嚟到今日,終於都要離開歐洲返香港,真係好唔捨得~
訂咗 0905 嘅機票飛 Milan,再轉 1325 機飛返香港~
0905 機,即係預最遲 0705 到機場啦,由於要天未光就拖住個篋出門口,真係要認真考慮究竟搭咩車去機場好~
1. 的士直達
2. 的士到機場巴士站,轉機場巴士
3. metro
綜合網上面睇到嘅資料,我揀咗 3,搭 metro~
由酒店搭 metro 去機場 T4,要轉兩次車~
未夠 0600 就出門口,點都估唔到,樓下條街仍然熱鬧,當然唔及得下午時份咁擠擁,但至少要喺條街度自然咁跳返隻舞又撞唔到人係冇可能嘅事~
舖頭又未開,條街仲係好黑,啲人咁早起身做咩呢?
不過個個都有啲疲態同帶點醉意,似係玩通宵多過早起啦~
天未光就走去搭 metro,警覺性好自然咁提升,我哋要盡快離開黑暗嘅街道~
落到 metro 月台,發現比平時多黑人,不過我又唔係對黑人特別有戒心,我係對所以人都有戒心,總之就同啲非遊客保持距離~
一路搭到去 T4 都冇咩事發生,亦唔覺氣氛有異,一如平常咁~
去到機場站就要每人俾 EUR3 附加費先可以出閘~
去到機場,睇牌知道要去 gate B 入閘,不過呢個 gate B 真係好遠,感覺真係行極都未到咁~
到咗 Milan,要轉機喇,今次係我第一次轉機,其實都冇咩特別,係去到有個閘口要排隊檢查証件,但由於我身上仲未有 Milan → HK 嘅 boarding pass,真係有啲擔心有問題~
我係咁裝吓前面啲人拎咩出嚟俾人檢查,好彩只係檢查証件,唔駛檢查 boarding pass~
過咗呢個閘口,我哋就好留心睇吓邊度可以搵到 CX counter,搞返張 boarding pass 先~
一路行一路行,終於見到 Cathay 呢個字~
如果唔係我哋好留心咁搵,真係好難睇到呢個 counter,隻眼生細啲都唔掂~
(下圖最入果個 counter)
埋到去說明來意,對方話:no worry, I can help to issus the boarding pass to you
佢嘅回應真係令到帶點徬徨嘅我哋感覺非常窩心~
到咗候機室,又搵啲嘢食吓~
袋入面淨返幾歐硬幣,就走去雪糕店買盡佢!
得果幾歐,點盡都係得咁細杯咋,仲要兩份分......
上咗機都冇乜嘢,直至第二日食早餐,我聽到有個空姐好努力咁向某乘客用英語解釋乜嘢係 congee,個空姐講得好細聲,又或者係飛機引擎聲嘈啦,我都唔係好聽到個空姐點講嘅,不過我感覺到佢有點不知所措,唔知點講好~
我又自己喺度諗,俾我會點解釋呢?
最後準時及平安抵港,完結今次非常開心嘅旅程~
留言列表