《瞬間看地球》Stranger's Blog

今日行程：

大阪市都市環境局 → 舞洲工場 → 自由軒

今日車程：7


今日係喺日本最後一日，離開酒店前梗係要做好 check-out 同寄存行李先~

今日第一站係「大阪市都市環境局」

本來嚟呢頭只係因為想去舞洲工場，喺做功課時睇 google map 時見到呢棟建築物同舞洲工場風格差唔多，所以一拼遊覽~

酒店 → 大阪市環境局

大　阪　地　鉄：　長堀橋 →→→ 日本橋

近　　　　　鉄：　日本橋 →→→ 西九条

大阪巴士８１號：　西九条 →→→ 此花大橋西詰

出咗近鉄西九条，好容易就搵到個巴士站，不過睇睇時間，上一班車七分鐘前開出，下一班車要三十三分鐘後先到，於是我哋就周圍行吓~
   
漫無目的咁，就走咗上呢條橋~
 
百無聊賴，望到類似吉野家嘅物體，決定去隊返碗先~
 
入到去揀咗碗細嘅 share，我哋未坐低就點嘢俾錢，俾完錢先搵位坐~

個職員原本以為我哋外賣，因為只有外賣先會未坐低就點嘢食~ =P

佢見我哋坐低咗，就問我哋係咪喺度食~

其實今朝都有食早餐，而家無啦啦隊多半碗飯，都真係幾飽......
 
睇睇時間差唔多，就走返去巴士站，見到好多人等車~ @@

等咗一陣就有車到~
 
二十分鐘到就到，不過又冇咩人落車，唔知佢去邊嘅呢？ @@

我哋終於都嚟到現場一睹呢座咁夢幻嘅建築~

 
上次去台灣，屎塔喺情人橋跣低咗，今次嚟日本，又跣多鑊~

佢企上個水池邊影相，影完行返落嚟嘅時候，一跣！同上次一樣，屁股開花！

真係唔知佢嘅論盡係先天定後天，總之就論盡到無可救藥，絕症！

好彩都冇咩大礙~
 
雖然呢度係工業區，不過環境都幾好~
 
下一站係「舞洲工場」

舞洲工場其實係處理垃圾嘅工場，我都唔知屎塔喺邊度知道有呢個咁夢幻嘅建築，佢俾我睇完之後，搞到我勁想嚟，仲放棄咗某啲景點~ =P

由大阪市都市環境局到舞洲工場，步行可達~

呢度四圍都冇咩人，真係好鬼正！

 
呢隻櫃睇落冇咩特別，其實佢係一隻凍櫃，雖然冇拖頭，不過佢仲運作緊咖~

我都知我少見多怪，不過喺香港真係未見過可以獨立運作嘅拖架凍櫃~
 
喺呢度所花嘅時間比我預期多好多，不過今日晏晝嘅行程只係行街，隨時隨地隨便縮都冇問題~ =P

下一站係「自由軒」

自由軒可謂出奇地巴閉，睇過嘅旅遊書，唔計必到嘅大景點，就只有佢係每本書都介紹甚至係推介嘅~

自由軒嘅馳名菜色係一碟咖哩飯上加隻生蛋，淨係睇圖，絕對唔會明白為何一碟如此普通嘅飯可以做到遠近馳名，我哋一定要親身試一試佢~

舞洲工場 → 自由軒

大阪巴士８１號：　此花大橋西詰 →→→ 西九条

阪　神　電　鉄：　西九条 →→→ 大阪難波

出咗鉄路站，我哋都唔係第一件事去自由軒，我哋係行住街咁慢慢行到去自由軒~

不過行街對我嚟講，都真係冇咩興趣，行過啲咩都完全冇印象~

行吓行吓就到自由軒~

 
坐低咗睇吓個 menu，其實都睇唔明，不過一場嚟到，一定會試招牌咖哩飯~

跟住又叫咗個茄汁飯，兩個都係人氣推介，必試咁話~

飯到喇，真係好好奇佢有幾特別同幾好食，睇個樣就真係唔開胃，因為我同屎塔都唔鍾意食生蛋嘅~

食之前加啲豉油，再將生蛋同飯撈勻，放一口飯落口，慢慢細味，再慢慢細味，不過任我如何慢同如何細，都真係食唔出比睇樣更好嘅味道~

即係話，我覺得完全唔好食，仲因為成隻生蛋咁食法，好抗拒，每人半碟，我就真係因為唔想浪費而捱咗兩個半碟，真係見面不如聞名，好難食！

咖哩味就係普通嘅咖哩味；蕃汁味咪又係普通嘅蕃汁味；生蛋就更加唔駛講，唔會係秘製卦?!

都唔知出名喺邊，仲要因為佢而左就右就啲行程，嘥鬼氣！

 
離開咗自由軒就向住酒店方向漫遊閒逛~

 
返到酒店攞埋行李就去機場~

酒店 → 機場

大阪地鉄：　心齋橋 →→→ 難波

南海電鉄：　難波 →→→ 関西空港

喺日本呢幾日，遇過嘅人一般都好友善，不過喺臨走前就俾我遇到個態度唔多好嘅人~

其實又冇咩大不了，只係喺國泰櫃檯 check-in 時個空姐冇咩禮貌，黑口黑面連望都唔想望你一眼~

啲人成日話國泰空姐態度差，但我又一向覺得呢啲係個人修為，冇理由國泰要求前線服務員態度一定要差咖~

有時真係唔明，友善啲自己都開心啲啦，做乜鬼要搞到咁樣~

入咗閘之後就搵嘢食，呢度有一個地方叫町家小路，入面有好多間食肆，都幾多選擇~

最後我哋揀咗烏冬、章魚丸；拉麵、和菓子

前三樣都係一般水準，至於和菓子，我都唔知點解屎塔會買嚟食，對於我哋嚟講，一睇就知唔會係好食嘅嘢嚟，食落口亦一如所料，連吞都唔想吞，不過為免浪費，我哋都有食埋佢~

 
食完咁難食嘅嘢，真係要食返啲好嘢補補啲味蕾~

 
上到飛機揀咗套未睇過嘅「中坑同學會」睇，我同時間喺自己同屎塔部機一齊按，咁做係為咗做到同步開始一齊睇，以我一貫反應敏捷心神合一，結果梗係可以同步開始啦~

不過睇睇吓部機停咗，點按都冇反應，原來係系統有問題，要成個系統關閉進行維修，不過都只係等咗十分鐘~

派餐時見到兩空姐，好明顯其中一個係新人，另一個自然係舊人~

個舊人教新人嘅口吻真係令人側目，一副高傲不悅加上命令式語氣高調調教，真係替個新人可憐~

不過個新人背後做過啲咩又或者係咪教極唔聽態度惡劣就不得而知，我只係知道前線對住顧客，唔應該表現得咁冇修養~

不過據我觀察，佢對顧客都唔好得幾多~ @@

今次嘅飛機餐~