《瞬間看地球》Stranger's Blog

今日行程：

嵯峨野觀光線嵯峨駅 → 渡月橋 → 乘搭觀光小火車 → 泛舟保津川 → 竹林之道 → 古都芋本舖 → 金閣寺 → JR 京都駅 → 手塚治虫紀念館 → 新福菜館

今日車程：12


今日有個極其重要嘅任務，就係去撲飛！

今日要去搭嵯峨野觀光小火車，第一日嚟到日本買唔到第一至第四卡嘅飛，只好買不設預售嘅第五卡飛，先有機會搭到小火車！

今日天氣唔錯，第五卡一定會開，搭唔搭到，就睇運氣同自己夠唔夠早去到買飛，如果晨早去到都買唔到，只好認命！

講明要撲飛，梗係一早出發，我決定六時三十分就出發！嵯峨野，我哋嚟喇，一定要買到飛，一定要買到飛！ .\!!/.

第一站係「嵯峨野觀光線嵯峨駅」

酒店 → 嵯峨野觀光線嵯峨駅

大阪地鉄：　本町 →→→ 梅田

阪急電鉄：　梅田 →→→ 桂

阪急電鉄：　桂 →→→ 嵐山

由阪急嵐山駅行去觀光線嵯峨駅，一定會經過渡月橋，不過我個心而家只得一個目標，渡月橋，等我買到飛先再講！

左兜右兜，終於都搵到觀光線嵯峨駅~
 
唔理三七二十一(其實呢句嘢係點嚟嘅呢......)，衝入去買飛先，一票難求呀！

一入到去，成個心沉晒，原來已經好多人排緊隊！仲要係分兩條，一條排小火車，一條排保津川~

由於要有小火車車票先可以買保津川船票，就算我同屎塔分開排都冇意思，嗱嗱聲排小火車條隊先~

(其實當我冷靜落嚟嘅時候，睇返都唔係真係好多人姐~ XDDD)
 
一路排隊一路諗，我心水係 10:07 呢排車，但如果埋到去冇晒，早一班都好過遲一班~

再排埋啲先睇到個牌，又諗，如果 10:07 只有企位，好唔好搭遲一班車呢？諗住同屎塔商量吓，但佢又唔喺我視線範圍內，只好自己決定，企一陣好過推遲之後嘅行程~
 
一路望住個牌，好怕 10:07 果度會轉為立席券，最後好彩都買到 10:07 第五卡指定席！

頭四卡採用密閉式設計，雖可開窗，但窗框粗大，視線略嫌受阻，自行開窗又怕啲風或噪音騷擾到其他人~

第五卡採用開放式設計，不設車窗，實行與大自然融為一體~

所謂塞翁失馬，焉知非福，如果一早有得揀，一定揀第五卡，但為免冇位，又只好買設有預售嘅頭四卡，而家咁就最好啦，萬般皆是命，半點不由人，整定！

買完小火車飛，梗係嗱嗱聲走過去買泛舟保津川嘅飛啦~

由於泛舟保津川要強制性買保險先可以乘搭，有一定資料要填，櫃檯附近有一位叔叔協助填表，佢睇完我填嘅嘢就同我講日文，我同佢講我唔識聽日文，佢就指住個表係咁講：name name name

我明明已經寫咗，正確無誤，經過同一對話大約七八次，我終於醒覺，佢唔係要我中文或者英文名，佢係要我個日文名(係咪即係片假名？)，試問我又點會有日文名？我唯有同佢講我中文名嘅發音，佢自己幫我譯咗個，照辦煮碗話埋俾佢知屎塔個名，由佢填埋佢~

