《瞬間看地球》Stranger's Blog

今日行程：
【London】Caffè Nero(Breakfast) → The British Museum(大英博物館) → Borough Market(波羅市場)(Lunch) → Tower of London(倫敦塔) → Tower Bridge(塔橋) → Panton Yokocho(Dinner)


Airbnb 唔包早餐，所以我就安排咗去 Caffè Nero 食早餐，就喺旅館對面，好方便~

前幾日上網睇到人講有個手機 app，同多間商戶合作，以購買 eGift Card 形式嚟付款，會有回贈，所以就開始咗用~
而 Caffè Nero 係其中一間合作嘅商戶，所以我就買咗 eGift card 嚟俾錢~
點知試咗幾次，仲試埋第二部機都唔得，店員話唔知係咪系統有問題~
喺冇辦法之下，唯有用返信用卡俾錢~
之前都用過呢個方法喺好幾間唔同商戶度俾錢，全部都好順利，所以我比較相信真係佢個系統有問題，而唔係呢個付款方式有問題~

我哋絕絕絕少會刻意去呢啲 Cafe 買嘢食買嘢飲，今次只係貪近貪方便~
而家咁樣保留住張 eGift Card 喺手，變相要喺將來夾硬用，咁其實係浪費金錢~

I HATE LONDON!!!

屎塔話個咖啡好好飲，而我杯熱朱古力亦幾唔錯，係個牛角包普通咗啲~

食完早餐就去 The British Museum(大英博物館)~
噚日我嚟嗰時，唔駛排隊，直接入場~
今日就唔同，噚日我入嘅入口唔入得，要行返去正門入~
去到正門，勁多人排緊隊入場，我哋行咗足足三分鐘先行到去龍尾~
我有喺網上面預約咗入場嘅，雖然係免費，但怕佢有人流管制，預約咗穩陣啲~
喺呢個階段亦冇分開有預約同冇預約嘅隊~

排隊行到去入口後，就要分返開有預約同冇預約嘅人~
分流之後就繼續向前行，行到冇得行就真正要排隊等做安檢再入場~
喺呢個時候，我發現冇預約嘅人係少過有預約嘅人，即係冇預約嘅人仲快入場過有預約嘅人！
又話機會係留俾有準備嘅人嘅？

I HATE LONDON!!!

入咗博物館，我同屎塔分開行，並約好 12:00 互相聯絡，睇吓到時點~

到咗 12:00，屎塔傳訊息俾我，約好喺邊度等，不過我仲有兩個地方未行，就同佢講我要啲時間~
到我行完尾二嗰個地方，就同佢匯合先，因為最尾嗰個就喺匯合嘅地方附近~
匯合好之後，就行去最尾我想去嘅地方，不過點都搵唔到點去~

其實今日起身仍然覺得好攰，因為噚晚都冇覺好瞓，咁點都好過噚日嘅，但體力真係未恢復~
所以嚟到呢刻，我放棄了，唔想再周圍行，就咁就當行晒成個博物館~

The British Museum 隨影~

跟住就搭車去 Borough Market(波羅市場)搵嘢食~

行咗個圈，最長龍亦最吸引嘅係 Paella 義大利燉飯，即刻排埋一份，都排咗 15 分鐘先買到~
呢兜嘢 £10 真心唔貴，不過味道就幾普通吓，有少少失望~

可以話係第二長龍嘅係 Wild Mushroom Risotto~
味道不錯，不過就覺得啲飯嘅質感較硬，有啲似食緊未煮熟嘅燕麥~
一次過煮咁大窩，有部份煮得唔係咁好都明白嘅~

生蠔~
我哋好少食生蠔，唔識分來源同唔同味道，店家見我哋有啲猶豫，就介紹吓~
最後揀咗偏向甜味嘅，食落又真係幾鮮甜，感覺好新鮮~

Borough Market 非常多人，真係多人到唔想逗留，食完嘢速閃~

食完嘢就行去 Tower of London(倫敦塔)~
Tower of London 始建於 1066 年底，曾作為堡壘、軍械庫、國庫、鑄幣廠、宮殿、刑場、公共檔案辦公室、天文台、避難所和監獄，特別關押上層階級的囚犯。最後的這一用途產生一條短語「sent to the Tower」，意思是「入獄」。1988年被列為世界文化遺產。

