今日主要景點:
Paris
La Défense (新凱旋門)
坐船遊 River Seine
今日一起身見到天色唔多好,睇嚟有機會落雨,不過我哋今日都離開瑞士,過去 Paris,都冇咩影響嘅~
講起 Paris,有兩件事想講講~
第一件事:
我上年已經開始計劃行程,知道 Paris 有間 Musée Picasso,都記低咗係要去嘅~
過咗若干時間,諗住睇睇佢嘅開放時間,最好梗係上官網睇,上到個網先知原來佢裝修緊,係到我去果時都仲未裝修完,唉,緣慳一面啦~
哈,到咗今年,佢館內嘅展品會安排嚟香港展覽,真係蹺!咁都可以睇得到~
咁當然,喺返當地睇,連埋人哋博物館內嘅環境一併遊覽梗係最好啦,氣氛都唔同啲~
第二件事:
我哋上機前,同日收到屎塔表妹嘅來電,佢表妹啱啱喺當日由巴黎返抵香港,佢話佢同老公都喺巴黎都俾人偷咗嘢!
佢就俾人偷咗部 iPhone,佢老公就俾人偷咗百幾蚊歐羅~
事情經過係咁嘅~
佢哋喺 Musée du Louvre (羅浮宮)附近影緊相,分別有兩班簽名黨叫佢哋簽名,佢兩個又不虞有詐~
喺簽名嘅途中,阿老公覺得個袋被郁動中,即刻睇吓啦,個袋啲拉鍊已經俾人開咗一半,佢望一望叫佢簽名果個女人,個女人向佢笑,仲要飛吻添!
跟住佢再檢查吓有冇咩唔見咗,就發現唔見咗百幾蚊歐羅~
阿老公走埋去話俾老婆知啦,咁阿老婆都下意識睇吓自己個袋,冇事喎,所有拉鍊都冇開,以為冇事啦~
事後到需要用電話嘅時候就發覺唔見咗,其實都好有可能係當時俾人偷咗,人哋仲好好手尾拉返埋佢啲拉鍊......
嘩,上機前聽到呢啲嘢,都咪話唔驚!不過都係果句,純偷的話,我又唔係好怕嘅~
今日比預期更早就出咗門口,仲好,落到 Interlaken 慢慢嘆個早餐先~
由 Lauterbrunnen 過 Paris,可謂路途遙遠,今日好多時間都係喺火車渡過~
落到去 Interlaken Ost 果邊嘅 Coop,餐廳啱啱開,冇咩人,行個圈睇吓有咩食啦,嘩,百幾蚊港幣一個人淨係食麵包同沙律,梗係唔滯啦!
早啲搭車過 Basel SBB 再搵嘢食好過~
喺 Interlaken Ost 火車站見到有啲酒店嘅顯示板,可以睇到邊間酒店有房,真係貼心~
喺 Interlaken 上咗車,開始落雨,一直落一直落,去到 Bern 都仲落緊,冇停過,真係替其他旅遊人士感到掃興~
過咗 Bern 一段時間就開始停雨,越近 Basel 就越好天~
到咗 Basel SBB,一落車望一望對面,對面果班車就係去 Paris 嘅 Gare de Lyon 火車站,呢班車開 1034,但我 book 果班車係 1234~
如果我訂呢班就好啦,唔駛等咁耐,不過世事難料,邊有咁多早知吖,訂咁早,搞到咁趕,趕唔切咪仲衰!
落咗車我話俾屎塔知,對面班車都係去 Paris,不過就唔係我哋訂咗嘅班次~
佢竟然話佢知道對面部車係去 Paris!
頭先聽廣播,冇講過英文,咁唯一原因,就係個廣播有講法文!
哈,學咗幾個月法文,果然有用,去到 Paris,我會俾機會你練習吓~
嚟到 Basel SBB,第一件事,睇列車資訊,再搵嘢食~
不過行勻成個火車站,都冇咩啱食,最後又係超求其咁買咗啲嘢填肚~
陣間就離開瑞士,為免對方找返啲瑞士法郎硬幣,唯有就住啲嚟用~
唔知係咪買得少又唔坐低食,賣嘢俾我哋果個人有少少咀妙妙咁......
第二張相買咗中間果啲卷~
由於唔夠散紙坐低食(坐低食貴啲),周圍又唔見有地方坐,我哋就落咗月台坐低食~
味道冇咩特別,至少唔會太鹹就已經好好......