講極我都唔明，其實個叔叔已經開始有少少不耐煩，人之常情，但佢語氣依然平靜，事後仲有禮微笑，EQ 夠晒高~

仲有一個鐘頭多少少時間先夠鐘搭小火車，而家梗係去返渡月橋先啦~

下一站係「渡月橋」

我唔知渡月橋點解咁出名，淨係知佢前身係木橋，因應時代變遷，改以現代物料改建，用以可被汽車通過，但外貎不變，保留木橋時嘅樣貌~

行去渡月橋時經過「大本山天龍寺」，絕對係嵯峨野嘅著名景點，不過我哋冇時間拜訪，相對下亦唔算好有興趣，冇計劃到訪~
 
終於都行到嚟渡月橋，現場有不少人喺度影緊相~

 
渡月橋附近嘅風景

 
渡月橋周圍都見到下圖左邊呢啲壯男，佢哋係手拉車嘅車伕，佢哋不停咁搵目標，但一啲都唔煩人，感覺你冇意思就微笑行開，好友善~
 
呢位叔叔部唔知咩機嚟呢~
 
影到夠就去搵啲嘢食吓，先前過嚟時見到京福電鉄嵐山駅有啲嘢食，就過去睇吓~

天氣凍凍地，番薯熱辣辣，特別好食！

 
天氣凍凍地，食雪糕，特別過癮！
 
鮮果班戟，都幾好食~
 
下一站係「乘搭觀光線小火車」

由嵯峨駅搭到去亀岡駅

 
入到車廂已經好多人，由於好多人企喺度，我哋好難先搵到自己個位，搵到嘅時候發現咗樣嘢，我買飛時指定要右邊，但嚟到見到係左邊，而且仲有人坐咗~ @@

我哋拎張飛俾果兩個人睇，佢哋再睇睇自己張飛，即刻起身又鞠躬又道歉(我估係啦)，我哋當然報以微笑，等佢哋離開咗先坐低~

我哋想坐右邊，係因為架小火車依山而行，另一邊係保津川，我研究過成程車，一邊係風景時，另一邊一定係山，而以右邊風景出現時間較長~

不過其實都唔緊要嘅，都唔爭果少少時間，楓葉旺季搭到觀光線小火車已經係好幸運~

中途仲見到保津川上面嘅船，陣間我哋就會係果啲船嘅座上客~

 
小火車觀光線嘅中途站~
 
到咗亀岡駅就會有個人上車係咁講嘢，扮鬼扮馬~
 
下一站係「保津川」

最初我係決定唔會泛舟保津川嘅，一來實在太貴，要成 4800 円一個，二來需時兩小時，呢兩個理由都令我卻步~

我深知唔係啲咩激流，極其量都係比較湍急嘅小溪，但係如果問我想唔想體驗吓，梗係想啦，最難搞唔係錢，去旅行就預咗用錢，最大問題係時間，淨計船程都兩個鐘，仲未計等巴士去碼頭同等開船嘅時間，三個鐘真係走唔甩~

如果我有三個鐘空出嚟，可以有其他地方去，呢個係我主要嘅爭扎位~

不過我諗咩都冇用，屎塔訓令我要安排埋保津川落行程裡面，其實都好嘅，反正自己又想試，有人決定埋唔駛諗咁多添~

其實目的地係返返轉頭去返渡月橋附近，只不過唔係搭返小火車，而係泛舟於保津川~

離開咗小火車，跟住指示就去到巴士站，上到巴士發現已經多人到要企喺門口~

架巴士行行吓，我隔離個男人，我估佢係日本人，突然問我哋係咪中國人，我果刻真係有啲緊張，但佢又充滿善意，我亦冇需要否認，梗係話係啦，佢又問來自中國邊度，我答佢香港，佢同我講佢到過香港大約有五次，有時公事有時旅遊，三個人閒話家常，佢又問吓我哋對日本有咩印象，自然，我哋又問返佢對香港有咩印象~

落咗車就已經係碼頭嘅室內等候處，我哋直接落去碼頭船邊，成個感覺好奇怪，上面(等候室喺上一層)勁多人，但船邊就冇咩人，啲人喺上面做咩呢？我哋冇諗咁多，跟住啲人喺船邊等，見佢哋可以落船我哋又跟住落~

