2010.11.27 京都、大阪 (日本第七天) @ 《瞬間看地球》Stranger's Blog

今日行程：

奈良公園 → 二条城 → 錦市場 → 永觀堂 → 青蓮院 → 道頓堀

今日車程：13

今日終於都唔駛咁早起身，七時三十分出門口就搞掂~

今日嘅早餐係飯團，啲飯好香甜，紫菜非常脆同好味，外層嘅飯同紫菜嘅味道實在令人陶醉，涵料味道已經不再重要，一人一個，實在太少喇！

今日第一站係「奈良公園」

去奈良公園，不為公園本身，亦不為公園內嘅建築，只係為咗親親糜鹿~

呢個景點都係跟人去，屎塔個妹上次去関西去過，屎塔又想去，其實可以咁近距離接觸平時冇咩機會見嘅動物，我都幾有興趣嘅，而且仲可以親手餵佢哋食嘢~

酒店 → 奈良公園

大阪地鉄：　長堀橋 →→→ 日本橋

近　　鉄：　日本橋 →→→ 奈良

去到公園門口已經見到兩隻鹿~

其實容許啲鹿同馬路如此接近，唔怕危險咩？我覺得對駕駛者同鹿本身都好危險，不過可能只係我唔多認識佢哋脾性先會覺得危險啦~

老實講，嚟奈良公園嘅目的，未入去已經達到了~ XDDD

不過我都計劃好會行個圈嘅~

奈良公園係非常之大，冇大半日時間都行唔得晒~

上網睇過資料，呢段時間係糜鹿嘅發情期，佢哋脾氣會較平常差，為免傷害到路人，所以會將佢哋嘅鹿角切去~

公園內嘅警告牌~

途人就係買呢啲餅餵鹿~

入咗公園，間中都會見到鹿，但又冇睇人哋啲相咁多同咁熱情，不過相信再行落去會多啲~

園內嘅歷史建築 - 東金堂及五重塔

園內嘅歷史建築 - 南円堂

園內嘅歷史建築 - 三重塔

睇完呢邊嘅建築，就要"長征"去春日大社~

假設入嚟果度係南邊，春日大社就喺最北邊，非常遙遠~

沿途走到春日大社嘅環境~

行咗四十五分鐘，終於都到春日大社~

呢四十五分鐘，可以話幾沉悶，行成九個字但環境一模一樣，不過更令人鬱悶嘅，係千辛萬苦嚟到，但環境同建築比睇相嘅普通千千萬萬倍！

一程四十五分鐘，來回就係個半鐘！個半鐘，我可以分啲俾之後嘅景點，我可以分多啲俾餵鹿環節，我仲可以唔駛行到咁鬼攰同咁鬼悶！

其實嚟到呢刻，我已經可以確定，奈良之行，一定會比原定時間遲，如果遲喺啲好似噚日咁精彩嘅行程，我心甘命抵，但係遲喺呢個春日大社度，真係非常咁唔願意！

睇完春日大社就行過去東大寺，去東大寺只係因為果度係餵鹿嘅最佳地方~

去到東大寺，真係特別多鹿，啲鹿仲會追住啲遊人攞嘢食，我買咗一抽鹿餅，但唔知點解，冇鹿搵我，反而喺屎塔背後係咁隊佢背脊，又隊佢腋窩，之後我俾埋抽餅佢，四五隻鹿係咁追住佢~ XDDD

呢啲嘢玩過就夠，冇打算買第二抽餅再餵~

我哋見到有隻鹿隻眼係白色嘅，唔知係白內障定係已經盲咗，可憐......

