《瞬間看地球》Stranger's Blog

今日行程：

彩虹眷村 → 紙箱王(大坑店) → 歐莉葉荷城堡 → 清境小瑞士花園

今次搭港龍，時間非常之靚，去程 0805，回程 2120，真係差唔多玩盡八日！

六點多少少到達機場，去到停車場時，發現停車費用比上次提升咗好多，如果一早有查到，我可能改搭的士嚟算~

以前泊八日要 $550，而家泊八日要 $750，貴咗成 36%，太貴喇，唔係好值得~

泊好車，屎塔就急急腳咁行咗去，原來佢走去搵有忌廉哥頭像嘅行李車~

 
去到機場見到啲自助 check-in 機，先醒起我出發前唔記得咗上網 online check-in 先！

不過其實都唔緊要嘅，個幾鐘機，坐邊都冇咩所謂~

我哋未行到去啲機就已經有港龍嘅職員走埋嚟問我哋 check-in 咗未，跟住就問我哋攞護照，幫我哋用部機 check-in，揀埋位~

嚟到機場接觸過兩位港龍職員，態度好好，親切友善~

入咗閘喺大家樂慢嘆咗個早餐，就走去閘口等上機~
 
到咗差唔多時間，都仲未見有飛機駛過嚟我哋嘅閘口，唔通 delay？

於是屎塔就走過去問吓閘口嘅職員，得到嘅答案真係 delay，但又未有進一步消息，唯有繼續等......

等到 0830，我又走去問吓，得到答案係 delay 到 0915 起飛，0900 返嚟上機~

好啦，我哋就坐喺叉電果度叉吓電先~

0855，時間差唔多，諗住行返去近啲閘口嘅位，一望，近閘口嘅人全部唔見晒，再望真啲，閘口度門係開啟狀態，即係話啲人已經上晒機......

本來都覺得冇嘢，佢講明 0900 返嚟入閘，0915 先起飛，我哋又唔係遲到，應該冇阻到人~

不過，當我哋都上咗機之後，機門隨即關閉，坐低咗無耐架飛機就開行，即係話我哋唔單止係最遲上機嘅人，亦係阻住飛機起飛嘅人......

唉，真係阻住個地球轉......

機上嘅廣播，話俾我哋知，先前因為當地太大霧，機場需要關閉，所以先延遲咗~

嘩，大霧到到關閉機場，都真係好勁吓，希望一切順順利利啦~

好快就話要派餐喇，不過就得一種，冇得揀~
 
由於機程實在太短，食完嘢無耐就話就快要降落，印象中真係未搭過咁短程嘅機~

落咗機之後第一件事，就係撳錢！

其實我從來未試過未兌外幣就出發去旅行，不過今次出發前睇咗好多資料，又計咗好多數，啲數字話俾我知，到當地櫃員機撳錢個匯價係最好嘅，於是我就膽粗粗試吓呢個方法~

不過呢次咁樣撳錢其實仲有樣嘢要留意嘅，就係咁啱今年三月開始，喺外地撳錢，張卡要有晶片先可以~

而家二月咋喎，咁，又關我咩事呢？本來就唔關嘅，但睇到唔少人話佢張卡冇晶片但撳唔到錢，我都打去匯豐問過，証實佢哋都知道有人張冇晶片嘅提款卡撳唔到錢，匯豐方面都解釋唔到~

為咗保險啲，我向匯豐申請咗張有晶片嘅提款卡先過台灣~

搵到部櫃員機，我先用張冇晶片嘅卡試吓先，開頭都好順利，又有提款選項，不過到最後都係唔得~

好嘞，入張有晶片嘅卡，其實呢刻我都好緊張，究竟得唔得呢？同之前一樣，好似好正常咁，直至聽到好似數錢咁嘅聲先放心啲，結果係成功嘅~
 
跟住就搭的士去和運租車中港站，的士司機開價 NT$500，我哋同佢講價佢都唔肯減，其實都預咗嘅，唔肯就算啦~

坐咗一陣已經有好熟悉嘅感覺，唔單單因為我上次嚟台中都係坐的士去市區，仲因為，上次同今次嘅司機，都係視紅燈如無物，好似每衝一盞就有一分咁，不停咁儲分......