坐咗一陣，就有一班人嚟落船，突然有個人同我哋講嘢，我哋唔知佢講乜，只好遞張船票俾佢睇，佢睇完就係咁講嘢又向上面係咁指，初時我都唔係好明，佢見我哋冇咩反應，後面啲人又幫手講，但仍然係講日文~ XDDD

咁嘅情況，明唔明都好啦，起身先算~

 
上返等候室，想搵個人問問，經過見到有個登記處，頂！要先登記先可以上船呀！

突然間醒起，本旅遊書都有講，而且買完泛舟保津川嘅飛都有圖示！我完全忘記咗，嗱嗱聲拎返啲船飛同護照出嚟登記~

就係因為自己嘅疏忽，咁就冇咗半個鐘......
 
等緊辦手續時，周圍望吓，我見到一個令我好錯愕好難接受，甚至乎可以用震驚嚟形容嘅告示~
 
由登記起計要等兩個鐘？我好希望啲日文唔係咁嘅意思，等果位小姐幫我辦完手續，我就問佢要等幾耐，由佢口中講出嚟嘅，係我最唔想要嘅答案！天呀！今日嘅行程點算呀，呢刻我真係好懊悔，我憎死我自己呀~ >_<

我個登記號碼係 210，個小姐同我講，到我嘅時候，嗌咪會叫「210 Lai」，我可以想像到，講一輪日文，突然講一句英文，真係未必聽得清楚，仲要係有日本口音嘅英文，我要打醒十二分精神先得~

等待室入面有小賣部，亦有保津川相關歷史嘅事物，有好幾張長凳，夠四五十人坐，不過仍然座無虛席，只好周圍睇吓嘢~

用十分鐘就可以睇晒嘅嘢，我就睇足大半個鐘，對腳攰到爆炸，呢一個鐘入面，有人離開有人入嚟，多數都係中年同老年，冇理由同人爭凳坐咖~

不過好彩，嗌咗一輪咪，走咗一半人，終於可以休息吓~

按照慣例，屎塔一坐低就已經進入熟睡狀態，我極力控制自己唔可以瞓，差唔多時間仲要叫醒屎塔去定洗手間，陣間起碼兩個鐘冇得去~

每一次廣播我都好留心，直至我聽到 two hundred and five，我聽到已經叫到 205，我即刻叫醒屎塔，迫佢即刻去洗手間，我成個人都緊張起嚟，好似進入作戰狀態咁~

我同屎塔都去完洗手間，都仲未聽到 210，我又走埋去登記處查詢，佢話 a moment please wait，等冇問題呀，最怕叫咗我都唔到咋~

等咗一陣終於等到佢嗌 two hundred and ten，我即時彈咗起身拉住屎塔衝落去~

落到去有幾個上船位，當然亦有幾條船，有個人即刻走埋嚟問「Lai?」，我點頭說 yes，佢直情想拉我落船咁款，船上面已經坐滿人，好似成村人等我哋兩個等咗好耐咁，其實我哋都一聽到已經衝落去啦，唔關我事咖~ @@

落到船剩返最後兩個位，前面就三個人一排，其實我哋呢兩個位都好正，因為最後呢兩個位比前面果幾排高，視野開揚，二人座位唔駛同陌生人，反正坐最前都唔係咁好，前方有兩位船伕，視線一定受阻~

開船喇，船伕總共有三個，一個喺最前頭，負責用長桿撐住河床推動船身，同埋避免喺窄河道時船身碰撞到兩旁嘅石；另一個就面對乘客，都幾大年紀，負責講嘢，我估係介紹保津川歷史同美景，同時划槳以作輔助：第三個就企喺船尾控制方向，可以話相對上冇咁吃力~

