令客人冇咁易食飽之感~
但慳飯唔慳生魚片，喺慳成本嘅做法上算係聰明做法，而且可能人哋唔係諗住慳，只係特式~
Sashimi B (五款十五件)
同寿司上嘅生魚片一樣，味道不錯，雖未至於香甜，但感覺算新鮮~
至於份量同厚薄，算係一個驚喜，感覺滿足~
Beef Teriyaki Bento
盤上嘅炸雞，外脆內嫩有肉汁，入口香味四溢，好食~
主角照燒牛肉，份量足，肉質亦可以，惜完全冇味......
純講食物，讚多過彈，合格有餘~
但我比較唔鍾意嘅，係個收費~
我唔係講緊佢收得貴，喺 London Soho 區食日本嘢，喺收費上，我完全冇合理與否嘅概念，收得幾貴先算應份？收得幾平先算抵食？我唔知道~
呢餐照餐牌價錢，係 £79，便當晚餐價要加 £5，菜單上有說明，落單時亦有提醒，所以呢餐照餐牌價錢，係 £84 先真~
佢嘅說明，係餐牌上嘅價錢係 Lunch time special，晚餐要加 £5~
正式餐牌，但列出嚟嘅全部係特價，的確可以話完全冇問題，只係我個人觀感上，有少少玩心理遊戲~
當顧客冇留意個價錢唔係正價，到落單時由侍應提醒先知，當刻可能十個有十個都會繼續叫~
係，餐牌有寫喎，阿顧客自己冇留意啫，侍應仲會提醒，完全冇呃人成份~
的確係，所以我都話，可以話完全冇問題，只係我個人觀感上，覺得有少少玩心理遊戲，有點蠱惑~
而且，列出嘅價錢係午餐特價，晚餐價錢要「加」£5，一個係特價，一個要加錢，如果以咬文嚼字嚟計，咁兩個都係唔係正價~
另一樣就係，當收到張單嗰刻，有一項 Discretionary £10.5，係強制嘅服務費/小費，計返條數，即係 12.5%，埋單係 £94.5~
又講明先，呢項收費，菜單上係有講明嘅，只係我當時冇留意到，所以其實餐廳方面都係冇問題~
我個人其實一直不滿餐廳收服務費呢種所謂文化，開間餐廳，服務客人要另外收費，我係覺得有啲荒謬，多數行業都包含服務，點解淨係餐廳先收服務費？
我知我知，餐廳收服務費唔係新奇事，我相信全世界大把餐廳都收，我來自香港亦體會唔少，只係我一直覺得荒謬，係一項巧立名目嘅收費~
我只係想記錄低我呢刻嘅感受同想法，人有時會自欺欺人，如果轉個做法，偷換概念，將呢 12.5% 加埋入食物收費，最後冇呢項服務費/小費出現，我可能又覺得可以~
或者，荒謬嘅唔係餐廳收取服務費，係我嘅思維~
I HATE LONDON!!!
食完飯就搭車去旅館~
今次經 Airbnb book 房，係自助式 check-in，即係俾個密碼我哋，去到就開密碼鎖攞鎖匙開房門~
依照指示，一切順利~
房間相當闊落，一切都唔錯~
不過惡夢好快就降臨~
旅館近大街，仲要係 Basement，有人喺街行過都聽到佢哋講嘢，隔音係零......
仲有唔知係咪近醫院警署定消防局，經常聽到警號聲，勁大聲......
不過呢啲都算係小事......
房對面係公共休息嘅地方，有幾個人喺度勁大聲交談，又大笑，仲要炸機，隔音差到真係彷似置身其中咁......
時間越夜，街外嘈音就越少，但對面班粉腸就嘈到 00:00 先停止~
的確，00:00 看似唔算太過份，但佢哋嘈到其實就算係下午時份都真係太嘈~
到咗 03:30 又嚟過，不幸中之大幸，今次只係維持咗 30 分鐘~
又真係奇怪嘅，半夜有人大聲交談唔出奇，但炸機半個鐘又停止，真係唔知佢哋做乜鬼~
以我今日嘅狀態，疲倦率達到 100%，理論上坐喺過山車都應該瞓得著，但呢一晚，只有佢哋停止交談同炸機，我先瞓到，因為真係好嘈......
I HATE LONDON!!!
留言列表