咁當然啦，佢只會喺啲冇乜車嘅路口衝燈，扣上安全帶係一定要做嘅事，我仲叫屎塔要扶穩，以免有咩事嘅事候嚟唔切反應~

順順利利到達和運~
 
搞手續嘅時候，見到張表格，真係有啲嬲嬲地！

訂車時同和運電郵溝通，佢哋俾我印象真係唔多好，問兩樣答一樣，又成日催我俾護照佢登記，我都未問清楚啲嘢，唔會咁快決定訂車~

其中一樣，我同佢講我同我太太都會揸，佢話唔可以，承租人、信用卡持卡人、駕駛者必需要係同一人~

你有你嘅條款，我一係唔租一係接受，原本都冇咩問題，為免我自己講得唔好，我回覆時表示有疑問，做咗個例子~

我話如果我一行四人，租車五天，是否真的必需由同一人駕駛？不能輪流交換？是否事前登記了都不行？

佢回覆時避而不談，答咗我另一樣嘢......

其實仲有其他問題都係答啲唔答啲，唉~

而家見到張表格，表格上直情有第二駕駛人呢一欄可以填，填咗之後，屎塔就成為受保險保障嘅合資格駕駛者！

明明可以，電郵回覆又話唔得，又避而不談，都唔知點解會咁......

相反，電郵溝通方便，格上真係好得多，態度好友善，又耐心解答我嘅問題，抵讚！

搞手續時，我白痴咗一吓，職員問我喺邊度還車，其實網上申請時已經有講明，不過可能佢都係想保險啲問多次，冇問題啦，咁咪答佢高營~

佢一臉疑惑咁問我，高營？我答佢係，又講一次，高營~

我真係完全唔覺有咩問題，仲強調係高鐵站，對方同屎塔終於明白，同時問我係咪左營，我終於都醒覺，冇錯，係左營，我竟然將高雄左營縮埋一齊嚟講而完全唔覺得有問題......

屎塔仲笑我：你估個個都好似我咁明白你諗緊乜嘢咩~

真係激死我！

其間我哋乘機問職員借電話用，打俾民宿，話佢知我哋今晚大約幾點到，咁又慳返一次長途電話費~

好快就搞掂啲手續~

呢部車好新淨，上咗車先知，原來只係行咗 28xx 公里，仲有新車嘅味道~

Nissan Tiida 1.8
 
第一站係「彩虹眷村」

左軚真係超唔慣，不停提醒自己右上左落~

個 GPS 真係幾好用，係有時傻傻地，但情況唔係好嚴重~

好容易就去到彩虹眷村，原來呢度有個專屬停車場，仲剩返一個車位，嗱嗱聲泊入去，不過都係果句，左軚超唔慣，真係要好小心好小心慢慢駛入個位度~

呢度真係好有特色~
 

參觀彩虹眷村時，發生咗件白痴嘢，有位女士拎住部單反想我幫佢同啲朋友影相，我呢，手唔定，又唔識影相，通常呢啲情況，我都會交俾屎塔幫手，不過咁啱屎塔又唔喺我身邊，咁就自己嚟啦~

我自己就用開一啲普通嘅傻瓜機，拎住人哋部相機，都好下意識咁走去睇螢幕，咦，點解個螢幕冇嘢嘅？正想話問吓機主，好彩，我突然醒覺，單反嘛，用觀景器呀白痴！

好彩冇真係走去問，否則真係尷尬死~

下一站「紙箱王(大坑店)」

紙箱王，其實今晚上清境都有，不過聽聞大坑店嘅大啲同多啲嘢睇，反正時間上可以夾啱食晏，就去大坑店參觀加食飯~

由彩虹眷村到紙箱王一段路，充份感覺到台灣中部人嘅駕駛文化~

簡單啲講，非常互動~

互動，係因為要因應情況而作出反應，廢話，全世界揸車都係咁咖啦！

但係喺呢度，千其唔好將優先權睇得太認真，機車固然要重點留意，另一要重點留意嘅係公車！

總之，規矩係死嘅，人係生嘅，喺呢度可以話係將理論實踐~

當然啦，我深信，相對落後地方，呢度真係不算甚麼，但係呢度唔係落後地方呢~

漸漸習慣地道駕駛文化，有時仲融入埋佢哋嘅文化添......