負責講故仔果個阿叔講過不停，講講吓啲乘客又會一齊笑，我哋梗係唔識笑啦~

隻船兩邊設有帆布可供拉起，用以遮擋水花，之前有人話過拉起咗都一樣濕，但唔知係因為今日水流唔急，定還是坐最後啲水花冇咁勁，基本上唔拉都冇咩問題~

有時會去到啲比較窄嘅位，呢個時候真係好靠最前頭果位船伕嘅力量去避免同啲石有碰撞~

間中會見到啲大石上面有個牌示意呢舊係咩石，通常以物件或動物嚟形容，不過多數都唔係咁似嘅，可能我想像力唔夠豐富啦~

成程船，一般需要兩個鐘，但如果當日河水比較急的話，最快個半鐘就完成~

三位船伕曾經互換位置，但年紀最大果位就唔需要做最前果個崗位，其實互換位置時都幾危險，個個都只係踩住船邊，用手按住乘客借力，一個唔小心真係會跌落河~

由於風景實在醉人，唔經唔覺已經過咗一個鐘有多，離遠見到右邊大石上有個人喺度影相，年紀較大個位船伕就指住佢係咁講嘢，啲乘客又有啲反應對住佢揮手，我意會石上面果個人係幫我哋影相嘅，當然，要嘅就要俾錢買啦~

過咗呢個影相位，佢哋就俾本樣本我哋睇，不過不設郵寄到國外，即係唔關我哋事啦......

到接近尾聲，迎面有隻有蓋嘅船向住我哋個方向行，坐咗咁耐，第一次見到有逆方向嘅船，跟住果隻船就改變方向，到最後就同我哋平排，原來佢係過嚟賣小食嘅~

不過我哋就冇咩興趣，反正上咗岸都會去食嘢~

成個船程需時一小時四十五分鐘，比原定快咗少少~

坐完之後，如果問我 4800 円抵唔抵坐，我都未必會話抵，但又覺得絕對貴得有道理，幾位船伕做足全程，雖有交換位置，但我仍然覺得非常吃力，真係好辛苦嘅血汗錢~

多謝屎塔嘅訓令，令我得以體驗咁正嘅行程~

 
由於時間方面同原定計劃相比，可謂已經脫軌，為免影響之後想去嘅地方，我決定縮短食晏時間，唔去食豆腐料理，隨便揀一間有興趣嘅食店，快快趣趣食完追返啲時間~

雖然冇食到豆腐料理，其實我個人一啲都唔覺得損失，反正唔係我喜愛嘅食材~

初時睇中圖中呢間，但係睇真啲，原來唔係賣嘢食咖，係賣工藝品~ XDDD
 
最後揀咗間普普通通有麵食嘅地方食嘢~

我點咗青魚蕎麥麵；屎塔點咗天婦羅定食，味道唔錯，好食！
    
下一站係「竹林之道」

竹林之道，最特別嘅地方，可能係特別普通~ XDDD

我完全摸不透為何能成為景點，參天嘅竹林，可天然可人為，但不論如何，不能算是特別，但每位到當地嘅人都會去嘅景點，又冇理由唔去睇吓~
   
竹林之道嘅盡頭係「野宮神社」，其實 plan 行程時都因為唔夠時間而飛走咗佢，更何況而家比原定時間仲要遲，所以嚟到都過門不入，影吓門口就算，不過圖中嘅鳥居，原來係全日本最古舊嘅黑木鳥居~
 
下一站係「古都芋本舖」

吸引我去古都芋本舖嘅，係四重口味雪糕，即係一杯雪糕有四種口味，其實間舖頭就喺竹林之道嘅入口，頭先都經過，就算只係純雲尼拿軟雪糕，都係必到之處~

其實呢間舖頭主銷都唔係軟雪糕，係古都芋同芋菓子~

旅遊書係咁講嘅：

古都芋 ─ 以薩摩芋為餡，再裹上芝麻及小麥粉外衣，以 250 度烤，達到「味、香、色、形、銘」境界，為當店名物。

(外層有分黑芝麻同白芝麻，差啲忍唔住要嘩~ XDDD)