食完嘢仲有排先夠鐘搭車,我哋決定出去行吓~
睇睇地圖,River Rhein 距火車站都唔係好遠,可能可以去河邊行吓,於是我哋就向住河邊方向行去~
Basel SBB
行到咁上下,見到有地方可以坐吓,我哋就坐低休息咗一陣,並且決定唔再行落去~
因為如果堅持行落去的話,回程會比較趕,又拖住個篋,無謂為咗去河邊到此一遊而搞到咁驚險~
回程時,屎塔人有三急,見到附近有洗手間,行到過去要落地庫,佢話個洗手間係自動門嚟,對開就係泊單車嘅地方,佢好驚去去吓度門突然自己開咁話~
由 Basel → Paris,坐嘅係 TGV,時速可以超過 300km/h 以上,我哋望到最高速去到 319km/h~
呢程車冇咩風景,所以都冇咩點影相,車程約三小時~
我哋個位係單向位,即係我哋前面望住都係椅背,而前面就坐咗一家四口,係對座嚟,父母同一對仔女,對仔女都好細,個仔仲要用奶咀嘅~
點解提起佢哋呢,梗係有啲嘢講吓啦~
坐車途中,個細仔個奶咀跌咗落地下,啱啱跌到落我前座同我嘅座位之間嘅走廊,咁我幫佢執返啦,佢阿媽都見到我喺地下執返俾佢~
佢接過之後就講咗聲 merci,跟住,佢竟然就咁就塞返落個仔個口度~
有冇搞錯,好污糟咖喎~
其後個細路仔仲有樣學樣,自己掉個奶咀落地,執返又放返入口,好似玩得好開心咁~
火車比預定時間遲咗十幾分鐘到~
到咗火車站,見到旅遊中心,走去買 Museum Pass 先~
呢個旅遊中心好得意,門口好細,排隊排到出晒門口,行近啲睇,原來排隊真係要喺門外面排,要等入面果個完成晒先可以進入,唔知要行咁嘅措施係咩原因呢?
我哋買 4 Days Museum Pass,買果時對方問我哋幾時去 Versailles (凡爾賽宮),我哋猶豫咗一陣,實在冇諗過佢會有此一問,其實我真係唔記得,要睇返啲功課先知,我淨係知唔係今日囉~
對方見我哋兩條友十吓十吓咁,索性話俾我哋知,星期六日去花園,有 Pass 都要額外俾 EUR8 先可以進入~
呢樣嘢我真係唔知道,睇嚟今晚要睇睇駛唔駛掉行程~
買完 Museum Pass 就去買三套 carnets 飛,通常買套票,係一張包晒,但係買 carnets,係真係一次過俾十張 ticket t+,3 sets 就自然係 30 張,細細張咁,要好好咁放好佢~
步出火車站,真正嚟到 Paris 嘅街頭,實在唔知點解,心情不受控咁興奮起嚟,之前去意大利同瑞士都冇呢種感覺~
由火車站行去酒店,可以搭 metro 一個站,亦可以步行 15 分鐘,我雖然拖住個篋,但我都選擇咗步行~
好容易就搵到間酒店,入到去,例牌俾封確認信佢睇~
我哋真係估唔到,咁倒楣嘅事,會喺一次旅程裡面遇上第二次!
對方左摷右摷,話冇我哋訂房資料!不過佢見到有確認信,又實在冇咩好講~
跟住又要喺第二個 file 度摷多次,睇佢個款都係搵唔到......
我見佢啲文件多數有 booking.com 嘅 logo,而我哋係直接喺佢網站訂嘅,唉,唔通佢哋唔係好慣啲人直接訂嘅......
佢放低個 file,跟手就打電話,係咁講係咁講,同樣嘅念頭又再次產生,唔通佢搵緊行家睇吓有冇房?
