今日主要景點:
Paris
Versailles (凡爾賽宮)
Musée d'Orsay (奧賽美術館)
今日凌晨半夜醒咗,喉嚨好似火燒咁,痛到不得了,希望只係噚晚食咗啲薯條太熱氣所致~
今日第一站係 Versailles (凡爾賽宮)
為咗避開人潮,今日 0630 就出門口~
由酒店去 Versailles,要搭 metro 再轉 RER~
咁搭 metro,我又有 ticket t+ 飛喺手,好自然就拎住張飛入閘~
屎塔入閘先,我就就嚟入閘之際先醒起,頂!呢程唔可以用 ticket t+ 呀!
Versailles 喺四區,用 ticket t+ 搭 RER 只能去到一區以內~
如果照用,唔知係咪可以補飛定點,為免麻煩,反正我用唔晒啲 ticket t+ 嘅,我叫屎塔出返閘,我哋一齊再買返張啱嘅飛先再入閘~
不過呢個入口只有一部售票機,只接受卡,仲要好似唔係接受信用卡,我哋唯有行遠啲去第二個入口~
去到第二個入口,見到部機接受硬幣嘅,就走埋去研究吓,其實都好易買~
數夠硬幣入落去,但係個五仙入極都轆返出嚟,睇真啲,原來唔收五仙咖!
唔收五仙就唔夠散紙,呢部機又唔接受紙幣,算啦,都係走去 counter 買~
不過 counter 又冇人,諗緊好唔好搵人打散張十蚊紙嘅時候,俾我眼尾望到有部機好似可以入紙幣,走埋去試吓~
掂!呢部機真係收紙幣,而且操作介面同之前果部係一樣嘅,好快就買到兩張去 Versailles 嘅車飛~
去到轉 RER 時,終於都見到傳說中嘅跳閘,好似好平常咁......
喺 RER 上面,有個男人企起身係咁大聲講嘢,佢似係有目的咁同大家講嘢,好大聲,唔似係精神有問題,我當然唔知佢講咩,講完一輪就喺下個站落咗車,我又唔覺有人理佢,大家都係各自做緊自己本身做緊嘅嘢~
出咗 RER,轉右再轉左,好容易就行到 Versailles~
睇外圍已經覺得好靚~
揸 Pass 可以直入唔駛買飛,安檢都唔駛點排隊,好快就入到去~
喺過安檢嘅通道上,見到有提示「beware of pickpockets」,但其實賊仔真係會去啲要收入場費嘅地方偷嘢咩?
安檢唔駛點排隊,就以為冇咩人,原來有好多人已經喺入面遊覽緊......
內部係奢華非常~
其實喺行呢個公園嘅時候係有落過雨,不過唔算好大,可以唔理繼續行~
行到咁上下,都肚餓喇,行返轉頭去有餐廳果邊~
呢邊有兩個選擇,一間餐廳,另外一間賣麵包嘅~
餐廳呢,真係好貴,唔係話唔捨得,係覺得唔值得,最後我哋都揀咗麵包~
雨勢越嚟越大,幸好,搵到個地方,以樹作蓬,又有長椅,可以坐低慢慢食~
其實我幾鍾意食呢啲包,一般都幾好食,又夠飽,又方便~
差唔多食完,雨勢突然再大起嚟,好彩棵樹生得非常茂盛,尚算可以頂得住~
由於雨勢實在太大,我哋食完都冇走開,諗住等多十分鐘,睇吓點先~
十分鐘過後,雨勢完全冇減弱跡象,唉,冇計,唔等喇,睇嚟有排落,穿上雨衣,決定離開 Versailles~
今次連一半都行唔到,連 Marie-Antoinette's Estate 都冇去到,好可惜,將來一定要再嚟呢度,花一天時間,租架 golf 車,好好暢遊~
冒住大雨,行到出近皇宮嘅噴泉時,有人跑緊走去避雨,有人在雨中享樂~
留喺現場嘅,全部都係細路仔同青少年,全部都已經濕透,不過佢哋玩得好開心,雖然我唔識聽佢哋講咩,但我識聽佢哋嘅笑聲~
行行吓,仲見到有個少女喺度跳舞,可惜,咁嘅雨勢,係冇可能拎部相機出嚟影吓呢班小朋友喺雨中玩樂嘅情況~
離花園最近有瓦遮頭嘅地方,已經企滿晒人,不過我哋要通過都唔係好難,因為冇人想掂到我哋濕咗嘅雨衣~
正式離開 Versailles,就已經有人上前嚟問我哋買唔買遮,呢度同意大利一樣,一落雨就會見到呢啲人~
我哋都著咗雨衣,所以都冇打算買~
下一站係 Musée d'Orsay (奧賽美術館)
由 Versailles 去 Musée d'Orsay,直接搭 RER,唔需要轉車~
等車都等咗好耐吓,等車嘅人,無論有冇雨具嘅,外衣都有唔同程度嘅濕~
車嚟喇,坐咗一陣已經窒息咁滯,車廂冇咩窗,有嘅都已經開咗,但由於車廂內濕氣非常重,空氣又極不流通,形成一個極為翳焗又潮濕嘅環境,所有車窗都朦晒,仲要全車都係人,非常辛苦~
終於捱到落車,出咗車站,都係落緊大雨,我哋又收起咗雨衣,唔理咁多,反正只係十多米路程,衝呀!