唔通呢度係停鹿場？

東大寺就冇入去，門前呢個木建築都幾有可觀性~

下一站係「二条城」

二条城係咩嚟，我已經忘記得一乾二淨，淨係知道同德川家康有關，亦係世界文化遺產~

奈良公園 → 二条城

近　　鉄：　奈良 →→→ 大和西大寺

近　　鉄：　大和西大寺 →→→ 竹田

京都地鉄：　竹田 →→→ 烏丸御池

京都地鉄：　烏丸御池 →→→ 二条城前

出咗地鉄站行幾步就到~

關於二条城，除咗室內唔可以影相，同要除鞋外，冇咩特別印象亦冇咩好講，放相就算~

下一站係「錦市場」

錦市場係地道嘅綜合市場，即係咩都有~

二条城 → 錦市場

京都地鉄：　二条城前 →→→ 烏丸御池

京都地鉄：　烏丸御池 →→→ 四条

嚟到錦市場，行咗兩條街就放棄咗，超多人加上冇咩啱睇，本來仲諗住喺度食埋午餐，不過揀唔啱~

出返大街，見到有人做展銷，展品係墓碑~

屎塔有個怪脾氣，一肚餓就燥，佢仲開到口話想食西餐，我不敢怠慢，見到有商場，即刻走入去睇吓有冇符合要求嘅食店~

真係弊弊都冇咁弊，冇間啱食！

不過憑住我一眼關七嘅本領，俾我搵到間樓上舖，我唔知佢有幾西，但睇落係西西地，頂住先！

除咗溝通上唔係咁順利，環境服務同食物都唔錯~

下一站係「永觀堂」

之前去東福寺嘅 blog 文提過，有本書係咁講嘅：如果在賞楓季節遊京都，沒有到過「東福寺」及「永觀堂」，等於沒有到過京都賞楓。

永觀堂係京都嘅賞楓名所，又有作者嘅極力推薦，所以永觀堂被納入必到景點之一~

錦市場 → 永觀堂

京都地鉄：　京都市役所前 →→→ 蹴上

出咗蹴上地鉄站，跟住地圖行，完全唔似係果回事，我哋唯有跟人潮行，相信好有機會係啱嘅~

跟人潮行穿過一條好短嘅隧道，再睇睇地圖，完來呢條路喺地圖係冇顯示，又或者咁講，條路太細，可能要放到好大先會顯示到，點都好，總算行啱路之餘，仲可以繼續跟得返地圖嘅路線~

跟住地圖繼續行，行行吓完全唔知自己去咗邊，我哋真係迷路了~

而家時間係 1550，永觀堂停止售票時間係 1600，呢刻個心真係急得要命，喺南禪寺兜兜轉轉咗好多次，我哋好肯定已經到咗永觀堂附近，不過真係搵唔到~

南禪寺對開有好多旅遊巴，又有拎旗仔嘅導遊，我哋決定問佢哋~

我首先接觸到嘅係旅巴司機，俾埋我哋嘅地圖佢睇，不過佢似乎唔係好清楚，於是佢就叫咗另一位小姐過嚟，果位小姐睇咗一陣，又喺地圖上比劃咗一陣，以唔太肯定嘅語氣話我哋知點行~

唔理你肯定還是唔肯定，反正我哋都六神無主，聽天由命啦~

不過跟足佢指示都係搵唔到，我哋又返返轉頭問第二個導遊，佢指示我哋嘅方向同第一個係反方向，我哋急到已經由急步去到要用跑，一樣係搵唔到！

有冇搞錯，幾本旅書都有介紹永觀堂，咁肯定呢個景點有一定份量，點可能喺當地做旅遊嘅唔知喺邊，真係奇怪！

我又走去問第三個，真係勢估唔到結果都係一樣！

三個人指嘅路線都唔同，但三個都係錯！真係有冇九両菜！

冇啦，過晒四點，今次冇啦，唉~

我同屎塔都覺得，喺日本呢度，講好截四點就會截四點，未必會遲，我哋已經有晒心理準備會錯過呢個景點~

兩條友一知道唔駛再趕，除咗失望，其實都輕鬆晒，唔知係咪因為心情鬆咗，屎塔突然好有信心咁理出一條路線來，我跟住佢行，越行就越對路，似喇似喇，直至去到已經關閉嘅門口，今次真係望門輕嘆~

註：門嘅右方寫到明呢度係幼稚園，但當時我哋見到左方有永觀堂嘅牌，當時完全冇為意呢間係幼稚園，可能因為當時實在太失望~ =P

不過好奇怪，我向前望去，好似有啲人源源不絕咁走出嚟，我懷疑果度係永觀堂嘅出口，但又見到有人入去，於是我哋就走去前面有人出入嘅地方睇吓~

好彩兩條粉腸夠八，過到去俾我哋見到售票處！

我哋面朦朦扮晒唔知過咗時間走去買飛，出乎意料咁買到兩張飛！

我哋知道永觀堂閂 1700，買到飛後嗱嗱聲入場先~

場內係一個典型嘅大公園，四圍都係楓葉，有售賣甜點嘅食店，只提供和菓子同茶~

不過可能因為天色昏暗，令我錯覺楓葉嘅美不及東福寺，但環境就比東福寺更有詩意更捨不得離開~

間幼稚園冷清清，有種恐怖嘅感覺......