到咗紙箱王，停車場爆滿，現場連等位都冇，有車嚟就要開車走，如此這般，兜咗三四個圈，最後返到嚟見到有人喺車上面，而且已經著咗車，相信都應該就走~

等呀等，等呀等，等咗五分鐘都未走，又見到有人由紙箱王走出嚟攞車，不過，成四五個人上咗車，又係冇開車，好彩嘅係，後面冇車嚟，否則明知等多陣就有位都要郁車俾人過~

最後，本身著咗車果咖車開車，咁我跟住佢行先可以用尾入，佢行行吓又停車，仲要入後波，我梗係唔敢繼續行~

我見佢冇郁車嘅意思，唔理喇，雖然俾佢頂住，個位變得好窄，我覺得都應該入到~

泊完之後，佢就倒車打橫停喺我前面 T 字型咁停，明顯佢係刻意讓個位俾我，而佢又未走得嘅~

我落車後就向佢表示謝意~

紙箱王入口~

 
時候都唔早，食咗嘢先再遊覽~

餐廳入面，視線範圍內，絕大部份物件都係用紙造嘅，包括檯檯凳凳都係~

 
我成日都覺得主題餐廳，食物質素一般都係普普通通，未必難食但亦通常唔會話好好食~

入到嚟自然都唔抱有咩期望，一望個 menu，得好少選擇，而且有限選擇入面有好一部份都唔係咁啱食~

我同屎塔都唔太喜歡食正餐時食啲以甜為主嘅菜式，亦一向唔太喜歡以生果嚟做食材嘅菜式，檸檬就例外，就因為咁，喺少選擇入面，起碼再有一半唔會揀~

最後揀咗：

普羅旺斯雞腿排

懷住冇期望嘅心情去食，真係算有驚喜，味道非常不錯！
 
酸辣檸檬蜜醬香魚排

呢個都幾好，很滿足嘅一餐！
 
飲品就揀咗百花蜜茶同蜂蜜綠茶，飲品呢，都係咁啦，想像到嘅味道~
 
食完嘢就走上樓上，參觀蜜蜂故事館~

館內以賣蜂蜜同其他副產品為主，冇咩特別~
 
館外有好多蜜蜂飛嚟飛去，佢哋個大本營就喺呢度~
 
睇完就落返地下，參觀吓個花園~

    
就咁睇，可能真係唔算有咩咁特別，不過諗吓個製造過程，我諗都相當花心思~

其他雜影~

 
睇夠離開時，比原定時間遲咗一個鐘，都唔緊要嘅，夜少少先上清境~

屎塔唔知道遲咗咁多，仲問我時間方面點樣，我話俾佢知遲咗一個鐘，佢驚訝地問做咩唔話佢知？

其實除非之後有啲非到不可嘅景點，否則我唔想趕頭趕命，咪睇夠先走囉~

下一站係「歐莉葉荷城堡」

呢個就係我同屎塔當日影婚照嘅場地~

婚照公司將每個場地都起咗自己嘅名，所以我哋本身係唔知呢度叫咩名嘅，亦由於拍攝當日係唔可以帶手機同相機，我哋只係靠記憶去記住呢個地方，之後先上網 search 返個確實位置~

由呢度去城堡，行經無數個街口，係咁轉右又轉左，複雜到不得了，就好似俾個 GPS 玩緊咁~

個人已經好鬼迷，真係想快啲脫離呢個狀況，好衰唔衰，絕大部份嘅燈位都係紅燈......