沿途隨影~

行經 Tower Bridge(塔橋)，睇戲睇劇見唔少，而家親身嚟到，有種感覺真係好倫敦，有點夢幻感，原來 Tower Bridge 真係幾靚~

我哋通過 Tower Bridge 行過去 Tower of London，好快見到有個位有工作人員喺度，以為嗰度係入口，點知只係出口~
Tower of London 好大，圍住 Tower of London 一路行，行到轉埋角先見到有另一個位有工作人員喺度，亦見到有個幾大嘅標示，指向左方(堅接左方就係拉咗布帶嘅位)，上面寫住「←Entrance (All ticket holders)」，不過門口拉咗布帶，一時間都唔知呢度係咪入口~


初時都唔確定係咪入口，因為拉咗布帶感覺有啲奇怪~
我哋行到去布帶前，喺我前面一米有三個工作人員，唔知我哋係咪無意間飲咗叮噹嘅隱形藥水，佢哋又唔係背住我哋，但就好似見唔到我哋咁......
我唯有開口問呢度係咪入口，對方表情同語氣都帶點輕佻咁問：你有冇飛？
檢查完我提供俾佢睇嘅 QR code 就獲放行~

I HATE LONDON!!!

Tower of London 佔地真係廣，感覺相當宏偉，不過同其他行過嘅，同樣都係中世紀建築，呢個對我嚟講算係冇咩吸引力~
好可能又是那該死的「先入為主」，真係唔知道~

Tower of London 隨影~

跟住就行去 Tower Bridge(塔橋)~
去到排隊位，有預約同冇預約排同一條隊......咁預約嚟做乜......
又話機會係留俾有準備嘅人嘅？

I HATE LONDON!!!

Tower Bridge 真心冇咩睇~

跟住地下條藍線就可以去到 Engine Room，憑票入場~

行完 Tower Bridge，天色已黑，正好欣賞吓 Tower Bridge 在黑夜嘅美麗~


跟住就去食晚餐~

沿途經過 The Shard，上面有餐廳，最主要係可以上到 68~69 樓睇景~
入場費要 £32，上去睇吓風景要 £32，真係令我呢啲見識少嘅大開眼界！
尤其係對岸有個免費嘅 Sky Garden，一樣可以睇風景，可能冇 The Shard 咁高，但可以睇到 The Shard 嘅景(喺 The Shard 當然睇唔到自身建築嘅景觀)~
不過又咁講，真係好想上 The Shard 嘅，可以諗吓 London Pass，因為持 London Pass 上 The Shard 係免費~


I HATE LONDON!!!

今晚晚餐去食日式拉麵，Panton Yokocho~


坐低之後，侍應話可以搵佢哋落單，亦可以 scan QR code 自己落單~
點完嘢直接俾埋錢，原來又要收 10% 服務費~

I HATE LONDON!!!

我同屎塔多數時候都會 share 嚟食，不過今晚我有種想自己一個食晒一碗嘅感覺，所以今晚就自己點自己嘅~
不約而同，我哋揀咗同一碗，由於唔會 share，一樣就一樣~
Kumamoto Tonkotsu (熊本豚骨拉麵)
湯底唔錯，可惜豬肉冇味亦略兼細塊~
流心蛋「不」流心，還帶有少許蛋殼......


Takoyaki (章魚燒)
我食嘅第一粒入面係冇章魚......
就算之後嗰啲有章魚，亦都要喺口入面搜尋一輪先搵到，實在太細粒......
味道亦只係普通~


Shio Kosho Wings (炸椒鹽雞翼)
雞翼乾身脆口惹味，乾身嘅唔單止外層，肉都係~


Coke & Apple Juice


食完嘢，我問屎塔，仲有時間，會唔會想去睇吓 London Eye(倫敦眼) / Big Ben(大笨鐘) / The Palace of Westminster(國會大廈) 夜景~
屎塔話有點攰，同埋其實都冇乜興趣~
好，同我諗法一樣，我一心只盼快啲返屋企......