下一站係「青蓮院」

其實青蓮院唔係我哋指定要到嘅地方，只係我哋想搵一個有夜間拜觀嘅寺院去參觀吓~

最心水嘅地方係清水寺，睇相就真係勁正，但又冇理由一個行程去兩次咖，所以就退而求其次，搵咗青蓮院~

由永觀堂到青蓮院，步行可達~

不過唔知係呢頭啲路比較複雜定地圖有問題，我哋又再一次喺呢頭迷路，搵唔到點行去青蓮院~

我哋唔會承認係我哋唔識睇地圖，因為呢個唔係一個事實~ XDDD

個天已經黑晒，四圍都好暗，我哋身處米字型馬路中心點嘅其中一處，因為呢度比較光明，我哋企喺燈光底吓研究地圖，但實在搞唔掂，確定唔到方向~

我見身旁嘅環境似係一啲機構或中心咁上下嘅建築，於是我就走入去，睇吓搵唔搵到人幫吓手~

入到去見到有個詢問處，不過果位職員唔得閒，我等咗一陣，又睇吓其他嘢，呢度似係文化中心咁嘅地方，原來呢度係「京都市国際交流会館」，我相信果位職員可以幫到我~

到果位職員得閒，我就問佢青蓮院點去，佢拎咗張小冊子出嚟，上面印有会館附近嘅地圖，不過個地圖實在太細，細到連啲小街都略過不作顯示，我覺得咁嘅地圖作用不大~

我問佢有冇大啲嘅地圖可以睇吓，佢就拎咗張比較大張，類似小冊子嘅嘢出嚟，今次呢張清楚得多，不過呢張嘢唔俾得我...... ~_~!

佢只好利用呢張大地圖，用語言加指手劃腳咁教我去，佢好醒目，佢指住地圖上一個鳥居嘅圖示，手勢加說話表示佢係一個好大嘅鳥居，仲話我一去到就知佢講邊個鳥居~

呢位小姐好用心去教我，我非常之多謝佢，又 thank you 又微笑又微微鞠躬以示謝意~

臨走時我拎埋張小地圖，出到去再同屎塔講述我求助嘅經過，選定方向再次起行~

果然不出果位小姐所料，一去到就知佢講嘅係邊個鳥居，真係夠晒巨型，有近三層樓咁高！

佢話見到呢個鳥居就轉左直行行到尾就會見到，我哋跟足佢指示，結果過咗三四條街就開始見到人流，到咗門口仲見到一條長龍，行咗好耐先見到龍尾~ @@

之前睇旅遊書，有一個景點叫做「瓜生石」，咁啱我哋排隊排到離開青蓮院好遠，四圍望吓嘢時，見到啲似曾相識嘅環境，我立時意會到，我所見到嘅嘢就係瓜生石~

瓜生石呢個景點有好幾個傳說，但每個都未能証實真偽，總之，而家道路被規劃成馬路，都唔會移除呢舊石，由佢喺馬路中間，仲有圍欄圍住保護佢，認真巴閉~

呢度大大話話有成幾百人排緊隊，但就只有一個差人維持秩序，而呢個差人本身都可以唔駛喺度，因為成條龍嘅其中一部份，會經差館門口，個差人只係出嚟保持差館出入口暢通，否則，根本唔需要差人喺度維時秩序，全部人，係每一個人都協助緊自己維持秩序，我深信就算再多一二三四五倍人，秩序都仍然係咁好！冇人大聲說話，冇人企圖插隊，冇人推推撞撞，呢度究竟仲係咪地球嘅一部份？喺呢度，連排隊都係享受，好舒服，唔駛每時每刻都痴Q咗線有妄想症咁驚俾人打尖~

排咗大半個鐘，終於都到門口~

經過門口買埋飛就可以入去，首先係入去室內嘅地方先，入去之前要除鞋~

先經過一條走廊，走廊則邊嘅嘢，我哋就冇咩興趣~

行到走廊盡頭，有好多人聚集住，原來呢度就係吸引我哋嚟青蓮院果個畫面嘅地方~

唔理地方有幾窄，人又有幾多，秩序仍然係咁好，有人離開時，唔會有人爭住入，我哋等咗五分鐘就可以去到最前~

不過咁暗嘅地方，又多人又唔可以 set 腳架，根本就影唔到好少少嘅相，我認為屎塔已經影得好好~

離開呢度，又返返去室內地方，一直跟人行，又去到另一個場景~

呢個場景啲光時暗時亮，好難捕捉~

再行落去就係竹林~

行吓行吓就去返第一個場景嘅對面~

對青蓮院嘅夜間拜觀有少少失望，藍燈果部份還可以，池塘果部份真係細得可憐~

我哋離開時仲有勁多人排緊隊......

下一站係「道頓堀」

其實今日行程就完咖喇，刻意安排返酒店附近食返碗拉麵，道頓堀係最佳選擇~

清蓮院 → 道頓堀

京都地鉄：　東山 →→→ 三条京阪

京阪電鉄：　三条 →→→ 北浜

大阪地鉄：　北浜 →→→ 日本橋

去到道頓堀，好快就決定好食「四天王」

行到埋去等帶位，突然有個職員俾五百円我，我呆咗一陣，佢就知道認錯人，原來係想俾我隔離個男人，即係上圖門口果個男人，佢係香港人，仲同我傾咗兩句~

我同屎塔例牌會叫唔同款再 share，兩碗都好好食，好滿足！