唉,最好唔好啦,陣間去咗間唔近 metro 嘅都幾頭痕~
佢終於都收線,我哋幾乎係屏息靜氣等佢宣佈死訊,佢就轉身去匙櫃度拎條鎖匙俾我哋~
真係鬆一口氣~
上到房望望個 floor plan,如果比例係正確的話,我哋呢間房係最大嘅,可能係逼於無奈先俾呢間我哋~
今日第一站係係 La Défense,俗稱新凱旋門~
由酒店去 La Défense,可以搭 metro,亦可以搭 RER,前者平啲,但慢 15 分鐘,反正我推算用唔晒啲 ticket t+,梗係搭 metro 啦~
第一次搭 Paris 嘅 metro,同 Milan 一樣,比想像中好得多,唔覺得有治安問題~
一出 metro 就見到 La Défense~
可以上去頂層睇風景,不過我哋冇上~
可以望到 Arc de Triomphe (凱旋門)
呢度係一個商業區~
其間有位大叔,係外國人嚟,係咁用英文同我哋講解塊碑上面嘅嘢,又話後面有中文,係咁叫我哋睇,我哋當然有晒戒心,如果佢係想偷嘢,可以話係搵錯人~
不過睇佢其實又唔似,佢似係熱情,係有心人多啲~
講咗五分鐘到,見佢有啲離意,我哋就講聲 thank you,佢就用國語講咗句:不客氣
就係呢塊碑~
本來想 hea 多陣周圍行吓欣賞吓,可惜,開始落雨,天色黑得好快,唔似落一陣嘅驟雨,我哋決定走人,都算好彩走得快,搭緊電梯落 metro(露天)時,開始勁大雨,我哋只係淋咗好短時間都已經好濕吓~
下一站係坐船遊 River Seine,來一個 Paris 概覽先~
搭 metro 過去,要喺 Franklin D. Roosevelt 呢個站轉車,Franklin D. Roosevelt 站,有中文的,不過,睇返當地語言反而會易睇啲......
出咗 metro 站,睇到舊嘢,第一時間諗起香港嘅金紫荊廣場,雖然一啲都唔似,但我就係諗起~
除咗上面舊嘢,最起眼嘅,梗係 Tour Eiffel (巴黎鐵塔)啦~
呢個塔,睇相睇雜誌睇電視就見過好多好多次,而家就喺眼前,感覺好唔真實~
遊 River Seine,有幾間公司做,我揀咗間最平嘅嚟搭,反正唔喺船食嘢就間間差唔多,我又唔需要中途落(有啲可以喺第二度落船),係隻船樣衰啲姐~
好正路,梗係上上層,搵到側邊位坐,不過都冇用,好多人企晒喺欄邊,除了屁股,咩都睇唔到~
不過船未開,唔知會唔會係唔俾企,費事陣間俾人趕,唔好輕舉妄動,靜觀其變~
觀吓觀吓,又落雨!
初時唔係好大都頂得吓,越落就越大,我哋就落咗下層尾部,視野還可以,又唔駛淋雨,都可以接受~
Paris 真係好靚好靚,我開始愛上呢個地方,今次只係留幾日,一定唔夠喉,將來要再次到來好好咁欣賞呢個城市~
搭 metro 返酒店,諗住喺酒店附近搵嘢食,求求其其,就搵咗呢間~
例牌兩主菜一有汽水~
Magret de Canard Rôti au Poivre Frites
呢個係廚師推介,問明店員,係 duck,就佢啦~
鴨胸肉,幾好吃,好香~
Steak Tartare de coupe manuelle avec des Frites
呢個真係奶嘢,見到 steak 呢個字,諗住點整都冇所謂~
叫果時,個店員提醒我哋係 red meat,冇錯吖,牛係紅肉,冇問題~
上檯果時真係呆咗!睇落似係全生,食落更加覺得係全生!
試食第一啖,很熟識嘅味道,屎塔都有同感,食第二啖,再諗咗幾分鐘,我知喇,將元気嘅辣味三文魚走辣,係差唔多味!
雖然我唔係未食過生嘢,但呢 pat 咁嘅生牛肉,感覺好似如牦飲血咁,心理上真係比較難入口~
生理上,就當係三文魚好未,成 pat 蒸肉餅咁大碟,仲要有返咁上下厚身嘅生肉,肯定非常膩~
我哋好努力咁食,先食到一半,再食的話,唔排除會嘔返出嚟,放棄~
臨走時見到店員唔多高興,可能因為我哋食剩晒啲生牛肉......
食完晚飯,望一望時間,唉吔!九點幾,酒店樓下間超市收九點呀,買唔到生果同早餐!唉,費時周圍行,算吧~
返到酒店發現個轉插器又係用唔到,因為個插座係圓型凹入去嘅,問接待處借咗個兩腳插,搞掂~
喺網上見到有人話 Paris 一街都係狗屎,我完全唔覺,只係間中見到,不過成地都係痰就真嘅......
返到酒店睇睇自己安排好幾時去 Versailles,好彩踩唔中星期六日,唔駛掉行程~
留言列表