去到巴士總站，好多人，現場我諗有二百人等緊車~
咁個巴士總站都幾大嘅，話晒 London，又有好多條巴士線~

我哋 22:00 車，不過 20:30 已經到咗~
呢個半鐘靜靜哋坐喺度休息吓，觀賞吓人生百態，又幾過癮~

21:45 開始放人上車，我哋留咗嘅位今次冇俾人坐到~

開車前，司機走埋嚟問：
司機：你們有留位嗎？
我哋：有
司機：你哋留咗幾多號？
我哋：78、79
司機：你肯定？
我哋：係

問完我哋又問前面座位個男仕：
司機：你有留位嗎？
男仕：有
司機：你留咗幾多號？
男仕：12
司機：咁點解你坐呢度？
個男人左右望吓坐位編號，有啲迷茫~
司機：12 號喺上層
個男人就執嘢上咗樓上~

我同屎塔成程喺度忍笑，唔係笑個男人，係覺得個司機好搞嘢，佢嗰句「咁點解你坐呢度？」真係好好笑，個司機個樣係嗰種冷面笑匠，成個畫面係好好笑~

其實我覺得座位編號本身係有啲令人誤會嘅，因為嚴格嚟講，留咗位嘅，係有兩個編號~
本身個座位編號係咁樣~


留咗位嘅座位號碼係咁樣~


係，留位編號係起眼好多，但前面個男人睇錯咗椅邊個細編號，都只係一個誤會，起碼佢唔係冇留位走去坐留咗位嘅位先，我又覺得情有可原~

而我後面兩個位，一樣有留位嗰塊嘢，但上面寫住嘅係「Not in use」，我心諗，今次好了，後面冇人坐~
不過就算有人坐，應該都冇咁唔好彩，又遇到兩個係咁講嘢嘅人嘅~
點知......後面兩個位原來係後備司機坐，佢哋當然唔會瞓覺，唔瞓覺又相識嘅，最正路會做咩呢？就係傾偈！！！
頂吖！去程回程都遇著兩個係咁傾偈嘅坐後面，仲要係成個下層都冇人講嘢，就係除咗我哋後面嗰兩個！有冇咁好彩呀！
不過呢兩個司機嘅聲浪比起去程時細，相對上好啲嘅......

期間我聽到有位女仕自樓上落嚟，同我後面嘅司機講，上面太多人，好熱，佢個女唔係好舒服，可唔可以俾佢哋落嚟坐~
(下層的確係有空位)
司機話，啲空位係有人留咗，之後啲站會上車，到時你都係要讓返出嚟，如果你冇問題就可以~
一係佢教大啲冷氣，咁上面就冇咁熱~
該位女仕選擇咗教大啲冷氣~

結果，下層就變咗個雪櫃，但我唔投訢，畢竟熱焗係辛苦過凍，不過真係好冷凍......
凍咗一輪，司機教返細啲個風口，係冇咁凍，不過唔知點解之後又教返大......
司機教返大之後，就一直冇再教過......
其實上身我還可以，但坐咁長程車，血液循環一定差，所以對腳係特別凍~

呢程車我又瞓到喎，當然係瞓得好差，但係有瞓著過嘅，可能始終呢兩日太攰喇~

按計劃，巴士會喺 07:00 到 Edinburgh，而之後要搭嗰程車就 07:50 先開，我哋有 50 分鐘空餘時間~
於是我就開個 map 睇吓，邊度有 Caffè Nero，反正都想喺呢 50 分鐘時間，搵地方食個早餐，不如食 Caffè Nero，睇吓用唔用得返張 eGift Card~
一睇地圖，嘩，距離 Edinburgh 巴士總站幾個舖位已經有 Caffè Nero，掂！

巴士喺 06:50 到達 Edinburgh 巴士總站，行過去 Caffè Nero 只需 15 秒，而且非常順利咁用得到張 eGift card~


I LOVE SCOTLAND!!!

返到自己住嘅地方，成個人心情都舒暢晒~

I LOVE SCOTLAND!!!

如果要總結今次行程，好簡單，I HATE LONDON!!!
不過，屎塔媽咪今年可能會嚟探我哋，一場過到嚟英國，冇理由唔同佢行吓 LONDON，即係我哋今年內好大機會會再去 LONDON，Yeah......