其實芋，我一向麻麻，一心嚟食雪糕，屎塔竟然話想試吓，咁我哋就買咗個黑芝麻嚟食，同時亦買咗杯四重味雪糕~

個古都芋比我想像中好食得多，至少食完一啖想食第二啖，喜歡芋嘅朋友真係不能錯過~

芋菓子呢，睇到個樣已經極唔想食，當然冇試到~

軟雪糕呢，話就話有四種口味，其實食落又好難分得到咩味同咩味，但雪糕本身幾滑，咁已經好足夠~
 

下一站係「金閣寺」

京都區內唔止有金閣寺，仲有銀閣寺，睇完資料先知兩者係完全冇關係嘅，純粹名字上嘅巧合~

金閣寺吸引人嘅地方，自然係佢金光閃閃嘅外牆，計劃行程時左度右度都一定要度到可以親身嚟到一睹佢盧山真面目~

古都芋本舖 → 金閣寺

京 福 電 鉄：　嵐山 →→→ 北野白梅町

京都巴士 204 號：　北野白梅町 →→→ 金閣寺道

其實嵯峨野係有一程過巴士直達金閣寺，不過有網友提醒放工時間嘅京都，好多地方都好塞車，叫我計劃行程時要好好計算埋呢樣嘢，所以我決定減少搭巴士嘅距離，改以鐵路再轉巴士~

我哋知道京福電鉄嵐山站有足湯浸，之前屎塔話過要試吓，由於時間緊迫，佢都話唔一定會浸，嚟到現場更加係決定唔會浸，因為現場已經有好多人，雖未至滿座，但興趣已經大減~
 
出咗北野白梅町站，好容易就搵到巴士站，京都嘅巴士站好正(可能日本都係咁，但我唔知)，除咗正常會睇到咩號碼嘅巴士會去邊之外，如果部巴士只係距呢個站前幾個站，都可以顯示埋出嚟，非常清楚~

就以當時為例，我計劃好搭 205 嘅，但嚟到巴士站見到 204 都經金閣寺，而 204 就喺幾個站前嚟緊，我哋就知道可以準備好上 204，一切都係咁清楚咁容易做到決定，最後當然都係等咗幾分鐘就見到部 204 嚟，亦都順利到達金閣寺~