好彩有 Museum Pass,唔駛排隊,否則就要著返雨衣冒雨排隊喇~
Musée d'Orsay 內部係禁止攝影嘅~
展館唔係好大,但展品都算幾多,最後都行咗四個幾五個鐘,估唔到提早離開 Versailles,將時間用咗喺 Musée d'Orsay~
Musée d'Orsay 原身係一個火車站,後來車站被取消,列為受保護建築,再改為現今嘅博物館~
雖然內部禁止攝影,但係我都忍唔住破壞規矩影咗一張......
有個位可以行出去室外,不過只係可以行出少少~
原來停咗雨喇~
出返嚟冇落雨,可以影吓相~
館內嘅特別展覽~
影影吓相,突然聽到屎塔嗌咗一聲,我以為有咩事,即刻走過去睇睇~
原來佢頂帽俾一陣怪風吹咗落馬路,而呢條馬路旁係不設行人路嘅~
好近就有條樓梯可以落到去,不過條樓梯係封咗咖,我唔理咁多,照用呢條樓梯行落去執返頂帽,呢條路都幾污糟~
下一站係 Leon de Bruxelles
雖然我知呢間只係一間好普通嘅比利時淡菜餐廳,不過咁樣隊一盤青口落肚,又真係未試過,所以就嚟試吓~
呢間餐廳喺 Paris 有好幾間分店,我揀咗間最近酒店嘅一間,喺 Bastille 區,就算夜咗都可以好快就返到酒店~
由 Musée d'Orsay 去 Bastille,行過對岸再搭 metro 到 Bastille 站便可~
我哋經過一條橋過對岸,呢條橋嘅欄杆滿是鎖頭,初時都唔明點解,直至見到賣鎖嘅檔位~
再貼多次昨日遊船時經過嘅呢條橋~
檔主見到我哋停低,都走埋嚟撩我哋買,佢話將個鎖鎖喺欄杆,再將鎖匙掉落河,咁我哋就會永遠喺埋一齊~
都係果句啦,我哋唔信呢啲嘢嘅~
搭 metro 到 Bastille 前一個站,列車停咗好耐,之後有廣播,全車人落晒車,相信部列車有問題,只好跟大隊落車再等下一班~
到咗 Bastille,搵咗一陣就搵到 Leon de Bruxelles~
唔知對當地人嚟講,八點係咪都算早,定還是呢間冇咁旺,完全唔需要排隊~
簡簡單單,揀套餐就最方便~
同一套餐有兩個價錢,平啲嘅,starter + dish / dish + dessert;貴啲嘅就三樣都有,starter + dish + dessert,我哋貪心啲,揀咗貴啲嘅~
點一個餐,例牌有埋嘅有:麵包、薯條,仲有呢樣:
第一 set,點咗 Original:
Starter:Small Plate of Raw Salmon
Dish:Leon Mussels
Dessert:Crème Brûlée
第二 set,點咗 Plancha:
Starter:Duo of Wrapped Prawns with Salad
Dish:Seafood Styled Mussels
Dessert:3 Scoops of Ice Cream
Starter,兩個都幾好,不過不失,正常味道~
Mussels,原味幾好食,雖不致非常鮮甜,但越食越想食,一個人食一兜,絕對唔會過膩;海鮮味果個,味道比較濃,食係幾好食,但真係唔能夠食太多,三份一就啱啱好~
Dessert,焦糖布丁,屎塔話好好食,我一向唔鍾意食,冇意見;雪糕,係好普通嘅雪糕,只係揀唔落其他甜品先揀佢~
而家已經過咗夜晚九點,又去唔到酒店樓下果間超市,我哋索性問吓店員呢度附近有冇超市~
店員態度好好,不過可惜佢英文一般,唔能夠講到俾我哋知,於是佢就畫咗俾我哋睇,再加埋身體語言教我哋去~
佢話間嘢叫 MONOP,凌晨十二點閂門,下方三角形係 Leon de Bruxelles,一畫畫嘅係過馬路,刻意將轉角位畫遠啲再強調 next street,跟足佢所講嘅,一步都冇行錯,好順利就搵到佢所講嘅 MONOP~
今日超過十點先返到酒店,條街靜靜地,但我又唔覺得唔安全~
我哋喺超市買咗早餐同生果,其中有蕃茄仔,啲蕃茄好好食,又多汁又鮮甜!好正!
留言列表