幾經辛苦，終於行到高速公路，一條好有熟悉感覺嘅高速公路，幾年前去日月潭就行過呢條公路~

一上咗呢條公路就爽囉，沿途一大段路都唔駛停，又唔多車，正！

到埗後已經係 1710，本來仲諗住嚟食英式下午茶，而家冇囉~

不過咁，嚟食下午茶可以話有少少自己逼自己去食嘅，NT$250 入場費當中，NT$200 係抵用券，唔用又好似好蝕咁~

最平果款英式下午茶都只係 NT$350，每人俾多 NT$150 就食到~

唉，蝕就蝕啦，鬼叫我哋咁遲先嚟到咩~

售票果個係一位大叔嚟，佢問我哋會唔會入餐廳食晚飯，知道唔入之後，一臉疑惑咁話俾我哋知，1800 會閂門，問我哋係咪仍然入去？

我哋當然話係啦，結果，原來咩都唔食，NT$150 就可以入場，真係唔知咁樣係賺咗定蝕咗~

阿大叔仲話，唔用餐的話，唔可以進入餐廳，只可以在外面走走~

距閂門仲有 45 分鐘，都夠時間行吓影吓相嘅~

入咗去之後，好自然，喺腦海入面會浮現返當時影婚照時嘅畫面~

同當時比較，現時係有啲唔同，不過改動過嘅地方唔算多~

可惜吖，今日天色已經唔好，仲要咁晏先到，現場一片灰灰朦朦~

 
差唔多六點喇，有啲唔捨得，喺門口徘徊咗幾分鐘先捨得走上車~

下一站係「清境小瑞士花園」

個天開始暗，上清境要一個多小時，無可避免要摸黑上山，我要小心啲~

沿路上去都冇乜車，一路平平安安冇事發生~

直至上到去一個 180 度嘅手臂彎......

話明係手臂彎，即係超盲彎，你根本就唔會知道彎後面會有啲咩~

天已經黑晒，街燈亦唔算得上係足夠，我慢慢咁行，左邊不停有車落山，突然有部小型貨車喺我嘅行車線向住我駛來！

呢一刻，我可以扭右，可以直撞，究竟我應該點做好呢？

現場好暗，根本睇唔清路況，扭右可能撞山或墮坑，唔扭唯有直撞，其實，邊度有咁多時間諗嘢，本能反應，路窄冇位走，千其唔好扭~

由於係手臂彎，大家車速都唔高，我深信撞到都唔會好嚴重，唯有盡我能力，死命踩實個 brake~

我揸得慢又上緊斜，好容易就踩停部車，踩停部車之後，部貨車就喺我身邊駛過，佢駛過我時，係彎芯兩線三車平排！

非常幸運，最後都冇撞到~

條友真係瘋狂，喺手臂彎嘅彎芯逆線扒頭，根本就係謀殺同自殺！

回過神來，繼續我哋嘅路程，希望一路順風，平平安安......

一路上一路上，去到一個分岔路時行錯路......

GPS 指示要靠左上，我就行咗右邊~

本來行錯路都冇咩好提，GPS 自然會俾條新路我哋，帶我哋去到目的地~

GPS 固然有咁做，不過佢帶咗我哋去一條不歸路......

過咗個分岔路，行咗都有一段路，GPS 指示在前方某處轉左，我哋跟住行，轉咗入一條非常斜嘅路，而且越入越黑，越入越窄！

呢個時候，倒後鏡同兩邊側鏡，同一塊黑色卡紙已經冇分別，後方視野只有漆黑，想安全倒後係冇可能嘅事~

唯有頂硬上，由於路面實在太斜，亦實在太窄，太大或者太細油都唔得，我要好好控制油門，慢慢攀扒上去~

路面越嚟越窄，窄得連揸部車仔轉彎都要偷位，但路面明明就係舖好嘅路，我唔覺得係一啲唔俾車行嘅路，唯有一路行一路判斷，反正而家要倒後絕對比向前難得多~

穿越咗叢林多個窄彎，亦見到有多面鏡，俾駕駛者睇清楚彎後嘅路，呢度除咗車頭燈嘅光，係完全冇其他光源，我祈求唔好有對頭車，遇到對頭車的話，我真係會投晒降~

好彩最後都有驚無險咁出返大街~

出咗大街，先發現自己全身肌肉崩緊，十幾度情況下仍然覺得好熱，我同屎塔緊張得連一張相都冇影過，如果剛才再加上落雨，我真係唔敢諗......