不過最遺憾係安排唔到早啲嚟，影金閣寺，最好有適當嘅陽光，先可以影得靚，而家嘅天色開始暗，影相梗係爭啲~

 
下一站係「JR 京都駅」

睇人哋影 JR 京都駅果啲相好似好靚咁，所以決定花少少時間嚟睇睇~

金閣寺 → JR 京都駅

京都巴士 205 號：　金閣寺道 →→→ 京都駅前

上咗 205，冇位坐，攰都冇辦法，企咗好耐都未到，起碼企咗有半個鐘先有一個位，我當然讓俾屎塔坐啦~

企企吓見到我一路揸住果條嘢原來叫「吊皮」XDDD

到咗車站外面，就見到京都塔，指定動作，影相啦~
 
入到車站，同睇相嘅好唔同，直情好似唔同地方咁，人哋啲相係向下好深咁影落去，但我向上望都唔覺可以去到咁高~

 
不過其實我都唔係好在意，因為有另一樣嘢完全將我嘅焦點吸引咗過去~

吸引我嘅係兩個字：近鉄

本來我計劃返酒店要搭 JR 到東福寺再轉京阪電鉄，咁梗係唔方便，但我哋搭京阪電鉄唔駛俾錢，所以唔會諗一程 JR 返酒店~

但我做功課時唔知係太大意定傻鬼咗，睇唔到可以坐近鉄返大阪，嚟到見到呢兩個字，成個人撞咗邪咁，向住佢個指示行，諗住探個究竟~

我見屎塔周圍影緊相，我諗起站外有個大告示牌顯示京都嘅交通網絡，於是我同屎塔講我出去睇睇，轉頭返嚟，唔好走遠~

不過由於個顯示牌實在有太多嘢顯示，一時間都好難睇得清楚我係咪可以搭近鉄直接返大阪~

於是我決定花少少時間，同屎塔一齊跟住近鉄個指示牌過去車站睇睇~

步行途中經過觀景台，不過要行十幾層，其實十樓有食店，冇理由冇 lift，但由於興趣不大，冇深究~

去到近鉄研究咗一輪，我可以肯定搭近鉄係可以直達大阪嘅，正，唔駛搭 JR 轉車~

本來諗住而家就去食嘢先，行行吓突然醒起唔記得咗要去「手塚治虫紀念館」，我唔知點解冇寫喺行程入面，好彩記得，我哋落到地下就搵吓間嘢~

間嘢就喺車站隔離，而且地面都有指示，好容易就搵到~
 
都係果句，我對手塚治虫冇咩認識亦冇咩大興趣，入到去行個圈就算，不過呢個好睇過神戶果個，但兩者性質不同，又唔可以直接比較嘅~

 
下一站係「新福菜館」

新福菜館係拉麵店，走濃厚醬油拉麵路線，湯底濃得接近漆黑，書就講到好吸引，最緊要係價錢合理，距離京都車站又近~

本來諗住去埋佢隔離嘅「本家第一旭」，呢間就走清湯底路線，可惜去到發現休息中~

入到去叫咗碗最大嘅招牌麵，最大碗除咗比其他大碗，仲會多一隻蛋~

再叫咗碗炒飯~

拉麵就非常唔錯，但食得多會覺得較鹹，但仍算可以接受~

炒飯都幾好~

 
偷影咗人哋果碗冇蛋嘅~ =P
 
食完嘢就返過去車站行吓，一路向上行，先發現頭先喺地面睇唔到上面仲有得上好多層，我哋慢慢行行行，上到最高影返落嚟就即係我睇人哋啲相所睇到嘅~
 
喺呢度休息咗一陣就走咗入伊勢丹行吓，行吓行吓都唔知道原來過咗關門時間，20:15 有個女職員走埋嚟話俾我哋知閂 20:00，我哋先恍然大悟，非常唔好意思咁問佢我哋手上想買嘅嘢仲可唔可以俾埋錢先走，個女職員又唔好意思又有禮貌咁話可以，仲帶我哋到付款處俾錢，再帶我哋到非正式出口離開~

我揀咗個 2011 年嘅貓月曆俾屎塔，佢梗係開心啦~

今日行程完結，去到近鉄仲行咗陣名店街，不過冇咩睇，未行晒就離開~

JR 京都駅 → 酒店

近　　鉄：京都 →→→ 大和西大寺

近　　鉄：大和西大寺 →→→ 日本橋

大阪地鉄： 日本橋 →→→ 長堀橋

出咗地鉄，為咗去便利店買嘢食，就行咗條同平時唔同嘅路，之前行咗幾日，我哋都相信識路返到酒店~

買完嘢後一路行，計好第幾條街點轉，轉完第幾條街就到，但點行都行唔到返酒店，於是我哋靠記憶去行，但係附近條條街都咁熟面口，就係搵唔到間酒店喺邊~

冇錯，我哋宣佈我哋已經蕩失路~!!! XDDD

嚟到冇晒計嘅情況，只好問人~

本來條街已經唔多人，仲要已經係黑晒嘅夜晚，想搵個人問都難~

好唔容易問到幾個人，不過佢哋唔係話唔知，就非常唔確定咁指個方向，我哋唔信都照跟，結果一樣係搵唔到~

行行吓見到啲比較大型嘅商業大廈，再睇睇附近嘅便利店，我哋終於可以喺地圖上面確定到自己嘅位置，只要確定到自己喺邊，要搵返間酒店就冇難道啦~

今日買咗嘅嘢食，啲布甸求其買都好好食~