一路上都見到有人彎位扒頭，雖然都係危險，但起碼有時間俾我作出反應都冇問題，收一收好閒~

終於都平安到達目的地，泊好車就走入小瑞士花園~

關於小瑞士花園，有一樣措施，我真係覺得好貼心，就係如果你夜晚入場，憑票可以第二日朝免費入場，咁就可以欣賞到小瑞士花園嘅日與夜，唔需要掙扎夜晚定朝早入嚟先好~

距水舞秀表現仲有一段時間，就周圍行吓~

 
見時間差唔多，就搵定位坐低等水舞秀~

由於比原定時間遲咗到民宿，我哋就再打俾民宿，話佢知我哋要遲啲先到~

好嘞，終於等到水舞秀開始~

 
其中有一處好礙眼，就係最右邊果度壞咗唔識轉~

左邊箭咀係正常嘅，右邊箭咀係壞咗嘅~
 
呢種水舞秀，除非第一次睇啦，否則都唔會有太大驚喜~

原先以為入面會有餐廳，嚟到就梗係知冇啦，夜麻麻都唔知去邊度搵嘢食，最方便就係門口嘅紙箱王......

唔係嘛，又紙箱王？真係咁鍾意咩，鍾意到一日要食兩次......

夜麻麻，為求方便，紙箱王就紙箱王啦！

紙箱王門外攞設~

 
室內擺設~

 
呢度嘅紙箱王同大坑店不盡相同，貓行宮賣嘅嘢有唔同，而呢度間餐廳就有火鍋~

店員話冇晒飯，俾意大利麵介唔介意~

梗係唔介意啦！本身意大麵係要另外叫嘅，而家可以免費品嘗喎！

今次我哋揀咗：

荔枝蜜香蒜海蝦

今朝因為荔枝而冇揀到我最喜愛嘅蝦，原來都幾好食，蝦本身幾新鮮幾爽口，又夠大隻，如果冇咗啲甜味就更好~
 
御蜂酒燉牛腱腿

都幾好食，有牛味，不過就唔係好夠稔~
 
呢度嘅食物同大坑店亦有少少出入~

沙律有沙律醬，唔知係咪今朝果度唔記得俾嘞~

甜品就有煉奶，又唔知係咪今朝果度唔記得俾嘞~

食完嘢就出發去民宿，沿途上去都好多雲，冇咩星星，睇嚟我哋間觀星房都發揮唔到佢嘅作用~

行行吓，突然有啲嘢喺擋風玻璃度跌落嚟，原來係個 GPS，整返上去行唔夠十秒又再跌過，睇嚟個吸盤應該老化咗，應該都唔可以再吸得穩喇，唯有靠屎塔用手固定佢啦~

聽晚仲要揸四個鐘車落高雄，都唔知點算，唉，到時先算~

去到民宿，淨返一個車位，有位小姐走過嚟，估計係電話中嘅接頭人，個位有啲難泊，搞完一輪，果位小姐問明我哋係邊個，有點錯愕咁話：原來你們自己開車上來！

其實我聽佢咁講都有啲錯愕，黃慶果園都幾多香港人幫趁，而我亦深信有好一部份遊清境嘅香港人會選擇自駕，點都好啦，聽過就算~

跟住佢就話我知，我哋有專屬車位，再指示我哋點去，沿途有條又黑又窄嘅斜路，經過先前嘅訓練，濕濕碎啦~

泊好車後就去搞 check-in 手續，其間我哋問起接載事宜，因為我哋知道民宿有免費接載服務，諗住聽日喺青青草原北票口泊完車一路向下走，玩到小瑞士花園，再請民宿嚟接我哋去返停車場攞車~

點知對方有反意見，話我哋自己開車的話，最好泊南票口，無論向上定向下走都唔會行好遠~

又話步步高昇同櫻花步道冇咩睇，可以唔去，玩夠就返停車場開車落小瑞士花園~

的確，如果唔去步步高昇同櫻花步道，佢個方案係最好嘅，不過，究竟佢係唔想接我哋，定係真心提出意見呢？

以佢十分誠懇嘅態度，我哋採納咗佢嘅意見，我哋相信佢係真心提出意見嘅~

當佢知道我哋會去青青草原時，仲話經佢買每人可以平 NT$40，我哋即時就買咗兩張~

入到房有四片梨，好清甜~
 
原來上到嚟就會見到星，雖不如我想像般多，但都好滿足喇，我睇到唔捨得合上眼，不過，十二點喇，真係要瞓喇~